Owi kpe dati 16 - WE NU GALE 1995

Samsoni nɛa tɛ Gaza

¹ Mbe tũ kpo, nɛ Samsoni nɛa kɔ le 'da Ofilisti, tɛ Gaza. A hɔa i mɔ, nɛ a zɔ mbe wuko ndumba kpo, nɛ a de tɛ̃ a, nɛ Samsoni le tɔa 'da a, nɛ a ɔ dɛ 'da a ni.

² Nɛ owi Gaza wa zele we kɛ Samsoni hɔa kɔ le 'da wa ni, nɛ wa mba ngba wa, nɛ wa nɛ, nɛ wa linggi fala a ɔa nɛ ni vɛ̃, nɛ wa a 'bɔ owele we zɔ mɔ tɛ nu ngbo le. Nɛ nde wa bà a do tũi ni gɔ, we kɛ wa lengge zi na, fala sa titole, sɛ nɛ lo gbɛ a de.

³ Samsoni ɔa ni gbaa, nɛ ma hɔ gbogbo zã tũi, nɛ a kulu ngɔ, nɛ a la dɛ nu ngbo le i. A hɔa i mɔ, nɛ a te tɛ gbangga nu ngboe ni, nɛ a ɛ̃lɛ̃ ma, nɛ fungula gbini, nɛ a zu'du te nu ngboe. 'Do nɛ, nɛ a kala ma vɛ̃, nɛ a zɛ zu 'baka a, nɛ a la do ma, nɛ a a ma ngɔ kala ma ka mɔ dɛ li ngbɛ ɛ do le Hebroni ni.

Dalila vũ to tɛ Samsoni

⁴ 'Do ki ni, nɛ Samsoni zɔ mbe wuko Filisti kpo, nɛ a de tɛ̃ a. Li wuke ni a Dalila, nɛ a ɔ zi kɔ gbangɔlɔ̃ Sorɛkɛ.

⁵ Nɛ onwa Filisti mɔlɔ wa tɛa, nɛ wa zɔ Dalila, nɛ wa tɔ̃ hã a na: “Mɔ ɔkɔlɔ Samsoni, hã a be fala kɛ gã ngawi 'da a ma yolo nɛ ni. Nɛ a be 'bɔ mɛ kɛ lɛ wia we dɛ nɛ na, lɛ nɛ ngɔ a, takɔ lɛ ba a hã lɛ ɛnzɛ a, hã lɛ fo ngawi 'da a ni. Fala kɛ mɔ dɛ ní, nɛ wele kpo kpo kɔ lɛ gɛ, a hã sɛ mbili koto do kama kpo hã mɔ.”

⁶ Dalila zila ni, nɛ a nɛ, nɛ a aka Samsoni na: “Fala kɛ mɔ kɔ̃, nɛ mɔ be fala gã ngawi 'da mɔ yolo nɛ ni hã mi, nɛ mɔ be 'bɔ mɛ wele wia we ɛnzɛ do mɔ, takɔ a nɛ ngɔ mɔ ni.”

⁷ Nɛ Samsoni gese na: “Fala kɛ wa ɛnzɛ mi do mbé fɛlɛ nzabele kɛ ma tɛ kòlò gɔ ni dɛ ngɔ ngbɛ ɛ sambo, nɛ ngawi 'da mi ma e nɛ, nɛ mi ɔ sɛ nɛ tala winɔ vɛ̃ ni.”

⁸ Nɛ onwa Filisti wa fa mbé fɛlɛ nzabele sambo kɛ ma tɛ kòlò gɔ ni, nɛ wa tɛ do ma hã Dalila, nɛ a ɛnzɛ do Samsoni.

⁹ Fala kɛ Dalila tɛ ɛnzɛ a ni, nɛ nde a usu sɔ mbɔkɔ Owele dɛ kɔ tɔa ni ia. A nɛa we ɛnzɛ a do'do, nɛ a he mɔ na: “Aa Samsoni, Ofilisti wa hɔa ngɔ mɔ gɛ!” Nɛ Samsoni kulu ngɔ, nɛ a gɔnɔ fɛlɛnɔ tɛ̃ a ni, ɔ nɛ kɛ we bɛlɛ ma bɛla ni. Na mɛ ni, nɛ wa ĩ̀ 'bɔ ti fala kɛ Gã ngawi 'da a yolo nɛ ni gɔ.

¹⁰ Nɛ Dalila tɔ̃ hã Samsoni na: “Mɔ mɔmɔ mi mɔma, we kɛ mɔ 'bili bɛlɛ hã mi. Kɔ mi aka mɔ na, mɔ be tɛlɛ tɛ kɛ wa wia we ɛnzɛ do mɔ ni hã mi.”

¹¹ Nɛ Samsoni tɔ̃ hã a na: “Fala kɛ wa ɛnzɛ mi do mbé fɛlɛ kɛ wele tɛ dɛ̃ ma do mɔ gɔ ni, nɛ ngawi 'da mi ma e nɛ, nɛ mi ɔ sɛ nɛ tala winɔ vɛ̃ ni.”

¹² Nɛ Dalila kala mbé fɛlɛnɔ ni, nɛ a ɛnzɛ do a. 'Da fala ni nɛ nde a usu sɔ mbɔkɔ owinɔ dɛ kɔ tɔa 'da a ni ia. Nɛ a he mɔ na: “Aa Samsoni, Ofilisti wa hɔa ngɔ mɔ gɛ!” Nɛ Samsoni kulu ngɔ, nɛ a gɔnɔ fɛlɛnɔ kɛ wa ɛnzɛ do 'baka a ni, ɔ nɛ be mbɔkɔ fɛlɛ iko ni.

¹³ Nɛ Dalila tɔ̃ hã a na: “Mɔ yɔndɔ mi yɔnda, we kɛ mɔ 'bili bɛlɛ hã mi. Kɔ mɔ tɔ̃ wá tɛlɛ tɛ kɛ wa wia we ɛnzɛ do mɔ ni hã mi.” Nɛ Samsoni gese hã a na: “Mɔ kálá mbɔkɔ dɛa mili zu mi sambo gɛ, nɛ mɔ yulu dɛ kɔ mɔ ngbɔ do tulunɔ, nɛ mɔ ngbɔ ma, ɔ nɛ kɛ wa ngbɔ do tulu ni, nɛ ngawi 'da mi ma e nɛ, nɛ mi ɔ sɛ nɛ tala winɔ vɛ̃ ni.”

¹⁴ 'Do nɛ, nɛ Dalila ɔkɔlɔ Samsoni, nɛ a ɔ yala, nɛ a kala dɛa zu a sambo ni, nɛ a yulu ma dɛ kɔ mɛ kɛ wa ngbɔ do tulunɔ ni, nɛ a ngbɔ ma vɛ̃. 'Do nɛ, nɛ a he mɔ na: “Aa Samsoni, Ofilisti wa hɔa ngɔ mɔ gɛ!” Nɛ Samsoni kulu ngɔ, nɛ a gbɔtɔ mili zu a tɛ li mɔ ngbɔ tulunɔ ni, nɛ mɛ ni yala vɛ̃.

¹⁵ Nɛ Dalila tɔ̃ hã a na: “Fala kɛ mɔ tɔ̃ na mɔ kɔ̃a gɛnɛ mi kɔ̃a, nɛ nde mɔ 'bili bɛlɛ iko. Mɔ mɔma mi fala talɛ, nɛ mɔ bɛ̃a we be fala kɛ gã ngawi 'da mɔ yolo nɛ ni hã mi.”

¹⁶ Tũ kpo kpo, nɛ Dalila zi tɛ he dɛ tɛ Samsoni, tɛ ala nu a hã a ni gbaa, nɛ Samsoni mbɔka, nɛ a wè zi 'bɔ tɛ kunu sila a gɔ.

¹⁷ Nɛ a be wá gulu fala kɛ gã ngawi 'da a yolo nɛ ni vɛ̃ hã Dalila na: “Kɛ gbaa gɛ, wa kɛ̀lɛ̀ mbe mili zu mi fala kpo gɔ. We kɛ, dati kɛ na wa ko mi ni, nɛ wa hã zi mi hã Gale na, mi ɔ wi 'da a. Kɔ fala kɛ nɛ kɛlɛ mili zu mi, nɛ ngawi 'da mi ma e nɛ, nɛ mi ɔ sɛ nɛ tala winɔ vɛ̃ ni.”

¹⁸ Dalila nɛa we zele ní, nɛ a ĩ na we Samsoni tɔ̃a hã ɛ gɛ a gbãlã we ngboo. Nɛ a tombo hã onwa Filisti na wa tɛ, we duzu kɛ Samsoni bia gulu fala kɛ ngawi 'da a yolo nɛ ni ia. Nɛ nwanɔ ni wa nɛ 'da Dalila i do mbili kɛ wa tɔ̃a zi we nɛ ni hã a.

¹⁹ Nɛ Dalila ɔkɔlɔ Samsoni, nɛ a ɔ yala dɛ ngɔ ku a. Nɛ Dalila sa mɔ hã wi wili kpo, nɛ a tɛ, nɛ a 'bili dɛa zu a sambo ni. Wa 'bili ma do'do, nɛ ngawi 'da Samsoni e.

²⁰ Nɛ Dalila he mɔ na: “Aa Samsoni, Ofilisti wa hɔa ngɔ mɔ gɛ!” Nɛ Samsoni kulu ngɔ, nɛ a lengge na, ɛ nɛ sɛ ngɔ wa, nɛ ɛ hɔ nza kɔ̃ wa, ɔ nɛ kɛ ɛ dɛ zi dati ni. Na mɛ ni, nɛ nde a ĩ̀ kɛ na, nwa la fala gala ɛ do'do ni gɔ.

²¹ Nɛ Ofilisti wa ba Samsoni, nɛ wa o li a bɔa nɛ, nɛ wa la do a dɛ kɔ le Gaza i, nɛ wa ɛnzɛ a do fɛlɛ dɔkpɔ kɛ wa dɛa ma do tũ mɔ bolo ni. Nɛ wa fi a bɔlɔkɔ hé ngbá ni, nɛ wa e a do wi Sɔkpɔ gbãlã ble.

²² Nɛ mili zu a kɛ wa 'bili zi ma ni, ma ma ngɔ dulu dɛ olo nɛ.

Samsoni dɛa tala gbali dɛa mɔ, nɛ a fe

²³ Mbe tũ kpo, nɛ onwa Filisti wa dɛa gbali mɔ, nɛ wa mba ngba wa we dɛ yangga, nɛ wa hã 'bɔ do dɔnggamɔ hã gale 'da wa Dagoni, we kɛ wa nɛa ngɔ Samsoni ni. Nɛ wa ga zuma na: “Gale 'da lɛ a 'dɔlɔ wi sɛnɛ lɛ, Samsoni hã lɛ ia.”

²⁴ Obe Filisti wa zɔa kpikima gale 'da wa, nɛ wa he mɔ na: “Wi sɛnɛ lɛ, Samsoni, a 'danga le 'da lɛ, nɛ a gbɛ lɛ wena, nɛ nde gale 'da lɛ a 'dɔlɔ a hã lɛ.”

²⁵ Nɛ wa dɛ zi yangga wena, nɛ wa tɔ̃ na, Owele wa ba Samsoni dɛ nza, hã lo aka mbe nu a sɛ. Nɛ wa gbɔtɔ a kɔ bɔlɔkɔ i dɛ nza, nɛ wa e a dɛ ngbala bɛlɛduma tɔa gale 'da wa ni, nɛ winɔ wa ma ngɔ soko a, nɛ wa tɛ mɔmɔ a gbɔlɔ gbɔlɔ gbɔlɔ.

²⁶ Nɛ Samsoni tɔ̃ hã bulu be ba te ti a ni na: “Mɔ 'bé mi hã mɔ e mi tɛ bɛlɛduma kɛ ma ngo tɔa gɛ ni, hã mi lɛ tɛ mi do nɛ.”

²⁷ 'Da fala ni nɛ nde, tɔa dunu do Owele, Owi wili do owuko. Nɛ onwa Filisti mɔlɔ ni wa zi tɛ mɛ 'bɔ di ni boe. Nɛ Owele kɔlɔ dɔ̃ɔ do koto talɛ, wa kũ zi dɛ ngɔ tɔa i we zɔ Samsoni, takɔ wa mɔmɔ a.

²⁸ Nɛ Samsoni ala nu a hã nwa na: “Aa NWA Gale, mɔ kɔ̃, nɛ mɔ lengge do mi. Mɔ hã 'bɔ mbé ngawi hã mi. Mɔ dɛ na mɛ ni, nɛ mi bili sɛ nu gbã kɛ Ofilisti wa ua li mi bɔa nɛ ni hã wa.”

²⁹ Nɛ Samsoni ɛfɛ kɔ̃ ɛ, nɛ a tamba tɛ bɛlɛdumanɔ bɔa kɛ ma dɛ gbogbo tɔa, nɛ tɔa yolo we nɛ ni. Nɛ a 'be mbe kpo do ngawili kɔ̃ a, nɛ a 'be mbe nɛ do gale kɔ̃ a, nɛ a miki ma.

³⁰ Nɛ a he mɔ na: “E kɔ mi fe do Ofilisti fala nɛ kpo!” Nɛ a miki tenɔ ni do ngawi 'da a vɛ̃, nɛ tɔa ma gbini, nɛ ma zɛ Onwanɔ do owanɔ vɛ̃ kɛ wa zi kɔ nɛ ni. Nɛ owinɔ kɛ wa fia fala nɛ kpo do Samsoni ni, wa dɛlɛ nɛa ngɔ owinɔ kɛ a gbɛa zi wa fala kɛ a 'bana do tunu li a ni.

³¹ Nɛ onya a do nu fɛlɛ kula 'da a, wa tɛa, nɛ wa ba wɔlɔ a. Nɛ wa si do ma, nɛ wa mi a ngɔ mabi'donggo 'da baa a Manoa, kɛ ma tɛ ngbala le Sora do Ɛsɛtaɔlɛ ni. Samsoni kpia zi dati obe Israɛlɛ 'do 'bu sabɛlɛ bɔa.