Owi kpe dati 20 - WE NU GALE 1995

Obe Israɛlɛ wa bi Owi nu kpala Bɛnzamɛ

¹ Nɛ obe Israɛlɛ wa mba ngba wa vɛ̃ dati NWA tɛ kɔ le Mispa. Wa yula zi fala do fala, yolo do tɛ Danɛ do si gbãlã ngɔ, gbaa we hɔ tɛ Bɛrseba do si ba gɔtɔ, mba do wanɔ wa yula gbaa tɛ Galadɛ, si 'biti gba wese i ni.

² Tɛ fala mba li ngba wi 'da winɔ 'da Gale ni, ogã winɔ do owinɔ kɔ nu kpala Israɛlɛ, wa nɛa vɛ̃. Nɛ nde dɛ kɔ wa ni, onga sodanɔ kɛ wa ĩ ti bi bolo do du kɔya ni, wa zi koto kama nalɛ.

³ Nɛ owi nu kpala Bɛnzamɛ wa zila na, tala obe Israɛlɛ wa mba ngba wa dɛ Mispa. Nɛ obe Israɛlɛ wa aka Levitɛ kɛ wa gbɛa zi wuke 'da a ni na, a lɔ̃ mbe tɛlɛ tɛ kɛ 'dã mɛ dɛa zi do tɛ̃ ɛ ni hã lo.

⁴ Nɛ Levitɛ ni tɔ̃ na: “Mi do wuke 'da mi, lɛ hɔa kɔ le Gibea, ngɔ nù 'da Bɛnzamɛ, takɔ lɛ ɔ dɛ di ni.

⁵ Nɛ Owi Gibea wa fa we dɛ 'dã mɔ do mi. Wa tɛa, nɛ wa linggi tɔa kɛ mi ɔa kɔ nɛ ni, nɛ wa fa we gbɛ mi. Nɛ wa ba wuko 'da mi do nga nɛ, nɛ wa ɔ do a gbaa, nɛ a fe.

⁶ Nɛ mi ba wɔlɔ a, nɛ mi 'bili sanga nɛ, nɛ mi tombo do ma hã onu kpala Israɛlɛ vɛ̃. Mba gɔ, wa dɛa gã 'dã mɔ kɛ ma do sape wena ni. Nɛ 'dã mɛ ni ma dɛa tɛ̃ ɛ dɛ ngɔ nù Israɛlɛ.

⁷ Ma wia na lɛ, obe Israɛlɛ vɛ̃, kɛ lɛ mba li ngba lɛ dɛ dɛ ni, lɛ wele we dɛ sanga tɛ ngba lɛ, nɛ lɛ lengge mɛ kɛ lɛ dɛ sɛ ma ni.”

⁸ Nɛ owinɔ vɛ̃ wa kulu ngɔ, nɛ wa tɔ̃ na: “Ma wè na, wele kpo sanga lɛ gɛ si nu tɔa 'dɛ ɛ gɔ.

⁹ Mɛ kɛ lɛ dɛ sɛ do Owi Gibea ni, ma kɛ: Lɛ to zeke, takɔ lɛ ĩ ti winɔ kɛ wa nɛ sɛ we bi Owi Gibea ni.

¹⁰ Nɛ lɛ saka owele kɔ onu kpala Israɛlɛ kpo kpo: Mɛ sɛ a kpo mbee 'bu sanga Owi wilinɔ. Nɛ owinɔ lɛ saka sɛ wa ni, wa fa sɛ nyɔngɔmɔ we nɛ nɛ 'do owi bi bolonɔ, nɛ tala owinɔ wa nɛ we bi le Gibea we hã etumbu hã wa olo gba mɔ sape kɛ wa dɛa dɛ ngɔ nù Israɛlɛ gɛ.”

¹¹ Nɛ obe Israɛlɛ vɛ̃ wa ɔa ngɔ linggamɔ kpo, nɛ wa nɛ we bi le Gibea.

¹² Nɛ tala nu kpala obe Israɛlɛ wa tumba Owele kɔ nu fɛlɛ Obɛnzamɛ vɛ̃ we aka wa na: “Dɛ do kɛ owinɔ 'da nɛ wa dɛa gba mɔ sape ní ni nɛ nde?

¹³ Ngangga ni, ma wia na, nɛ kala owi Gibea, kɛ wa dɛa 'dã mɛnɔ ni hã lɛ, takɔ lɛ gbɛ wa, hã lɛ fo 'dã mɔ kɔ obe Israɛlɛ do'do.” Nɛ Obɛnzamɛ wa bɛ̃a dɛ olo nu onya wa obe Israɛlɛ.

¹⁴ Nɛ Obɛnzamɛ wa yolo kɔ lenɔ 'da wa kpi do kpi, nɛ wa nɛ, nɛ wa mba ngba wa dɛ Gibea we bi tala onya wa obe Israɛlɛ.

¹⁵ Wa tɔlɔ zi osodanɔ kɛ wa yula kɔ olenɔ 'da Obɛnzamɛ ni vɛ̃, nɛ nde wa zi a Owele koto 'bu wa bɔa ngɔ wa gazɛlɛ. Nɛ Owi Gibea, kɛ wa tɔlɔ zi wa kɔ owinɔ ni gɔ ni, wa zi a onga soda kama sambo.

¹⁶ Sanga osodanɔ ni, Owele kama sambo wa dɛ zi to do gale kɔ̃ wa. Nɛ gɛlɛ kɔ̃ wa tɔ̃ wena. Fala kɛ wa e gbãlã ta li lasi, hã wa da, nɛ nde ma kɔ́tɔ́ gɔ.

¹⁷ Nɛ tala onu kpala Israɛlɛ wa mba zi li onga sodanɔ 'da wa koto kama nalɛ.

Obe Israɛlɛ wa bi bolo

¹⁸ Obe Israɛlɛ wa nɛa Betɛlɛ i, nɛ wa aka Gale na, a sa li nu kpala kɛ a nɛ sɛ dati we bi do Obɛnzamɛ ni hã lo. Nɛ NWA bia kɔ̃ ɛ tɛ nu kpala Yuda.

¹⁹ Nɛ fala sa do titole, nɛ obe Israɛlɛ wa nɛ, nɛ wa dɛ fala ɔi 'da wa dɔ̃ɔ do Gibea.

²⁰ 'Do nɛ, nɛ wa nɛ we bi Obɛnzamɛ. Wa nɛa, nɛ wa lɔnggɔ osodanɔ do 'biti kɛ wa nɛ bi do bole ni, nɛ wa siki li wa dɛ ngɔ le Gibea.

²¹ Nɛ Obɛnzamɛ wa zɔa ní, nɛ wa hɔ nza kɔ le Gibea we bi do obe Israɛlɛ. Nɛ do ngba soe ni, wa gbɛa zi obe Israɛlɛ Owele koto 'bu wa bɔa ngɔ wa bɔa.

^22-23 Obe Israɛlɛ wa nɛa we zɔ ní, nɛ wa ala nu wa hã NWA gbaa nɛ wese gɛ̃. Nɛ wa aka a we ĩ tabi wa wia we bi 'bɔ mbé bole do onya wa Obɛnzamɛ, tabi wa tɛ bì gɔ nde. Nɛ NWA gese hã wa na, wa nɛ bole. Osodanɔ wa nɛa we zele ní, nɛ wa kpa ngawi, nɛ wa lɔnggɔ 'bɔ dɛ kpo fala olo wa zi dati ni we bi bole.

^24-25 Nɛ wa bi 'bɔ Obɛnzamɛ, nɛ Obɛnzamɛ wa hɔ nza kɔ le Gibea 'bɔ mbé nɛ, nɛ wa gbɛ onga soda Israɛlɛ koto 'bu ngɔ wa ngbɛ'dɛ'dɛ.

²⁶ Obe Israɛlɛ wa nɛa we zɔ ní, nɛ wa la dɛ Betɛlɛ. Nɛ wa dungu nù dati nwa, he wa he kɔ̃a tɛ wa do ngba soe ni gbaa nɛ wese gɛ̃, nɛ wa nyɔngɔ mɔ gɔ Nɛ wa dɔ sa'de we dɔnggɔ do Gale, nɛ wa gbɛ 'bɔ mbe we be dɛa na.

^27-28 Do 'da fala ni, nɛ nde Sanduku Gba Tɔkɛ zi a tɛ Betɛlɛ. Nɛ Pinasi, be yaa Aroni, be 'da Elazarɛ zi a wi zɔ mɔ tɛ nɛ. Obe Israɛlɛ wa aka NWA, we ĩ tabi ma wia na, wa nɛ we bi onya wa Obɛnzamɛ 'bɔ mbé nɛ, tabi wa la wa ni iko nde. Nɛ NWA gese hã wa na: “Nɛ nɛ́! Bindɛ, nɛ mi dɛ sɛ na, nɛ nɛ ngɔ wa.”

²⁹ Na mɛ ni, nɛ obe Israɛlɛ wa nɛa, nɛ wa usu ombe osodanɔ 'da wa, nɛ wa zĩ 'do le Gibea takpa.

³⁰ Fala sa, nɛ wa nɛ we bi Obɛnzamɛ ɔ nɛ kɛnɔ zi fala bɔa dati ni. Nɛ wa lɔnggɔ osodanɔ 'da wa do tɛlɛ tɛ kɛ wa nɛ bi do bole ni, nɛ wa siki li wa dɛ ngɔ le.

³¹ Nɛ Obɛnzamɛ wa hɔa nza, nɛ wa la nyɛlɛ do le Gibea we bi do obe Israɛlɛ. Nɛ wa gbɛa obe Israɛlɛ ɔ nɛ kɛ zi dati ni. Nɛ wa gbɛa Owele 'bu wa talɛ do zamɛnɔ do ngɔ walanɔ kɛ ma la si Betɛlɛ do Gibea ni.

³² Nɛ wa lingga na, lo nɛa 'bɔ ngɔ obe Israɛlɛ ɔ nɛ kɛ zi dati ni ia. Ĩ na, obe Israɛlɛ wa yu sɔ ni, takɔ Obɛnzamɛ wa ndaka 'do wa si zamɛnɔ ndũu do le Gibea ni.

³³ Na mɛ ni, nɛ obe Israɛlɛ wa gbɔtɔ tɛ wa dɛ 'do, nɛ wa ngɛmɛ li ngba wa dɛ tɛ Bala-Tamarɛ. Nɛ nde owinɔ kɛ wa usu tɛ wa kɔ tanɔ ngɔ mbɛ nu Geba ni, wa hɔa nza, nɛ wa yu, nɛ wa bi le Gibea.

³⁴ Wa zi a onga soda koto 'bu, nɛ wa yula zi kɔ nu kpala Israɛlɛ kpo kpo vɛ̃. Wa bi bole, nɛ ma nganda wena. Nɛ nde Obɛnzamɛ wa ĩ̀ zi kɛ na ngamɔ ma kpa sɛ lo ni gɔ.

³⁵ Nɛ NWA vĩ zu Obɛnzamɛ li bole dati obe Israɛlɛ, nɛ do ngba soe ni, nɛ obe Israɛlɛ wa gbɛa osodanɔ 'da wa koto 'bu wa bɔa ngɔ wa mɔlɔ do kama kpo.

³⁶ Nɛ Obɛnzamɛ wa ĩ wá na, bole gana lo. Obe Israɛlɛ wa gbɔtɔ tɛ wa, nɛ wa la nùi hã Obɛnzamɛ, we kɛ wa gbini zi zã wa do osodanɔ kɛ wa usu tɛ wa 'do le Gibea ni na, wa bi sɛ le ni.

³⁷ Nɛ owinɔ wa usu ni wa lia kɔ le Gibea, nɛ wa ba ma, nɛ wa gbɛa owinɔ kɔ nɛ.

³⁸ Osodanɔ ni wa ba zi zã zu we do tala obe Israɛlɛ na, lo dã we, takɔ zɛ̃ nɛ ma kutu dɛ ngɔ le ni ɔ nɛ mbisa we ni.

³⁹ Fala kɛ osoda Israɛlɛ wa gbɔtɔ tɛ wa li bole dɛ 'do, nɛ Obɛnzamɛ wa gbɛa wa 'bu wa talɛ. Nɛ wa lengge na, lo nɛ sɛ 'bɔ ngɔ wa ɔ nɛ kɛ zi dati ni.

⁴⁰ Nɛ do 'da fala ni, nɛ gba zɛ̃ we ma kutu ngɔ le kpurr, we mbese tala obe Israɛlɛ kɛ wa 'bana dɛ nza i ni. Nɛ Obɛnzamɛ wa ka mɔ 'do wa, nɛ wa zɔ le 'da wa nɛ nde ma lɔ'bɔ do nyɛa we pilii.

⁴¹ Nɛ obe Israɛlɛ wa kpolo tɛ wa, nɛ wa bi Obɛnzamɛ. Nɛ Obɛnzamɛ wa zɔa ngamɛnɔ kɛ wa kpa ma ni, nɛ zu wa vĩ.

⁴² Nɛ wa yu obe Israɛlɛ, nɛ wa la si li gba zɔ̃ i. Gɛnɛ kɔ ni, nɛ nde wa yù gbaa gɔ, we duzu kɛ osoda Israɛlɛ kɛ wa hɔa nza kɔ le ni, wa gɔnɔ ti wa, nɛ wa ma ngɔ gbɛ wa.

⁴³ Wa ndaka wa tɛ gbɛ wa do li wala gɛ, nɛ nde wa là wa na, wa kpe mbe tɛ wa be sĩ gɔ. Wa ndaka wa gbaa, nɛ wa a wa tɛ mbe fala kpo, kɛ mɔ yolo Gibea, nɛ nde ma do si gbãlã ngɔ.

⁴⁴ Nɛ osoda Bɛnzamɛ koto 'bu ngɔ wa ngbɛ'dɛ'dɛ wa fia zi. Owinɔ ni vɛ̃ zi a onga soda bolo.

⁴⁵ Nɛ tala Obɛnzamɛ wa yu dɛ li gba zɔ̃, si ngɔ kpangba tanɔ li nɛ a Rimoni. Nɛ obe Israɛlɛ wa gbɛa 'bɔ Owele koto mɔlɔ sanga wa do 'da wala gɛ, nɛ wa ndaka tala owanɔ ni gbaa dɛ tɛ Gidɔmɛ, nɛ wa gbɛ 'bɔ wa Owele koto bɔa i mɔ.

⁴⁶ Osoda Bɛnzamɛ kɛ wa fia li bole do ngba soe ni zi vɛ̃ a Owele koto 'bu wa bɔa ngɔ wa mɔlɔ. Winɔ ni zi vɛ̃ a onga soda bolo.

⁴⁷ Nɛ osodanɔ kama gazɛlɛ kɛ wa yu dɛ li gba zɔ̃ i ni, wa hɔa ngɔ kpangba ta le Rimoni, nɛ wa ɔ dɛ di ni 'do zɛkɛ nalɛ.

⁴⁸ Nɛ obe Israɛlɛ wa kpolo tɛ wa ngɔ nù Bɛnzamɛ, nɛ wa la do kɔ lenɔ kpo kpo, nɛ wa bi tala Obɛnzamɛ kɛ wa 'bana zi olo wa nga ni, nɛ wa gbɛ owinɔ kɔ lenɔ ni mba do nadalamɛnɔ 'da wa vɛ̃, nɛ wa fi we tɛ lenɔ vɛ̃, nɛ ma bɛlɛ.