OHEBRE 4 - WE NU GALE 1995

¹ Gale kpua zɛ́ mbulu hã lɛ na, lɛ wia sɛ we le fala kpe do tɛ wi 'da ɛ, nɛ mbuli ni ma 'bana. We duzu ma, lɛ dɛ́ nganda na, dɔ mbe kpo sanga lɛ 'báná 'do, kɔ a zɔlɔ le nɛ gɔ.

² Mba gɔ, lɛ vɛ̃ lɛ zila Dia Sakoe ɔ nɛ kɛ winɔ wa zila zɛ́ ma li gba zɔ̃ i ni. Nɛ nde wanɔ ni wa zila zɛ́, nɛ ma gàlà wa gɔ, we kɛ wa kɔ̃̀ zɛ́ gɛnɛ wenɔ wa zila ni gɔ.

³ Nɛ lɛ, kɛ lɛ kɔ̃a ma ni, lɛ le sɛ fala kpe tɛ wi kɛ Gale tɔ̃a nɛ na: “Zã mi nɔ̃lã, nɛ mi zonggo tɛ mi na, wa lé sɛ fala kpe do tɛ wi 'da mi gɔ” ni. A tɔ̃a ni, ĩ na, toe 'da a ia zɛ́ vɛ̃, yolo do kɛ a dɛa nùi do mɛnɔ vɛ̃ ni ia.

⁴ Ma kɛ mbe wele kɔma kɔ 'Buki 'da Gale ngɔ sambo tũi na: “Do sambo tũi, nɛ Gale kpia tɛ̃ ɛ olo dɛa tonɔ 'da a vɛ.”

⁵ Nɛ wa kɔma 'bɔ kpo kpo we ni na: “Wa lé sɛ fala kpe do tɛ wi 'da mi gɔ.”

⁶ Owanɔ kɛ wa zila zɛ́ toe 'da Gale dati ni, wa lè zɛ́ fala kpe tɛ wi 'da a ni gɔ, we kɛ wa bɛ̃a zɛ́ we nu a. Na mɛ ni, ma be na, ombé gele wele wa kpa sɛ wala we le ma.

⁷ Ma kɛ Gale 'dafa 'bɔ mbé kɔ̃ tũ kɛ wa sa li ma na “Sɔɛ gɛ” ni. Mba gɔ, olo nɛ la sabɛlɛ dɛlɛ wena, kɛ Gale tɔ̃a do wala 'da Davidi na: “'Da fala nɛ zele gɛlɛ Gale sɔɛ gɛ nde, nɛ nɛ tɛ dɛ̀ nga zu ɔ nɛ oyaa nɛ gɔ.”

⁸ Ɔ do kɛ Yozue a zɛ́ oyaa lɛ tɛ fala kpe tɛ wi ni ia, nɛ nde Gale wé sɔ 'bɔ mbé kɔ̃ tũ we nɛ gɔ.

⁹ Na mɛ ni, ma be na, mbé gele tũ kpe tɛ wi, takɔ winɔ 'da Gale wa kpe do tɛ wa, ɔ nɛ kɛ a kpia zi tɛ̃ a do sambo tũi ni boe.

¹⁰ Mba gɔ, wi kɛ a le i mɔ we kpe tɛ̃ a fala nɛ kpo do Gale ni, a kpe tɛ a do dɛa toe 'da a, ɔ nɛ kɛ Gale kpia zi tɛ̃ ɛ do kɛ 'da ɛ ni.

¹¹ Kɔ lɛ dɛ́ nganda wena we le fala kpe do tɛ wi ni, nɛ da dɛ kɔ mbe kpo sanga lɛ bɛ̃́ we nu Gale, kɔ a dɛ 'dã mɔ ɔ nɛ wanɔ wa zi li gba zɔ̃ i ni gɔ.

¹² Nɛ ĩ na, we nu Gale ma do kpasi, nɛ ma do ngawi. Nu nɛ tɔ̃a nɛa ngɔ tɔ̃a nu kɔya kɛ nu ma bɔa ni. Ma dumu wele, nɛ ma le gbaa nɛ ma kɛ sanga sila wi do hi wi, nɛ ma nɛ, nɛ ma kpa gbãlã, do mbɔnggɔ zã nɛ. We nu Gale ma be linggamɔ kɔ sila wele, do mɛnɔ a do wɔ nɛ ni dɛ nza.

¹³ Mɔ kɛ ma usu tɛ ɛ li Gale ni bina. Mɛnɔ vɛ́ kɛ Gale dɛa ma ni, ma ɔ li a dɛ tɛ wila fala iko. A a wi kɛ lɛ tɔ̃ sɛ gulu mɛnɔ vɛ lɛ dɛa ni hã a.

Yezu a gã nwa nganga 'da lɛ

¹⁴ Ma wia na, sila lɛ nɔ tɛ kɔ̃a we 'da lɛ. Mba gɔ, lɛ do gã nwa nganga boe, wi a Yezu Be 'da Gale, kɛ a nɛa gbaa, nɛ a lia li nza 'da Gale i ni.

¹⁵ A a gã nwa nganga, nɛ a wia we dɛ 'bako do lɛ 'da fala kɛ lɛ mbɔkɔ ni, we kɛ Satana ɔlɔ zi a do walanɔ kpi do kpi, ɔ nɛ kɛ a ɔlɔ do lɛ ni, nɛ nde Yezu tè kɔ 'dã mɔ gɔ.

¹⁶ We duzu ma, lɛ tɛ dɛ̀ kili gɔ, nɛ nde lɛ nɛ́ dɛ dati kpongbo nwa 'da Gale, kɛ a be dia zã 'da a hã owinɔ fai ni. A ĩ sɛ 'bako hã lɛ, nɛ a be sɛ dia zã 'da a hã lɛ we gala lɛ do li zɔlɔ nɛ ngboo.