Owi kpe dati 6 - WE NU GALE 1995

Omadianɛ wa ba nù Israɛlɛ

¹ Obe Israɛlɛ wa dɛa zi 'bɔ mɔ kɛ ma dè tɛ NWA gɔ ni. Gulu nɛ hã a la wa dɛ kɔ̃ Omadianɛ na, wa e mbula ngɔ wa 'do sabɛlɛ sambo.

² Omadianɛ wa zɛlɛ tɛ obe Israɛlɛ wena. Nɛ obe Israɛlɛ wa yu, nɛ wa 'dafa fala ɔi 'da wa kɔ ta ngɔ kalanɔ, kɛ fala kũ ma nganda nɛ ge nde ni.

³ Nɛ 'da falanɔ vɛ̃ kɛ obe Israɛlɛ wa mi zi kpalɛ li fɔnɔ 'da wa ni, nɛ Omadianɛ wa mba do Oamalɛkɛ, do winɔ kɛ wa ɔ li gba zɔ̃ si 'biti gba wese ni, nɛ wa nɛ, nɛ wa bi wa.

⁴ Wa hɔ ngɔ nùi 'da obe Israɛlɛ, nɛ wa 'danga okpalɛ li fɔnɔ gbaa we kɔlɔ do nu ngba le Gaza. Nɛ wa lá mɔ kpo hã obe Israɛlɛ na wa nyɔngɔ gɔ. Nɛ wa kala 'bɔ obata, do ongɔmbɔ, do pundanɔ 'da wa vɛ̃.

⁵ Nɛ 'da fala kɛ wa nɛ zi we bi obe Israɛlɛ ni, nɛ wa kulu ngɔ do onadalamɛnɔ 'da wa, do tɔa tandenɔ do osamonɔ 'da wa, nɛ wa dɛlɛ do tɛlɛ tɛ kɛ na, wele wè tɛ tɔlɔ wa gɔ ni. Nɛ wa hɔ tɛ fala kpo ia, nɛ wa gbini ngɛɔɔ ɔ nɛ tia odɔla ni, nɛ wa 'danga mɛnɔ ngɔ nùi vɛ̃.

⁶ We duzu ki ni, ngawi 'da obe Israɛlɛ ma ia zi vɛ̃ balia Omadianɛ, nɛ wa ala nu wa hã NWA Gale na a gala lo.

⁷ 'Da fala kɛ obe Israɛlɛ wa ala nu wa hã nwa na, a fo lo ti kɔ̃ Omadianɛ ni,

⁸ nɛ nwa tumba mbe wi gba olo nu a hã wa, nɛ a tɔ̃ hã wa na: “Nɛ zélé we nu NWA Gale kɛ a tɔ̃ hã nɛ obe Israɛlɛ gɛ. A na: ‘Mi kala zi nɛ ngɔ nù Ezipeto 'da fala kɛ nɛ zi a kɔ ngbá, nɛ mi fua nɛ dɛ nza.

⁹ Mi fua zi nɛ ti kɔ̃ Oezipeto, do kɔ̃ owinɔ vɛ̃ kɛ wa zɛlɛ tɛ nɛ ni. Mi ndaka zi owi sɛnɛ nɛ dati nɛ, nɛ mi 'dɔlɔ le 'da wa hã nɛ.’

¹⁰ Nɛ nwa tɔ̃a zi hã nɛ na: ‘Mi a NWA Gale 'da nɛ, ma wè na nɛ dɔnggɔ ogalenɔ 'da Oamori, kɛ nɛ ɔ ngɔ nùi 'da wa gɛ gɔ. Nɛ nde nɛ zèlè we nu mi gɔ.’ ”

Gale saka Zedeoni we kpasa obe Israɛlɛ

¹¹ Mbe tũ kpo, nɛ anzɛ 'da nwa nɛa kɔ le Ofra. A hɔa i mɔ, nɛ a dungu nù ti gba te sɛnɛ, tɛ ngɔ nùi 'da Yoasi, wi nu fɛlɛ Abiezɛrɛ. Nɛ be 'da Yoasi kpo, li a a Zedeoni, a zi tɛ zɛ kpalɛ ble. A dɛ zi ma tɛ fala kɛ wa kpĩlĩ do wala te vinɔɛ ni na, da dɛ kɔ Omadianɛ wa zɔ́ ma gɔ.

¹² Nɛ anzɛ 'da nwa hɔa dati a, nɛ a tɔ̃ hã a na: “Aa mɔ nga soda bi bole gɛ, NWA Gale do mɔ fala nɛ kpo.”

¹³ Nɛ Zedeoni gese na: “Aa baa mi, mɔ mbɔ́kɔ́ mi! NWA Gale ɔ sɔ fala nɛ kpo do lɛ, nɛ gulu kɛ 'bakoe gɛ kpa lɛ ni we ge nde? Obaa lɛ wa tɔ́a zi we gba sɔ̃mɛ kɛ NWA dɛa ma, 'da fala kɛ a fua zi wa ngɔ nù Ezipeto dɛ nza ni hã lɛ. Kɔ gulu kɛ mɛnɔ ni dɛ́ 'bɔ tɛ̃ ɛ dɔ́ gɛ gɔ we ge nde? Ngangga gɛ, NWA da kɔ a tɛ lɛ, nɛ a la lɛ hã Omadianɛ.”

¹⁴ Nɛ NWA Gale gese na: “Mɔ kúlú ngɔ do nganda mɔ do ma gɛ, hã mɔ nɛ we fo obe Israɛlɛ ti kɔ Omadianɛ. Wi a mi hã mi tumba mɔ.”

¹⁵ Nɛ Zedeoni tɔ̃ hã a na: “Nwa, mi nɛ dɛ fala kpasa obe Israɛlɛ nɛ nde? Nu fɛlɛ mi kɔ nu kpala Manase gɛ, ma ga gɔ. Nɛ mi 'bɔ a be 'do kɔ nu fɛlɛ kula 'da lɛ iko.”

¹⁶ Nɛ nwa tɔ̃ hã a na: “Mi sɛ fala nɛ kpo do mɔ. We duzu ki ni, mɔ zɔ sɛ Omadianɛ li mɔ ɔ nɛ wele kpo iko ni, nɛ mɔ gbɛ sɛ wa vɛ̃.”

¹⁷ Nɛ Zedeoni gese 'bɔ na: “Mɔ kɔ̃ gɛnɛ mi kɔ̃a nde, nɛ mɔ bé hã mi na, wi ngboo a mɔ NWA Gale, hã mɔ wele we gɛ hã mi.

¹⁸ Mi kɔ̃a we hã dɔnggamɔ hã mɔ. Kɔ mɔ tɛ là gɔ. Mɔ 'bɔ kɔ mi tɛ do ma hã mɔ sɛ.” Nɛ nwa gese na: “Mi 'bɔ sɛ dɛ dɛ na mɔ kpolo tɛ mɔ sɛ nɛ de.”

¹⁹ Zedeoni nɛa, nɛ a gbɛ be dua, nɛ a so fũ farini kɔ sani, nɛ a dɔ do mapa, nɛ nde a à ina hana mapa tɛ nɛ gɔ. Nɛ a a mulu dua ni kɔ bi yele, nɛ a a lì ti nɛ kɔ daka. Nɛ a nɛ do ma tɛ ti te sɛnɛ i, nɛ a hã ma hã anzɛ 'da NWA Gale.

²⁰ Nɛ anzɛ tɔ̃ hã a na: “Mɔ nɛ́, hã mɔ e mulu sa'de do mapa ngɔ ta i mɔ ni. Nɛ mɔ á li sanggoe dɛ ngɔ nɛ.” Nɛ Zedeoni dɛa na mɛ ni.

²¹ Nɛ anzɛ 'da NWA ba dɔndɔlɔ 'da ɛ, nɛ a ɛfɛ kɔ̃ a, nɛ a to mulu sa'de do mapa do sɔti zu dɔndɔlɛ, nɛ we hɔ kɔ ta ni, nɛ ma bɛlɛ mulu sa'de do mapa vɛ̃. Nɛ 'do nɛ, nɛ anzɛ busu dɛ li Zedeoni ni.

²² Nɛ Zedeoni ĩ wá na, wi ni a anzɛ 'da NWA Gale. Nɛ a zɛ nu a kpu kpu kpu do kili vɛ̃ na: “NWA Gale! Mi zɔa anzɛ 'da mɔ ngboo, nɛ li mi kpa ngba ɛ do li a.”

²³ Nɛ NWA tɛ hã a na: “Mɔ dúngú fio! Mɔ tɛ dɛ̃ kili gɔ, we kɛ mɔ fé sɛ gɔ.”

²⁴ Nɛ Zedeoni dɛa gbagala do ta dɛ fala ni, takɔ a dɔ sa'de ngɔ nɛ we dɔnggɔ do NWA. Nɛ a e li fala ni na: “NWA hã dungu fio.” Gbagala ni 'bana dɛ kɔ nu fɛlɛ kula 'da Abiezɛrɛ, tɛ kɔ le Ofra ni tia do sɔɛ gɛ.

Zedeoni gbini gbagala dɔnggɔ do Bala

²⁵ Do tũi ni, nɛ NWA ba nu a hã Zedeoni na: “Mɔ bá wili ngɔmbɛ 'da baa mɔ, mɔ bá a wele kɛ 'do gɛ, kɛ a do sabɛlɛ sambo ni, nɛ mɔ nɛ do a tɛ fala gbagala dɔnggɔ do gale Bala kɛ baa mɔ dɛa ma ni. Mɔ hɔ i mɔ, nɛ mɔ gbini gbagala ni, nɛ mɔ gɔmɔ sanga kpikima gale Asera kɛ zã nɛ ni.

²⁶ Nɛ mɔ dɛ́ mbé gbagala dɛ zu kala ni hã mi NWA Gale 'da mɔ, nɛ mɔ 'dafa ma ɔ dia. Nɛ mɔ gbɛ ngɔmbɛ, nɛ mɔ dɔ a we dɔnggɔ do mi. Mɔ kala sɛ te kpikima Asera kɛ mɔ gɔmɔ sanga nɛ ni, nɛ mɔ dã do we, nɛ mɔ dɔ do ma.”

²⁷ Zedeoni saka wele 'bu kɔ owi dɛa tonɔ 'da a, nɛ a nɛ do wa, nɛ a dɛ mɛ kɛ NWA ba nu ɛ hã a ni. A dɛ̃ ma do gba wese gɔ, we kɛ a dɛa kili Owi nu fɛlɛ kula 'da a do owinɔ kɔ le ni. Ma kɛ a dɛa ma do tũ.

²⁸ Nɛ do titole, nɛ owinɔ kɔ le wa hɔa nza, nɛ wa zɔ gbagala dɔnggɔ do Bala, nɛ nde ma gbini. Nɛ wa zɔ kpikima Asera kɛ zã nɛ ni, nde ma gbini 'bɔ. Nɛ wa zɔa 'bɔ na, wa dɛa mbé gbagala, nɛ wa dɔ ngɔmbɔ we dɔnggɔ do NWA ngɔ nɛ.

²⁹ Nɛ owinɔ wa aka dɛ ngbala wa na: “Wi dɛa mɛ gɛ a wio nde?” Nɛ wa fa gbaa, nɛ wa kpa na wi a Zedeoni, be 'da Yoasi.

³⁰ Nɛ wa tɔ̃ hã Yoasi na: “Mɔ bá be 'da mɔ Zedeoni, hã lɛ gbɛ a! Mba gɔ, a gbini gbagala dɔnggɔ do Bala, nɛ a gɔmɔ 'bɔ sanga kpikima Asera kɛ zã nɛ ni do'do.”

³¹ Yoasi nɛa we zele ní, nɛ a aka winɔ wa wele we hã a ni na: “Nɛ bi bolo ngɔ Bala nde? Nɛ nɛ tɔ̃ we ngɔ a nde? Wele bi bolo ngɔ Bala, kɔ gɛnɛ kɔ a a wio nde, nɛ a fe sɛ dati a bindɛ titole. Nɛ lá Bala, kɔ fala kɛ a a gbãlã we Gale kpaa nde, nɛ e kɔ a bi ngɔ kili tɛ̃ a. We kɛ mɛ wa gbini ni, mɛ a gbagala 'da a!”

³² Yolo do ngba soe ni, nɛ wa sa li Zedeoni na: “Yɛrubalɛ.” Gulu nɛ na: “E kɔ Bala bi bolo ngɔ kili tɛ̃ ɛ.” Wa saka li ni we duzu lɛnggɛ nu Yoasi kɛ a tɔ̃a na: “E kɔ Bala bí bolo ngɔ kili tɛ̃ a, we kɛ mɛ wa gbini ni, mɛ a gbagala 'da a” ni.

Gale bia hã Zedeoni na ɛ gbaka sɛ a

³³ Omadianɛ, do Oamalɛkɛ, do owinɔ li gba zɔ̃ si 'biti gba wese, wa mba li ngba wa, nɛ wa kũ lì Yɔrdanɛ, nɛ wa 'dafa fala ɔi 'da wa ngɔ mbɛ nù Yizreɛlɛ.

³⁴ 'Da fala ni, nɛ Hi Wi 'da nwa le kɔ Zedeoni, nɛ a dama mɔtũlũ we sa mɔ hã owi nu fɛlɛ Abiezɛrɛ na, wa nɛ 'do a.

³⁵ Nɛ a tombo Owele ngɔ nùi 'da Manase vɛ̃, takɔ wa sa mɔ hã owi nu kpala a vɛ̃ na, wa nɛ 'bɔ 'do a. Nɛ a tombo 'bɔ mbe wele kɔ nu kpala Asɛrɛ, do Zabuloni, do Nɛftali. Nɛ wa tɛa, nɛ wa mba li ngba wa do a.

³⁶ Nɛ Zedeoni tɔ̃ hã Gale na: “Mɔ tɔ̃a zi na, mɔ fo sɛ lɛ, obe Israɛlɛ ti kɔ̃ owi sɛnɛ lɛ do wala 'da mi.

³⁷ Kɔ ní, nɛ mi ba sɛ sala bata gɛ, nɛ mi yɛlɛ ma dɛ fala kɛ wa zɛ do kpalɛ ble ni. Kɔ do tũi, hã fala kɛ mbɔɛ ala dɛ ngɔ nɛ iko, hã nùi kɛ zã nɛ ni ma 'bɔ̀ gɔ nde, nɛ mi ĩ sɛ na, mɔ fo sɛ lɛ ti kɔ̃ owi sɛnɛ lɛ do wala 'da mi, ɔ nɛ kɛ mɔ tɔ̃a zi ni do gbãlã we.”

³⁸ Nɛ ma dɛa tɛ̃ ɛ na mɛ ni. Fala sa do titole 'do ki ni, nɛ Zedeoni nɛ, nɛ a ba sala bata, nɛ a kpĩlĩ ma, nɛ mbɔɛ hulu, nɛ ma dunu sɛmbɛ.

³⁹ Nɛ a tɔ̃ hã Gale na: “Da dɛ kɔ sila mɔ nɔ̃́lɔ̃́ dɛ tɛ mi gɔ! Mi nɛ aka 'bɔ mɔ we mbé mɔ kpo. Mi kɔ̃a na, mɔ be 'bɔ hã mi do wala 'da sala bata gɛ na, mɔ gbaka sɛ mi. Ma wia na 'do kɛ gɛ, nɛ tati a sala bata ma 'bana do kula nɛ, nɛ mbɔɛ 'bɔ nùi kɛ zã nɛ ni.”

⁴⁰ Do tũi ni, nɛ Gale gese nu we 'da Zedeoni. Nɛ do titole, nɛ nde tati a sala bata ni ma 'bana do kula nɛ, nɛ kɛ zã nɛ ma 'bɔa do mbɔɛ vɛ̃.