Owi kpe dati 21 - WE NU GALE 1995

Obe Israɛlɛ wa kɔ̃̀ na nu kpala Bɛnzamɛ kumu gɔ

¹ 'Da fala kɛ obe Israɛlɛ wa mba zi li ngba wa tɛ Mispa i ni, nɛ wa kpua mbulu dati nwa na, wele kpo kɔ lo a hã́ sɛ be zɔnga be mɔ́ a hã wi wili Bɛnzamɛ na, a ba a gɔ.

² Nɛ 'do kɛ bole ia ni, nɛ wa kpolo tɛ wa dɛ Betɛlɛ, nɛ wa dungu nù dati Gale, nɛ wa ala nu wa, nɛ wa he 'bɔ kɔ̃a tɛ wa gbaa, nɛ wese gɛ̃.

³ Nɛ wa na: “Aa NWA Gale 'da lɛ obe Israɛlɛ, gulu 'bakoe lɛ kpa gɛ na ge nde? Gulu kɛ mbe kpo sanga nu kpala lɛ obe Israɛlɛ nɛ kumu nɛ we ge nde?”

⁴ Fala sa do titole belee, nɛ wa kulu ngɔ, nɛ wa dɛ gbagala do ta, nɛ wa dɔ sa'de we dɔnggɔ do Gale, do be dɛa na dɛ di ni.

⁵ Nɛ wa aka ngba wa na: “'Da fala kɛ lɛ mba zi li ngba lɛ dati NWA tɛ Mispa i, nɛ owinɔ sanga nu kpala Israɛlɛ kɛ wa nɛ̀ zi gɔ ni a owio nde?” Ĩ na, wa kpua zi mbulu na, wi kɛ a nɛ tɛ Mispa i gɔ, nɛ wa gbɛ a.

⁶ Gɛnɛ kɔ obe Israɛlɛ wa nɛa ngɔ onya wa Obɛnzamɛ, nɛ nde obe Israɛlɛ wa ĩ zi 'bako hã wa, nɛ wa na: “Sɔɛ gɛ, mbe kpo sanga nu kpala lɛ obe Israɛlɛ ma kumu,

⁷ we duzu kɛ lɛ kpua zi mbulu dati NWA na, lɛ hã sɛ obe zɔnga benɔ 'da lɛ hã Owi wili Bɛnzamɛ na, wa ba wa gɔ. Kɔ mɛ lɛ nɛ dɛ we kpa owuko hã Obɛnzamɛ kɛ wa fè li bole gɔ ni a ge nde?”

⁸ Nɛ wa ma ngɔ aka dɛ ngbala wa we ĩ na, wi sanga obe Israɛlɛ kɛ a nɛ̀ zi tɛ mba li ngba wi dati NWA tɛ Mispa i gɔ ni a wio nde? Nɛ wa kpa na, winɔ vɛ̃ kɔ le Yabɛsi kɛ ma ngɔ nù Galadɛ ni, wa nɛ̀ zi gɔ.

⁹ Wa kpa ni do'do, nɛ wa tɔlɔ owinɔ wa tɛa ni, nɛ nde gbãlã wi kɔ le Yabɛsi kpo bina.

¹⁰ Obe Israɛlɛ kɛ wa mba li ngba wa ni, wa nɛa we zɔ ní, nɛ wa tombo onga soda koto 'bu ngɔ wa bɔa tɛ Yabɛsi, tɛ ngɔ nù Galadɛ i, takɔ wa gbɛ owinɔ kɔ le ni, owi wili do owuko do obe vɛ̃.

¹¹ Nɛ wa tɔ̃ hã wa na: “Nɛ zɔ́, mɛnɔ kɛ nɛ dɛ sɛ ma ni, ma kɛ: Nɛ gbɛ sɛ owi wilinɔ, do owukonɔ kɛ wa ĩ̀ ti wili ia ni vɛ̃, nɛ nde nɛ gbɛ́ sɛ owanɔ wa ĩ̀ ti wili gɔ ni gɔ.” Nɛ wa dɛa na mɛ ni.

¹² Wa hɔa i mɔ, nɛ wa kpa obe zɔnga kama nalɛ, kɛ wa ĩ̀ ti wi wili gɔ ni sanga owinɔ kɔ le ni. Nɛ wa kala wa, nɛ wa la do wa dɛ fala ɔi kɛ wa 'dafa ma tɛ Silo, kɛ ma ngɔ nù Kanana ni.

¹³ Nɛ 'do ki ni, nɛ obe Israɛlɛ vɛ̃ wa mba 'bɔ li ngba wa, nɛ wa tombo Owele hã Obɛnzamɛ kɛ wa yu zi, nɛ wa usu tɛ wa kɔ kpangba ta tɛ Rimoni i ni na, lo nɛ dɛ na do wa.

¹⁴ Nɛ Obɛnzamɛ wa kpula tɛ wa dɛ 'da wa i, nɛ obe Israɛlɛ wa kala obe zɔnganɔ kɛ wa gbɛ̀ zi wa tɛ Yabɛsi i gɔ ni hã wa, nɛ Obɛnzamɛ wa kala owukonɔ ni do kɛnɛ wa. Nɛ nde owukonɔ ni wa kpà zi zu wa vɛ̃ gɔ.

¹⁵ Nɛ obe Israɛlɛ wa dɛa 'bako Obɛnzamɛ, we kɛ NWA kumu Obɛnzamɛ sanga wa do'do ni,

¹⁶ Nɛ okumunɔ wa tɔ̃ na: “Fo 'bɔ owuko kɔ nu kpala Bɛnzamɛ bina. Kɔ mɛ lɛ nɛ dɛ we kpa owuko hã Obɛnzamɛ kɛ wa fè lì bole gɔ ni a ge nde?

¹⁷ Ma wè na mbe nu kpala kpo sanga nu kpala obe Israɛlɛ ma kumu gɔ. Ní a ma wia na, lɛ fa wala hã wa na, dɔ nu kpala wa kúmú gɔ.

¹⁸ Gɛnɛ kɔ na mɛ ni, nɛ nde lɛ ngboo ni, lɛ wè tɛ hã obe zɔnga benɔ 'da lɛ hã Obɛnzamɛ na, wa ba wa do wuko gɔ. We kɛ lɛ kpua zi mbulu dati nwa na, lɛ fɔmbɔ sɛ be Israɛlɛ, kɛ a hã be zɔnga be 'da a hã wi wili Bɛnzamɛ na, a ba a do wuko ni.”

¹⁹ Nɛ ta zu wa gba ngɔ ɛngga kɛ wa dɛ ma sabɛlɛ kpo kpo dati nwa tɛ Silo i ni. (Mɔ ba wala ma yula Betɛlɛ we nɛ Sikɛmɛ, nɛ nde Silo do si 'biti gba wese. Kɔ mɔ yolo Silo, nɛ nde Betɛlɛ do si ba gɔtɔ, nɛ Lɛbona do si gbãlã ngɔ.)

²⁰ Nɛ wa ba zi nu wa hã Obɛnzamɛ na, wa nɛ, hã wa usu tɛ wa kɔ fɔ vinɔnɔ,

²¹ nɛ wa 'bɔ dɛ di ni. Kɔ fala kɛ obe zɔnga Silo wa hɔ we yɔ yɔla ɛngga nde, nɛ wa gbo nza kɔ fɔ vinɔnɔ ni, nɛ wele do wele ba mbe be zɔnga sanga wa ni kpo, nɛ a si do a dɛ kɔ le 'da a, nɛ a ba a do wuko.

²² Nɛ wa tɔ̃ 'bɔ na: “'Da fala kɛ obaa be zɔnganɔ ni, tabi onya wa, wa tɛ we ala nu wa dati lɛ nde, nɛ lɛ tɔ̃ sɛ hã wa na: ‘Nɛ kɔ̃ nde, nɛ nɛ la wa, hã wa kala wukonɔ ni, we duzu kɛ owukonɔ kɛ lɛ kala zi wa li bole tɛ Yabɛsi i ni, wa kpà zi zu wa gɔ. Kɔ ɔ nɛ kɛ nɛ a nɛ hã̀ obe zɔnga benɔ 'da nɛ hã wa do kɔ sila nɛ gɔ ni, wele kpo kɔ́'dɔ́ sɛ nɛ na, nɛ yala mbuli kɛ nɛ kpua zi ma ni gɔ.’ ”

²³ Nɛ Obɛnzamɛ wa dɛa zi ɔ nɛ kɛ okumu Israɛlɛ wa tɔ̃a hã wa ni. Nɛ wele kpo kpo kpa wuko sanga obe zɔnga Silo kɛ wa yɔ zi yɔla ni. Nɛ Obɛnzamɛ wa si dɛ kɔ lenɔ 'da wa, nɛ wa 'dafa ma dɛ olo nɛ, nɛ wa ɔ dɛ di ni.

²⁴ Mba li ngba wi ni ia, nɛ tala obe Israɛlɛ wa si dɛ kɔ nu fɛlɛ kula 'da wa, do kɔ nu kpala wa. Nɛ wele do wele kpolo tɛ̃ ɛ dɛ ngɔ nùi 'da ɛ.

²⁵ Do 'da fala ni, nɛ nde nwa ngɔ obe Israɛlɛ zi bina, nɛ wele do wele dɛ zi mɛnɔ nɛ́ kɛ zã a kɔ̃a ni.