Owi kpe dati 9 - WE NU GALE 1995

Abimelɛkɛ hɔa wi kpe dati obe Israɛlɛ

¹ Abimelɛkɛ, be 'da Zedeoni, nɛa tɛ Sikɛmɛ i we zɔ oyamba a, do nu fɛlɛ kula 'da naa a, nɛ a tɔ̃ hã wa na:

² “Nɛ nɛ́, hã nɛ aka okumu lenɔ, hã wa tɔ̃ linggamɛ zã wa ni hã nɛ. Tabi wa kɔ̃a na obenɔ 'da Zedeoni 'bu wa sambo ni, wa hɔ owi kpe dati wa, tabi wele kpo hã a hɔ wi kpe dati wa nde? Nɛ nde nɛ ĩ do dia nɛ na, mi a kili tɛ nɛ.”

³ Oyamba Abimelɛkɛ wa zila ní, nɛ wa nɛ we tɔ̃ we nɛ hã okumu le Sikɛmɛ. Nɛ okumunɔ ni wa kɔ na, Abimelɛkɛ hɔ wi kpe dati lo, we duzu kɛ a wi kɔ nu fɛlɛ kula 'da wa.

⁴ Nɛ wa kala mbili fɛ̃a mɔ bolo 'bu nɛ sambo kɔ tɔa 'da gale 'da wa Bala-Bɛritɛ, nɛ wa hã ma hã a. Nɛ Abimelɛkɛ kala mbili ni, nɛ a hã ma hã oyia wi, do Owi dɛ mbuma na, wa si 'do ɛ.

⁵ Nɛ a la do wa dɛ nu tɔa 'da baa a tɛ Ofra i, nɛ a gbɛ onya a, benɔ 'da Zedeoni 'bu wa sambo ni vɛ̃, dɛ ngɔ kpangba ta kpo. Nɛ nde tati a Yotamɛ, tala hɔ dɛ 'do wa vɛ̃ ni, hã a kpasa zi, we kɛ a usu zi tɛ̃ a usu.

⁶ Nɛ 'do ki ni, nɛ okumu le Sikɛmɛ do owinɔ kɔ le Bɛtɛ-Milo vɛ̃, wa mba li ngba wa, nɛ wa nɛ ti te sɛnɛ tɛ Sikɛmɛ, kɛ ma kɛ zã gã ta kɛ wa zĩ ma ni. Nɛ wa e Abimelɛkɛ do wi kpe dati wa dɛ di ni.

Yotamɛ tɔ̃a gba wia we

⁷ Yotamɛ zila ní, nɛ a kũ dɛ zu kala Garizimɛ, nɛ a he mɔ dɛ ngɔ na: “Aa nɛ, Owi Sikɛmɛ, nɛ kɔ̃ na Gale zele nɛ, nɛ nɛ zele mi sɛ!

⁸ Mbe 'da fala zɛ́ kpo, nɛ ote wa kɔ̃a zi we saka wi kpe dati wa. Nɛ wa tɔ̃ hã te olivɛ na: ‘Mɔ dúngú nwa ngɔ lɛ!’

⁹ Nɛ te olivɛ bɛ̃, nɛ a na: ‘Nɛ lengge na, mi la sɛ fala dɛ nɔɛ kɛ ma de tɛ ogalenɔ do owinɔ nɛ ge nde ni, we gbini tɛ mi we dungu nwa ngɔ nɛ nde?’

¹⁰ Nɛ tenɔ wa tɔ̃ 'bɔ hã te figɛ na: ‘Mɔ tɛ́, hã mɔ dungu nwa ngɔ lɛ!’

¹¹ Nɛ te figɛ bɛ̃, nɛ a na: ‘Nɛ lengge na, mi la sɛ fala ko dia wala tenɔ kɛ ma ɛ̃lɛ̃ nu winɔ ndirr ni, we gbini tɛ mi we dungu nwa ngɔ nɛ nde?’

¹² Nɛ tenɔ wa tɔ̃ 'bɔ hã te vinɔ na: ‘Mɔ tɛ́, hã mɔ dungu nwa ngɔ lɛ!’

¹³ Nɛ te vinɔ bɛ̃, nɛ a na: ‘Nɛ lengge na, mi la sɛ fala dɛ dɔ̃ɛ kɛ ma hã yangga hã ogalenɔ do owinɔ ni, we gbini tɛ mi we dungu nwa ngɔ nɛ nde?’

¹⁴ Nɛ do Sɔkpɔ nɛ, nɛ otenɔ vɛ̃ wa mba ngba wa, nɛ wa tɔ̃ hã te tɛ̃ na: ‘Mɔ tɛ́, hã mɔ dungu nwa ngɔ lɛ!’

¹⁵ Nɛ te tɛ̃ gese na: ‘Fala kɛ nɛ kɔ̃ we e mi do nwa ngɔ nɛ kpaa nde, nɛ nɛ tɛ́, hã nɛ usu tɛ nɛ ti gɔ̃lɔ̃ mi. Kɔ fala kɛ nɛ dɛ̃ ni gɔ, nɛ nyɛa we ma yolo sɛ kɔ tɛ̃nɔ tɛ mi gɛ, nɛ ma bɛlɛ te sɛdrɛnɔ tɛ Libanɛ.’ ”

¹⁶ Nɛ Yotamɛ tɔ̃ 'bɔ na: “Aa nɛ, Owi Sikɛmɛ, nɛ lengge na, nɛ kɛ nɛ ia Abimelɛkɛ do nwa 'da nɛ ni, nɛ dɛa gbãlã we dɛa mɔ nde? Nɛ nɛ lingga mbe do Zedeoni, do nu fɛlɛ kula 'da a, we si olo de mɛnɔ kɛ a dɛa hã nɛ ni nde?

¹⁷ Nɛ ĩ na, baa mi a bi zi bolo zu nɛ, nɛ a hɔa zi fɛna fio we fo nɛ ti kɔ̃ Omadianɛ.

¹⁸ Kɔ nɛ zɔ̀, nɛ siki li nɛ dɛ tɛ nu fɛlɛ kula 'da a, nɛ nɛ gbɛ obenɔ 'da a 'bu wa sambo ni vɛ̃ dɛ ngɔ kpangba ta kpo! Nɛ nɛ e Abimelɛkɛ, be kɛ a kua a do wuko wi dɛa to 'da a ni do nwa ngɔ nɛ, we duzu kɛ a kɔ nu fɛlɛ kula 'da nɛ.

¹⁹ Kɔ sɔɛ gɛ, fala kɛ nɛ lengge na, mɛ nɛ dɛa hã Zedeoni do nu fɛlɛ kula 'da a ni, mɛ a gbãlã we dɛa mɔ nde, nɛ nɛ dɛ́ yangga do Abimelɛkɛ, nɛ Abimelɛkɛ dɛ́ tɛ mɛ 'bɔ yangga do nɛ.

²⁰ Hã ni gɔ, nɛ e kɔ nyɛa we hɔ kɔ Abimelɛkɛ nɛ ma bɛlɛ nɛ, owi Sikɛmɛ do Bɛtɛ-Milo vɛ̃! Nɛ e kɔ we hɔ kɔ nɛ, Owi Sikɛmɛ do Bɛtɛ-Milo, nɛ ma bɛlɛ tɛ mɛ 'bɔ Abimelɛkɛ!”

²¹ 'Do kɛ Yotamɛ tɔa we ni do'do, nɛ a yu, nɛ a usu tɛ̃ a kɔ le Bɛera. Mba gɔ, a dɛa kili nya a Abimelɛkɛ.

Owi Sikɛmɛ wa bɛ̃a gɛnɛ Abimelɛkɛ

²² Abimelɛkɛ kpia dati obe Israɛlɛ 'do sabɛlɛ talɛ.

²³ Nɛ 'do sabɛlɛnɔ talɛ ni, nɛ Gale fi sɛnɛmɔ sanga tɛ ngba Abimelɛkɛ do owi Sikɛmɛ. Nɛ Owi Sikɛmɛ wa dɛ nga zu dɛ tɛ̃ a.

²⁴ Na mɛ ni, wa vɛ̃ wa kpa si olo 'dã mɛ 'da wa: Abimelɛkɛ, kpa si olo kɛ a gbɛa onya a, benɔ 'da Zedeoni 'bu wa sambo ni. Nɛ owi Sikɛmɛ, wa kpa si olo kɛ wa kɔ̃a zi gɛnɛ 'dã mɛ Abimelɛkɛ dɛa, nɛ wa yolo 'do a tɛ 'da fala gbɛ onya a ni.

²⁵ Owi Sikɛmɛ wa tumba owi zũ we usu tɛ wa tɛ ngɔ kala dɔ̃ɔ do le, takɔ wa kala mɛnɔ kɔ owinɔ wa la wala do di ni. Wa dɛa ní we 'danga dɔ̃lɔ̃ li 'da Abimelɛkɛ. Nɛ Abimelɛkɛ zila we nɛ.

²⁶ Mbe ngba soe kpo, nɛ wele kpo li a a Gala, be 'da Ebɛdɛ, a hɔ tɛ Sikɛmɛ do onya a.

²⁷ Nɛ owinɔ kɔ le ni wa kɔ̃ gɛnɛ a. Wa nɛa kɔ fɔ vinɔnɔ 'da wa i, nɛ wa 'bi wala nɛ, nɛ wa kpĩlĩ dɔ̃ nɛ we dɛ do mɔ dɔ. Nɛ wa nɛa kɔ tɔa gale 'da wa, nɛ wa dɛ mɔ dɔɛ ni i mɔ, nɛ wa tɔ̃ 'dã zu li Abimelɛkɛ.

²⁸ Nɛ Gala aka wa na: “Tɛlɛ tɛ lɛ Owi Sikɛmɛ gɛ ɔ nɛ nde? Gulu kɛ lɛ kɔ̃a gɛnɛ Abimelɛkɛ na, a dungu nwa ngɔ lɛ we ge nde? A a wio nde? A yula do nde? A a be 'da Zedeoni gɔ nde? A ia Zebulɛ do gã wi ngɔ le 'da lɛ. Nɛ nde yaa lɛ ngboo kɛ a dɛa le Sikɛmɛ gɛ, wi a Hamɔrɛ. Hã ma wè na, lɛ dungu ti mbula 'da Abimelɛkɛ gɔ.

²⁹ Ɔ do kɛ wa e sɔ mi do wi zɔ mɔ tɛ Owi Sikɛmɛ, nɛ mi fo sɔ Abimelɛkɛ tɛ to nwa 'da a do'do. Nɛ mi tɔ̃ sɔ hã a na, a kala ombé wele dɛ ngɔ osodanɔ 'da a, hã lɛ bi do wa.”

³⁰ 'Da fala kɛ Zebulɛ, gã wi ngɔ le, zila we kɛ Gala tɔ̃a ma ni, nɛ zã a nɔ̃lɔ̃.

³¹ Nɛ a tombo owi to do usu nɛ kɔ le Aruma i hã Abimelɛkɛ na: “Mɔ zɔ̃, Gala, be 'da Ebɛdɛ hɔa tɛ Sikɛmɛ gɛ do onya a, hã wa tɛ 'danga sila winɔ dɛ tɛ mɔ.

³² Kɔ ma wia na, mɔ tɛ do owinɔ 'da mɔ tũi gɛ, hã nɛ usu tɛ nɛ dɛ kɔ fɔnɔ gɛ.

³³ Nɛ bindɛ, nɛ nɛ kulu ngɔ do sanga titole belee, nɛ nɛ tɛ we bi le. Kɔ fala kɛ Gala do owinɔ 'da a, wa nɛ sɛ we hɔ kɔ le dɛ nza ni, nɛ nɛ dɛ wa nɛ́ kɛ ma wia ni.”

³⁴ Abimelɛkɛ nɛa we zele ní, nɛ a gɔnɔ sanga winɔ 'da a nalɛ, nɛ wa la do tũi ni, nɛ wa usu tɛ wa tɛ kɔ fɔnɔ dɔ̃ɔ do le Sikɛmɛ ni.

³⁵ Gala nɛa we hɔ nza, nɛ a 'bana dɛ tɛ nu ngbo le ni, nɛ Abimelɛkɛ kulu ngɔ do owinɔ 'da a, nɛ wa hɔ nza tɛ fala kɛ wa usu nɛ ni.

³⁶ Gala nɛa we zɔ wa, nɛ a tɔ̃ hã Zebulɛ na: “Mɔ zɔ́, Owele wa a wa zĩlĩ kalanɔ gɛ!” Nɛ Zebulɛ gese na: “Ma a ni gɔ! Mɛ a Owele gɔ, nɛ nde mɛ a gɔlɔ kalanɔ iko.”

³⁷ Nɛ Gala ba kafi nɛ, nɛ a tɔ̃ na: “Mɛ a gɔlɔ kalanɔ gɔ, nɛ nde mɛ a Owele, hã wa zĩlĩ kala do kɛ gbogbo gɛ. Hã mɔ zɔ́, ombe 'bɔ owinɔ ni wa a wa hɔ do wala ti te sɛnɛ 'da wi dɛ sɔ̃nɔ gɛ.”

³⁸ Nɛ Zebulɛ gese na: “Mɔ wila zi odia lɛnggɛnɔ wena. Mɔ tɔ́a zi hã lɛ na, Abimelɛkɛ gɛ a wio nde na, a dungu nwa ngɔ lɛ? Kɔ mɔ zɔ́, owinɔ kɛ mɔ zɔa zi wa yala iko, nɛ mɔ tɔ̃ zi 'dã zu li wa ni, wa hɔa ia. Kɔ mɔ nɛ wá, hã mɔ bí do wa.”

³⁹ Nɛ Gala kpe dati Owi Sikɛmɛ, nɛ wa hɔ nza kɔ le, nɛ wa ma ngɔ bi Abimelɛkɛ.

⁴⁰ Nɛ Abimelɛkɛ nɛa ngɔ wa, nɛ Gala yu, nɛ Abimelɛkɛ ndaka 'do a. Nɛ nde gili Owi Sikɛmɛ wena wa kpa gã dani, nɛ wa ala nù dati kɛ na wa hɔ nu ngbo le i ni.

⁴¹ Nɛ Abimelɛkɛ kpula tɛ̃ a dɛ Aruma i. Nɛ Zebulɛ ndaka Gala do onya a kɔ le Sikɛmɛ ni vɛ̃, nɛ a bɛ̃ na, wa tɛ kpòlò 'bɔ tɛ wa mbé nɛ dɛ di ni gɔ.

⁴² Fala sa 'do là ni, nɛ Owi Sikɛmɛ wa fa we nɛ tɛ kɔ fɔnɔ 'da wa i. Nɛ Abimelɛkɛ zele we nɛ.

⁴³ Nɛ a gɔnɔ sanga owinɔ 'da a talɛ, nɛ wa usu tɛ wa tɛ kɔ fɔnɔ i. Kɔ 'da fala kɛ wa zɔa owi Sikɛmɛ tɛ hɔ nza kɔ le ni, nɛ wa kulu ngɔ, nɛ wa yu dɛ 'da wa i we gbɛ wa.

⁴⁴ Nɛ Abimelɛkɛ nɛa do gili winɔ wa do a ni dɛ nu ngbo le i, nɛ a ba ma. Nɛ tala ngɔ gili winɔ bɔa ni, wa bi winɔ tɛ sa fɔnɔ 'da wa i, nɛ wa gbɛ wa vɛ̃.

⁴⁵ Abimelɛkɛ do owinɔ 'da a, wa bi le, yolo titole gbaa tũ, nɛ wa ba ma. Nɛ wa gbɛ winɔ kɔ nɛ ni, nɛ wa 'danga le vɛ̃. Nɛ wa so tɔ̃, nɛ wa pɛsɛ ma do olo tɔanɔ 'da wa vɛ̃.

⁴⁶ Nɛ Owi Migdalɛ-Sikɛmɛ wa zila we nɛ, nɛ wa yu, nɛ wa usu tɛ wa kɔ 'bili tɔanɔ kɛ wa 'dafa ma ti tɔa 'da gale 'da wa Bala-Bɛritɛ ni.

⁴⁷ Nɛ ombe wele wa tɔ̃ we nɛ hã Abimelɛkɛ na, winɔ wa mba ngba wa, nɛ wa usu tɛ wa fala ni.

⁴⁸ Nɛ Abimelɛkɛ nɛa ngɔ kala Salmoni i do owinɔ 'da a, nɛ a ba kpɛnɛmɔ, nɛ a 'bili te, nɛ a zɛ ma ngɔ 'baka a. Nɛ a ba nu a hã winɔ 'da a na, wa dɛ́ tɛ mɛ 'bɔ nɛ́ kɛ ɛ dɛa ni, nɛ wa dɛ́ ma dɔ̃ dɔ̃.

⁴⁹ Nɛ wele do wele 'bili te, ɔ nɛ kɛ Abimelɛkɛ tɔ̃a ni, nɛ wa kpe dɛ 'do a. Wa hɔa tɛ tɔa fala kɛ owi Migdalɛ-Sikɛmɛ wa usu kɔ nɛ ni, nɛ wa ná tenɔ ni vɛ̃ dɛ nu nɛ, nɛ wa fi we se'de. Nɛ we ni bɛlɛ winɔ kɔ nɛ ni vɛ̃. Na mɛ ni, nɛ owi Migdalɛ-Sikɛmɛ wa fia vɛ̃. We mba wi wilinɔ do owukonɔ kɛ wa fia ni, nɛ dɛlɛ wa vɛ̃ kɔla zi dɔ̃ɔ do Owele koto kpo.

Abimelɛkɛ fia

⁵⁰ Nɛ Abimelɛkɛ kulu ngɔ di ni do owinɔ 'da a, nɛ wa la dɛ tɛ le Tebɛsi. Nɛ wa bi le ni, nɛ wa ba ma.

⁵¹ Nɛ nde dɛ gbogbo le ni, wa dɛa zi ngala tɔa gã wena, nɛ owi wili do owuko, do ogã winɔ kɔ le ni vɛ̃, wa yu zi, nɛ wa usu tɛ wa dɛ kɔ nɛ, nɛ wa kpe nu nɛ, nɛ wa kũ dɛ zu tɔa ngɔ i.

⁵² Nɛ Abimelɛkɛ nɛa we bi ngala tɔa ni, kɔ a nɛ kɔlɔ do nu nɛ we fi we tɛ nɛ,

⁵³ nɛ mbe wuko kpo ba gba gbɛlɛ kili ta, nɛ a lo zu Abimelɛkɛ, nɛ ta ni o zu a.

⁵⁴ Nɛ Abimelɛkɛ sa mɔ hã be zagbãlã kɛ a 'be mɔ bi bole 'da a ni, nɛ a ba nu a hã a na: “Mɔ bá du kɔya 'da mɔ, hã mɔ dala do 'da mi, da dɛ kɔ owinɔ wa tɔ̃ sɛ na, mɛ a wuko hã a gbɛa mi gɔ.” Nɛ be zagbãlã ni ba du kɔya, nɛ a dumu Abimelɛkɛ, nɛ a gbɛ a.

⁵⁵ Nɛ fala kɛ obe Israɛlɛ wa nɛa we zɔ na a fia ni, nɛ wa kpolo tɛ wa vɛ̃, nɛ wele do wele si dɛ nu tɔa 'da ɛ.

⁵⁶ Na mɛ ni, Gale si ku'da 'dã mɛ kɛ Abimelɛkɛ dɛa ma dɛ 'da baa a, nɛ a gbɛa onya a 'bu wa sambo ni hã a.

⁵⁷ Nɛ Gale hã zi 'bɔ etumbu hã owi Sikɛmɛ, we duzu 'dã mɛnɔ vɛ̃ wa dɛa ni. Na mɛ ni, ofɔmbanɔ kɛ Yotamɛ fɔmba zi do wa ni, ma dɛa tɛ̃ ɛ.