Owi kpe dati 17 - WE NU GALE 1995

Mika dɛa kpikima

¹ Mbe wi wili kpo zi ngɔ kalanɔ tɛ Efraimɛ, li a a Mika.

² Nɛ mbe tũ kpo, nɛ a tɔ̃ hã naa a na: “Mbe wele zũ zi dɛ mbili koto do kama kpo kɔ̃ mɔ, nɛ mɔ fɔmba wi zũi ni dɛ li mi. Kɔ mɔ zɔ́ mbili ni, ma kɛ. Wi a mi hã mi zũ zi ma.” Nɛ naa a tɔ̃ hã a na: “Be 'daa, e kɔ NWA wele nu ɛ tɛ mɔ!”

³ Nɛ Mika gese mbili kote do kama kpo ni hã naa ɛ, nɛ naa a tɔ̃ hã a na: “Mi kɔ̃a we kpo mbulu we hã mbili gɛ hã NWA, lɛ oso ma do kpikima kɛ wa dɛa ma do fɛ̃a mɔ bolo ni we e kɔ tɔa 'da mɔ. Na mɛ ni, nɛ mbili ma gese sɛ tɛ̃ ɛ hã mɔ.”

⁴ Nɛ Mika gisa mbili ni hã naa ɛ, nɛ naa a kala kama bɔa kɔ nɛ, nɛ a hã ma hã wi dɛ dula. Nɛ wi dɛ dula ni 'bili te, nɛ a sɛ ma do kpikima, nɛ a nãlã fɛ̃a mɔ bolo tɛ nɛ vɛ̃. Nɛ wa e ma kɔ tɔa 'da Mika.

⁵ Ĩ na, Mika zi do fala dɔnggɔ do gale 'da a boe. Nɛ a dɛa 'bɔ mbe kpikima do ombe gele sɛa te, nɛ a zĩ ma kɛ zã kpikima fɛ̃a mɔ bole ni. Nɛ a saka mbe kpo kɔ obenɔ 'da a, nɛ a e a do nganga 'da a.

⁶ Do 'da fala ni, nɛ nde nwa ngɔ obe Israɛlɛ zi bina. Nɛ wele do wele dɛ zi nɛ́ kɛ zã a kɔ̃a ni.

⁷ Do ngba soe ni, nɛ nde be zagbãlã kpo kɔ nu fɛlɛ Levi, a ɔ zi tɛ Bɛtleɛmɛ, tɛ ngɔ nù Yuda.

⁸ Nɛ mbe tũ kpo, nɛ a kulu ngɔ Bɛtleɛmɛ i, nɛ a yɛnggɛ we fa fala we ɔ nɛ. A yɛngga gbaa, nɛ a hɔ tɛ tɔa 'da Mika, kɛ ma ngɔ kalanɔ tɛ Efraimɛ i ni.

⁹ Nɛ Mika aka a na: “Mɔ yula do nde?” Nɛ a gese na: “Mi a be zã Levi, kɔ le Bɛtleɛmɛ, kɛ ma ngɔ nù Yuda, kɔ mi fa fala we ɔ nɛ.”

¹⁰ Nɛ Mika tɔ̃ hã a na: “Mɔ 'báná dɛ 'da mi gɛ. Mi kɔ̃a we e mɔ do nganga kɔ nu fɛlɛ kula 'da mi. Nɛ kɔ sabɛlɛ kpo, nɛ mi hã sɛ mbili 'bu hã mɔ, do otulu we he'de nɛ, do nyɔngɔmɔ we nyɔngɔ nɛ.”

¹¹ Nɛ be zã Levi ni kɔ̃, nɛ a le to nganga ti kɔ̃ Mika. Nɛ Mika dɛa zi a ɔ nɛ be 'da a ngboo ni.

¹² Mika ia a do nganga 'da a, nɛ a hã 'bɔ fala ɔi hã a dɛ kɔ tɔa 'da a ni.

¹³ Nɛ a tɔ̃ na: “Mi kpa mbe be zã Levi kpo, nɛ mi ia a do nganga 'da mi. Kɔ mi ĩ na, nwa a dɛ sɛ dia mɔ hã mi.”