Owi kpe dati 13 - WE NU GALE 1995

Kula 'da Samsoni

¹ Oisraɛlɛ wa dɛa zi 'bɔ mɔ kɛ ma dè tɛ NWA gɔ ni. Gulu nɛ a NWA 'dɔlɔ wa hã Ofilisti, nɛ wa ɔa ti mbula 'da wa 'do sabɛlɛ 'bu nɛ nalɛ.

² Do 'da fala ni, nɛ nde mbe wi wili kpo, li a a Manoa, a a wi nu kpala Danɛ, a ɔ zi kɔ le Sora. Nɛ wuke 'da a zi a ndɔlɔ.

³ Nɛ mbe tũ kpo, nɛ anzɛ 'da nwa hɔ 'da wuke ni, nɛ a tɔ̃ hã a na: “Mi ĩ na mɔ kò be gɔ, mɔ a ndɔlɔ. Gɛnɛ kɔ na mɛ ni, nɛ nde mɔ ba sɛ zã, nɛ mɔ ko bulu be.

⁴ Ní a yolo do sɔɛ gɛ, mɔ tɛ nɔ dɔ̃ vinɔ do ogele nga dɔ̃nɔ vɛ̃ gɔ, nɛ mɔ tɛ nyɔ̀ngò 'bɔ mɔ kɛ mɛ a mɔ ndi li Gale ni gɔ.

⁵ Mba gɔ, mɔ ba sɛ zã, nɛ mɔ ko bulu be. Nɛ wa hã sɛ be ni hã Gale. Nɛ mɔ kɛ́lɛ́ sɛ zu a gɔ, we be na, wa ia a hã Gale. Kɔ 'da fala a gã, nɛ a fo sɛ obe Israɛlɛ ti kɔ̃ Ofilisti.”

⁶ Wuke zila ni, nɛ a si, nɛ a tɔ̃ we nɛ hã wili a na: “Wi mɔ Gale hɔa 'da mi, nɛ ma hã kili hã mi wena, we kɛ a ɔ nɛ anzɛ 'da Gale ni. Nɛ mi àkà a we fala kɛ a yula nɛ ni gɔ. Nɛ a sà li a hã mi gɔ.

⁷ Nɛ a tɔ̃a hã mi na, mi ba sɛ zã, nɛ mi ko bulu be. Nɛ a ba nu a hã mi na, mi tɛ nɔ dɔ̃ vinɔ do ogele nga dɔ̃nɔ vɛ̃ gɔ. Nɛ mi tɛ nyɔngɔ 'bɔ mɔ kɛ mɛ a mɔ ndi li Gale ni gɔ. Mba gɔ, be mi nɛ ko a ni, wa hã sɛ a hã Gale, nɛ nde a 'bana kɔ zã mi, nɛ a sɛ a wi mɔ Gale gbaa ndɔti nɛ a fie 'da a.”

⁸ Manoa zila ni, nɛ a aka NWA Gale na: “NWA, mɔ kɔ̃, nɛ mɔ dɛ na wi 'da mɔ, kɛ mɔ tumba a hã lɛ ni, a tɛ 'bɔ mbé nɛ, hã a be mɛnɔ kɛ ma wia na, lɛ dɛ ma do be kɛ lɛ ko sɛ a ni hã lɛ.”

⁹ Nɛ Gale dɛa mɛ kɛ Manoa aka nɛ̀ Nɛ ngba soe kpo, nɛ anzɛ 'da NWA hɔa 'da wuke tɛ kɔ fɔ i, nɛ nde wili a zi kɛ zã a bina.

¹⁰ Nɛ wuke wɛlɛ tɛ̃ a, nɛ a si, nɛ a tɔ̃ we nɛ hã wili a na: “Kpo wi wili a hɔa zi 'da mi ni, a hɔa 'bɔ.”

¹¹ Manoa zila ni, nɛ a kulu ngɔ do gbɛnga tɛ, nɛ a kpe do wuko 'da a, nɛ wa kpolo tɛ wa kɔ fɔ i. Wa hɔa i mɔ, nɛ Manoa aka wi wili ni na: “Wi wila zi we do wuke 'da mi wi a mɔ nde?” Nɛ wi wili ni kɔ̃.

¹² Nɛ Manoa tɔ̃ hã a na: “Fala kɛ lɛ ko be ɔ nɛ kɛ mɔ tɔ̃a ni, nɛ mbula ma wia na lɛ dɛ sɛ ma we duzu be ni a ge nde?”

¹³ Nɛ anzɛ 'da nwa gese hã Manoa na: “Ma wia na, wuke 'da mɔ bɛ̃ gɛnɛ mɛnɔ vɛ̃ kɛ mi tɔ̃a we nɛ hã a ni.

¹⁴ A nyɔngɔ sɛ mɔ kɛ ma yula kɔ wala te vinɔ ni gɔ. Nɛ a nɔ̀ sɛ dɔ̀ vinɔ do ogele nga dɔnɔ vɛ̃ gɔ. A nyɔ́ngɔ́ sɛ 'bɔ mɔ kɛ mɛ a mɔ ndi li Gale ni gɔ. Nɛ ma wia na, wuke 'da mɔ dɛ mɛnɔ mi tɔ́a we nɛ hã a ni vɛ̃.”

^15-16 'Da falanɔ ni vɛ̃, nɛ nde Manoa ĩ na, wi wili ni a anzɛ 'da NWA Gale ni gɔ. Nɛ a tɔ̃ hã a na: “Mɔ tɛ là do ti gɔ, kɔ mɔ nyɔngɔ mbe be dua lɛ nɛ gbɛ a hã mɔ gɛ sɛ.” Nɛ anzɛ gese hã a na: “Gɛnɛ kɔ mi là 'bɔ ngangga ni gɔ, nɛ nde mi nyɔ́ngɔ́ sɛ mɛ 'da mɔ gɔ. Nɛ nde mɔ kɔ we hã sa'de hã mi nde, nɛ mɔ dɔ ma we dɔnggɔ do NWA.”

¹⁷ Nɛ Manoa aka a na: “Mɔ sá li mɔ hã lɛ, takɔ lɛ dɔnggɔ sɛ mɔ 'da fala kɛ wenɔ mɔ tɔ́a gɛ, ma dɛ tɛ̃ ɛ ni.”

¹⁸ Nɛ anzɛ gese na: “Gulu kɛ mɔ kɔ̃a we ĩ ti li mi we ge nde? Li mi mɛ a ɔngbamɔ we Owele.”

¹⁹ Nɛ Manoa nɛa, nɛ a gbɛ be dua, nɛ a mba ma do gele dɔnggamɔ, nɛ a a dɛ ngɔ kpangba ta, nɛ a dɔ we dɔnggɔ do NWA, kɛ a dɛ ɔngbamɛnɔ nɛ ge nde ni.

²⁰ Nɛ Manoa do wuke 'da a wa zi tɛ ka mɔ tɛ zɛ̃ we sa'de kɛ ma kutu ngɔ gbagala i ni, nɛ wa zɔ anzɛ 'da NWA, nɛ nde a yula dɛ gbogbo zɛ̃ we ni, kɔ a kũ dɛ li nza i. Wa nɛa we zɔ ní, nɛ wa tia, nɛ wa gu li wa nù.

²¹ Nɛ Manoa ĩ wá na, wi ni a anzɛ 'da NWA. Nɛ 'do ki ni, nɛ wa zɔ́ tɛ anzɛ 'da NWA 'bɔ mbé nɛ gɔ.

²² Nɛ Manoa tɔ̃ hã wuke 'da a na: “Kafi bina, lɛ fe sɛ we duzu kɛ lɛ zɔa Gale.”

²³ Nɛ wuke 'da a gese hã a na: “Fala kɛ Gale kɔ̃ sɔ we gbɛ lɛ, nɛ nde a kɔ̃̀ sɔ 'bɔ gɛnɛ mɛnɔ kɛ lɛ dɔa we dɔnggɔ do a ni gɔ. Nɛ a bé sɔ mɛnɔ kɛ lɛ zɔa gɛ hã lɛ gɔ. Nɛ a tɔ̃́ sɔ 'bɔ mbulanɔ kɛ lɛ zila ma gɛ hã lɛ gɔ.”

²⁴ 'Do nɛ, nɛ wuke 'da Manoa kua bulu be, nɛ a e li a na Samsoni. Be ni gã, nɛ NWA wele nu ɛ tɛ̃ a.

²⁵ Nɛ do 'da fala kɛ a zi tɛ fala ɔi 'da Danɛ, kɛ ma ngbala le Sora do Ɛsɛtaɔlɛ ni, nɛ Hi Wi 'da NWA lia kɔ a, nɛ a hã ngawi dɛ gba mɔ hã a.