Owi kpe dati 19 - WE NU GALE 1995

Owi nu kpala Bɛnzamɛ wa dɛa gã 'dã mɔ

¹ Do 'da fala kɛ nwa ngɔ obe Israɛlɛ zi bina ni, nɛ mbe Levitɛ kpo, a ɔ zi ndũu ngɔ kalanɔ tɛ Efraimɛ i. Nɛ a ba zi wuko makango kpo tɛ Bɛtleɛmɛ, tɛ ngɔ nù Yuda.

² Nɛ wuke ni mɔ̃lɔ̃ do a, nɛ a yu, nɛ a si dɛ 'da baa a tɛ Bɛtleɛmɛ i. Nɛ a ɔa i mɔ zɛkɛ nalɛ.

³ Nɛ wili a kulu ngɔ, nɛ a nɛ 'do a we mbɔkɔ zã a, takɔ a si do a. A kulu ngɔ we nɛ ma, nɛ a kpe fala nɛ kpo do wi dɛa to 'da a, do opunda bɔa. Wa hɔa i mɔ, nɛ wuke 'da a kã a dɛ nu tɔa 'da baa a i. Baa wuke nɛa we zɔ wili kɛfɛ 'da ɛ, nɛ a gɔnɔ dati a, nɛ a dɛ gɛnɛ a do yangga.

⁴ Nɛ a 'dafa fala hã wili kɛfɛ 'da a, nɛ a ɔ dɛ 'da a ni 'do tũ talɛ. Nɛ wa nyɔngɔ mɔ, nɛ wa nɔ dɔ̃.

⁵ Do kɔ̃ tũi kɛ nalɛ ni, nɛ wa kulu ngɔ do titole belee we si nɛ. Wa kɔlɔ fala la nɛ, nɛ kɛfɛ a tɔ̃ hã a na: “Mɔ nyɔ́ngɔ́ mbe mɔ, hã mɔ kpa ngawi, sɛ nɛ mɔ la de!”

⁶ Nɛ wa dungu nù, nɛ wa nyɔngɔ mɛ, nɛ wa nɔ dɔ̀ fala nɛ kpo do kɛfɛ a. Nɛ kɛfɛ a tɔ̃ hã a na: “Mɔ ɔ́ mbe 'bɔ tũ kpo, hã lɛ dɛ yangga, sɛ nɛ bindɛ nɛ mɔ la de!”

⁷ Nɛ Levitɛ ni kulu ngɔ we la nɛ. Nɛ kɛfɛ a ngbi a, nɛ a dala nu a na, a tɛ là gɔ. Nɛ a kɔ̃a, nɛ a dungu nù, nɛ a ɔ 'bɔ mbé nɛ tũ kpo.

⁸ Ma hɔa tɛ kɔ tũi kɛ mɔlɔ, nɛ wa kulu ngɔ do titole belee we la nɛ. Nɛ kɛfɛ a tɔ̃ hã a na: “Nɛ nyɔ́ngɔ́ mbe mɔ, nɛ nɛ 'bɔ́, hã wese yɛmbɛ, sɛ nɛ nɛ la de.” Nɛ wa dungu nù, nɛ wa nyɔngɔ mɛ.

⁹ Wa nyɔngɔ mɛ ia, nɛ Levitɛ ni kulu ngɔ we la do wuke 'da a, fala nɛ kpo do wi dɛa toe 'da a ni, nɛ kɛfɛ a tɔ̃ 'bɔ hã a na: “Mɔ zɔ wese ma ngɔ gɛ̃ nɛ ia. 'Da kala di ni, nɛ fala ma tũ sɛ. Kɔ mɔ ɔ 'bɔ mbé nɛ tũ kpo, hã lɛ dɛ yangga, kɔ bindɛ, nɛ nɛ kulu ngɔ do titole belee sɛ nɛ nɛ la de.”

¹⁰ Nɛ Levitɛ bɛ̃ we ɔ 'bɔ mbé nɛ, nɛ a kulu ngɔ, do kɛnɛ a, do wi dɛa toe 'da a, nɛ wa kũ ngɔ opundanɔ 'da a bɔa, kɛ wa do mɔ dungunɔ dɛ li 'do wa ni, nɛ wa la.

¹¹ Wa la ni gbaa, nɛ wa kɔlɔ dɔ̃ɔ do le 'da Oyebuzi, kɛ li nɛ a Yeruzalɛmɛ ni, nɛ nde wese gɛ̃a ia. Nɛ wi dɛa toe tɔ̃ hã wele a na: “Lɛ nɛ́ dɛ kɔ le 'da Oyebuzinɔ i, hã lɛ ɔ dɛ di ni.”

¹² Nɛ wele a bɛ̃, nɛ a tɔ̃ na: “Lɛ ɔ́ sɛ nù dɛ kɔ le 'da ogele winɔ gɛ gɔ, we kɛ fo mbe obe Israɛlɛ di ni bina. Nɛ nde lɛ nɛ́ gbaa Gibea i.

¹³ Lɛ wɛ́lɛ́ tɛ lɛ, kɔ lɛ hɔ Gibea tabi Rama nde, nɛ lɛ ɔ do i mɔ.”

¹⁴ Wa la, nɛ wa kɔlɔ dɔ̃ɔ do Gibea, tɛ ngɔ nùi 'da Bɛnzamɛ, nɛ wese le nù.

¹⁵ Nɛ wa hɔ dɛ Gibea i we ɔ dɛ di ni. Wa hɔa dɛ 'da le i, nɛ wa dungu nù dɛ li fanda gbogbo le ni. Nɛ nde fo wi sa zi mɔ hã wa na, wa ɔ 'da ɛ bina.

¹⁶ Wa dungu nù dɛ di ni, nɛ mbe kpasa wi wili kpo a yolo safɔ 'da a, tɛ si ma do kpo kpo gɛ̃a wese tũi ni, nɛ a la do fala wa dungu nɛ ni. A zi a wi kɔ le ngɔ kalanɔ tɛ Efraimɛ, nɛ a kulu dɛ Gibea, le 'da Obɛnzamɛ.

¹⁷ A zɔa Levitɛ tɛ li fanda gbogbo le ni, nɛ a aka a na: “Mɔ yula nɛ mɔ nɛ do nde?”

¹⁸ Nɛ Levitɛ gese hã a na: “Lɛ yula Bɛtleɛmɛ, hã lɛ si dɛ fala 'da lɛ ndũu tɛ ngɔ kalanɔ Efraimɛ i ni. Nɛ nde fo wi sa mɔ hã lɛ na, lɛ nɛ we ɔ 'da ɛ bina.

¹⁹ Lɛ zɔlɔ mɔ kpo gɔ. Lɛ do zɔ̃ do nyɔngɔmɛ 'da pundanɔ 'da lɛ boe. Nɛ lɛ 'bɔ do mapa do dɔ̃ vinɔ we duzu mi, do wuke, do wi dɛa toe 'da mi boe.”

²⁰ Nɛ kpasa wi wili tɔ̃ hã a na: “Mɔ tɛ́, hã lɛ ɔ do mɔ. Mɔ a gɛnɛ ngɔ mi. Ma wè na, mɔ ɔ dɛ li fanda gɛ gɔ.”

²¹ Nɛ a si do wa dɛ nu tɔa 'da a i, nɛ a hã nyɔngɔmɔ hã opundanɔ. Nɛ a hã lì hã ogɛnɛnɔ na, wa fɔlɔ do nyanga wa, nɛ a hã 'bɔ nyɔngɔmɔ do dɔ̃ hã wa.

²² 'Da fala kɛ wa ma ngɔ nyɔngɔ mɛ ni, nɛ ombe o'dã wi wilinɔ kɔ le ni wa hɔ, nɛ wa linggi tɔa, nɛ wa ngbolo 'do nu nɛ. Nɛ wa tɔ̃ hã wele tɔa na, a fo gɛnɛ wi wili 'da a ni dɛ nza, we kɛ lo kɔ̃a we ɔ do a.

²³ Nɛ wele tɔa hɔ dɛ 'da wa nza i, nɛ a tɔ̃ hã wa na: “Aa onyae! Fala kɛ nɛ kɔ̃, nɛ nɛ tɛ dɛ̀ 'dã mɔ ɔ nɛ ki ni gɔ, we kɛ wi wili gɛ a gɛnɛ ngɔ mi. Nɛ dɛ ni, nɛ mɛ sɛ a gba mɔ sape wena.

²⁴ Nɛ zɔ̃, mi do be zɔnga be 'da mi kɛ a tɛ ĩ̀ ti wili gɔ ni boe, nɛ wi wili gɛ a tɛa fala nɛ kpo do makango 'da a. Kɔ nɛ kala wa, nɛ nɛ dɛ do wa ɔ nɛ kɛ zã nɛ kɔ̃a ni. Nɛ nde nɛ tɛ dɛ̃ gba mɔ sape do wi wili gɛ gɔ.”

²⁵ Nɛ nde owinɔ ni wa kɔ̃̀ we zele ma gɔ. Nɛ Levitɛ ni ba makango 'da a, nɛ a hã a hã wa dɛ nza i. Nɛ wa ba a do nga nɛ, nɛ wa ɔ do a gbaa, kɔ fala ma ngɔ gɔnɔ daɛ̃ɛ, nɛ wa la a dɛ nu ni.

²⁶ Wa la do'do, nɛ wuke kulu ngɔ olo wa, nɛ a nɛ, nɛ a te dɛ kpongbo nu tɔa 'da kpasa wi kɛ wili a ɔa 'da a ni. Nɛ a ɔ dɛ di ni gbaa, nɛ fala sa.

²⁷ Wili a kulu ngɔ do titole, nɛ a fi nu tɔa na, a hɔ nza we la nɛ, nɛ a ka mɔ, nɛ a zɔ wuke 'da a, nde a ɔa nù, nɛ a a kɔ a dɛ kpongbo nu tɔa ni.

²⁸ Nɛ wili a tɔ̃ hã a na: “Mɔ kúlú ngɔ, hã lɛ la!” Nɛ nde a gésé we kpo gɔ. Nɛ wili a ba wɔlɔ a, nɛ a e ma ngɔ punda, nɛ a si do ma gbaa dɛ nu tɔa 'da a i.

²⁹ A hɔa i mɔ, nɛ a ba kɔya, nɛ a gɔnɔ wɔlɔ wuke 'da a, nɛ a 'bili sanga nɛ 'bu ngɔ nɛ bɔa, nɛ a tombo 'bili nɛ dɛ kɔ onu kpala Israɛlɛ kpo kpo vɛ̃.

³⁰ Winɔ vɛ̃ kɛ wa zɔa zi ma ni, nɛ wa ɔngbɔ zi do ma ɔngba na: “Lɛ zɔ̀ mbe kuti mɔ ɔ nɛ mɛ gɛ fala kpo gɔ! Yolo do ngba soe kɛ obe Israɛlɛ wa hɔa nza ngɔ nù Ezipeto ni, mɔ ɔ nɛ mɛ gɛ dɛ̃ mbe tɛ̃ ɛ fala kpo gɔ. Kɔ ma wia na, lɛ wele we ngɔ nɛ dɛ ngbala ngba lɛ, takɔ lɛ zɔ mɛ kɛ lɛ nɛ dɛ ma ni.”