Owi kpe dati 3 - WE NU GALE 1995

¹ NWA la zi owinɔ ni dɛ ngɔ nù Kanana, takɔ a yamba sila obe Israɛlɛ kɛ wa bì zi bolo do Okanana gɔ ni.

² A dɛa ni, takɔ obe Israɛlɛ kɛ wa nɛ̀ zi mbe kuti bolo fala kpo gɔ ni, wa yambala bi bolo.

³ Owinɔ kɛ NWA la zi wa dɛ ngɔ nùi ni, wa zi dati a Owi kɔ lenɔ mɔlɔ tɛ ngɔ nù Filisti. 'Do nɛ 'bɔ a Okanana vɛ̃, do Osidoni, do Ohivi kɛ wa dɛa lenɔ 'da wa ngɔ kalanɔ tɛ Libanɛ, ndo do nyanga kala tɛ Bala-Hɛrmoni gbaa we hɔ tɛ le Lɛbo-Hamatɛ.

⁴ NWA kɔ̃a zi na, wa 'bana dɛ di ni, takɔ ɛ yamba sila obe Israɛlɛ we ĩ na, wa dɛ sɛ mbula kɛ ɛ hã zi ma hã oyaa wa, do wala 'da wi dɛa toe 'dɛ ɛ Mɔizɛ ni nde.

⁵ Ma kɛ obe Israɛlɛ wa ɔa dɛ sanga Okanana, Ohiti, Oamori, Opɛrizi, Ohivi do Oyebuzi.

⁶ Nɛ wa kala wuko sanga tɛ ngba wa do owinɔ ni, nɛ wa dɔnggɔ 'bɔ ogalenɔ 'da wa.

Otniɛlɛ

⁷ Obe Israɛlɛ wa dɛa zi mɔ kɛ ma dè tɛ NWA Gale 'da wa gɔ ni. Ta zu wa ele ngɔ Gale 'da wa, nɛ wa dɔnggɔ ogale Bala do Asera.

⁸ Nɛ zã NWA nɔ̃lɔ̃ dɛ tɛ wa, nɛ a la zi wa dɛ kɔ Kusanɛ-Risataimɛ, nwa ngɔ nù Mezopotami. Nɛ nwa ni ia mbula ngɔ wa 'do sabɛlɛ ngbɛ'dɛ'dɛ.

⁹ Obe Israɛlɛ wa zɔa ní, nɛ wa ala nu wa hã nwa na, a gala lo. Nɛ nwa tumba wele kpo, li a a Otniɛlɛ, be 'da Kɛnazɛ, hɔ dɛ 'do Kalɛbɛ na, a fo wa ti kɔ̃ nwa Kusanɛ-Risataimɛ.

¹⁰ Hi Wi 'da NWA lia kɔ Otniɛlɛ, nɛ a hɔa wi kpe dati obe Israɛlɛ. A nɛa, nɛ a bi do nwa Kusanɛ-Risataimɛ, nɛ NWA Gale hã ngawi hã a, nɛ a nɛ ngɔ nwa ni.

¹¹ Do 'da fala ni, nɛ obe Israɛlɛ wa kpa zi dungu fio 'do sabɛlɛ 'bu nɛ nalɛ. Nɛ 'do nɛ, nɛ Otniɛlɛ, be 'da Kɛnazɛ fe.

Ehudɛ

¹² Obe Israɛlɛ wa dɛa zi 'bɔ mɔ kɛ ma dè tɛ NWA gɔ ni. Gulu nɛ a NWA tumba Egloni, nwa ngɔ nù Moabɛ na, a bi do wa.

¹³ Nɛ Egloni mba do Oamoni, do Oamalɛkɛ, nɛ wa bi obe Israɛlɛ, nɛ wa ba le Yeriko.

¹⁴ Nɛ nwa Egloni ia mbula ngɔ obe Israɛlɛ 'do sabɛlɛ 'bu ngɔ nɛ ngbɛ'dɛ'dɛ.

¹⁵ Obe Israɛlɛ wa zɔa ni, nɛ wa ala nu wa hã NWA Gale na, a gala lo. Nɛ a tumba wele kpo, li a a Ehudɛ na, a fo wa ti kɔ̃ nwa Egloni. Ehudɛ zi a be 'da Gera, wi nu kpala Bɛnzamɛ. A dɛ zi to do gale kɔ̃ a. Nɛ obe Israɛlɛ wa tumba Ehudɛ do dia mɔ we dɔnggɔ do Egloni, nwa ngɔ nù Moabɛ.

¹⁶ Ehudɛ dolo zi gba du kɔya kɛ nu ma tɔa do i mbee nɛ bɔa nɛ. Du kɔya ni zi dɔ̃ɔ do sãtimɛtrɛ 'bu nɛ mɔlɔ. A yulu zi ma ti tulu tɛ̃ a, nɛ a bɔlɔ ma dɛ kɛ zã ku a kɛ ngɔ ngawili kɔ̃.

¹⁷ Nɛ a nɛ we hã dia mɛ hã nwa Egloni. Kili tɛ nwa ni gã zi wena.

¹⁸ Ehudɛ hɔa i mɔ, nɛ a hã dia mɛ ni hã Egloni. Nɛ a kulu ngɔ do owinɔ wa kã zi a do tole dia mɛ ni we si nɛ.

¹⁹ Wa nɛa we hɔ dɛ fala kpikima kɛ winɔ kɔ le ni wa dɛa do ta, dɔ̃ɔ do le Gilgalɛ ni, nɛ Ehudɛ yolo nù, nɛ a gili tɛ̃ a zu a kpo dɛ 'da nwa Egloni i. Nɛ a tɔ̃ hã a na: “Aa Nwa, mi do to we tɔ̃ hã mɔ, kɔ ma wè do kɛ gele wele zele gɔ.” Nɛ nwa Egloni ba nu a hã Owi dɛa tonɔ 'da a na, wa hɔ dɛ nza i, nɛ wa hɔa.

²⁰ Do 'da fala ni, nɛ nde a dungu zi nù dɛ kɔ gɛ̃a tɔa kɛ wa 'dafa we duzu a gbogbo zu tɔa i ni. Nɛ Ehudɛ nɛa, nɛ a kɔlɔ do a, nɛ a tɔ̃ hã a na: “Toe kɛ mi tɛa we tɔ̃ ma hã mɔ gɛ, ma yula 'da Gale.” Kɔ nwa nɛa we zele ní, nɛ a kulu ngɔ ngɔ kpongbo nwa 'da a.

²¹ Nɛ Ehudɛ ɛfɛ gale kɔ̃ ɛ ti tulu tɛ̃ ɛ, nɛ a gbɔtɔ gba du kɔya kɛ a usu sɔ ma kɛ zã ku a ngɔ ngawili kɔ̃ ni, nɛ a dumu zã nwa surr.

²² Nɛ gba du kɔya ni le mba do te go'do nɛ vɛ̃ dɛ kɔ zã a i ni. Nɛ kɛndɔ zã a gulu ngɔ gba li kɔya lɔngbɔɔ, we kɛ Ehudɛ gbɔtɔ zi ma gɔ.

²³ 'Do nɛ, nɛ Ehudɛ kpe nu tɔa, nɛ a kã ma, nɛ a hɔ do nu kɛ 'do tɔa i ni, nɛ a la.

²⁴ A la do'do, nɛ Owi dɛa tonɔ 'da nwa wa hɔ, nɛ wa zɔ na, nu tɔa ma kpia tɛ̃ ɛ kpia. Nɛ wa lengge na, nwa tɛ yu nza kɔ tɔa i.

²⁵ Nɛ wa 'bɔ a ni gbaa, nɛ nde a hũ̀i nu tɔa gɔ. Nɛ wa ba fungula, nɛ wa fĩ, kɔ wa nɛ ka mɔ dɛ tɔa i, nɛ wa zɔ a, nɛ nde a tia, kɔ a fia.

²⁶ 'Da fala kɛ Owi dɛa tonɔ wa tɛ 'bɔ 'do nu tɔa 'da nwa i ni, nɛ nde Ehudɛ yu sɔ, kɔ 'do a nyɛlɛ ia. A la fala wa ia do kpikima kɛ wa dɛa ma do ta ni, nɛ a yu dɛ tɛ Seira.

²⁷ A hɔa ngɔ kalanɔ tɛ Efraimɛ i, nɛ a dama mɔtũlũ we mba li obe Israɛlɛ. Wa zila mɔtũlĩ, nɛ wa hɔ, nɛ a kpe dati wa, nɛ wa zĩlĩ kalanɔ.

²⁸ Nɛ a tɔ̃ hã wa na: “Nɛ tɛ 'do mi, we kɛ nwa 'dɔlɔ Owi sɛnɛ lɛ, Omoabɛ hã lɛ.” Wa nɛa do Ehudɛ, nɛ wa hɔ nu lì Yɔrdanɛ, nɛ wa ba nu kole kɛ Omoabɛ wa kũ nɛ we si dɛ kɔ le 'da wa i ni. Nɛ wi Moabɛ kpo wè zi 'bɔ tɛ kṹ lì Yɔrdanɛ gɔ.

²⁹ Do ngba soe ni, obe Israɛlɛ wa gbɛa Omoabɛ kɔlɔ do koto 'bu. Owinɔ ni, wa a onga wi bolo, kɛ sila wa a kpã ni. Wa gbɛa wa vɛ̃, nɛ wele kpo sanga wa kpàsà zi gɔ.

³⁰ Ndo do di ni, nɛ Omoabɛ wa dɛa mbula 'da obe Israɛlɛ, nɛ dungu fio lia ngɔ nùi 'da Oisraɛlɛ. Nɛ bolo zi 'bɔ bina gbaa 'do 'bu sabɛlɛ ngbɛ'dɛ'dɛ.

Samgarɛ

³¹ Dɛ 'do nɛ, nɛ Samgarɛ, be 'da Anatɛ, dungu olo Ehudɛ. A gbɛa zi Ofilisti kama gazɛlɛ do 'bɛ̃lɛ̃ nu te kɛ wa kã do ongɔmbɔnɔ ni. Na mɛ ni, a kpasa zi 'bɔ obe Israɛlɛ ti kɔ̃ Owi sɛnɛ wa.