Owi kpe dati 12 - WE NU GALE 1995

Yɛfte kpa we do Owi nu kpala Efraimɛ

¹ Owi nu kpala Efraimɛ wa mba li ngba wa, nɛ wa kũ lì Yɔrdanɛ, nɛ wa nɛ dɛ tɛ le Safoni. Wa hɔa i mɔ, nɛ wa tɔ̃ hã Yɛfte na: “Gulu kɛ mɔ nɛa we bi do Oamoni, nɛ mɔ sà mɔ hã lɛ na, lɛ gala mbe mɔ gɔ we ge nde? Ní a lɛ dɔ sɛ tɔa dɛ zu mɔ.”

² Nɛ Yɛfte gese hã wa na: “Lɛ do owinɔ 'da mi, lɛ kpa we do Oamoni, nɛ wa bi lɛ, nɛ lɛ sa mɔ hã nɛ, nɛ nɛ dɛ̃ mɔ kpo we kpasa lɛ ti kɔ̃ wa gɔ.

³ Kɔ mi nɛa we zɔ na, nɛ dɛ̀ mɔ gɔ ni, nɛ mi dɛ̃ kili fio gɔ. Mi kũ lì Yɔrdanɛ, nɛ mi bi Oamoni. Nɛ NWA dɛa na, mi nɛ ngɔ wa. Kɔ gulu kɛ nɛ tɛ we bi mi we ge nde?”

⁴ Nɛ Yɛfte nɛa, nɛ a ngɛmɛ li Owi Galadɛ vɛ̃, nɛ wa bi Oefraimɛ, nɛ wa nɛ ngɔ wa. Nɛ nde ĩ na, wi a Oefraimɛ wa a wa tɔ̃a zi na: “Aa nɛ, Owi Galadɛ, nɛ zi a Oefraimɛ. Nɛ nde nɛ yu lɛ, nɛ nɛ si dɛ kɔ nu kpala Manase si iko.”

⁵ Nɛ owi Galadɛ wa wɛlɛ tɛ wa dɛ nu lì Yɔrdanɛ, nɛ wa ba nu kolonɔ owinɔ wa kũ do lì ni na, da dɛ kɔ be Efraimɛ kpo kũ lì, kɔ a kpasa gɔ. Kɔ fala kɛ mbe Efraimɛ kpo tɔ̃ we kũ lì nde, nɛ owi Galadɛ wa aka a na, a a wi Efraimɛ nde. Kɔ fala a tɔ̃̀ na, ɛ a Efraimɛ gɔ,

⁶ nɛ wa ba nu wa hã a na, a tɔ̃ na: “Shibɔlɛ.” Kɔ fala a tɔ̃̀ ma do wala olo nɛ gɔ, hã a tɔ̃ na: “Sibɔlɛ”, nɛ wa ĩ na, a a be Efraimɛ, nɛ wa ba a dɛ di ni, nɛ wa gbɛ a. Nɛ 'da fala ni, Oefraimɛ wa fia zi vɛ̃ Owele koto 'bu wa nalɛ ngɔ wa bɔa.

⁷ Yɛfte kpia zi dati obe Israɛlɛ 'do sabɛlɛ gazɛlɛ, nɛ a fe, nɛ wa mi a tɛ kɔ le 'da a ngɔ nù Galadɛ.

Ibsanɛ, Eloni do Abdoni

⁸ Yɛfte fia, nɛ mbe wi Bɛtleɛmɛ kpo, li a a Ibsanɛ, a hɔ wi kpe dati obe Israɛlɛ.

⁹ Ibsanɛ kua zi obulu be 'bu wa talɛ, nɛ oboko be 'bɔ 'bu wa talɛ. Obe zɔnga benɔ 'da a vɛ̃, wa kala zi owili kɔ gele nu kpala Owele.

¹⁰ Nɛ ozagbãlã benɔ 'da a vɛ̃, wa kala tɛ mɛ 'bɔ owuko kɔ gele nu kpala Owele. Ibsanɛ kpia zi dati obe Israɛlɛ 'do sabɛlɛ sambo. Nɛ a fe, nɛ wa mi a tɛ Bɛtleɛmɛ.

¹¹ 'Do Ibsanɛ ni, nɛ Eloni, wi nu kpala Zabuloni, a kpe dati obe Israɛlɛ 'do sabɛlɛ 'bu,

¹² nɛ a fe, nɛ wa mi a tɛ Ayaloni, tɛ ngɔ nùi 'da Zabuloni.

¹³ 'Do Eloni, nɛ Abdoni, be 'da Hilɛlɛ, wi Piratoni, a hɔ wi kpe dati obe Israɛlɛ.

¹⁴ Abdoni zi do obe 'bu wa nalɛ, nɛ obe yaa a vɛ̃ wa zi 'bu wa talɛ, nɛ wa zi a ogã wi, nɛ wa zi vɛ̃ do pundanɔ 'da wa we kũ ngɔ wa boe. Mɛ a opunda 'bu nɛ sambo. Abdoni kpia dati obe Israɛlɛ 'do sabɛlɛ ngbɛ'dɛ'dɛ,

¹⁵ nɛ a fe, nɛ wa mi a tɛ Piratoni, tɛ ngɔ nù Efraimɛ, ngɔ okalanɔ kɛ Oamalɛkɛ wa ɔ zi nɛ ni.