Owi kpe dati 11 - WE NU GALE 1995

Yɛfte hɔa wi kpe dati obe Israɛlɛ

¹ Mbe nwa bolo kpo tɛ Galadɛ, li a a Yɛfte. Li baa a a Galadɛ, nɛ naa a zi a wuko ndumba.

² Galadɛ kua zi 'bɔ gele obe do kɛnɛ a ngboo ni. Nɛ 'da fala kɛ obenɔ ni wa gã, nɛ wa tɔ̃ hã Yɛfte na: “Mɔ a be zã gele wuko. Mɔ wè do kpa mɔ olo baa lɛ fala nɛ kpo do lɛ gɔ.” Nɛ wa ndaka a.

³ Nɛ Yɛfte yu onya a, nɛ a nɛ gbaa, nɛ a ɔ ngɔ nù Tɔbɛ. A hɔa i mɔ, nɛ owi mbuma wa si 'do a we yɛnggɛ do a.

⁴ 'Do nɛ là tũ dɛlɛ gɔ, nɛ Oamoni wa bi obe Israɛlɛ.

⁵ 'Da fala kɛ bole ndua nɛ ni, nɛ okumu Galadɛ wa nɛ we fa Yɛfte tɛ ngɔ nù Tɔbɛ i.

⁶ Wa kpa a, nɛ wa tɔ̃ hã a na: “Mɔ tɛ̃, hã mɔ kpe dati bole, hã lɛ bi do Oamoni.”

⁷ Nɛ Yɛfte gese hã wa na: “Wi a nɛ owi sɛnɛ mi, kɛ nɛ ndaka zi mi kɔ tɔa 'da baa mi ni hã ni gɔ nde? Kɔ gulu kɛ nɛ sa 'bɔ mɔ hã mi do 'da fala kɛ nɛ kɔ 'bako ni we ge nde?”

⁸ Nɛ wa gese hã a na: “Di ngangga ni, lɛ kala li lɛ dɛ tɛ mɔ, we duzu kɛ lɛ kɔ̃a na, mɔ tɛ̃, hã lɛ bi Oamoni fala nɛ kpo do mɔ. Nɛ mɔ dungu gã wi ngɔ lɛ do Owi Galadɛ vɛ̃.”

⁹ Nɛ Yɛfte tɔ̃ hã wa na: “'Da fala lɛ si do nɛ we bi Oamoni, hã NWA dɛ na mi nɛ ngɔ wa, nɛ mi hɔ sɛ gã wi ngɔ nɛ nde?”

¹⁰ Nɛ okumunɔ wa kɔ̃, nɛ wa tɔ̃ na: “Lɛ dɛ sɛ ɔ nɛ kɛ mɔ tɔ̃a ni. Temɔɛ 'da lɛ wi a NWA Gale do tɛ̃ a ngboo.”

¹¹ Nɛ Yɛfte si fala nɛ kpo do okumunɔ, nɛ obe Israɛlɛ wa e a do gã wi ngɔ wa, do wi kpe 'bɔ dati wa li bolo. Wa hɔa Mispa, nɛ Yɛfte tɔ̃ wenɔ kɛ wa 'dafa zi ma do okumunɔ ni hã owinɔ dɛ dati NWA.

Yɛfte tumba Owele hã Oamoni

¹² Nɛ Yɛfte tumba Owele hã nwa 'da Oamoni we aka a na: “Ngbangga sanga tɛ ngba nɛ do lɛ ni a ge nde? Nɛ gulu kɛ mɔ bi lɛ we ge nde?”

¹³ Nɛ nwa 'da Oamoni gese hã owinɔ Yɛfte tumba wa ni na: “Obe Israɛlɛ wa yula zi Ezipeto i tɛ si mɔ́ wa, nɛ wa ba nùi 'da lɛ, yolo nu lì Arnoni gbaa we hɔ tɛ nu fua lì Yabɔkɛ, do gbangɔlɔ̃ lì Yɔrdanɛ vɛ̃. Kɔ ma wia na, wa gese nùi ni hã lɛ do dia sila iko.”

¹⁴ Yɛfte nɛa we zele ní, nɛ a tombo 'bɔ mbé Owele hã nwa 'da Oamoni,

¹⁵ nɛ wa tɔ̃ hã a na: “Obe Israɛlɛ wa bà nù Moabɛ do Amoni gɔ.

¹⁶ Nɛ nde 'da fala kɛ obe Israɛlɛ wa yula zi Ezipeto tɛ si ma ni, nɛ wa 'bili zi do kɛ li gba zɔ̃ gɛ gbaa we hɔ nu gba lì Sala Tɔ̃. Nɛ wa yolo di ni, nɛ wa la dɛ Kadɛsɛ.

¹⁷ Wa hɔa Kadɛsɛ, nɛ wa tombo Owele hã nwa ngɔ nù Edɔmɛ we aka a na, a kɔ, nɛ a ba wala hã lo na, lo gɔnɔ do ngɔ nùi 'da a. Nɛ nwa ngɔ nù Edɔmɛ bɛ̃. Nɛ obe Israɛlɛ wa aka 'bɔ kpo kpo we ni do nwa ngɔ nù Moabɛ, nɛ a bɛ̃ 'bɔ. Nɛ obe Israɛlɛ wa 'bana dɛ Kadɛsɛ ni.

¹⁸ “'Do ki ni, nɛ wa si 'bɔ do kpo wala li gba zɔ̃ɛ ni, nɛ wa zĩ do 'do nù Edɔmɛ do Moabɛ. Wa hɔa dɔ̃ɔ do Moabɛ do si 'biti gba wese, nɛ wa 'dafa fala ɔi 'da wa dɛ mbee kulu lì Arnoni. Nɛ nde wa kṹ zi lì ni we le ngɔ nù Moabɛ gɔ, we duzu kɛ nùi 'da Omoabɛ Sɔkpɔ tɛ lì Arnoni.

¹⁹ Obe Israɛlɛ wa 'bana dɛ kulu lì Arnoni i, nɛ wa tombo wele hã Sihoni, nwa 'da Oamori kɛ a ɔ tɛ le Hɛsɛboni we aka a na, a kɔ, nɛ a ba wala hã lo na, lo la do ngɔ nùi 'da a, we si dɛ ngɔ nùi kɛ nwa hã ma hã lo ni.

²⁰ Nɛ nde nwa Sihoni kɔ̃̀ zi we hã wala hã wa na, wa la gɔ. Nɛ a mba li osodanɔ 'da a vɛ̃, nɛ wa 'dafa fala ɔi 'da wa tɛ Yahasi, nɛ wa bi obe Israɛlɛ.

²¹ Kɔ bole ni, nɛ NWA Gale 'da obe Israɛlɛ 'dɔla Oamori hã wa na, wa nɛ ngɔ wa. Nɛ obe Israɛlɛ wa ba nùi 'da Oamori vɛ̃,

²² yolo nu lì Arnoni gbaa we hɔ tɛ nu fua lì Yabɔkɛ, do li gba zɔ̃ɛ kɛ ma si 'biti gba wese ni, gbaa we hɔ tɛ kɔ gbangɔlɔ̃ Yɔrdanɛ.

²³ “Nɛ́ kɛ NWA Gale 'da lɛ obe Israɛlɛ ndaka Oamori, nɛ a hã nùi 'da wa hã winɔ 'da a ni, nɛ mɔ kɔ̃a we ba 'bɔ ma kɔ lɛ nde?

²⁴ Mɔ do nù mɔ́ mɔ kɛ Kɛmɔsi, gale 'da mɔ a hã ma hã mɔ ni boe. Ma wia tɛ mɛ 'bɔ na, lɛ kpa nùi 'da lɛ kɛ NWA Gale 'da lɛ a hã ma hã lɛ ni.

²⁵ Mɔ lengge na, mɔ nganda nɛa ngɔ Balakɛ, be 'da Sipɔrɛ, nwa 'da Omoabɛ nde? Balakɛ kpà mbe we do lɛ obe Israɛlɛ gɔ, nɛ a bì mbe lɛ fala kpo gɔ.

²⁶ Obe Israɛlɛ wa hɔa fala gɛ zɛ́ belee, ma la di ni sabɛlɛ kama talɛ. Nɛ wa ɔa tɛ Hɛsɛboni, do Arɔɛrɛ, do olenɔ kɛ zã nɛ ni, do olenɔ tɛ nu lì Arnoni vɛ̃. Ní a gulu kɛ nɛ ndàkà zi wa do ngba soe ni, nɛ nɛ kala nùnɔ ni kɔ wa gɔ we ge nde?

²⁷ Mi dɛ̀ 'dã mɔ kpo dɛ 'da mɔ gɔ, nɛ nde mɔ dɛ́ mi de gɔ, we duzu kɛ mɔ bi bolo do mi. Kɔ NWA kɛ a a wi gɔnɔ ngbangga sanga owinɔ ni, a ngboo a gɔnɔ sɛ we sanga lɛ obe Israɛlɛ do Oamoni sɔɛ gɛ.”

²⁸ Nwa 'da Oamoni zila toe kɛ Yɛfte tumba hã a ni, nɛ a lènggè nɛ gɔ.

Yɛfte kpua mbulu hã Gale

²⁹ Nɛ Hi Wi 'da NWA lia kɔ Yɛfte, nɛ a yɛnggɛ ngɔ nù Galadɛ do Manase, nɛ a ngɛmɛ li osodanɔ, nɛ a si do wa dɛ Mispe, tɛ ngɔ nù Galadɛ, nɛ a la dɛ ngɔ nù Amoni.

³⁰ Nɛ Yɛfte kpo mbulu hã Gale na: “Fala kɛ mɔ nwa, mɔ dɛ na, mi nɛ ngɔ Oamoni,

³¹ hã mi si do lɔa tɛ mi nde, nɛ mi ba sɛ kuti wi kɛ a nɛ hɔ nza kɔ tɔa 'da mi, we gɔnɔ dati mi ni, nɛ mi gbɛ a we dɔnggɔ do mɔ.”

³² Nɛ Yɛfte kũ lì do owinɔ 'da a we bi Oamoni, nɛ nwa 'dɔlɔ wa hã a.

³³ Nɛ Yɛfte nɛ ngɔ wa wena, nɛ a kala le olo wa 'bu nɛ bɔa. Yolo tɛ Arɔɛrɛ do olenɔ kɛ zã Minitɛ ni gbaa we hɔ tɛ Abɛlɛ-Kɛramimɛ. Na mɛ ni, nɛ obe Israɛlɛ wa ia zi mbula ngɔ Oamoni.

³⁴ Yɛfte tɛ si nu tɔa 'da a i, nɛ a 'bana dɛ li wala nga iko, nɛ kpo be zɔnga be 'da a zɔ a, nɛ a yolo tɔa i, nɛ a gbo nza, nɛ a ma ngɔ yɔ yɔla do yaka dawaya tɛ gɔnɔ dati baa a.

³⁵ Yɛfte nɛa we zɔ a ní, nɛ a ɛ̃ tulu tɛ̃ a do 'bako, nɛ a he mɔ na: “Aa boko be 'daa, mɔ hã 'bako hã mi wena! Nɛ gulu kɛ wi a mɔ a mɔ hã 'bako hã mi ní ni we ge nde? We kɛ mi kpua zi mbulu hã NWA, nɛ mi wè tɛ kpolo nu mi gɔ.”

³⁶ Nɛ be zɔnga be 'da a gese na: “Fala kɛ mɔ kpo mbulu hã NWA kpua nde, nɛ mɔ dɛ do mi ɔ nɛ mbuli mɔ kpua ni. We kɛ a a dɛa na, mɔ bili nu gbã mɛ kɛ Oamoni wi sɛnɛ mɔ, wa dɛa ma ni.

³⁷ Kɔ mɔ kɔ̃, nɛ mɔ hã zɛkɛ bɔa hã mi. Mi kɔ̃a we nɛ ngɔ kalanɔ i do ongba mi, takɔ mi he kɔ̃a tɛ mi kɛ mi nɛ fe dati a kɛ na, mi ba wili ni.”

³⁸ Yɛfte kɔ̃a, nɛ a tɔ̃ hã a na, a nɛ 'do zɛkɛ bɔa. A nɛa ngɔ kalanɔ i do ongba a, nɛ a he kɔ̃a tɛ̃ a wena, we kɛ a nɛ fe dati a kɛ na, a ba wili ni.

³⁹ Fala kɛ zɛkɛ bɔa ni wia, nɛ a si dɛ 'da baa a nga. Nɛ baa a dɛa do a nɛ́ kɛ a kpua zi mbulu nɛ hã nwa ni. Be zɔnga be 'da Yɛfte fia, nɛ nde a ĩ̀ ti wili gɔ.

⁴⁰ Ndo do di ni, nɛ obe Israɛlɛ wa ia mbula na, kɔ sabɛlɛ kpo kpo, nɛ obe zɔnganɔ wa nɛ 'do tũ nalɛ ngɔ kalanɔ i, we he kɔ̃a fio be 'da Yɛfte, wi Galadɛ ni.