Owi kpe dati 2 - WE NU GALE 1995

NWA dãlã dɛ tɛ obe Israɛlɛ

¹ Anzɛ 'da nwa yula tɛ le Gilgalɛ, nɛ a hɔ tɛ Bokimɛ. Nɛ a tɔ̃ hã obe Israɛlɛ na: “Mi fua zi nɛ kɔ ngbá ngɔ nù Ezipeto, nɛ mi kã nɛ dɛ ngɔ nùi kɛ mi zonggo zi tɛ mi na, mi hã sɛ ma hã oyaa nɛ ni. Nɛ mi tɔ̃a na, mi 'dángá sɛ gba tɔkɛ kɛ mi gba zi do nɛ ni fala kpo gɔ.

² Nɛ mi ba zi nu mi hã nɛ na, nɛ tɛ gbà tɔkɔ do winɔ ngɔ nùi gɛ gɔ. Nɛ mi tɔ̃ 'bɔ hã nɛ na, nɛ gbini gbagalanɔ kɛ wa dɔ sa'denɔ ngɔ nɛ hã galenɔ 'da wa ni do'do. Nɛ nɛ dɛ̃ mbula ni gɔ we ge nde?

³ We duzu kɛ nɛ dɛa ní ni, mi tɔ̃a hã nɛ na, mi ndáká sɛ winɔ ngɔ nùi ni dati nɛ gɔ. Wa 'bana sɛ dɛ sanga nɛ, nɛ wa dɛ sɛ na, nɛ dɔnggɔ galenɔ 'da wa. Na mɛ ni, ogalenɔ 'da wa wa ɔ sɛ nɛ bili kɛ ma 'bɔ we ba nɛ ni.”

⁴ 'Da fala kɛ obe Israɛlɛ wa zila we kɛ anzɛ 'da NWA tɔ̃a hã wa ni, nɛ wa te nù ngɔ kɔ̃a.

⁵ Nɛ wa sa li fala ni na Bokimɛ, gulu nɛ na: “Owi he kɔ̃a.” Nɛ wa gbɛ osa'de dɛ fala ni we dɔnggɔ do NWA.

Yozue fia

⁶ Yozue gisa obe Israɛlɛ dɛ ngɔ nùi kɛ wa hã zi ma hã wa do mɔ wa ni, nɛ wele do wele dɛa tɔa ngɔ nùi 'dɛ ɛ.

⁷ 'Da fala kɛ Yozue 'bana zi nza ni, nɛ obe Israɛlɛ wa dɛa olo nu NWA, nɛ wa dɛa 'bɔ ni do 'da fala okpasa wi ngɔ wa wa 'bana zi nza ni. Mba gɔ, okpasa winɔ ni wa zɔa zi oɔngbamɛnɔ vɛ̃ kɛ NWA dɛa hã wa obe Israɛlɛ ni.

⁸ Yozue be 'da Nunɛ, kɛ a a wi dɛa toe 'da NWA ni fia. A nɛa we fe nɛ, nɛ nde a zi do sabɛlɛ kama do ngɔ nɛ 'bu.

⁹ Nɛ wa mi a ngɔ nùi kɛ wa ba zi hã a tɛ Timnatɛ-Herɛsɛ, kɛ ma ngɔ kalanɔ tɛ Efraimɛ ni. Mɔ yolo ngɔ kala Gasɛ, nɛ nde Timnatɛ-Herɛsɛ do si gbãlã ngɔ.

¹⁰ Nɛ ongba Yozue kɛ wa gã zi do a fala nɛ kpo ni, wa fia 'bɔ. Nɛ nde owinɔ kɛ wa kua wa dɛ 'do wa ni, wa zɔ̀ zi oɔngbamɛnɔ kɛ nwa dɛa hã obe Israɛlɛ ni gɔ, nɛ wa ĩ̀ zi ti nwa ngboo gɔ.

Obe Israɛlɛ wa bɛ̃a gɛnɛ NWA

¹¹ Obe Israɛlɛ wa dɛa zi mɔ kɛ ma dè tɛ NWA gɔ ni, nɛ wa dɔnggɔ 'bɔ okpikima gale Bala.

¹² Wa bɛ̃a gɛnɛ NWA Gale 'da oyaa wa, kɛ a fua zi wa kɔ ngbá ngɔ nù Ezipeto i ni, nɛ wa gu nù ti gele galenɔ 'da winɔ kɛ zã wa ni, nɛ wa dɔnggɔ wa, nɛ ma nɔ̃lɔ̃ zã nwa dɛ tɛ wa.

¹³ Wa bɛ̃a gɛnɛ NWA we dɔnggɔ ogale Bala do Astarte.

¹⁴ Nɛ nwa zɔa ní, nɛ zã a nɔ̃lã dɛ tɛ wa obe Israɛlɛ. Nɛ a ia wa dɛ kɔ̃ owi 'danga mɔ na, wa 'danga mɛnɔ 'da wa. Nɛ owi sɛnɛ wa wa hɔa, nɛ wa linggi wa, nɛ wa bi wa. Nɛ nde obe Israɛlɛ wa wè zi tɛ yolo dati wa gɔ.

¹⁵ 'Da fala kɛ wa nɛ zi bole ni, nɛ NWA dɛ na, Owi sɛnɛ wa wa nɛ ngɔ wa, we duzu kɛ a ɛlɛ tɛ̃ a 'do wa, ɔ nɛ kɛ a kana zi do nu a tɛ wa ni. Na mɛ ni, nɛ wa kpa 'bako wena.

¹⁶ NWA zɔa ni gbaa, nɛ a tombo owi kpe dati obe Israɛlɛ, takɔ wa kpasa wa ti kɔ Owi 'danga mɛnɔ ni.

¹⁷ Nɛ nde obe Israɛlɛ wa zɔa owi kpe dati wa ni li wa yala. Nɛ wa bɛ̃ we nu NWA, nɛ wa dɔnggɔ gele galenɔ, nɛ wa gu nù ti wa. Ĩ na, oyaa wa wa dɛa zi olo nu NWA. Nɛ nde 'da kàlà gɔ, nɛ obe Israɛlɛ wa bɛ̃a we ba wala olo oyaa wa ni.

¹⁸ 'Da fala kɛ NWA tombo wi kpe dati owinɔ 'da a ia, nɛ a yolo 'do a kɔ dungu nza 'da a vɛ̃, nɛ a kpasa Oisraɛlɛ tambala kɔ owi sɛnɛ wa. NWA kpasa obe Israɛlɛ, we duzu kɛ a zɔa ngamɛ kɛ owi sɛnɛ wa wa hã hã wa ni, nɛ a zila hia kɔ̃a 'da wa, nɛ a ĩ 'bako hã wa.

¹⁹ 'Da fala kɛ wi kpe dati obe Israɛlɛ fe, nɛ wa kpolo tɛ wa vɛ̃ dɛ ngɔ ã 'dã dɛa mɔ tɛ wa, nɛ wa dɛ 'bɔ 'danga nɛ ngɔ kɛ 'da oyaa wa zi ni. Nɛ wa ndo dɔnggɔ gele galenɔ do gu nù ti wa. Wa kɔ̃̀ zi we la fala 'dã mɛnɔ do nga zu 'da wa gɔ.

²⁰ Ma kɛ sila NWA nɔ̃lã dɛ tɛ wa, nɛ a tɔ̃ na: “Mi ba zi nu mi hã oyaa nɛ na, wa dɔnggɔ gba tɔkɛ kɛ mi gba zi do wa ni. Nɛ nde nɛ, obe zã wa, nɛ 'danga gba tɔkɛ ni do'do, we duzu kɛ nɛ zèlè we nu mi gɔ.

²¹ We duzu ki ni, owinɔ kɛ Yozue fia, nɛ nde a ndàkà wa gɔ ni, mi ndáká sɛ tɛ mɛ 'bɔ wa gɔ.

²² Wa sɛ a wi tonɔ 'da mi, wa gala sɛ mi we ĩ na, nɛ obe Israɛlɛ, nɛ kɔ̃a we nɛ 'do mi, ɔ nɛ kɛ oyaa nɛ wa dɛa zi ni, tabi nɛ kɔ̃̀ gɔ nde.”

²³ We duzu ma, NWA la zi owinɔ kɛ Yozue ndàkà wa gɔ ni, nɛ wa 'bana dɛ ngɔ nùi ni. Nɛ a wɛ̀lɛ̀ we ndaka wa do ti gɔ.