Owi kpe dati 7 - WE NU GALE 1995

Zedeoni bi do Omadianɛ

¹ 'Da fala kpo, nɛ Zedeoni, kɛ mbe li a a Yɛrubalɛ ni, a kulu ngɔ do titole belee do osodanɔ 'da a, nɛ wa nɛ, nɛ wa 'dafa fala ɔi 'da wa dɔ̃ɔ do zu lì Harɔdɛ. Do ngba soe ni, nɛ Omadianɛ wa 'dafa tɛ mɛ 'bɔ fala ɔi 'da wa dɛ kɔ gbangɔlɛ̃ tɛ nyanga kala More. Fala ni, ma nyɛlɛ do zu lì Harɔdɛ gɔ. Mɔ yolo di ni, nɛ nde kala More do si gbãlã ngɔ.

² Nɛ nwa tɔ̃ hã Zedeoni na: “Osodanɔ 'da mɔ wa dɛlɛ wena, hã mi kɔ̃́ sɛ na, wa dɛlɛ nɛ ngɔ Omadianɛ gɔ. We kɛ ní gɔ, nɛ wa lengge sɛ na, wa nɛa ngɔ Owi sɛnɛ wa do ngawi 'da wa wele nɛ. Nɛ olo li kɛ na wa dɔnggɔ mi, nɛ wa dɔnggɔ sɛ tɛ wa wele nɛ iko.

³ Kɔ mɔ nɛ, hã mɔ tɔ̃ hã owinɔ 'da mɔ na, wele kɛ a do kili, nɛ a kulu ngɔ, nɛ a gbili do li wala kɛ nyanga kala Galadɛ hã a si.” Nɛ Zedeoni dɛa ɔ nɛ kɛ NWA tɔ̃a hã a ni, nɛ osoda koto 'bu wa bɔa ngɔ wa bɔa wa kpula tɛ wa, nɛ wanɔ kɛ wa 'bana do Zedeoni ngɔ kala Galadɛ i ni, wa zi a osoda koto 'bu iko.

⁴ Nɛ nwa tɔ̃ 'bɔ hã Zedeoni na: “Osodanɔ 'da mɔ wa 'bana 'bɔ dɛlɛ wena. Kɔ mɔ kálá wa, hã mɔ la do wa dɛ nu lì i, hã mi gɔnɔ sanga wa hã mɔ. Mi be sɛ kɔ̃ mi tɛ wanɔ kɛ mɔ nɛ sɛ do wa, do wanɔ kɛ mɔ nɛ́ sɛ do wa gɔ ni hã mɔ.”

⁵ Nɛ Zedeoni la do owinɔ 'da a dɛ nu lì i, nɛ NWA tɔ̃ hã a na: “Mɔ kálá owinɔ kɛ wa so lì do kɔ̃ wa, nɛ wa nɔ ɔ nɛ otolonɔ ni, hã mɔ a wa do tɛ̃ ɛ, nɛ mɔ kala 'bɔ owanɔ kɛ wa gu gba zugolo, sɛ nɛ wa nɔ do lì de ni, hã mɔ a wa do tɛ̃ ɛ.”

⁶ Zedeoni kɛ̃a sanga wa na mɛ ni, nɛ owanɔ kɛ wa sua lì do kɔ̃ wa ni, wa zi a Owele kama talɛ. Nɛ tala owinɔ ni vɛ̃, wa gu zi gba zugolo we nɔ do lì.

⁷ Nɛ NWA tɔ̃ hã Zedeoni na: “Mi dɛ sɛ na, mɔ nɛ ngɔ Omadianɛ do owinɔ 'da mɔ kama talɛ, kɛ wa sua lì dɛ nu wa ni, nɛ mi kpasa sɛ nɛ, obe Israɛlɛ. Kɔ mɔ tɔ̃ hã tala winɔ ni na, wa si.”

⁸ Nɛ Zedeoni gisa tala winɔ ni, nɛ wa si vɛ̃ dɛ nu tɔa 'da wa. Nɛ a 'bana do osoda kama talɛ. Nɛ osodanɔ ni wa kala mbɔkɔ nyɔngɔmɛnɔ do mɔtũlũnɔ 'da wanɔ kɛ wa kpula tɛ wa ni. Do fala nɛ ni, nɛ nde Omadianɛ wa ɔa dɛ ti nyanga kala, nɛ obe Israɛlɛ wa 'dafa fala ɔi 'da wa do ngɔ kala i.

⁹ Do tũi ni, nɛ NWA tɔ̃ hã Zedeoni na: “Mɔ kúlú ngɔ, hã mɔ zĩlĩ we bi Omadianɛ, we kɛ mi 'dɔla wa hã mɔ.

¹⁰ Kɔ fala kɛ mɔ dɛ kili bi do wa dɛa nde, nɛ mɔ zĩlĩ kala dati, do wi dɛa to 'da mɔ, kɛ li a a Pura ni, nɛ mɔ nɛ tɛ fala ɔi 'da wa i,

¹¹ nɛ mɔ zele sɛ wenɔ kɛ wa wele ma ni. Nɛ ma hã sɛ kpã sila hã mɔ we bi do wa.” Nɛ Zedeoni zĩlĩ kala ni do wi dɛa toe 'da a Pura, nɛ wa nɛ ni gbaa, nɛ wa hɔ nu ngba fala ɔi 'da Omadianɛ.

¹² Nɛ nde Omadianɛ, do Oamalɛkɛ, do wanɔ kɛ wa yula li gba zɔ̃ i ni, wa pɛsɛ do nyanga kala ni vɛ̃ ɔ nɛ tia odɔla ni. Nɛ osamonɔ 'da wa wa dɛlɛ ɔ nɛ ogbãlã kɛnzɛ nu gba lì ni.

¹³ Fala kɛ Zedeoni hɔa i mɔ, nɛ a zele gɛlɛ mbe wi wili kpo tɛ tɔ̃ nu yalɛ mɔ a hã ngba a na: “Mi yala zu mi tũi gɛ, nɛ mi zɔ kili mapa, wa dɛa ma do fũ ɔrzɛ, nɛ nde ma tɛ kimili dɛ fala ɔi 'da lɛ nga. Nɛ ma 'dɛnɛ mbe zã tɔa tande kpo, nɛ tɔa ni te, nɛ nyanga nɛ kala dɛ ngɔ.”

¹⁴ Ngba a nɛa we zele ní, nɛ a gese na: “Kafi bina, mɛ mɔ yala ni, mɛ a gba du kɔya 'da be Israɛlɛ, li a a Zedeoni, be 'da Yoasi gɛ a ni. We kɛ Gale kɔ̃a we 'dɔlɔ lɛ hã a na, a gbɛ lɛ do osodanɔ 'da lɛ vɛ̃.”

¹⁵ Zedeoni zila yalɛ 'da wi ni, do gulu nɛ kɛ ngba a tɔ̃a hã a ni, nɛ a bili zu a nù, nɛ a hã iɔ̃nae hã Gale. Nɛ a kpolo tɛ̃ a dɛ fala ɔi 'da obe Israɛlɛ i, nɛ a he mɔ na: “Nɛ kùlù ngɔ, we kɛ NWA 'dɔla osoda Madianɛ hã lɛ ia.”

Bole vĩ zu Omadianɛ

¹⁶ Zedeoni gɔnɔ sanga owinɔ 'da a kama talɛ ni do ngɔ gili wa talɛ, nɛ a kɛ̃ mɔtũlũ, do wula daka, do kã we e kɔ wula daka ni hã wele kpo do kpo, nɛ ma kpa kɔ̃ wa vɛ̃.

¹⁷ Nɛ 'do ki ni, nɛ a tɔ̃ hã wa na: “Fala kɛ mi la, kɔ mi hɔ nu ngba fala ɔi 'da Omadianɛ, nɛ nɛ ka mɔ dɛ 'da mi i mɔ, nɛ nɛ dɛ mɛnɔ vɛ̃ ɔ nɛ kɛ mi nɛ dɛ ma ni.

¹⁸ Kɔ 'da fala kɛ owinɔ 'da mi wa dama mɔtũlũ nde, nɛ nɛ dama tɛ mɛ 'bɔ kɛ 'da nɛ, nɛ ma zĩ fala ɔi 'da Omadianɛ vɛ̃, nɛ nɛ he mɔ na: ‘Do zu li NWA Gale, do zu li Zedeoni!’ ”

¹⁹ Ma nɛa we kɔlɔ do gbogbo zã tũi, nɛ Zedeoni do owinɔ 'da a, wa hɔ nu ngba fala ɔi 'da Omadianɛ, nɛ nde Omadianɛ wa tɛ yapa Owi ɔ ngi'dinɔ 'da wa. Nɛ Zedeoni do owinɔ 'da a wa dama mɔtũlĩ 'da wa, nɛ wa o sanga daka kɛ wa nɛa nɛ ni.

²⁰ Nɛ tala ngɔ gili winɔ bɔa ni, wa nɛ zɔ na mɛ ni, nɛ wa dama tɛ mɛ 'bɔ mɔtũlũnɔ 'da wa, nɛ wa o sanga dakanɔ 'da wa. Nɛ wa vɛ̃ wa kala okãnɔ do gale kɔ̃ wa, nɛ wa kala mɔtũlũnɔ do ngawili kɔ̃ wa, nɛ wa he mɔ na: “Lɛ nɛ́, hã lɛ bi wa do zu li NWA Gale, do zu li Zedeoni!”

²¹ Nɛ wele do wele yula dɛ fala olo a dɛ nu ngba fala ɔi 'da Omadianɛ ni, nɛ wa zĩ ma takpa. Omadianɛ wa nɛa we zɔ ní, nɛ wa ma ngɔ he mɔ gboo, nɛ wa la do yu.

²² Nɛ 'da fala kɛ obe Israɛlɛ kama talɛ ni, wa ma ngɔ dama mɔtũlĩ ni, nɛ NWA vĩ zu Omadianɛ, nɛ wa ma ngɔ gbɛ ngba wa dɛ sanga tɛ ngba wa do du kɔyanɔ 'da wa. Nɛ tala wanɔ kɛ wa fè gɔ ni, wa yu si 'biti le Sɛreda, nɛ wa hɔ gbaa tɛ Bɛtɛ-Sita, do Abɛlɛ-Mɛhola, dɔ̃ɔ do Tabatɛ.

²³ Nɛ Zedeoni sa mɔ hã obe Israɛlɛ kɛ wa tɛ kɔ nu kpala Nɛftali do Asɛrɛ, do Manase na, wa tɛ, takɔ wa ndaka 'do Omadianɛ.

²⁴ Nɛ Zedeoni tombo 'bɔ Owi to tɛ ngɔ kalanɔ tɛ Efraimɛ na, Oefraimɛ wa zĩlĩ kala, hã wa nɛ, hã wa ndɔ tɛ nu lì Yɔrdanɛ gbaa dɛ tɛ Bɛtɛ-Bara, da dɛ kɔ Omadianɛ wa kũ lì gɔ. Na mɛ ni, Oefraimɛ wa mba li ngba wa, nɛ wa nɛ, nɛ wa kala nu kolo lìnɔ vɛ̃ gbaa dɛ tɛ Bɛtɛ-Bara i.

²⁵ Nɛ Oefraimɛ wa kala zi ogã wi ngɔ Omadianɛ bɔa, kɛ li wa a Orɛbɛ do Zɛbɛ, nɛ wa gbɛ Orɛbɛ tɛ ngɔ kpangba ta, nɛ wa sa li ma na: “Kpangba ta 'da Orɛbɛ.” Nɛ wa gbɛ Zɛbɛ dɔ̃ɔ do fala wa kpĩlĩ do wala te vinɔɛ ni, nɛ wa sa li fala ni na: “Fala kpĩlĩ wala vinɔ 'da Zɛbɛ.” Nɛ 'do ki ni, nɛ wa la dɛ dati we ndaka 'do Omadianɛ. Nɛ Oefraimɛ wa kala kpongbolo zu Orɛbɛ do Zɛbɛ, nɛ wa nɛ do ma hã Zedeoni tɛ kulu lì Yɔrdanɛ i.