OHEBRE 3 - WE NU GALE 1995

Yezu gã nɛa ngɔ Mɔizɛ

¹ Na mɛ ni, onyae wi kɔ̃a wenɔ, kɛ Gale sa zi 'bɔ mɔ hã nɛ ni, nɛ á linggamɛnɔ 'da nɛ dɛ ngɔ Yezu, kɛ Gale tumba a we ɔ gã nwa nganga ngɔ wenɔ lɛ kɔ̃a ma gɛ ni.

² Yezu dɛa toe kɛ Gale tumba a we nɛ ni, do wala olo nɛ ngboo, ɔ nɛ kɛ Mɔizɛ dɛa zi do toe 'da a sanga owinɔ 'da Gale vɛ̃ ni.

³ Nɛ nde Yezu kpa dɔ̃lɔ̃ li nɛa ngɔ Mɔizɛ, nɛ́ kɛ wi dɛ tɔa kpa dɔ̃lɔ̃ li nɛ ngɔ tɔa a dɛa ni.

⁴ Tɔa kpo kpo vɛ, wi dɛ ma boe, nɛ nde wi dɛ mɛnɔ vɛ́, wi a Gale.

⁵ Mɔizɛ zi a wi dɛ to sanga owinɔ 'da Gale. Toe 'da a zi a mbese owinɔ do wenɔ kɛ Gale nɛ tɔ̃ ma ni, nɛ a dɛa toe ni do wala olo nɛ.

⁶ Nɛ nde Yezu Kristo a Be 'da Gale, kɛ Gale ia a ngɔ winɔ 'da a vɛ ni, nɛ Yezu dɛa toe 'dɛ ɛ do wala olo nɛ. Owinɔ 'da Gale ni wi a lɛ. Kɔ ma wia na, lɛ ɔ do kpã sila, nɛ lɛ 'bana tɛ gbini zã lɛ do mɛnɔ kɛ lɛ a linggamɛnɔ 'da lɛ na, a dɛ sɛ hã lɛ ni.

Gale a hã sɛ fala kpe tɛ wi hã owinɔ 'da a

⁷ We duzu ma, Hi Wi Santo tɔ̃a na: “'Da fala nɛ zele gɛlɛ Gale sɔɛ gɛ nde,

⁸ nɛ nɛ tɛ dè nga zu, ɔ nɛ kɛ oyaa nɛ wa lakala zi we nu Gale do ngba soe wa yamba sila a li gba zɔ̃ i ni gɔ.

⁹ Gale tɔ̃a na: Oyaa nɛ wa bɛ̃a zi we nu mi, nɛ wa yamba sila mi. Mɛ ni nɛ nde wa zɔa zi mɛnɔ kɛ mi dɛa ma kɔ 'bu sabɛlɛ nalɛ ni vɛ.

¹⁰ We duzu ma, nɛ zã mi nɔ̃lã dɛ tɛ wa, nɛ mi tɔ̃a hã wa na, nɛ a owi vĩ zu iko, nɛ kɔ̃̀ we dɛ mbulanɔ 'da mi gɔ.

¹¹ Nɛ zã mi nɔ̃lã, nɛ mi zonggo tɛ mi na, wa lé sɛ fala kpe do tɛ wi 'da mi gɔ.”

¹² Kɔ onyae, nɛ dɛ́ zĩ, da dɛ kɔ mbe kpo sanga nɛ ɔ́ do 'dã sila, kɔ ma 'danga kɔ̃a we 'da a, kɔ a la fala Gale, wele kpasi gɔ.

¹³ Nɛ nde nɛ ngándá sila ngba nɛ tũ kpo kpo, we kɛ lɛnggɛ wa kɔma kɔ 'Buki na “Sɔɛ gɛ” ni, ma 'bana do gulu nɛ we lɛ tɛ mɛ 'bɔ. Nɛ dɛ́ ní, da dɛ kɔ 'dã mɔ ɔ́lɔ́ mbe kpo sanga nɛ, kɔ a dɛ nga zu gɔ.

¹⁴ Mba gɔ, fala kɛ lɛ 'bana tɛ gbini zã lɛ do Gale ɔ nɛ kɛ zi dati ni, gbaa we hɔ ndɔti nɛ, nɛ nde lɛ a winɔ 'da Kristo ngboo.

¹⁵ Ma ɔ nɛ kɛ wa kɔma kɔ 'Buki 'da Gale na: “'Da fala nɛ zele gɛlɛ Gale sɔɛ gɛ nde, nɛ nɛ tɛ dè nga zu ɔ nɛ kɛ oyaa nɛ wa lakala zi do we nu a ni gɔ” ni.

¹⁶ Winɔ wa zila zɛ́ gɛlɛ Gale, nɛ wa bɛ̃a we nu a ni a wio nde? Wi a wanɔ vɛ́ kɛ Mɔizɛ fua zɛ́ wa ngɔ nù Ezipeto dɛ nza ni.

¹⁷ Nɛ winɔ kɛ zã Gale nɔ̃lã zɛ́ dɛ tɛ wa 'do 'bu sabɛlɛ nalɛ ni a wio nde? Wi a wanɔ kɛ wa dɛa zɛ́ 'dã mɛnɔ, nɛ wa fia li gba zɔ̃ i ni.

¹⁸ Nɛ 'da fala Gale zonggo tɛ ɛ na: “Nɛ lé sɛ fala kpe do tɛ wi 'da mi gɔ” ni, a tɔ̃a zɛ́ we ni hã wio nde? A tɔ̃a zɛ́ ma hã winɔ kɛ wa lakala we nu a ni.

¹⁹ Nɛ lɛ zɔa na, wa lè fala kpe tɛ wi ni gɔ, we duzu kɛ wa kɔ̃̀ zɛ́ we nu Gale gɔ.