Owi kpe dati 15 - WE NU GALE 1995

Samsoni bili nu gbã hã Ofilisti

¹ 'Do nɛ là tũ dɛlɛ gɔ, nɛ Samsoni ba be dua, nɛ a nɛ nɛ we zɔ do wuke 'da a. Ngba soe ni zi a zɔlɔ kala kpalɛ ble. A hɔa i mɔ, nɛ a kpa kɛfɛ a wi wili wele kɛ, nɛ a tɔ̃ hã a na: “Mi nɛ le kɔ 'bili tɔa 'da wuke 'da mi!” Nɛ kɛfɛ a bɛ̃.

² Nɛ a tɔ̃ hã Samsoni na: “Mi lingga na, mɔ kɔ̃̀ 'bɔ gɛnɛ wuke 'da mɔ gɔ, kɔ mi hã a hã be zagbãlã wele kɛ a zɔ zi mɔ tɛ mɔ dɔɛ ni na, a ba a do kɛnɛ a. Nɛ nde boko nya a 'do gɛ boe, nɛ a dia zɔnga nɛa ngɔ a. Kɔ mɔ kɔ̃ nde, nɛ mɔ ba wele ki ni olo a.”

³ Nɛ Samsoni gese hã a na: “Di dɔ̃ ni, mi nɛ dɛ Ofilisti 'danga wena, hã da dɛ kɔ wele kpo kɔ́'dɔ́ mi we nɛ gɔ.”

⁴ Nɛ Samsoni la, nɛ a ndaka ogbatã, nɛ a kala wa kama talɛ, nɛ a fa tanda, nɛ a kala ogbatãnɔ ni bɔa bɔa, nɛ a kifi do wa dɛ tɛ ngbɛ ɛ, nɛ a ɛnzɛ tanda dɛ te'de,

⁵ nɛ a tũ ma, nɛ a da kɔ̃ a tɛ wa, nɛ wa pɛsɛ do kɔ fɔ blenɔ 'da Ofilisti vɛ̃. Nɛ nyɛa we ma te tɛ lã ble kɛ wa sɛlɛ ia ni, do kɛnɔ li te nɛ ni, nɛ ma te 'bɔ tɛ fɔ olivɛnɔ.

⁶ Nɛ Ofilisti wa aka na: “Wi dɛa mɛ gɛ a wio nde?” Nɛ wa gese hã wa na: “Wi a Samsoni, a a dɛa mɛ ni, we duzu kɛ kɛfɛ a wi Timna, a ba wuke kɔ̃ a, nɛ a hã a hã be zagbãlã wele kɛ a zɔ zi mɔ tɛ mɔ dɔɛ ni.” Nɛ Ofilisti wa nɛ, nɛ wa fi we tɛ tɔa 'da kɛfɛ Samsoni, nɛ wa dɔ a do be 'da a, nɛ wa ngutu.

⁷ Nɛ Samsoni tɔ̃ hã Ofilisti na: “We duzu kɛ nɛ dɛa ní ni, mi dɛ sɛ tɛ mɛ 'bɔ nɛ́ kɛ nɛ dɛa ni. Fala kɛ mi bìlì nu gbã mɛ nɛ dɛa gɛ gɔ, nɛ nde sila mi ma gɛ̃ sɛ gɔ.”

⁸ Nɛ Samsoni bi wa, nɛ a gbɛ wa wena. Nɛ a la dɛ Etamɛ, nɛ a ɔ dɛ kɔ kpangba ta di ni ni.

Samsoni bi Ofilisti do gbãlã 'bangga punda

⁹ Ofilisti wa tɛa, nɛ wa 'dafa fala ɔi 'da wa ngɔ nù Yuda, nɛ wa bi le Lehi.

¹⁰ Nɛ Oyuda wa aka wa na: “Gulu kɛ nɛ tɛa we bi lɛ we ge nde?” Nɛ Ofilisti wa gese na: “Lɛ tɛa we bi nɛ, takɔ lɛ ba Samsoni we bili nu gbã mɛ a dɛa do lɛ ni hã a.”

¹¹ Oyuda wa nɛa we zele ní, nɛ wa tombo Owi wili koto talɛ sanga wa ni kɔ kpangba ta tɛ Etamɛ i, nɛ wa tɔ̃ hã Samsoni na: “Mɔ ĩ vɛ̃ na, Ofilisti wa ia mbula ngɔ lɛ. Kɔ mɔ ĩ ti zɛlɛ tɛ mɔ hã ma hã lɛ ni nde?” Nɛ Samsoni gese hã winɔ ni na: “Mi bili a nu gbã mɛ kɛ wa dɛa do mi ni.”

¹² Nɛ wa tɔ̃ hã a na: “Lɛ tɛa we ɛnzɛ mɔ, we si do mɔ hã Ofilisti.” Nɛ Samsoni gese hã wa na: “Nɛ zónggó tɛ nɛ hã mi na, nɛ gbɛ́ sɛ mi gɔ.”

¹³ Nɛ wa gese hã a na: “Lɛ gbɛ́ sɛ mɔ gɔ, nɛ nde lɛ kɔ̃a we ɛnzɛ mɔ, nɛ lɛ 'dɔlɔ mɔ hã wa.” Nɛ wa ba a, nɛ wa ɛnzɛ a do mbé gbãlã fɛlɛ bɔa, nɛ wa hɔ nza do a kɔ kpangba ta ni, nɛ wa si do a.

¹⁴ Wa hɔa tɛ Lehi i, nɛ Ofilisti wa gɔnɔ dati a, nɛ wa zɛ nu wa do yangga vɛ̃. Nɛ Hi Wi 'da nwa lia kɔ Samsoni, nɛ a gɔnɔ fɛlɛnɔ wa ɛnzɛ do 'baka a do kɔ̃ a ni, ɔ nɛ wa dɔa ma do we ni.

¹⁵ Nɛ a kpa mbé gbãlã 'bangga punda kɛ wa gbɛa a 'da kala gɔ ni, nɛ a ba ma dɛ kɔ̃ a, nɛ a gbɛ do Owi wili koto kpo.

¹⁶ Nɛ a dɔnggɔ tɛ̃ a na: “Mi ba 'bangga punda, nɛ mi gbɛ do Owi wili koto kpo. Mi ba 'bangga punda, nɛ mi ngɛmɛ do wɔlɔ Owele dɛ ngɔ ngbɛ ɛ.”

¹⁷ 'Do wila we ni, nɛ a da 'bangga punda ni nù. Gulu nɛ a wa sa li fala ni na, Ramatɛ-Lehi. Gulu nɛ na: “Kala 'bangga sa'de.”

¹⁸ 'Do nɛ, nɛ wɔ lì ba Samsoni wena, nɛ a ala nu a hã NWA Gale na, a gala ɛ. Nɛ a tɔ̃ na: “Aa Gale, wi a mɔ hã mɔ dɛa na, mi nɛ ngɔ owi sɛnɛ mi. Nɛ mɔ kɔ̃a na mi fe wɔ lì, nɛ Ofilisti kɛ wa a omanda'ba gɛ, wa ba mi dɛ fala gɛ kpaa nde?”

¹⁹ Nɛ Gale dɛa na sanga kpangba ta tɛ Lehi ni ma gba, nɛ li go'do kɔ nɛ dɛ nza. Nɛ Samsoni nɔa lì ni, nɛ a kpa ngawi. Ma kɛ wa sa li 'de ni na: “Kore.” Gulu nɛ na: “'De 'da wi ala nu.” 'De ni ma 'bana tia do sɔɛ gɛ.

²⁰ Samsoni kpia zi dati obe Israɛlɛ 'do 'bu sabɛlɛ bɔa. Ma zi do 'da fala kɛ Ofilisti wa ia mbula ngɔ obe Israɛlɛ ni.