OZE 11 - WE NU GALE 1995

Gale kɔ̃a gɛnɛ winɔ 'da a

¹ NWA tɔ̃a na: “'Da fala nu kpala obe Israɛlɛ ndua zi nɛ ni, nɛ mi kɔ̃a zi gɛnɛ wa, nɛ mi sa li wa na: Obenɔ 'da mi. Mi sa zi mɔ hã wa ngɔ nù Ezipeto i na, wa kulu ngɔ, hã wa si.

² Nɛ gɛnɛ kɔ mi zi tɛ sa mɔ hã wa ni, nɛ nde wa yu mi yu fai. Wa nɛa, nɛ wa gbɛ sa'de hã Bala, nɛ wa dɔ fũ yɔmbɔ we dɔnggɔ do okpikima.

³ Ĩ na, mi a mi 'bolo zi obe Israɛlɛ dɛ kɔ̃ mi, nɛ mi 'bia nu kɔ̃ wa, nɛ mi be nɛ nɔ hã wa. Nɛ nde wa kɔ̃̀ kɛ na, mi zɔ mɔ tɛ wa gɔ.

⁴ Mi kpia zi ti wa do dia zã, nɛ mi kɔ̃ zi gɛnɛ wa wena. Mi ba wa dɛ ngɔ gɛlɛ mi, nɛ mi dɛ nyɔngɔmɔ dɛ nu wa.

⁵ “Ɔ nɛ kɛ wa bɛ̃a we kpolo tɛ wa dɛ 'da mi ni, wa yú sɛ dɛ ngɔ nù Ezipeto gɔ. Nɛ nde nwa ngɔ nù Asiri a e sɛ mbula ngɔ wa.

⁶ Nɛ owi sɛnɛ wa, wa bi sɛ lenɔ 'da wa, nɛ wa 'danga ongbo nu nɛ. Nɛ wa kumu sɛ owinɔ 'da mi, we duzu kɛ wa nɛa 'do linggamɔ kɛ ma dia tɛ wa wele nɛ ni.

⁷ Owinɔ 'da mi wa bɛ̃a we dɛ olo nu mi fai. Ma kɛ wa bi sɛ tɛ wa ti dĩ tole ogele winɔ wa e sɛ zu wa, nɛ ma isi wa dɛ nù ni. Nɛ nde wele kpo fó sɛ ma zu wa gɔ.

⁸ “Aa nɛ, obe Israɛlɛ, mi nɛ bɛ̃ gɛnɛ nɛ we ge nde? Mi nɛ la nɛ we ge nde? Mi wè tɛ zɛlɛ tɛ nɛ, nɛ mi kumu nɛ, ɔ nɛ kɛ mi dɛa zi do owi kɔ le Adma do Sɛbɔimɛ ni gɔ. Mi dɛ mɔ na mɛ ni, nɛ ma yɛkɛ sɛ sila mi wena, nɛ ma hã sɛ 'bako hã mi.

⁹ Mi hã́ sɛ etumbu hã nɛ do 'da nɔ̃lɔ̃ zã 'da mi gɔ, mi kúmú sɛ 'bɔ nɛ, obe Israɛlɛ gɔ, we kɛ mi a Gale, mi a wele gɔ. Mi a Gale santo 'da nɛ, obe Israɛlɛ, mi tɛ́ sɛ dɛ 'da nɛ do nɔ̃lɔ̃ zã gɔ.”

¹⁰ “Mi NWA, mi ngbu sɛ dã nɛ́ gbɔgbɔ ni, nɛ owinɔ 'da mi wa kpe sɛ dɛ 'do mi. Wa yolo sɛ kɔlɔ 'duli si 'biti gɛ̃a wese, nɛ wa wɛlɛ tɛ wa dɛ 'da mi nga.

¹¹ Wa yolo sɛ ngɔ nù Ezipeto, nɛ wa si dɔ̃ dɔ̃ nɛ́ ongolo ni. Nɛ wa yolo ngɔ nù Asiri, nɛ wa bũlũ, 1 nɛ wa si ɔ nɛ ogbakulĩ ni. Nɛ mi gese sɛ 'bɔ wa dɛ ngɔ nùi 'da wa. Mi NWA, mi tɔ̃a ni.”