Owi kpe dati 4 - WE NU GALE 1995

Debora do Barakɛ

¹ Ehudɛ fia, nɛ obe Israɛlɛ wa dɛa 'bɔ mɔ kɛ ma dè tɛ NWA gɔ ni.

² NWA zɔa ní, nɛ a hã ngawi hã Yabinɛ na, a nɛ ngɔ wa. Yabinɛ zi a nwa ngɔ nù Kanana, nɛ a ɔ tɛ Hasɔrɛ. Nɛ gã wi ngɔ osodanɔ 'da a zi a Sisra, nɛ a ɔ zi tɛ Harosɛtɛ-Goimɛ.

³ Yabinɛ zi do ongilingili mɔ bolo kama kusi. Nɛ a zɛlɛ zi tɛ obe Israɛlɛ wena gbaa 'do 'bu sabɛlɛ bɔa. Nɛ obe Israɛlɛ wa zɔa ní, nɛ wa ala nu wa hã NWA na, a gala lo.

⁴ 'Da fala ni, Debora, wuke 'da Lapidɔtɛ zi a wi 'bili we 'da obe Israɛlɛ, nɛ a zi 'bɔ a wi gba olo nu Gale.

⁵ A 'bili zi we ti mbe 'bete kpo tɛ ngbala le Rama do Betɛlɛ, tɛ ngɔ kalanɔ tɛ Efraimɛ. Nɛ obe Israɛlɛ wa nɛ zi we aka a do wenɔ dɛ di ni. Nɛ wa sa zi li 'bete fala ni na: “'Bete 'da Debora.”

⁶ Mbe tũ kpo, nɛ Debora sa mɔ hã Barakɛ, be 'da Abinoamɛ na, a tɛ 'dɛ ɛ nga sɛ. Barakɛ a wi Kedɛsi, wi kɔ nu kpala Nɛftali. Barakɛ hɔa, nɛ Debora tɔ̃ hã a na: “NWA Gale 'da lɛ obe Israɛlɛ ba nu a hã mɔ na, mɔ kúlú ngɔ, hã mɔ nɛ, hã mɔ kala Owi wili koto 'bu kɔ nu kpala Nɛftali do Zabuloni, nɛ mɔ kũ do wa dɛ ngɔ kala Tabɔrɛ.

⁷ Nɛ ɛ yɛkɛ sɛ sila Sisra, gã wi ngɔ osodanɔ 'da Yabinɛ na, a nɛ do ongilingilinɔ 'da a do osodanɔ 'da a dɛ nu lì tɛ Kisoni, takɔ a bi mɔ di ni. Nɛ ɛ hã sɛ ngawi hã mɔ, nɛ mɔ nɛ sɛ ngɔ a.”

⁸ Nɛ Barakɛ gese hã Debora na: “Mɔ kpé fala nɛ kpo do mi, sɛ nɛ mi nɛ nɛ de. Kɔ ni gɔ, nɛ nde mi nɛ́ sɛ gɔ.”

⁹ Nɛ Debora gese na: “Mi kɔ̃a, mi nɛ sɛ do mɔ. Kɔ mi nɛ, nɛ nde li mɔ dɔ̃́lɔ̃́ sɛ kɔ bole ni gɔ, we kɛ NWA a e sɛ Sisra dɛ kɔ̃ wuko na, a nɛ ngɔ a.” Nɛ Debora kulu ngɔ, nɛ wa nɛ do Barakɛ tɛ Kedɛsi i.

¹⁰ Wa hɔa i mɔ, nɛ Barakɛ sa mɔ hã Owi nu kpala Nɛftali do Zabuloni. Nɛ owi wili koto 'bu wa kɔ̃a, nɛ wa kũ kala Tabɔrɛ do a. Nɛ Debora nɛa do wa.

¹¹ Do 'da fala ni, nɛ nde Hebɛrɛ, be Keni, a nyɛ̀lɛ̀ zi do le Kedɛsi gɔ. Okeni wa zi a nu fɛlɛ Hobabɛ, masɛ̃ Mɔizɛ. Nɛ nde Hebɛrɛ la zi onya a Keninɔ, nɛ a zĩ tɔa tande 'da a tɛ ti te sɛnɛ tɛ Sananimɛ, dɔ̃ɔ do Kedɛsi.

¹² Sisra nɛa we zele na Barakɛ, be 'da Abinoamɛ, kũ dɛ ngɔ kala Tabɔrɛ i,

¹³ nɛ a ngɛmɛ li ongilingili mɔ bolo kama kusi, do osodanɔ 'da a vɛ̃ dɛ Harosɛtɛ-Goimɛ. Nɛ wa yolo di ni, nɛ wa la dɛ nu lì Kisoni.

¹⁴ Debora zila we nɛ, nɛ a tɔ̃ hã Barakɛ na: “Mɔ nɛ! NWA do tɛ̃ a, a a kpia dati mɔ. Sɔɛ gɛ a 'dɔlɔ sɛ Sisra hã mɔ.” Nɛ Barakɛ kulu ngɔ, nɛ a kpe dati osodanɔ 'da a kote 'bu ni, nɛ a zĩlĩ kala Tabɔrɛ do wa.

¹⁵ Kɔ wa ma ngɔ bi bole, nɛ NWA dɛa na, zu osodanɔ 'da Sisra vĩ, nɛ bole gana wa, do owi ba ngilingilinɔ ni vɛ̃. Sisra nɛa we zɔ ni, nɛ a zĩ nù kɔ ngilingili 'da a, nɛ a ma ngɔ yu do nyanga a.

¹⁶ Nɛ Barakɛ do owinɔ 'da a wa ndaka 'do ongilingilinɔ do osodanɔ 'da Sisra gbaa tɛ Harosɛtɛ-Goimɛ, nɛ wa gbɛ wa vɛ̃, nɛ wele kpo kpàsà gɔ.

¹⁷ Nɛ Sisra yu gbaa dɛ nu tɔa tande 'da Yaɛlɛ, wuko 'da Hebɛrɛ. Mba gɔ, Yabinɛ, nwa tɛ Hasɔrɛ, dɛa zi na do nu fɛlɛ kula 'da Hebɛrɛ.

¹⁸ Nɛ Yaɛlɛ zɔa Sisra, nɛ a gɔnɔ dati a, nɛ a tɔ̃ hã a na: “Aa nwa 'daa, mɔ lé dɛ 'da mi nga. Mɔ tɛ dɛ̀ kili gɔ.” Nɛ Sisra lia, nɛ Yaɛlɛ gu bolangiti ngɔ a, nɛ a usu a.

¹⁹ Nɛ Sisra tɔ̃ hã Yaɛlɛ na, wɔ lì ba ɛ ba. Nɛ Yaɛlɛ fi nu daka ndala, kɛ lì ma'bɛlɛ kɔ nɛ ni, nɛ a hã ma hã a na, a nɔ. A nɔa do'do, nɛ a gu 'bɔ bolangiti dɛ ngɔ a.

²⁰ Nɛ Sisra tɔ̃ 'bɔ hã a na: “Mɔ yóló dɛ nu tɔa ni, kɔ fala wele hɔ, hã a aka mɔ na, wele a kɔ tɔa gɛ boe nde, nɛ mɔ gese hã a na, wele bina.”

²¹ Sisra mbɔkɔ zi wena, nɛ a tia do yala, nɛ yala nɛ ngɔ a wena. Yaɛlɛ nɛa we zɔ ní, nɛ a ba dɔnɔ, do 'bɛ̃lɛ̃ nu te kɛ wa bɛ̃lɛ̃ do tɔa tande 'da wa ni, nɛ a hala gɛɔ dɛ kɛ zã Sisra i, nɛ a e 'bɛ̃lɛ̃ nu te tɛ gulu zala a, nɛ a zɛ go'do nɛ. Nɛ 'bɛ̃lɛ̃ nu te ni le zu Sisra, nɛ ma sala, nɛ ma nda'da a do nù, nɛ a fe.

²² 'Do nɛ, nɛ Barakɛ yolo tɛ fa Sisra, nɛ a hɔ. Nɛ Yaɛlɛ gɔnɔ dati a dɛ nza i, nɛ a tɔ̃ hã a na: “Mɔ tɛ́, hã mi be wi kɛ mɔ fa a gɛ hã mɔ.” Nɛ Barakɛ lia, nɛ a zɔ Sisra dɛ nù ni, nɛ nde 'bɛ̃lɛ̃ nu te lia gulu zala a, nɛ ma sala, hã a fia.

²³ Do ngba soe ni, Gale dɛa zi na, obe Israɛlɛ wa nɛ ngɔ Yabinɛ, nwa ngɔ nù Kanana.

²⁴ Obe Israɛlɛ wa bi zi do a gbaa, nɛ bole fila kerr, nɛ do ndɔti nɛ, nɛ wa gbɛ a.