OHEBRE 6 - WE NU GALE 1995

¹ Gulu nɛ a ma wia na, lɛ la fala be bi lɛnggɛnɔ kɛ lɛ ndua zi be ma ngɔ Kristo ni do'do, kɔ lɛ nɛ dɛ dati, nɛ lɛ yambala wenɔ kɛ ma wia do okpasa nɛ ni. Lɛ tɛ gìlì 'bɔ tɛ lɛ ngɔ bi lɛnggɛnɔ ni gɔ. Lɛ wè 'bɔ tɛ be tɛlɛ tɛ kɛ wele wia we la fala dɛ 'dã mɛnɔ kɛ ma kã a dɛ li fio ni, kɔ a kɔ̃ zu li Gale ni hã nɛ gɔ.

² Nɛ lɛ wè 'bɔ tɛ be we ngɔ fɔlɔ tɛ wi we hɔ sa wi li Gale, do a kɔ̃ wi zu wele we aka wila nui 'da Gale dɛ ngɔ a, do kɛ 'da tunu kɔ fio, do kɛ Gale a gɔnɔ sɛ do tala ngbangga ngba'du ni gɔ.

³ Kɔ fala kɛ Gale kɔ̃, nɛ lɛ nɛ dɛ dati, nɛ lɛ yambala mɛnɔ kɛ ma a 'du ni.

⁴ Kɔ ma ɔ sɛ do winɔ kɛ wa kpula 'bɔ tɛ wa li wala 'dã mɔ ni nɛ nde? Wa lia zi kɔ sa fala 'da Gale, nɛ wa kpa dia mɛnɔ kɛ Gale hã ma hã wa ni, nɛ wa kpa 'bɔ ngawi 'da Hi Wi Santo.

⁵ Wa zila zi we nu Gale, nɛ wa zɔa na, ma de wena, nɛ wa ĩ ti ngawi 'da mɛnɔ ma hɔ sɛ 'do gɛ ni.

⁶ Gɛnɛ kɔ na mɛ ni, nɛ nde wa tia 'bɔ kɔ 'dã mɔ. Kɔ ma wé sɛ na, wele be we hã wa, nɛ wa kifi sila wa gɔ, we duzu kɛ wa tɛ bɛ̃lɛ̃ 'bɔ Be 'da Gale ngɔ finda te mbé nɛ, nɛ wa e a na, winɔ wa dã a.

⁷ Ma ɔ nɛ nùi kɛ kolo tɛ dɛ ngɔ nɛ wena, nɛ ma nɔmɔ lì kole, nɛ ma ko odia kpalɛ hã owi wa fɔnɔ ni. Ki ni nɛ nde Gale wila nu ɛ tɛ nùi ni.

⁸ Kɔ fala kɛ nùi ni ko tati a otɛ̃, do owɔkɔsɔ iko, nɛ nde mɛ a 'dã nù. Nɛ ngba soe kɛ Gale nɛ fɔmbɔ do ma ni kɔla ia, wa fi sɛ we tɛ nɛ, nɛ ma bɛlɛ vɛ̃.

⁹ Aa oyali ngba mi, gɛnɛ kɔ lɛ tɔ̃ hã nɛ ní, nɛ nde lɛ bà kafi we duzu nɛ gɔ. Lɛ ĩ na, nɛ a ngɔ bɔlɔ wala, nɛ mɛ a wala kɛ Gale a kpasa sɛ do nɛ.

¹⁰ Gale a wi bɔlɔ zu, nɛ ta zu a élé sɛ ngɔ de dɛa mɛnɔ 'da nɛ, do kɔ̃a zã nɛ kɔ̃a do a ni gɔ. We kɛ a zɔa tɛlɛ tɛ kɛ nɛ gala zi onya nɛ wi kɔ̃a wenɔ, nɛ nɛ 'bana tɛ gala wa tia do sɔɛ gɛ ni.

¹¹ Nɛ nde lɛ kɔ̃a na, wele do wele sanga nɛ ni dɛ nganda na mɛ ni fai, takɔ mɛ nɛ gbini zã nɛ do ma ni, nɛ kpa ma vɛ̃.

¹² Lɛ kɔ̃̀ na, nɛ mbɔkɔ hã nɛ la fala nɛ gɔ. Nɛ nde nɛ dɛ mɔ tɛ nɛ ɔ nɛ kɛ 'da winɔ wa kɔ̃ zu li Gale, nɛ wa kunu sila wa gbaa, nɛ wa kpa mɛnɔ kɛ Gale kpua zi mbulu nɛ hã wa ni.

Gale kpua mbulu

¹³ 'Da fala Gale nɛa we kpo mbuli hã Abrahama ni, nɛ a zungga tɛ̃ a do zu li a wele nɛ ngboo, we kɛ fo mbé wele ngɔ Gale, do kɛ Gale zonggo tɛ̃ a do zu li a ni bina.

¹⁴ A tɔ̃a na: “Mi wele sɛ nu mi tɛ mɔ, nɛ mi hã sɛ gili obe hã mɔ.”

¹⁵ Nɛ Abrahama 'bɔa zi 'da mbuli ni do du sila, nɛ a kpa mɛ kɛ Gale tɔ̃a zi nɛ hã a ni.

¹⁶ Kɔ 'da fala owele wa nɛ zonggo tɛ wa, nɛ wa zonggo do zu li wi kɛ a nɛa ngɔ wa ni. Nɛ zonggo tɛ wi ni, ma fo kafi sanga tɛ ngba wa.

¹⁷ Na mɛ ni, 'da fala kɛ Gale kpua zi do mbuli 'da a ni, nɛ a zungga zi tɛ̃ a zungga we be hã winɔ kɛ wa nɛ kpa sɛ mɔ olo mbuli ni dɛ wila fala na, a kpóló sɛ linggamɛ 'da a ngɔ ma gɔ.

¹⁸ Nɛ mbuli 'da Gale, do zonggo tɛ wi 'da a ma kífí sɛ gɔ, nɛ Gale káfá sɛ olo nu ɛ gɔ. Ki ni ma hã ngawi hã lɛ winɔ kɛ lɛ usu tɛ lɛ dɛ tambala kɔ̃ a ni na, lɛ 'bɔ 'da mbuli ni do sila lɛ kpo.

¹⁹ Nɛ mbuli kɛ lɛ gbini zã lɛ do ma ni, ma nganda sila lɛ na, da dɛ kɔ linggamɔ zu lɛ yɛ́kɛ́ gɔ. Nɛ ma ba wala hã lɛ na, lɛ le gbaa 'do gã tuli kɛ ma kɛa sanga kɔ tɔa Tɛmpɛloe li nza i ni, nɛ lɛ hɔ tɛ fala kɛ ma santo wena ni.

²⁰ Mɛ a fala kɛ Yezu lia kɔ nɛ dati hã lɛ, we hũi wala hã lɛ na, lɛ le tɛ mɛ 'bɔ. Nɛ a fai a gã nwa nganga ɔ nɛ tɛlɛ tɛ kɛ 'da Mɛlkisedɛkɛ ni.