Owi kpe dati 10 - WE NU GALE 1995

Tola do Yairɛ

¹ Do 'do kɛ Abimelɛkɛ fia ni, nɛ Tola, be 'da Puva, kɛ li yaa a zi a Dodo ni, a kpasa obe Israɛlɛ ti kɔ̃ owi sɛnɛ wa. Tola a wi kɔ nu kpala Isakarɛ, nɛ a ɔ kɔ le Samirɛ, kɛ ma ngɔ kalanɔ tɛ Efraimɛ.

² A kpia zi dati obe Israɛlɛ 'do sabɛlɛ 'bu nɛ bɔa ngɔ nɛ talɛ. Nɛ a fe, nɛ wa mi a dɛ Samirɛ ni.

³ Tola fia, nɛ Yairɛ dungu olo a. Yairɛ zi a wi Galadɛ, nɛ a kpia zi dati obe Israɛlɛ 'do sabɛlɛ 'bu nɛ bɔa ngɔ nɛ bɔa.

⁴ A zi do obulu be 'bu wa talɛ. Nɛ obenɔ ni wa zi a ogã wi ngɔ nù Galadɛ, nɛ wa zi vɛ̃ do pundanɔ 'da wa we kũ ngɔ wa boe. Wa 'bana tɛ sa li falanɔ ni gbaa tia do sɔɛ gɛ na lenɔ 'da Yairɛ.

⁵ Yairɛ fia, nɛ wa mi a tɛ kɔ le Kamoni.

Oamoni wa bi obe Israɛlɛ

⁶ Obe Israɛlɛ wa dɛa zi 'bɔ mɔ kɛ ma dè tɛ NWA Gale gɔ ni. Wa dɔnggɔ ogale Bala do Astarte. Nɛ wa dɔnggɔ 'bɔ ogalenɔ 'da Osiri, Osidoni, Omoabɛ, Oamoni do Ofilisti. Obe Israɛlɛ wa siki zi 'do wa, nɛ wa lo do nwa, nɛ wa bɛ̃a we dɔnggɔ a.

⁷ Nɛ zã NWA nɔ̃lɔ̃ dɛ tɛ wa, nɛ a 'dɔlɔ wa hã Ofilisti do Oamoni.

⁸ Nɛ yolo dɛ di ni, nɛ owinɔ ni wa ma ngɔ bi obe Israɛlɛ kɛ wa ɔ tɛ Galadɛ, kɛ ma ngɔ nùi 'da Oamori tɛ kulu lì Yɔrdanɛ do si 'biti gba wese ni. Nɛ wa zɛlɛ tɛ wa gbaa 'do sabɛlɛ 'bu ngɔ nɛ ngbɛ'dɛ'dɛ.

⁹ Oamoni wa kũ 'bɔ lì Yɔrdanɛ we bi nu kpala Yuda, do Bɛnzamɛ, do Efraimɛ. Nɛ obe Israɛlɛ wa kpa zi 'bako wena.

¹⁰ Wa nɛa we zɔ ní, nɛ wa ala nu wa hã NWA na, a gala lo. Nɛ wa tɔ̃ hã a na: “Aa NWA, lɛ dɛa 'dã mɔ dɛ 'da mɔ, nɛ lɛ bɛ̃a gɛnɛ mɔ, kɛ mɔ a Gale 'da lɛ ni, nɛ lɛ dɔnggɔ ogale Bala.”

¹¹ Nɛ NWA gese na: “'Da fala Oezipeto, Oamori, Oamoni, Ofilisti,

¹² Osidoni, Oamalɛkɛ, do Omaoni vɛ̃, wa zɛlɛ zi tɛ nɛ, nɛ nɛ ala nu nɛ hã mi na, mi gala nɛ, nɛ mi fò zi nɛ ti kɔ̃ wa gɔ nde?

¹³ Nɛ nde nɛ bɛ̃a gɛnɛ mi, nɛ nɛ dɔnggɔ ogele galenɔ. Gulu nɛ a mi bɛ̃a na, mi fó sɛ nɛ 'bɔ mbé nɛ ti kɔ̃ Owi sɛnɛ nɛ gɔ.

¹⁴ Kɔ nɛ nɛ́, hã nɛ sa mɔ hã ogalenɔ kɛ nɛ saka wa ni, kɔ wa tɛ we gala nɛ. Ma wia na, wa a wa fo nɛ kɔ 'bakoe 'da nɛ.”

¹⁵ Nɛ obe Israɛlɛ wa gese na: “Aa NWA, lɛ dɛa 'dã mɔ. Kɔ mɔ dɛ́ do lɛ, ɔ nɛ kɛ ma wia li mɔ ni. Nɛ nde mɔ kɔ̃, nɛ mɔ kpásá 'bɔ lɛ mbé nɛ sɔɛ gɛ.”

¹⁶ Nɛ 'do ki ni, nɛ wa la fala dɔnggɔ ogele galenɔ ni, nɛ wa hã tɛ wa we dɔnggɔ NWA. Nɛ NWA zɔa na mɛ ni, nɛ a wè zi 'bɔ tɛ kunu sila a ngɔ 'bakoe kɛ wa kpa ma ni gbaa gɔ.

¹⁷ Nɛ Oamoni wa mba ngba wa, nɛ wa 'dafa osodanɔ 'da wa ngɔ nù Galadɛ. Nɛ obe Israɛlɛ kɛ wa ɔ di ni ni, wa 'dafa tɛ mɛ 'bɔ osodanɔ 'da wa tɛ kɔ le Mispa.

¹⁸ Nɛ wa mba do ogã wi ngɔ wa, nɛ wa aka ngba wa na: “Wi kɛ a kpe sɛ dati lɛ we bi do Oamoni a wio nde? Wi kɛ a kpe sɛ dati lɛ ni, a hɔ sɛ nwa ngɔ owi ngɔ nù Galadɛ vɛ̃.”