OHEBRE 9 - WE NU GALE 1995

Tɛlɛ tɛ dɔnggɔ Gale nù nga do kɛ li nza i

¹ Kuti gba tɔkɛ zɛ́ ni, ma zɛ́ do ombula we be tɛlɛ tɛ kɛ winɔ wa wia we dɔnggɔ do Gale ni, nɛ ma zɛ́ 'bɔ do tɔa dɔnggɔ do Gale ngɔ nù gɛ boe.

² Wa dɛa zɛ́ tɔa tande, nɛ wa 'bili kɔ nɛ bɔa. Nɛ 'bili kɛ wa le kɔ nɛ dati ni, wa sa li nɛ na, fala kɛ ma santo. Mɛ a fala wa ia do mɔ a do mwindanɔ, do mɛsa kɛ wa a mapa dɔnggɔ do Gale ngɔ nɛ ni.

³ Nɛ 'do bɔa gbau tuli wa 'bili do kɔ tɔa tande ni, nɛ mɔ hɔ tɛ fala wa sa li nɛ na, fala kɛ ma santo wena ni.

⁴ Nɛ mɛnɔ fala ni, mɛ a gbagala kɛ wa dɛa ma do mɔ mbali, nɛ wa dɔ yɔmbɔ hã Gale ngɔ nɛ ni, do sanduku gba tɔkɛ, kɛ 'do nɛ vɛ a mɔ mbali ni. Nɛ mɛ kɔ sanduki, mɛ a kpana mɔ mbali, nɛ dɛ kɔ kpana ni, mɛ a nyɔngɔmɛ kɛ li nɛ a mana ni. Nɛ mbe 'bɔ mɛ kɔ sanduki, mɛ a dɔndɔlɔ 'da Aroni, kɛ ma kunu zɛ́ mbé tɔlɔ nwá ni, do tanɔ kɛ Mɔizɛ kɔma zɛ́ mbula gba tɔkɛ ngɔ nɛ ni.

⁵ Nɛ wa dula okerubinɛ bɔa, nɛ wa a ma dɛ ngɔ sanduki ni we be na, Gale di ni boe. Nɛ sala 'baka wa tata dɛ ngɔ fala onganganɔ wa hã do mɛnɔ hã Gale we aka a na, a fo ku'da 'dã mɛnɔ zu winɔ ni. Nɛ nde fala do kɛ na lɛ tɔ̃ vɛ̃ ni bina.

⁶ Wa dɛa tɔa tande na mɛ ni, nɛ onganganɔ wa le kɔ kuti 'bili kɔ tɔa ni tũ kpo kpo, we dɛ to nganga 'da wa dɛ di ni.

⁷ Nɛ wi kɛ a le tɛ kɔ bɔa 'bili kɔ tɔa ni, wi tati a gã nwa nganga zu a kpo, nɛ kɔ sabɛlɛ kpo, a le i mɔ fala kpo. Nɛ a le do tɔkɔ sa'de we a ma ngɔ gbagala hã Gale na, a fo ku'da 'dã mɛnɔ 'da ɛ, do ku'da 'dã mɛnɔ kɛ tala ogele winɔ wa dɛa ma, nɛ nde wa ĩ̀ we nɛ gɔ ni.

⁸ Na mɛ ni, Hi Wi Santo be na, fala kɛ kuti tɔa tande 'bana, nɛ nde li wala le tɛ fala kɛ ma santo wena ni tɛ hũ̀i gɔ.

⁹ Tɔa tande ni, ma be mɛnɔ kɛ ma dɛ tɛ̃ ɛ do ngba soenɔ gɛ. Ma be na, dia mɛnɔ kɛ wa hã ma hã Gale, do osa'denɔ kɛ wa gbɛ hã a ni, ma wè tɛ fo 'dã mɛnɔ kɔ sila winɔ vɛ̃ gɔ.

¹⁰ Mɛnɔ ni, mɛ a ombula ngɔ onyɔngɔmɛnɔ, do dɔ̃nɔ, do tɛlɛ tɛ fɔlɔ tɛ mɛnɔ 'da wa na, ma ɔ sa li Gale ni iko. Mɛ a ombula mɔ́ Owele, nɛ ma sɛ do ngawi gbaa we sɔkpɔ do 'da fala kɛ Gale a kpolo sɛ do mɛnɔ vɛ ni.

¹¹ Nɛ nde Kristo hɔa gã nwa nganga, nɛ a tɛa do dia mɛnɔ kɛ ma sɔɛ gɛ ni. Nɛ fala a dɛ do to nganga 'da a ni, ma gã nɛa ngɔ tɔa tande kɛ nù nga gɛ wena. Wele a dɛ̀ ma gɔ, nɛ ma 'bɔ dɛ ngɔ nùi gɛ gɔ.

¹² Kristo lia zi kɔ 'bili tɔa kɛ ma santo wena ni fala kpo ia, nɛ a hã̀ zi a tɔkɔ wili dua tabi be ngɔmbɛ gɔ, nɛ nde a hã tɔkɔ tɛ a ngboo. Na mɛ ni, nɛ a hã kpasi kɛ ma é sɛ gɔ ni hã lɛ.

¹³ Zi dati, wa kpɔ zi tɔkɔ wili duanɔ do wili ngɔmbɛnɔ, nɛ wa so bũ be naa ngɔmbɛ kɛ wa dɔa a ni, nɛ wa kpã ma tɛ winɔ kɛ wa yɔa mbulanɔ ni, takɔ ma fɔlɔ ndi 'dã mɛnɔ tɛ wa, ɔ nɛ kɛ mbula bia ni.

¹⁴ Ní a tɔkɔ tɛ Kristo nɛ̀ ngɔ ki ni do ngawi gɔ nde? Do wala 'da Hi Wi Santo kɛ a fai boe ni, Kristo hã zi kili tɛ̃ ɛ ngboo we dɔnggɔ do Gale, ɔ nɛ dɔnggamɔ kɛ fo ndi tɛ nɛ bina ni. Nɛ tɔkɔ tɛ̃ a ma fɔlɔ lɛ, nɛ ma fua sila lɛ ngɔ yia dɛa mɛnɔ lɛ dɛ zi ni, takɔ lɛ dɛ to hã Gale, wele kpasi.

¹⁵ We duzu ma, Kristo hɔa wi yolo sanga tɛ ngba lɛ do Gale, we 'dafa mbé gba tɔkɔ sanga lɛ, takɔ winɔ kɛ Gale sa zɛ́ mɔ hã wa ni, wa kpa odia mɛnɔ kɛ ma é sɛ gɔ, nɛ Gale kpua zɛ́ mbulu nɛ hã wa ni. Wa wia sɛ we kpa ma, we duzu kɛ Kristo fia, nɛ fie 'da a kpasa winɔ kɔ 'dã mɛnɔ, kɛ wa dɛa zi 'da fala wa 'bana ti mbula ã gba tɔkɛ ni.

¹⁶ Fala kɛ wele kɔma mbɛti ngɔ mɔ do ɛ, nɛ ma wia na wi ni fe do'do, sɛ nɛ mbɛti ni kpa ngawi de.

¹⁷ Mba gɔ, fala kɛ wi kɔma mbɛti ni tɛ fè gɔ, nɛ nde mbɛti do ngawi bina, kɔ a fe do'do, sɛ nɛ ma kpa ngawi de.

¹⁸ Ma 'bɔ na mɛ ni we kuti gba tɔkɛ, ma wè zɛ́ tɛ kpa ngawi do ti gɔ gbaa na, tɔkɔ sa'de a nù do'do sɛ nɛ de.

¹⁹ Dati ngboo, Mɔizɛ tɔla zɛ́ mbulanɔ vɛ ɔ nɛ kɛ wa kɔma kɔ 'Buku Mbula ni. Nɛ 'do nɛ, nɛ a ba tɔkɔ be ngɔmbɛ, do tɔkɔ dua, nɛ a a lì tɛ nɛ, nɛ a fi nwá nyama do fila sala bata 'dɔ nɛ, nɛ a kpã ma ngɔ 'Buku Mbula do tɛ winɔ vɛ.

²⁰ Nɛ a tɔ̃ na: “Kɛ gɛ mɛ a tɔkɛ kɛ ma be na, Gale gba tɔkɔ do nɛ. Kɔ ma wia na, nɛ dɛ mbula nɛ.”

²¹ Nɛ Mɔizɛ kpã 'bɔ tɔkɛ tɛ ngɔ tɔa tande, nɛ a kpã tɛ mɛnɔ vɛ kɛ wa dɛ do tonɔ we dɔnggɔ do Gale ni.

²² We zɔ mbula ni, nɛ nde wa wia we fɔlɔ gba gili mɛnɔ do tɔkɔ, nɛ ma hɔ sa mɔ li Gale. Nɛ takɔ Gale fo ku'da 'dã mɔ zu wele, nɛ nde ma wia na, tɔkɔ a nù.

Tɔkɔ tɛ Kristo ma fo o'dã mɔ fua

²³ Omɛnɔ zɛ́ kɔ tɔa tande 'da Gale ni, mɛ a hi ngbongbo mɛnɔ li nza i ni. Nɛ ma wia zɛ́ na, wa fɔlɔ mɛnɔ do tɔkɔ sa'de dɔnggamɛnɔ, takɔ ma ɔ sa li Gale. Nɛ nde we mɛnɔ li nza i ni, takɔ ma ɔ sa li Gale, nɛ ma wia na, wa kpa 'bɔ mbé dɔnggamɔ kɛ ma nɛa ngɔ osa'denɔ ni.

²⁴ Mba gɔ, Kristo lè zi kɔ tɔa tande kɛ Owele wa dɛa ma do kɔ̃ wa, nɛ mɛ a hi gbãlã we tɔa kɛ li nza i ni gɔ, nɛ nde a lia zi li nza ngboo. Nɛ ngangga gɛ, a yolo dati Gale we tɔ̃ we ngɔ lɛ.

²⁵ Sabɛlɛ kpo kpo, nɛ nwa nganga 'da Oyuda ba tɔkɔ sa'de, nɛ a le nɛ tɛ fala ma santo wena ni. Nɛ nde Kristo lè zi 'do ngbɛ ɛ do 'do ngbɛ ɛ gɔ, nɛ a hã̀ tɛ a hã Gale fala dɛlɛ wena gɔ.

²⁶ Ma ɔ sɔ na mɛ ni, nɛ a kpa sɔ zɛlɛ tɛ fala dɛlɛ wena, yolo do 'da fala Gale dɛa zɛ́ do nùi ni, gbaa we hɔ sɔɛ gɛ. Nɛ nde a hɔa ngɔ nù gɛ fala kpo. A hɔa do 'da fala ndɔti nùi kɔla ia gɛ, nɛ a hã kili tɛ a ngboo hã Gale, takɔ a fò do ku'da 'dã mɔ zu owele.

²⁷ Owinɔ vɛ̃ wa fe fala kpo, nɛ 'do fie 'da wa, nɛ Gale 'bili ngbangga 'da wa.

²⁸ Na mɛ ni, Kristo hã zi tɛ a hã Gale, nɛ a fia fala kpo we 'dã mɛ 'da ogili winɔ. Nɛ a hɔ sɛ 'bɔ mbé nɛ fala kpo, nɛ nde a hɔ́ sɛ we fo 'dã mɔ gɔ, a hɔ sɛ we kpasa winɔ wa 'bɔ 'da a ni.