OZE 10 - WE NU GALE 1995

¹ Obe Israɛlɛ wa ɔ zi nɛ te vinɔ kɛ ma wala de wena ni. Nɛ nde ɔ nɛ kɛ wa kpa zi odia mɔ dɛ dati wena ni, nɛ wa dɛa tɛ mɛ 'bɔ gbagalanɔ dɔ wena. Nɛ ɔ nɛ kɛ nùi 'da wa ko zi kpalɛ wena ni, nɛ wa 'dafa tɛ mɛ 'bɔ tanɔ kɛ wa ndɛngɛlɛ dɛ ngɔ ngbɛ ɛ we dɔnggɔ do ogalenɔ ni de wena.

² Sila wa ma 'danga wena, ma kɛ wa zɔ sɛ ngamɔ olo 'dã mɛnɔ wa dɛa ni. Gale a gbini sɛ gbagalanɔ 'da wa, nɛ a 'danga sɛ tanɔ wa ndɛngɛlɛ dɛ ngɔ ngbɛ ɛ we dɔnggɔ ma ni.

³ Owinɔ ni wa tɔ̃ na: “Lɛ do nwa ngɔ lɛ bina, we kɛ lɛ dɛ̃ zi kili NWA Gale gɔ. Kɔ nwa sɔ 'bɔ boe, nɛ mɛ a nɛ dɛ sɔ hã lɛ ni a ge nde?”

⁴ Owinɔ ni wa kpo ombulu wena, nɛ nde wa dɛ́ ma gɔ. Nɛ wa kana tɛ wa do bɛlɛ, nɛ wa gba tɔkɔ kɛ ma do gulu nɛ bina ni do ogele winɔ. Bɛlɛ gã kɔ wa gbaa, nɛ ma ɔ nɛ gbolo kɛ ma hɔ kɔ fɔ ni.

⁵ Owi kɔ le Samaria, wa dɛ sɛ kili, nɛ wa zɛ nu wa do 'bako, we kɛ fo sɛ 'bɔ be ngɔmbɔ mɔ mbali we dɔnggɔ ma tɛ Betɛlɛ i bina. Nɛ owi Samaria do onganganɔ 'da wa kɛ wa dɔnggɔ kpikima ni, wa he sɛ kɔ̃a 'bako, nɛ wa bi sɛ tɛ wa, we kɛ ngɔmbɔ mɔ mbali wa dula ni sɛ 'bɔ do dɔlɔ li bina.

⁶ Mba gɔ, Owele wa ba sɛ ngɔmbɛ ni, nɛ wa la sɛ do ma, nɛ wa 'dɔlɔ ma hã gã nwa ngɔ nù Asiri. Nɛ Oisraɛlɛ wa e sɛ kɔ̃ wa nu wa do sape, we duzu 'dã linggamɛ kɛ wa nɛa 'do nɛ ni.

⁷ Le Samaria 'danga ia. Owele wa ba nwa 'da wa la do a fai, ɔ nɛ dɔ te kɛ wa da 'dɔ lì, nɛ ma fo si gɔtɔ fai ni.

⁸ Ngɔ kala Bɛtɛ-Avɛnɛ, tɛ fala wa dɔnggɔ do kpikimanɔ ni, ma 'danga sɛ vɛ̃. Nɛ owɔkɔsɔ do gbakɔnda ma di'bili sɛ ngɔ gbagalanɔ 'da wa. Nɛ do fala nɛ ni, Oisraɛlɛ wa tɔ̃ sɛ hã kalanɔ na: “Aa kala gɛ, mɔ gú dɛ ngɔ lɛ, hã mɔ usu lɛ!”

NWA a hã sɛ etumbu hã Oisraɛlɛ olo 'dã mɛnɔ 'da wa

⁹ NWA tɔ̃a na: “Ndo do 'da fala oyaa obe Israɛlɛ wa dɛa zi 'dã mɔ dɛ 'da mi tɛ Gibea i ni, gbaa we hɔ sɔɛ gɛ, obe zã wa wa là fala dɛ 'dã mɔ dɛ 'da mi gɔ. Ma kɛ bolo ma gbanga sɛ wa dɛ kɔ le Gibea ni ngboo.

¹⁰ Mi bi sɛ o'dã winɔ ni, nɛ mi hã sɛ etumbu hã wa. Nɛ ogele nu kɔnggɔnɔ wa mba sɛ ngba wa, nɛ wa tɛ we bi wa olo gba gili 'dã mɛnɔ 'da wa.

¹¹ “Obe Israɛlɛ wa ɔ zi nɛ be zagbãlã ngɔmbɔ, kɛ wa bia dɛa to ma kpalɛ hã a de wena, nɛ a dɛ ma do yangga ni. Kɔ mi nɛa we zɔ ngawi 'da a, nɛ mi ba te ngbangboe kɛ wa ɛnzɛ ngɔ gɛlɛ sa'denɔ, nɛ wa dɛ do toe ni, nɛ mi ɛnzɛ dɛ ngɔ gɛlɛ a. Mi ia Oyuda tɛ nga dɛa to na, wa 'bili fɔ, nɛ Oisraɛlɛ wa 'dafa ngɔ nɛ.

¹² Mi tɔ̃a na: Nɛ dɛ̃ bɔlɔ zu dɛa mɔ, nɛ mi be sɛ dia zã 'da mi hã nɛ fai. Nɛ kpóló dɛa to tɛ nɛ, nɛ 'dã mɛnɔ fo tɛ̃ ɛ kɔ sila nɛ do'do, ɔ nɛ kɛ wa fo do 'dã wɔkɔsɔ kɔ fɔ ni. Ngba soe kpolo tɛ nɛ dɛ 'da mi ma wia ia. Kɔ nɛ dɛ ni, nɛ mi tɛ sɛ, nɛ mi sulu wila nui 'da mi dɛ ngɔ nɛ.

¹³ Nɛ nde gɛnɛ kɔ mi tɔ̃a na mɛ ni, nɛ nɛ dɛa 'dã mɔ, nɛ nɛ kpa si olo nɛ. Nɛ 'bi 'dã wala te olo bɛlɛ 'da nɛ, nɛ nɛ nyɔngɔ ma. “Aa nɛ, obe Israɛlɛ, nɛ ia sila nɛ ngɔ ongilingilinɔ do ogba gili sodanɔ 'da nɛ.

¹⁴ Ma kɛ bolo ma bi sɛ nɛ, nɛ Owi sɛnɛ nɛ, wa 'danga sɛ olenɔ 'da nɛ kɛ nɛ dɛa gba ngbonɔ nu nɛ zĩ takpa ni. Nɛ ma ɔ sɛ nɛ 'da fala nwa Salmanɛ 'danga zi do le Bɛtɛ-Arbɛlɛ li bolo, nɛ a mbɔtɔ zi wukonɔ do benɔ kɔ le ni ni.

¹⁵ Ki ni a tɛlɛ tɛ mɛ ma nɛ dɛ nɛ, Owi Betɛlɛ, olo gã 'dã mɛnɔ nɛ dɛa gɛ a ni. Nɛ 'da fala bole ma ndo sɛ bi nɛ ni, nɛ wa gbɛ sɛ nwa ngɔ nɛ, obe Israɛlɛ.”