OZE 1 - WE NU GALE 1995

¹ 'Buki gɛ ma tɔ̃ lɛnggɛnɔ kɛ NWA ia zi dɛ nu Oze, be 'da Beri na, a tɔ̃ ma ni. A tɔ̃a ma do 'da fala Yeroboamɛ, be 'da Yoasi zi a nwa ngɔ nù Israɛlɛ, nɛ Oziasi, Yotamɛ, Ahazɛ do Ezekiasi wa dɛ zi to nwa 'da wa dɛ 'do ngba wa tɛ ngɔ nù Yuda ni.

Oze ba wuko ndumba, nɛ a ko obe do a

² 'Da fala NWA ndua nyanga wele we hã obe Israɛlɛ do wala 'da Oze ni, nɛ a tɔ̃ hã Oze na: “Mɔ nɛ́ hã mɔ ba wuko ndumba, nɛ mɔ ko obe do a. Nɛ obenɔ ni, wa dɛ sɛ 'bɔ ndumba nɛ́ naa wa ni. Ki ni, ma be sɛ mɛ kɛ owinɔ ngɔ nùi gɛ wa dɛa hã mi ni. Wa siki 'do wa hã mi, nɛ wa nɛ 'do gele galenɔ, nɛ wa ɔ li mi nɛ owuko ndumba ni.”

³ Nɛ Oze nɛa, nɛ a ba wuko li a a Gɔmɛrɛ, be 'da Diblaimɛ. Nɛ Gɔmɛrɛ ba zã, nɛ a ko bulu be hã Oze.

⁴ Nɛ NWA tɔ̃ hã Oze na: “Mɔ é li be na Yizreɛlɛ, we kɛ mi kɔlɔ hã etumbu hã nu fɛlɛ Yehu we 'dã mɛ a dɛa do Yizreɛlɛ ni ia. Mi dɛ sɛ na, dɛa to nwa 'da onu fɛlɛ Yehu ngɔ nù Israɛlɛ ma Sɔkpɔ.

⁵ Nɛ mi kumu sɛ ogili soda Israɛlɛ li bolo tɛ ngɔ mbɛ nù Yizreɛlɛ i.”

⁶ 'Do nɛ, nɛ Gɔmɛrɛ ba mbé zã, nɛ a ko boko be. Nɛ NWA tɔ̃ hã Oze na: “Mɔ é li be na Sɛnami, we kɛ mi kɔ̃̀ 'bɔ gɛnɛ obe Israɛlɛ gɔ. Wɔ tɛ wa ia li sila mi do'do.

⁷ Nɛ nde mi 'bana fala kɔ̃ gɛnɛ obe Yuda. Mi NWA Gale 'da wa, mi kpasa sɛ wa. Nɛ nde mi kpásá sɛ wa do wala 'da bolo, tabi do nzabele, tabi do du kɔya, tabi do ombalata, tabi do Owi kũ mbalata gɔ.”

⁸ 'Do kɛ Sɛnami gɔnɔ bele ni, nɛ Gɔmɛrɛ ba 'bɔ zã, nɛ a ko bulu be.

⁹ Nɛ NWA tɔ̃ hã Oze na: “Mɔ é li be na, Gelewi we kɛ nɛ, obe Israɛlɛ, nɛ 'bɔ a owinɔ 'da mi gɔ, nɛ mi 'bɔ a Gale 'da nɛ gɔ.”