OHEBRE 5 - WE NU GALE 1995

¹ Owinɔ wa saka gã nwa nganga sanga wa kpo kpo vɛ, nɛ wa e a na, a dɛ to dati Gale we duzu lo. A hã odɔnggamɔ hã Gale, nɛ a dɔ osa'de hã a we si do ku'da 'dã mɛnɔ 'da winɔ.

² Nɛ́ kɛ a a wele, nɛ a do ngawi we yu 'dã mɔ bina ni, a wia tɛ dɛ 'bako hã owinɔ vɛ kɛ wa zɔla hã zã, do wanɔ wa yɔa wala ni.

³ Nɛ we duzu kɛ a do ngawi yu 'dã mɔ bina ni, a dɔ́ sa'denɔ hã Gale we lengge do 'dã mɛnɔ 'da otala gele winɔ iko gɔ, nɛ nde ma tɛ mɛ 'bɔ we duzu 'dã mɛnɔ 'da a wele nɛ.

⁴ Wele wè tɛ e tɛ̃ ɛ wele nɛ do gã nwa nganga gɔ. Nɛ nde Gale a saka a, ɔ nɛ kɛ a saka zi do Aroni ni, sɛ nɛ de.

⁵ Na mɛ ni, Kristo sàkà zi tɛ ɛ wele nɛ na, ɛ hɔ gã nwa nganga, kɔ ɛ kpa dɔ̃lɔ̃ li gɔ. Nɛ nde Gale a saka a, nɛ a tɔ̃a hã a na: “Yolo do sɔɛ gɛ, mɔ a bulu be 'da mi, nɛ mi hɔa baa mɔ.”

⁶ Nɛ a tɔ̃ 'bɔ na: “Mɔ 'bana sɛ nganga fai, ɔ nɛ tɛlɛ tɛ kɛ 'da Mɛlkisedɛkɛ ni.”

⁷ 'Da fala Yezu 'bana zi nù nga ni, nɛ a wila zi we nu ngba a do Gale, nɛ a ala nu a hã a, nɛ a hia mɔ nganda wena do mili kɔ̃a li a. We kɛ a ĩ zi na, Gale wia tɛ kpasa ɛ kɔ fio. Nɛ Gale zila zi sambala 'da a, we kɛ a ba zi tɛ̃ a dɛ nù dati Gale.

⁸ Gɛnɛ kɔ a a Be 'da Gale ngboo, nɛ nde ma wia zi na, a kpa ngamɔ, takɔ a ĩ ti zele nu Gale.

⁹ Kɔ Gale zɔa na, Yezu dɛa toe 'da a, nɛ ma wia vɛ ia ni, nɛ Gale ia a do wi hã kpasi kɛ ma é sɛ gɔ ni hã winɔ vɛ̃, kɛ wa zele nu a ni.

¹⁰ Nɛ Gale tɔ̃a na, ɛ ia a do gã nwa nganga ɔ nɛ tɛlɛ tɛ kɛ 'da Mɛlkisedɛkɛ ni.

Nɛ tɛ là fala kɔ̃a we 'da nɛ gɔ

¹¹ Lɛ do we wena we tɔ̃ hã nɛ ngɔ wenɔ ni, nɛ nde fala tɔ̃ gulu nɛ hã nɛ nganda wena, we kɛ zu nɛ bá mɔ dɔ̃ gɔ.

¹² Nɛ wia sɔ we hɔ Owi be mɔ hã ombé wele ia. Ĩ na, ma wia 'bɔ na, wa be kuti gulu we nu Gale hã nɛ. Nɛ tɛ wè do nyɔngɔ nga nyɔngɔmɔ gɔ, nɛ nde nɛ ɔmɔ bele iko.

¹³ Kɔ wi kɛ a ɔmɔ bele iko ni, a 'bana do nzɔ be. A tɛ ĩ̀ ti gɔnɔ sanga dia mɔ do 'dã mɔ gɔ.

¹⁴ Nɛ nde wele gã ia, nɛ a nyɔngɔ nga nyɔngɔmɔ. Nɛ mɛnɔ a dɛ ni, ma sɔ̃ li a na, a ĩ ti gɔnɔ sanga dia mɔ do 'dã mɔ.