Owi kpe dati 1 - WE NU GALE 1995

Obe Israɛlɛ wa dɛa le ngɔ nu Kanana

¹ 'Do kɛ Yozue fia ni, nɛ obe Israɛlɛ wa aka nwa na, a saka nu kpala winɔ sanga wa, kɛ wa kulu sɛ ngɔ dati, nɛ wa nɛ we bi Okanana ni.

² Nɛ nwa gese na: “Wi sɛ a nu kpala Yuda, mi hã nùi ni hã wa do mɔ́ wa.”

³ Nu kpala Yuda wa nɛa we zele ni, nɛ wa tɔ̃ hã obe zã Simeoni, nya Yuda na: “Nɛ tɛ́, hã nɛ mba do lɛ, takɔ lɛ bi Okanana, kɔ lɛ ba nùi kɛ NWA hã ma hã lɛ do mɔ́ lɛ ni. Nɛ 'do nɛ, nɛ lɛ mba sɛ tɛ mɛ 'bɔ do nɛ, nɛ lɛ nɛ we ba nùi kɛ nwa hã ma hã nɛ do mɔ́ nɛ ni.” Nɛ obe zã Simeoni wa kɔa, nɛ wa mba do wa,

⁴ nɛ wa nɛ bole. Wa hɔa i mɔ, nɛ nwa dɛa na, wa nɛ ngɔ Okanana do Opɛrizi, nɛ wa gbɛa wa koto 'bu tɛ kɔ le Bezɛkɛ.

⁵ Nɛ wa kpa nwa Adoni-Bezɛkɛ kɔ le ni, nɛ wa bi a,

⁶ nɛ a yu, nɛ wa ndaka 'do a gbaa, nɛ wa ba a, nɛ wa 'bili ogba 'biti zu kɔ̃ a, do ogba 'biti zu nyanga a do'do.

⁷ Adoni-Bezɛkɛ zɔa na mɛ ni, nɛ a he mɔ na: “Owinɔ 'da mi wa kala zi onwa 'bu wa sambo, nɛ wa 'bili gba 'biti zu kɔ wa, do gba 'biti zu nyanga wa. Nɛ Onwanɔ ni wa dɔlɔ zi be 'bulu nyɔngɔmɛnɔ kɛ ma te dɛ ti mɛsa 'da mi ni, nɛ wa nyɔngɔ. Kɔ Gale si olo 'dã mɛ kɛ mi dɛa zi ni hã mi.” Nɛ Oyuda wa la do a dɛ Yeruzalɛmɛ, nɛ a fe dɛ i mɔ.

⁸ Oyuda wa bi le Yeruzalɛmɛ, nɛ wa ba ma, nɛ wa gbɛ winɔ kɔ nɛ wena. Nɛ wa fi we tɛ le, nɛ ma bɛlɛ vɛ̃.

⁹ Nɛ 'do nɛ, nɛ wa nɛ, nɛ wa bi Okanana kɛ wa ɔ zi ngɔ kalanɔ, do wanɔ ti nyanga kalanɔ si 'biti gɛ̃a wese, do wanɔ kɔ lenɔ tɛ li gba zɔ̃ Negɛvɛ si ba gɔtɔ ni.

¹⁰ Nɛ wa nɛ 'bɔ, nɛ wa bi Owi kɔ le Hebroni, kɛ li nɛ 'bɔ a Kiriatɛ-Arba ni. Nɛ wa nɛ ngɔ nu fɛlɛ Sekai do Ahimanɛ do Talmai, kɛ wa ɔ zi kɔ le ni.

¹¹ Wa kulu ngɔ di ni, nɛ wa nɛ we bi owinɔ kɔ le Dɛbirɛ, kɛ li nɛ 'bɔ a Kiriatɛ-Sefɛrɛ ni.

¹² Nɛ mbe kpo sanga Oyuda, li a a Kalɛbɛ, a tɔ̃ na, wele kɛ a ba le Kiriatɛ-Sefɛrɛ, nɛ ɛ hã sɛ be zɔnga be 'dɛ ɛ Akɛsa hã a, nɛ a ba a do kɛnɛ a.

¹³ Nɛ Otniɛlɛ, be 'da Kɛnazɛ, kɛ a hɔa dɛ 'do Kalɛbɛ ni, a ba le Kiriatɛ-Sefɛrɛ. Nɛ Kalɛbɛ hã be 'da a Akɛsa hã Otniɛlɛ, nɛ wa ba ngba wa.

¹⁴ Wa nɛa we ba ngba wa do'do, nɛ Otniɛlɛ tɔ̃ hã Akɛsa na, a nɛ, hã a aka baa a Kalɛbɛ na, a hã fɔ hã lo. Nɛ Akɛsa nɛa, nɛ a hɔ 'da baa a Kalɛbɛ i, nɛ a zĩ nù ngɔ punda 'da a. Nɛ baa a aka a na: “Mɛ mɔ kɔ̃a na, mi dɛ hã mɔ ni a ge nde?”

¹⁵ Nɛ Akɛsa gese na: “Mɔ kɔ̃, nɛ mɔ 'dɔlɔ mbe de mɔ hã mi. Mɔ hã mbe zu lì hã mi, we kɛ nùi mɔ hã ma hã mi tɛ li gba zɔ̃ Negɛvɛ gɛ, ma kolo wena.” Kalɛbɛ zila ní, nɛ a hã zu lìnɔ si ngɔ kala, do kɛnɔ si ba gɔtɔ hã be 'da a Akɛsa.

¹⁶ Okeni, obe zã kɛfɛ Mɔizɛ, wa kulu ngɔ tɛ Yeriko, kɛ li nɛ 'bɔ a “Le 'Bete” ni, nɛ wa mba fala nɛ kpo do Oyuda, nɛ wa la do wa dɛ li gba zɔ̃ Negɛvɛ, ngɔ nù Yuda. Wa hɔa i mɔ, nɛ wa nɛ tɛ mbe fala kpo, kɛ mɔ yolo Aradɛ, nɛ nde ma do si ba gɔtɔ, nɛ wa dɛ tɔa do winɔ dɛ di ni.

¹⁷ Oyuda wa mba do obe zã Simeoni, nya Yuda, nɛ wa bi Okanana, kɛ wa ɔ kɔ le Sɛfatɛ ni, nɛ wa nɛ ngɔ wa. Nɛ wa ba le 'da wa, nɛ wa 'danga ma vɛ̃. Nɛ wa e li le ni na Horma. Gulu nɛ na: “Ogbɛsa tɔa.”

¹⁸ Dɛ 'do ki ni, nɛ Oyuda wa ba le Gaza, do Askaloni, do Ekroni do lenɔ kɛ zã nɛ ni.

¹⁹ NWA zi fala nɛ kpo do wa, nɛ wa kala lenɔ ngɔ kala i ni. Nɛ nde wa wè zi tɛ ndaka winɔ kɛ lenɔ 'da wa ma ngɔ mbɛ nùi ni gɔ, we duzu kɛ winɔ ni wa zi do ongilingili bi bolo, kɛ wa dɛa do mɔ bolo ni.

²⁰ Nɛ Yozue ba le Hebroni hã Kalɛbɛ, ɔ nɛ kɛ Mɔizɛ ba zi do nu a ni. Kalɛbɛ nɛa, nɛ a ndaka obe zã Anakɛ, kɛ wa hɔa zi nu fɛlɛ kula talɛ dɛ di ni, nɛ a ba le kɔ̃ wa.

²¹ Nɛ nde obe zã Bɛnzamɛ wa wè zi we ndaka Oyebuzi kɛ wa ɔ Yeruzalɛmɛ ni gɔ. Ma kɛ Oyebuzi wa 'bana tɛ ɔ dɛ di ni fala nɛ kpo do Obɛnzamɛ tia do sɔɛ gɛ.

²² Obe zã Efraimɛ do Manase, benɔ 'da Yozɛfu, wa nɛa zi 'bɔ bole, nɛ NWA fala nɛ kpo do wa, nɛ wa nɛa we bi le Betɛlɛ,

²³ kɛ li nɛ 'bɔ a Luzɛ ni. Dati nɛ mɔ wa, nɛ wa tumba Owi miã na wa nɛ, hã wa zɔ le.

²⁴ Wi miãnɔ ni wa nɛa, nɛ wa hɔ nu ngba le, nɛ wa zɔ mbe wele kpo tɛ hɔ nza kɔ le, nɛ wa tɔ̃ hã a na, a be tɛlɛ tɛ kɛ wa wia tɛ le nɛ dɛ kɔ le i ni hã lo. Nɛ wa tɔ̃ 'bɔ hã a na, wa dɛ́ sɛ 'dã mɔ do a gɔ.

²⁵ Nɛ wi wili ni bia wala hã obe zã Efraimɛ do Manase, nɛ wa le do ma, nɛ wa gbɛ winɔ 'da le ni vɛ̃. Nɛ nde wa gbɛ wi kɛ a gala wa ni gɔ. Wa ia a do nu fɛlɛ kula 'da a vɛ̃ do tunu li wa na wa la.

²⁶ Wi wili ni la dɛ ngɔ nù 'da Ohiti, nɛ a dɛ le i mɔ, nɛ a e li le ni na, Luzɛ Wa 'bana tɛ sa li nɛ ní tia do sɔɛ gɛ.

²⁷ Obe zã Manase wa wè zi we ndaka winɔ kɛ wa ɔ tɛ Bɛtɛ-Seanɛ, do Tanakɛ do Dɔrɛ ni gɔ. Nɛ wa wè zi 'bɔ we ndaka wanɔ tɛ Ibleamɛ do Megido, fala nɛ kpo do wanɔ kɔ lenɔ kɛ zã nɛ ni gɔ. Nɛ Okanana wa 'bana tɛ ɔ dɛ di ni.

²⁸ Dɛ 'do nɛ, gɛnɛ kɔ Oisraɛlɛ wa kpa ngawi wena, nɛ nde wa wè zi 'bɔ tɛ ndaka Okanana di ni gɔ, nɛ wa a wa do wi dɛ to kolofenɔ 'da wa.

²⁹ Obe zã Efraimɛ wa wè zi we ndaka Okanana kɛ wa ɔ tɛ Gezɛrɛ ni gɔ. Ma kɛ wa 'bana tɛ ɔ dɛ sanga Oefraimɛ ni.

³⁰ Obe zã Zabuloni wa wè zi we ndaka Okanana kɛ wa ɔ tɛ Kitroni do Nahalalɛ ni gɔ. Ma kɛ Okanana wa 'bana tɛ ɔ dɛ sanga Ozabuloni, nɛ wa a Okanana do wi dɛ to kolofenɔ 'da wa.

³¹ Obe zã Asɛrɛ wa wè zi we ndaka winɔ tɛ Ako do Sidoni ni gɔ. Nɛ wa wè zi 'bɔ we ndaka wanɔ tɛ Alabɛ, do Akzibɛ, do Hɛlba do Afikɛ, do Rɛhɔbɛ ni gɔ.

³² Gulu nɛ hã Oasɛrɛ wa dɛa tɔa do Okanana, we kɛ wa wè zi we ndaka wa gɔ.

³³ Obe zã Nɛftali wa wè zi we ndaka Okanana kɛ wa ɔ tɛ Bɛtɛ-Semɛsi do Bɛtɛ-Anatɛ ni gɔ. Nɛ wa dɛa zi tɔa do wa, nɛ wa a wa do wi dɛ to kolofenɔ 'da wa.

³⁴ Oamori wa bi nu kpala Danɛ, nɛ wa ndaka wa dɛ ngɔ kala i, nɛ wa hã̀ zi wala hã wa we zĩlĩ dɛ ngɔ mbɛ nù nga gɔ.

³⁵ Ma kɛ Oamori wa 'bana tɛ ɔ tɛ Harɛ-Herɛsi, do Ayaloni, do Salbimɛ. Nɛ nde 'do ki ni, nɛ nu kpala Efraimɛ do Manase wa ia mbula ngɔ wa, nɛ wa a wa do wi dɛ to kolofenɔ 'da wa.

³⁶ Ngbala nù 'da Oamori ma ndua do ti nyanga kala Akrabimɛ, nɛ ma la dɛ Sɛlama, nɛ ma kũ 'bɔ dɛ ngɔ okalanɔ i.