OHEBRE 2 - WE NU GALE 1995

Kpasi kɛ ma gã la li ngele

¹ We duzu ma, ma wia na, lɛ kɔ̃ gɛnɛ wenɔ kɛ lɛ zila zi ma ni do sila lɛ kpo, dɔ lɛ yɔ́ wala 'da Gale gɔ.

² Toe kɛ anzɛnɔ wa tɔ̃a zɛ́ ma hã oyaa lɛ ni, ma bia tɛ̃ ɛ na, mɛ a gbãlã we ngboo. Nɛ winɔ vɛ kɛ wa lènggè zi do ma gɔ, tabi wa dɔ̀nggɔ̀ ma gɔ ni, wa kpa zi etumbu olo nɛ, ɔ nɛ kɛ ma wia do wa ni.

³ Ma ɔ ní, nɛ lɛ winɔ kɛ lɛ zila sako gã kpasi gɛ, nɛ lɛ lènggè nɛ gɔ ni, lɛ nɛ dɛ fala yu ngbangga 'da Gale nɛ nde? Nwa Yezu ngboo a tɔ̃a zi to kpasi ni dati, nɛ 'do nɛ, nɛ owinɔ kɛ wa zila ni, wa bia hã lɛ na, mɛ a gbãlã we.

⁴ Nɛ Gale hã ngawi hã wa we dɛ oɔngbamɔ, do ogba sɔ̃ mɔ wena we be na, we wa tɔ̃ ni, mɛ a gbãlã we. Nɛ a kɛa 'bɔ ngawinɔ 'da Hi Wi Santo hã owinɔ, ɔ nɛ kɛ zã a kɔ̃a ni.

Yezu a wi kpasa winɔ

⁵ Nɛ nde we mbé nùi kɛ ma tɛ sɛ 'do gɛ, ɔ nɛ kɛ lɛ tɔ̃ do ma ni, Gale è anzɛnɔ na, wa dungu sɛ nwa ngɔ nɛ gɔ.

⁶ Nɛ nde mbe wele kɔma kɔ 'Buki 'da Gale na: “Wele tɛ mɛ a ge, takɔ mɔ lengge do a ní ni? Wele wia tɛ mɛ mbe mɔ dati mɔ wia, takɔ mɔ sɔnzɔ do a nde?

⁷ Mɔ ia a do ti anzɛnɔ 'do be ngba soe sĩ. Nɛ mɔ hã dĩ do dɔ̃lɔ̃ li hã a,

⁸ nɛ mɔ ia mɛnɔ vɛ do ti a, nɛ a a nwa ngɔ nɛ.” Gale ia wele ngɔ mɛnɔ vɛ, ma be na, mɛnɔ vɛ̃ do ti wele, fo mɔ kpo kɛ wele dùngù nwa ngɔ nɛ gɔ ni bina. Nɛ nde lɛ zɔa na, tia do sɔɛ gɛ, mɛnɔ tɛ lè ti mbula 'da wele vɛ̃ gɔ.

⁹ Kɔ lɛ zɔa na mɛ gɛ: Gale ia zi Yezu do ti anzɛnɔ 'do be ngba soe sĩ, takɔ a fe we winɔ vɛ. Gale dɛa ni we dia zã 'da a dɛ 'da lɛ. Nɛ ngangga ni, Gale hã dɔ̃lɔ̃ li hã a, nɛ a ia a do nwa we fie a fia ni.

¹⁰ Gbãlã we, ma wia zi na, Gale kɛ a dɛa mɛnɔ vɛ, nɛ a zɔ mɔ tɛ nɛ vɛ ni, a 'dafa tɛ mɛ 'bɔ Yezu, nɛ a we ngboo, we duzu zɛlɛ tɛ a kpa ni. Gale dɛa na mɛ ni, takɔ Yezu hũi wala kpasi hã ogba gili wele, nɛ wa hɔ benɔ 'da Gale, nɛ wa mba kpo do a kɔ dɔ̃lɔ̃ li 'da a.

¹¹ Yezu kɛ a fua 'dã mɛnɔ zu owinɔ ni, a mba do owinɔ kɛ 'dã mɛnɔ 'da wa fua tɛ ɛ ia ni, nɛ wa hɔa vɛ be zã Baa wi kpo. Kɔ we duzu ma, sape bà zi li Yezu we sa li wa na onya ɛ ni gɔ.

¹² Nɛ a tɔ̃a na: “Aa Gale, mi tɔ̃ sɛ we 'da mɔ hã onya mi, nɛ mi dɔnggɔ sɛ mɔ dɛ sanga ogba dɔa winɔ.”

¹³ Nɛ a 'bɔ na: “Mi gbini sɛ zã mi do Gale.” Nɛ a tɔ̃a 'bɔ mbé nɛ na: “Mi kɛ! Mi fala nɛ kpo do benɔ kɛ Gale hã zi wa hã mi ni.”

¹⁴ Nɛ ɔ nɛ kɛ benɔ ni wa a Owi kili tɛ wi nù ni, ma kɛ Yezu hɔa zi tɛ 'bɔ wele nɛ́ wa ni, takɔ a fe, nɛ a nɛ ngɔ Satana kɛ a do ngawi we gbɛ winɔ ni.

¹⁵ Na mɛ ni, nɛ Yezu kpasa owinɔ kɛ wa yu zi kili fio, nɛ kɔ dungu nza 'da wa vɛ, nɛ wa ɔ zi nɛ ngbá we duzu kili ni.

¹⁶ Mba gɔ, winɔ kɛ Yezu tɛa we gala wa ni, wi a anzɛnɔ gɔ, nɛ nde wi a obe zã Abrahama.

¹⁷ We duzu ma, ma wia zi na, Yezu we kɔ̃ do onya a kɔ omɛnɔ vɛ, takɔ a ɔ gã nwa nganga 'da wa, kɛ a ĩ 'bako hã Owele, nɛ a dɛ to hã Gale nɛ́ kɛ ma wia ni na, a fo ku'da 'dã mɛnɔ zu winɔ.

¹⁸ Nɛ ngangga ni, Yezu wia tɛ gala owinɔ kɛ Satana fa we ɔlɔ wa ni, we kɛ a ngboo ni, Satana fa zi 'bɔ we ɔlɔ a, nɛ a hã ngamɔ hã a.