Owi kpe dati 18 - WE NU GALE 1995

Owi nu kpala Danɛ wa fa fala we dɛ do le 'da wa

¹ Do 'da fala ni, nɛ nde nwa ngɔ obe Israɛlɛ zi bina. Nɛ Owi nu kpala Danɛ wa kpà zi nù ɔ nɛ tala ogele nu kpala obe Israɛlɛ, takɔ wa ɔ nɛ gɔ. Nɛ wa yɛnggɛ zi we fa fala, takɔ wa ɔ nɛ.

² Gulu nɛ hã wa saka zi osɔ̃a tɛ wele mɔlɔ sanga wa. Nɛ wa kpa wa kɔ le Sora do Ɛsɛtaɔlɛ. Nɛ wa ba nu wa hã wa na, wa yɛnggɛ we fa dia nù. Nɛ wa la, nɛ wa hɔ ngɔ kalanɔ tɛ Efraimɛ, nɛ wa yolo nù dɔ̃ɔ do tɔa 'da Mika, nɛ wa dungu nù we kpe tɛ wa.

³ Kɔ wa tɛ kpe tɛ wa, nɛ wa zele gɛlɛ mbe be zagbãlã Levi kpo, nɛ wa ĩ ti wala gɛlɛ a. Nɛ wa nɛ, nɛ wa aka a na: “Wi tɔ̃a hã mɔ na, mɔ tɛ i nga a wio nde? Nɛ toe mɔ dɛ dɛ ni a to ge nde?”

⁴ Nɛ be zagbãlã ni gese na: “Mika hã to hã mi. Mi a nganga 'da a, nɛ a futa mi futa.”

⁵ Nɛ wa tɔ̃ hã a na: “Mɔ kɔ̃ nde, nɛ mɔ aka Gale, takɔ lɛ ĩ tabi yali 'da lɛ ma Sɔkpɔ sɛ do dia nɛ nde?”

⁶ Nɛ nganga ni tɔ̃ hã wa na: “Ma Sɔkpɔ sɛ do dia nɛ! Kili tɛ bà nɛ gɔ! NWA fala nɛ kpo do nɛ kɔ yali 'da nɛ.”

⁷ Owinɔ mɔlɔ ni wa zila ni, nɛ wa kulu ngɔ, nɛ wa la gbaa dɛ tɛ le Laisi. Nɛ wa zɔa na owi kɔ le ni, wa dungu do dia nɛ kpasaa ɔ nɛ kɛ 'da owi kɔ gã le Sidoni ni. Wa do kili bina, wa a wi gɛ̃a sila, nɛ dungu fio kɔ le 'da wa boe. Wa kpá we do wele gɔ. Nɛ mɔ kpo zɔlɔ 'da wa gɔ. Wa ɔ zi a nyɛla do Sidoni, nɛ wa kɔ̃ zi we hɔ 'da ogele wele gɔ.

⁸ Owinɔ mɔlɔ ni wa si dɛ tɛ Sora do Ɛsɛtaɔlɛ i, nɛ onya wa wa aka wa we mɛnɔ wa zɔa kɔla yali 'da wa ni.

⁹ Nɛ wa tɔ̃ hã wa na: “Lɛ nɛ́, hã lɛ bi owi Laisi. Lɛ zɔa nùi 'da wa, nde ma de wena. Nɛ tɛ dùngù dɛ dɛ iko gɔ! Nɛ kùlù ngɔ, hã lɛ nɛ we bi le ni.

¹⁰ Fala kɛ nɛ hɔ i mɔ, nɛ nɛ kpa sɛ Owele kɛ ta zu wa mbe ngɔ bolo fala kpo bina ni. Nùi 'da wa ma gã wena, nɛ mɔ kpo zɔlɔ 'da wa gɔ. Kɔ Gale a 'dɔlɔ sɛ ma hã nɛ.”

¹¹ Odanɛ wa zila ni do'do, nɛ owi wili kama gazɛlɛ sanga wa ni, wa kulu ngɔ kɔ le Sora do Ɛsɛtaɔlɛ, nɛ wa kala mɔ bolo dɛ kɔ̃ wa,

¹² nɛ wa nɛ, nɛ wa dɛ fala ɔi 'da wa ngɔ nù Yuda. Fala kɛ mɔ a kɔ le Kiriatɛ-Yearimɛ, nɛ nde fala ɔi ni ma do si ba gɔtɔ. Wa sa li fala ni na, Mahane-Danɛ, gulu nɛ na, “Fala ɔi 'da Danɛ.” Wa 'bana tɛ sa li fala ni ní tia do sɔɛ gɛ.

¹³ Nɛ wa kulu ngɔ di ni, nɛ wa la si ngɔ kalanɔ tɛ Efraimɛ, nɛ wa kɔlɔ dɔ̃ɔ do tɔa 'da Mika.

¹⁴ Nɛ owinɔ mɔlɔ kɛ wa nɛa zi we zɔ le Laisi dati ni, wa tɔ̃ hã ongba wa na: “Mbe tɔa kpo kɔ tɔanɔ dɛ gɛ, mɔ le kɔ nɛ, nɛ mɔ kpa kpikima, do mbe gele osɛa te kɛ zã nɛ. Nɛ mbe kpikima kpo, wa nãlã fɛ̃a mɔ bolo tɛ nɛ vɛ̃. Ní a nɛ kɔ̃a na, lɛ dɛ nɛ nde?”

¹⁵ Nɛ owinɔ mɔlɔ ni wa nɛ nu tɔa 'da Mika i, nɛ wa le, nɛ wa kpa be zagbãlã Levi, nɛ wa aka a ngɔ dungi 'da a.

¹⁶ Do 'da fala ni, nɛ nde Odanɛ kama gazɛlɛ ni wa yolo dɛ 'do nu ngboe do mɔ bi bolonɔ 'bakaka dɛ kɔ̃ wa ni.

¹⁷ Nɛ owinɔ mɔlɔ ni wa le dɛ kɔ tɔa i, nɛ wa kala ngɔ gili kpikimanɔ kpi do kpi, mba do kɛ wa nãlã fɛ̃a mɔ bole tɛ nɛ ni. Nɛ nganga yolo dɛ 'do nu ngbo ni, fala nɛ kpo do owinɔ kama gazɛlɛ do mɔ bi do bolonɔ dɛ kɔ̃ wa ni.

¹⁸ Fala kɛ nganga nɛa we zɔ na, winɔ ni wa lia tɔa 'da Mika i, nɛ wa kala okpikimanɔ do sɛa tenɔ, mba do kɛ wa nãlã fɛ̃a mɔ bole tɛ nɛ ni, nɛ a aka wa na: “Kɛ nɛ dɛ ni a ge nde?”

¹⁹ Nɛ wa gese hã a na: “Mɔ kpé nu mɔ! Mɔ tɛ wèlè we gɔ! Mɔ kpé do lɛ, hã mɔ dungu nganga kɔ nu kpala lɛ. Sanga kɛ na, mɔ dungu nganga kɔ nu fɛlɛ kula mɔ wele kpo iko, do kɛ na, mɔ dungu nganga kɔ mbe nu kpala Israɛlɛ kpo ni, kɛ mɔ kɔ̃a ni a ki nge nde?”

²⁰ Nɛ nganga zila we wa tɔ̃a hã ni, nɛ a dɛ yangga wena, nɛ a kala okpikimanɔ do osɛa tenɔ, nɛ a le dɛ sanga osodanɔ ni, nɛ a la do wa.

²¹ Odanɛ wa a ngba wa li wala tɛ la nɛ, nɛ wa kpe obenɔ, do nadalamɛnɔ, do otolenɔ dati.

²² Wa là nyɛlɛ do tɔa 'da Mika gɔ, nɛ Mika do owinɔ kɛ zã tɔa 'da a ni, wa mba li ngba wa, nɛ wa ma ngɔ ndaka 'do wa.

²³ Nɛ wa kpa wa, nɛ wa zɛ nu wa zu wa. Nɛ Odanɛ wa kifi tɛ wa, nɛ wa aka Mika na: “Dɛ nɛ nde? Gulu kɛ nɛ mba ngba nɛ, nɛ nɛ tɛ 'do lɛ we ge nde?”

²⁴ Nɛ Mika gese na: “Nɛ kala okpikimanɔ kɛ mi sɛa ni, nɛ nɛ ba 'bɔ nganga 'da mi, nɛ nɛ la do a, nɛ nɛ là mɔ kpo hã mi gɔ. Nɛ dɛ do kɛ nɛ aka 'bɔ mi ni nɛ nde?”

²⁵ Nɛ wa tɔ̃ hã a na: “Mɔ lá fala we nu mɔ ni, da dɛ kɔ zã lɛ nɔ̃lɔ̃, hã lɛ bi nɛ gɔ. Lɛ dɛ ni, nɛ mɔ do owi nu fɛlɛ mɔ vɛ̃, nɛ fe sɛ mba iko!” Nɛ wa la.

²⁶ Mika zɔa na wa nganda nɛa ngɔ a ni, nɛ a kpolo tɛ̃ a, nɛ a si dɛ nu tɔa 'da a i.

Odanɛ wa ba le Laisi

²⁷ Nɛ Odanɛ wa la do kpikimanɔ kɛ Mika sɛa ni, do nganga 'da a, nɛ wa ba wala le Laisi, kɛ owi kɔ nɛ wa a wi gɛ̃a sila, nɛ ta zu wa ngɔ bolo bina ni. Odanɛ wa hɔa i mɔ, nɛ wa bi le, nɛ wa gbɛ winɔ kɔ nɛ, nɛ wa dɔ le 'da wa.

²⁸ Nɛ wele kpo tɛ̀ zi mbe we gbaka owinɔ ni gɔ, we duzu kɛ le 'da wa ma kɔ gbangɔlɔ̃ tɛ Bɛtɛ-Rɛhɔbɛ, nɛ ma zi a nyɛla do gã le Sidoni, nɛ wa hɔ́ zi 'bɔ 'da ogele wele gɔ. Owi nu kpala Danɛ wa dɛa mbé le dɛ di ni, nɛ wa ɔ nɛ.

²⁹ Nɛ wa kpolo li le Laisi, nɛ wa e li Danɛ, kɛ mɛ a li yaa wa, be zã Yakɔbɔ ni dɛ zu nɛ.

³⁰ Wa ia zi 'bɔ kpikima 'da Mika dɛ kɔ le ni, takɔ wa dɔnggɔ ma. Nɛ wa e Yonatanɛ do nganga kɔ nu kpala wa. Yonatanɛ zi a be yaa Mɔizɛ, nɛ a a be 'da Gɛrsɔmɛ. Obe yaa Yonatanɛ wa dɛa zi to nganga gbaa we hɔ do ngba soe kɛ owinɔ wa la zi kɔlɔ 'duli ni.

³¹ Kpikima 'da Mika 'bana zi dɛ di ni kɔ sabɛlɛnɔ vɛ̃ kɛ tɔa Tande 'da Gale ma zi tɛ kɔ le Silo ni.