Owi kpe dati 14 - WE NU GALE 1995

Kuti gba mɛ kɛ Samsoni dɛa ma

¹ Mbe tũ kpo, nɛ Samsoni nɛa tɛ kɔ le Timna. A nɛa we hɔ i mɔ, nɛ a zɔ mbe be zɔnga Filisti kpo kɛ a dia tɛ̃ a ni.

² Nɛ a si, nɛ a tɔ̃ hã baa a do naa a na: “Mi hɔa tɛ Timna i, nɛ mi zɔ mbe be zɔnga Filisti kpo, nɛ a dia tɛ mi, hã mi kɔ̃a na, nɛ ba a do wuko hã mi.”

³ Nɛ owi ko a wa aka a na: “Gulu kɛ mɔ nɛ ba wuko ti Ofilisti, kɛ wa a omanda'ba ni we ge nde? Mɔ fà be zɔnga kɔ nu fɛlɛ kula 'da lɛ, tabi kɔ nu kpala lɛ, nɛ mɔ ba a gɔ nde?” Nɛ Samsoni gese hã baa a na: “Mi kɔ̃a gɛnɛ wuke ni, mɔ bá a hã mi.”

⁴ Owi ko Samsoni wa ĩ̀ zi na, wi a NWA Gale hã a kɔ̃a na mɛ ni, takɔ a kpa wala we hã etumbu hã Ofilisti ni gɔ. Ĩ na, do 'da fala ni, nɛ nde Ofilisti wa ia zi mbula ngɔ obe Israɛlɛ.

⁵ Samsoni do Owi ko a wa kulu ngɔ, nɛ wa la Timna i. Wa nɛa we hɔ tɛ fɔ vinɔɛ dɔ̃ɔ do le ni, nɛ be gbɔgbɔ gbo do hiamɔ dɛ 'da Samsoni nga.

⁶ Nɛ Hi Wi 'da NWA lia kɔ Samsoni, nɛ a ba be gbɔgbɛ ni, nɛ a ɛ̃ sanga a bɔa, ɔ nɛ kɛ wa ɛ̃ do sanga be dua ni. Nɛ nde a tɔ̃̀ we mɛ kɛ a dɛa ni hã Owi ko a gɔ.

⁷ Wa hɔa Timna i, nɛ Samsoni wele we do wuke. Nɛ wuke ni de tɛ̃ a wena.

⁸ Samsoni si, nɛ a ɔ̃ tũ dɛlɛ gɔ, nɛ a kpolo 'bɔ tɛ̃ a tɛ Timna i we ba wuke 'da a. A hɔa li wala i, nɛ a ɛlɛ we zɔ fia gbɔgbɛ zi ni. Kɔ a nɛ kɔlɔ do ma, nɛ a zɔ 'bua gɔlɔ, nɛ nde wa dɛa nɔ wa dɛ kɔ zã fia gbɔgbɛ ni.

⁹ Nɛ a so mbe nɔ gɔlɛ ni dɛ kɔ̃ a, nɛ a la'da, nɛ a hɔ nza, nɛ a la. A nɛa we hɔ 'da Owele a i, nɛ a hã mbe nɔ gɔlɛ ni hã wa, nɛ wa la'da. Nɛ nde a tɔ̃̀ hã wa na, ɛ sua nɔ gɔlɛ ni kɔ zã fia gbɔgbɔ gɔ.

Samsoni tɔ̃a be to hã Ofilisti

¹⁰ Baa Samsoni nɛa 'da be zɔnga ni, nɛ Samsoni nɛa do a, nɛ a dɛ mɔ dɔ ba ngba wi, ɔ nɛ kɛ obe zagbãlãnɔ i mɔ wa dɛ ma fai ni.

¹¹ Kɔ Ofilisti wa nɛa we zɔ Samsoni, nɛ wa saka obe zagbãlã 'bu wa talɛ na, wa dungu do a.

^12-13 Nɛ Samsoni tɔ̃ hã wa na: “Mi nɛ tɔ̃ be to hã nɛ, kɔ fala kɛ nɛ kpa gisa nu nɛ, hã nɛ tɔ̃ ma hã mi dati kɛ na tũi sambo kɛ wa 'dafa we mɔ dɔɛ gɛ ma Sɔkpɔ ni, nɛ mi hã sɛ tulu ngɔ 'bu nɛ talɛ do tulu ɛngga 'bu nɛ talɛ hã nɛ. Kɔ ní gɔ, nɛ nɛ hã tulu ngɔ 'bu nɛ talɛ do tulu ɛngga 'bu nɛ talɛ hã mi.” Nɛ wa tɔ̃ hã a na: “Mɔ tɔ̃̀ be toe 'da mɔ, hã lɛ zele.”

¹⁴ Nɛ Samsoni tɔ̃ hã wa na: “Nyɔngɔmɔ hɔa nza kɔ zã wi nyɔngɔ mɔ, nɛ ɛ̃fɛ̃ mɔ hɔa nza kɔ zã wi ngawi. Mɛ a ge nde?” Nɛ obe zagbãlãnɔ ni wa fa gulu nɛ gbaa 'do tũ talɛ, nɛ wa kpà gɔ.

¹⁵ Ma nɛa we hɔ tɛ talɛ kɔ tũi ni, nɛ wa nɛ, nɛ wa tɔ̃ hã wuke 'da Samsoni na: “Mɔ 'bɔ́ndɔ́ wili mɔ, kɔ a tɔ̃ gulu toe gɛ hã lɛ. Kɔ ní gɔ, nɛ lɛ fi sɛ we tɛ tɔa 'da nɛ, nɛ lɛ dɔ sɛ mɔ, do Owi nu fɛlɛ mɔ vɛ̃. Nɛ sa mɔ hã lɛ tɛ mɔ dɔɛ gɛ, takɔ nɛ kala mɔ kɔ̃ lɛ nde?”

¹⁶ Wuke nɛa we zele ní, nɛ a nɛ dɛ 'da wili a i do kɔ̃a, nɛ a tɔ̃ hã a na: “Mɔ kɔ̃̀ gɛnɛ mi gɔ, mɔ sɛnɛ mi sɛna, we kɛ mɔ tɔ̃a be toe hã owinɔ 'da mi, nɛ nde mɔ tɔ̃̀ mbe gulu nɛ hã mi gɔ.” Nɛ Samsoni gese hã a na: “Gɛnɛ kɔ owi ko mi ngboo ni, mi tɔ̃̀ gulu toe gɛ hã wa gɔ. Kɔ gulu kɛ mi nɛ tɔ̃ hã mɔ we ge nde?”

¹⁷ Nɛ wuke 'da Samsoni hia dɛ tɛ̃ a gbaa, we hɔ ndɔti tũ mɔ dɔɛ ni. Nɛ ma nɛa we hɔ tɛ kɔ tũ kɛ sambo ni, nɛ Samsoni tɔ̃ gulu toe ni hã a, we kɛ hia kɔ̃a 'da wuke 'da a ma ngba a do'do. Wuke zila gulu toe do'do, nɛ a nɛ dɔ̃, nɛ a tɔ̃ ma hã owinɔ 'da a.

¹⁸ Nɛ do kpo soe ni, dati kɛ na wese le tũ ni, nɛ owinɔ ni wa tɛ 'da Samsoni, nɛ wa tɔ̃ hã a na: “Mɛ ma ɛ̃fɛ̃ nɛa ngɔ nɔ gɔlɔ ni a ge nde? Nɛ mɛ ma do ngawi nɛa ngɔ gbɔgbɔ ni a ge nde?” Nɛ a tɔ̃ hã wa na: “Nɛ tɛ lè sɔ ti nu wuke 'da mi, nɛ nɛ ɔlɔ a gɔ, nɛ nde nɛ kpá sɔ gulu nɛ gɔ.”

¹⁹ Nɛ Hi Wi 'da NWA lia kɔ Samsoni. Nɛ a la dɛ Askaloni, nɛ a gbɛ Owi wili 'bu wa talɛ. Nɛ a kala tulunɔ 'da wa, nɛ a hã ma hã owinɔ wa tɔ̃a gulu toe ni. Nɛ zã a nɔ̃lɔ̃ wena, nɛ a kulu ngɔ, nɛ a si dɛ nu tɔa 'da baa a i.

²⁰ Nɛ wa ba wuke 'da Samsoni, nɛ wa hã a hã mbe be zagbãlã kɔ wanɔ 'bu wa talɛ ni, wele kɛ a zɔ zi mɔ tɛ mɔ dɔɛ ni, nɛ a ba a do kɛnɛ a.