OHEBRE 7 - WE NU GALE 1995

Mɛlkisedɛkɛ a nwa, nɛ a 'bɔ a nganga

¹ Mɛlkisedɛkɛ zi a nwa ngɔ le Salɛmɛ, nɛ a zi 'bɔ a nganga 'da Gale, kɛ a nɛa ngɔ mɔ vɛ ni. Nɛ 'da fala kɛ Abrahama yula zi tɛ bi bole do ogele nwanɔ, nɛ a nɛa ngɔ wa ni, nɛ a tɛ si nɛ, nɛ Mɛlkisedɛkɛ gɔnɔ dati a, nɛ a wele nu a tɛ̃ a.

² Nɛ Abrahama kala kpo mbee 'bu kɔ mɛnɔ vɛ a kala li bole ni hã a. Gulu li Mɛlkisedɛkɛ na: “Nwa, wele bɔlɔ zu.” Nɛ a zi a nwa ngɔ le Salɛmɛ, gulu Salɛmɛ na: “Nwa, wele dungu fio.”

³ Owele wa ĩ̀ ti baa a, do naa a, do nu fɛlɛ a gɔ, nɛ wa ĩ̀ 'bɔ ti fala wa kua do a, do fala a fia nɛ ni gɔ. A ɔ nɛ Be 'da Gale ni, nɛ a 'bana sɛ nganga 'da Gale fai.

⁴ Nɛ zɔ́, Mɛlkisedɛkɛ zɛ́ a gã wi ngboo. Mba gɔ, yaa lɛ Abrahama hã zi kpo mbee 'bu kɔ mɛnɔ vɛ a kala li bole ni hã a.

⁵ Mbula kɛ Mɔizɛ kɔma zi ni, ma hã zi wala hã onganganɔ, obe zã Levi na, wa kala kpo mbee 'bu kɔ mɛnɔ 'da obe Israɛlɛ vɛ. Ĩ na, Olevi do obe Israɛlɛ a nya wi, wa vɛ a obe zã Abrahama.

⁶ Nɛ gɛnɛ kɔ Mɛlkisedɛkɛ zɛ́ a wi nu fɛlɛ Levi gɔ, nɛ nde a kpa zɛ́ kpo mbee 'bu kɔ mɛnɔ kɔ̃ Abrahama, nɛ a wila 'bɔ nu a tɛ Abrahama, kɛ Gale kpua zɛ́ mbuli hã a ni.

⁷ Nɛ lɛ ĩ na, wi kɛ a wele nu a tɛ ngba a, nɛ nde a gã nɛa ngɔ wele kɛ a wila nu a tɛ́ a ni.

⁸ Onganganɔ kɛ wa kala zɛ́ kpo mbee 'bu kɔ mɛnɔ kɔ̃ onya wa ni, wa a Owele, wa fe fio fia. Nɛ nde kɛ 'da Mɛlkisedɛkɛ, wa kɔma kɔ 'Buki 'da Gale na, a 'bana do tunu li a.

⁹ Ma kɔ̃a we tɔ̃ na, do ngba soe kɛ Abrahama hã zi kpo mbee 'bu kɔ mɛnɔ 'da a hã Mɛlkisedɛkɛ ni, nɛ nde Levi kɛ a kala kɔ mɛnɔ 'da onya a ni, a hã zi tɛ mɛ 'bɔ kpo mbee 'bu kɔ mɛnɔ 'da a hã Mɛlkisedɛkɛ.

¹⁰ Mba gɔ, gɛnɛ kɔ do ngba soe ni, wa tɛ kò zi Levi gɔ, nɛ nde a zi kɔ tɔkɔ tɛ yaa a Abrahama 'da fala Mɛlkisedɛkɛ gɔnɔ do dati a ni boe.

¹¹ Dɛa to nganga 'da Olevi ma yula ngɔ mbula kɛ Gale hã zɛ́ ma hã obe Israɛlɛ ni. Nɛ nde ɔ do kɛ na, to nganga 'da Olevi we sɔ tɛ 'dafa obe Israɛlɛ ngboo, nɛ gulu kɛ Gale ia 'bɔ mbé nganga, kɛ a a nu fɛlɛ Aroni gɔ, nɛ nde a a nganga ɔ nɛ tɛlɛ tɛ kɛ 'da Mɛlkisedɛkɛ ni we ge nde?

¹² Mba gɔ, fala kɛ dɛa to nganga kifi, nɛ ma wia tɛ mɛ 'bɔ na, wa kifi mbulanɔ.

¹³ Nɛ wi kɛ lɛ tɔ̃ wenɔ 'da a ni, a yula kɔ gele nu kpala, nɛ wele kpo kɔ nu kpala a dè zi mbe to nganga dati gɔ.

¹⁴ Winɔ vɛ̃ wa ĩ na, a a wi nu kpala Yuda. Nɛ 'da fala kɛ Mɔizɛ tɔ̃ zɛ́ we dɛa to nganga ni, a sà zi li nu kpala Yuda tɛ nɛ gɔ.

Yezu a nganga kɛ a wia kɔ̃ do Mɛlkisedɛkɛ

¹⁵ Mɛ ma be 'bɔ hã lɛ dɛ wila fala na, dɛa to nganga 'da Olevi wè ngboo gɔ ni, mɛ a kɛ na, mbé gele nganga kɛ a wia kɔ̃ do Mɛlkisedɛkɛ ni hɔa.

¹⁶ A hɔ̀ zi nganga do wala 'da mbulanɔ kɛ Owele wa ia ni gɔ, nɛ nde a hɔa nganga do ngawi kpasi 'da a kɛ ma é sɛ gɔ ni.

¹⁷ Nɛ ma ɔ nɛ kɛ wa kɔma kɔ 'Buki 'da Gale na: “Mɔ 'bana sɛ nganga fai ɔ nɛ tɛlɛ tɛ kɛ 'da Mɛlkisedɛkɛ ni.”

¹⁸ Na mɛ ni, ã gbɛlɛ mbulanɔ kifi zi, we duzu kɛ ma do ngawi bina, nɛ ma yala iko.

¹⁹ Mba gɔ, mbula kɛ Mɔizɛ kɔma zɛ́ ni, ma wè zi tɛ 'dafa mɔ na, ma we ngboo gɔ. Nɛ nde Gale 'dafa mbé gele mɔ kɛ lɛ wia we gbini zã lɛ do ma, nɛ ma dia nɛa ngɔ ã mbulanɔ zi ni hã lɛ. Nɛ ma hã wala hã lɛ we kɔlɔ do Gale.

²⁰ Dɛ ngɔ ki ni, 'da fala Gale ia a do gã nwa nganga ni, nɛ Gale zungga zi tɛ̃ a zungga. Nɛ nde a zònggò zi tɛ̃ a hã ogele nganganɔ zɛ́ dati ni gɔ.

²¹ Kɔ 'da fala a nɛa we e Yezu do nganga ni, nɛ a zungga tɛ̃ a na: “Mi Nwa, mi zungga tɛ mi, nɛ mi kpóló sɛ linggamɛ 'da mi gɔ: Mɔ 'bana sɛ nganga fai.”

²² Kɔ we duzu Yezu, ma kɛ kafi fua tɛ ɛ kɔ sila lɛ, nɛ lɛ ĩ na, mbé gba tɔkɛ kɛ Gale gba ma do lɛ ni, ma dia nɛa ngɔ ã kɛ.

²³ Mbe mɛ kɛ ma si 'bɔ tɛ ɛ do kɛ zi ni, mɛ a kɛ na, onganganɔ zi ni wa dɛlɛ zi wena, we kɛ wa a wele, nɛ wa fe fio fia, nɛ wa wè zi tɛ 'bana fai gɔ.

²⁴ Nɛ nde Yezu wè tɛ fe fio gɔ, nɛ a wè tɛ la dɛa to nganga 'da a hã gele wele gɔ.

²⁵ We duzu ma, owinɔ kɛ wa kɔlɔ do Gale do wala 'da Yezu ni, nɛ Yezu wia tɛ kpasa wa ngboo. We kɛ a do kpasi, nɛ a tɛ aka Gale we winɔ fai.

²⁶ Na mɛ ni, Yezu a gã nwa nganga kɛ a wia do lɛ ngboo ni. A a santo, a dè 'dã mɔ gɔ, nɛ fo 'dã mɔ kɔ a bina. Gale fua zi a sanga o'dã winɔ, nɛ a ba a dɛ li nza ngɔ i.

²⁷ A ɔ̀ nɛ ogele gã nwa nganganɔ gɔ. Wanɔ ni, wa dɔ zi dɔnggamɔ hã Gale tũ kpo kpo we duzu 'dã mɛnɔ 'da wa, sɛ nɛ wa dɔ 'bɔ we 'dã mɛnɔ 'da tala ogele winɔ de. Nɛ nde kɛ 'da Yezu, a hã zi dɔnggamɔ hã Gale fala kpo ia, nɛ dɔnggamɛ ni, mɛ a kifi tɛ̃ a wele nɛ ngboo.

²⁸ Mbulanɔ kɛ Mɔizɛ kɔma zé ni, ma ia zi Owele do gã nwa nganga. Ĩ na, wele do ngawi we dɛ mɛnɔ vɛ do wala olo nɛ bina. Nɛ nde zonggo tɛ wi kɛ Gale zungga ma do 'do mbula ni, ma ia Yezu do gã nwa nganga. Yezu a Be 'da Gale, nɛ Gale 'dafa to nganga 'da a wia ngboo, nɛ ma 'bana sɛ fai.