Owi kpe dati 5 - WE NU GALE 1995

Zuma 'da Debora

¹ Do ngba soe ni, nɛ Debora do Barakɛ, be 'da Abinoamɛ, wa ga zuma na:

² Lɛ dɔ́nggɔ́ NWA! Obe Israɛlɛ vɛ̃ wa 'dafa tɛ wa we bi bole, wa hã tɛ wa, nɛ wa nɛ bole do sila wa kpo.

³ Aa nɛ, Onwanɔ! Aa nɛ, ogã winɔ! Nɛ gɛ́ zala nɛ, hã nɛ zele! Mi nɛ ga zuma we dɔnggɔ do NWA, mi nɛ ga zuma do zu li NWA Gale 'da lɛ obe Israɛlɛ.

⁴ NWA, fala kɛ mɔ yula ngɔ nù Edɔmɛ, nɛ mɔ zĩlĩ okalanɔ tɛ Seirɛ ni, nɛ nùi tana, nɛ li nza tũ do lĩ kolo, nɛ gba kolo tɛa dɛ ngɔ nù nga,

⁵ nɛ okalanɔ tana dati mɔ NWA Gale 'da lɛ obe Israɛlɛ, kɛ mɔ bia zi tɛ mɔ hã oyaa lɛ ngɔ kala Sinai ni.

⁶ Zi dati belee, do 'da fala 'da Samgarɛ, be 'da Anatɛ, gbaa we hɔ 'da fala 'da Yaɛlɛ, owi nɛ gɛnɛ wa bá zi do li gã wala ngɔ nù Israɛlɛ ni gɔ. Wa hɔ zi do obe wala zamɛnɔ ni iko.

⁷ Gã wi ngɔ obe Israɛlɛ zi bina, fo zi 'bɔ wi kpe dati wa bina. Ma ɔa ni gbaa we hɔ do ngba soe, kɛ mi Debora, mi hɔa, nɛ mi ɔ nɛ naa obe Israɛlɛ ni.

⁸ Obe Israɛlɛ wa saka mbé ogale, nɛ bolo ma tia do ti. Obe Israɛlɛ kɛ wa a owi bi bolo ni, wa koto 'bu nɛ nalɛ, nɛ nde fo ngele do sɛlɛ kpo kɔ̃ wa bina.

⁹ Nɛ nde di dɔ̃ ni, mi lengge onwa ngɔ osoda Israɛlɛ do yangga, nɛ mi 'bɔ do yangga we duzu wanɔ kɛ wa hã tɛ wa li bole do sila wa kpo ni. Lɛ dɔ́nggɔ́ nwa!

¹⁰ Aa nɛ, ogã winɔ kɛ nɛ kũ ngɔ ofɛ̃a pundanɔ, tabi nɛ dungu ngɔ dia bunggu, tabi nɛ la do li gba walanɔ do nyanga nɛ ni, nɛ tɔ̃ sako dia mɛ kɛ NWA dɛa ma gɛ!

¹¹ Nɛ zélé gɛlɛ winɔ, kɛ wa mba li ngba wa tɛ nu 'denɔ ni. Wa kã onadalamɛnɔ 'da wa i mɔ, nɛ wa tɛ tɔ̃ we dia mɛ kɛ nwa dɛa ma we duzu ogã wi ngɔ lɛ, obe Israɛlɛ ni. Wa tɔ̃ tɛlɛ tɛ kɛ wa nɛa do ngɔ Owi sɛnɛ wa ni, nɛ owinɔ wa mba li ngba wa dɛ nu ngbo lenɔ 'da wa.

¹² Aa mɔ Debora, mɔ kúlú ngɔ, nɛ mɔ gá zuma sɔ bolo. Aa mɔ Barakɛ, be 'da Abinoamɛ, mɔ tɛ́ do Owi sɛnɛ lɛ, kɛ mɔ kala wa tɛ li bole si do wa ni.

¹³ Winɔ 'da nwa kɛ wa 'bana nza ni, wa tɛa, nɛ wa mba do ogã wi ngɔ wa, we nɛ bole. Wa ngɛmɛ li ngba wa dɛ kɛ zã NWA, nɛ wa 'dafa tɛ wa vɛ̃ we bi bole.

¹⁴ Owi nu kpala Efraimɛ wa yula tɛ ngɔ nùi 'da wa, kɛ wa ba zi ma kɔ̃ Oamalɛkɛ ni, nɛ wa tɛa. Nɛ owi nu kpala Bɛnzamɛ wa kpia dɛ 'do wa. Onwa bolonɔ tɛ kɔ nu fɛlɛ Makirɛ wa tɛa, fala nɛ kpo do owanɔ tɛ kɔ nu kpala Zabuloni.

¹⁵ Onwanɔ kɔ nu kpala Isakarɛ tɛ mɛ 'bɔ, wa hɔa 'da mɔ, Debora. Nɛ wa vɛ̃ wa kpe dɛ 'do Barakɛ, nɛ wa nɛ we bi bole ngɔ mbɛ nù. Nɛ nde Owi nu kpala Rubɛnɛ, wa tia kafi dɛ sanga tɛ ngba wa gbaa, nɛ wa nɛ gɔ.

¹⁶ Aa nɛ, owi nu kpala Rubɛnɛ, nɛ là zi nu ba'de batanɔ 'da nɛ gɔ, nɛ nɛ dungu nù dɛ nu nɛ we zele gɛlɛ Owi dala sa'denɔ, kɛ wa sa mɔ hã batanɔ 'da wa ni. Gulu kɛ nɛ dɛa ní ni we ge nde? Owi nu kpala Rubɛnɛ, wa tia kafi dɛ sanga tɛ ngba wa gbaa, nɛ wa nɛ bole gɔ.

¹⁷ Onu kpala winɔ ngɔ nù Galadɛ si 'biti gba wese ni, wa kũ̀ 'bɔ lì Yɔrdanɛ we bi bole gɔ. Nɛ owi nu kpala Danɛ, wa 'bana zi dɛ kɔ masuanɔ 'da wa, nɛ wa mbà do lɛ gɔ. Owi nu kpala Asɛrɛ tɛ mɛ 'bɔ, wa yɛkɛ tɛ wa gɔ, nɛ wa 'bana zi dɛ nu kolo gba lì i.

¹⁸ Nɛ nde Ozabuloni mba do Onɛftali, wa dɛ̀ kili fe fio tɛ li bolo i gɔ.

¹⁹ Owi sɛnɛ lɛ, onwa ngɔ lenɔ ngɔ nù Kanana, wa bi lɛ tɛ kɔ le Tanakɛ, kɔlɔ dɔ̃ɔ do lì Megido, nɛ nde wa kpà mbe mbamba fɛ̃a mɔ bolo sĩ tɛ li bole ni gɔ.

²⁰ Nɛ osɔlanɔ tɛ li nza i 'bɔ, wa mba ngba wa do lɛ kɔ bole ni. Wa tɛ ba walanɔ 'da wa ngɔ i, nɛ nde wa tɛ bi do wi sɛnɛ lɛ Sisra.

²¹ Kisoni a ã gbɛlɛ fua lì zɛ́ belee, ma fua do Owi sɛnɛ lɛ si gɔtɔ. Kɔ lɛ nɛ́ bole do gbɛnga tɛ!

²² Nɛ mbalatanɔ wa ma ngɔ yu nɛ, nɛ nyanga wa ma nùi nganda wena.

²³ Nɛ anzɛ 'da NWA tɔ̃a na: “Nɛ fɔ́mbɔ́ le Merɔzɛ, nɛ nɛ fɔ́mbɔ́ 'bɔ winɔ vɛ̃ kɛ wa ɔ kɔ le ni, we duzu kɛ wa nɛ̀ we gala NWA li bolo gɔ, nɛ wa kɔ̃̀ zi 'bɔ we tombo onwa bolonɔ 'da wa hã NWA gɔ.”

²⁴ Lɛ dɔnggɔ Yaɛlɛ, wuko 'da Hebɛrɛ, be Keni ni. Lɛ dɔ́nggɔ́ a nɛ ngɔ gɛlɛ wukonɔ vɛ̃, kɛ wa ɔ kɔ tɔa tande 'da wa ni.

²⁵ Sisra gɔa lì, nɛ Yaɛlɛ hã ma'bɛlɛ hã a. A sua ma dɛ kɔ dia bila, nɛ a nɛ nɛ hã a.

²⁶ Nɛ a ba 'bɛ̃lɛ̃ nu te dɛ mbee kɔ̃ a, nɛ a 'be 'bɔ gã dɔnɔ do mbee nɛ, nɛ a bɛ̃lɛ̃ ma tɛ gulu zala Sisra, nɛ gbãlã zu a o, nɛ ma sala.

²⁷ Nɛ a tana gbirr dɛ ti Yaɛlɛ ni, nɛ a gu li a nù, nɛ a bɔlɔ yɔrr dɛ ti nyanga a ni, nɛ a fe.

²⁸ Nɛ naa Sisra gɛa li ɛ do li holo tɔa, nɛ a ma ngɔ bi tɛ̃ a na: “Gulu kɛ ngilingili 'da Sisra ma tɛ hɔ̀ gɔ we ge nde? Gulu kɛ ombalatanɔ 'da a wa yú nganda gɔ we ge nde?”

²⁹ Nɛ ongba a wukonɔ kɛ wa do hã zã wena ni, wa gisa nu nɛ hã a. Nɛ a zele, nɛ a ɔ̀mɔ̀ tɛ 'bã olo nu wa gɔ.

³⁰ Nɛ a na: “Kafi bina, wa 'bana ngɛmɛ omɛnɔ wa kala ma li bolo i ni. Wa tɛ kɛ̃ sanga nɛ hã ngba wa. Wa hã be zɔnga kpo tabi bɔa hã soda kpo, nɛ Sisra kpa tulu wa fulu dia nɛ ge nde ni, tulu kɛ wa gɛzɛ mɔ tɛ nɛ de wena, nɛ ma wia do nwa bolo ngboo ni.”

³¹ Aa NWA, e kɔ Owi sɛnɛ mɔ vɛ̃ wa fe ɔ nɛ kɛ Sisra fia ni, nɛ oyali ngba mɔ wa ɔ do ngawi ɔ nɛ tua wese ni. Nɛ mbé bolo té zi 'bɔ ngɔ nù Israɛlɛ gɔ, gbaa 'do 'bu sabɛlɛ nalɛ.