OHEBRE 12 - WE NU GALE 1995

Gale a Baa lɛ

¹ Nɛ nde kɛ 'da lɛ, ɔ nɛ kɛ ogba gili wi kɔ̃a wenɔ wa linggi lɛ zĩ takpa ni, ma wia na, lɛ fo mɛnɔ vɛ kɛ ma kpe wala ti lɛ na, lɛ tɛ là dɛ dati gɔ ni do'do. Lɛ lá fala 'dã mɛnɔ kɛ ma ɛnzɛ lɛ, nɛ ma gbɔtɔ lɛ dɛ 'do ni, kɔ lɛ yú yui kɛ Gale wia hã lɛ ni do kpã sila.

² Nɛ lɛ ká mɔ kpo dɛ tɛ Yezu, kɛ kɔ̃a we 'da lɛ yolo kɔ a ni, nɛ a kã sɛ 'bɔ lɛ gbaa we hɔ ndɔti nɛ. 'Da fala wa nɛa zi we gbɛ a ngɔ finda te ni, nɛ a kunu sila a, nɛ a lènggè do fio sape ni gɔ, we duzu kɛ a zɔa yangga kɛ ma 'bɔ 'da a ni. Nɛ ngangga gɛ, a dungu kɛ zã kpongbo nwa 'da Gale, si ngɔ ngawili kɔ̃.

³ Kɔ ma wia na, nɛ lengge do a fai. A kunu zi sila a ngɔ sɛnɛmɛ kɛ o'dã winɔ wa dɛa zi hã a ni. Kɔ nɛ lengge do a, nɛ nde nɛ mbɔ́kɔ́ sɛ gɔ, nɛ nɛ sɛ do kpã sila.

⁴ Mba gɔ, nɛ tɛ bi bolo do 'dã mɛnɔ, nɛ nde nɛ tɛ kpà fio li bole ni gɔ.

⁵ Ta zu nɛ ila ngɔ mbulanɔ kɛ Gale tɔ̃a zɛ́ hã nɛ we nganda sila nɛ, ɔ nɛ kɛ baa be tɔ̃ hã obenɔ 'da a ni nde? Gale tɔ̃a na: “Bulu be 'daa, fala kɛ mi Nwa, mi hã etumbu hã mɔ, nɛ mɔ tɛ zɔ̀ ma li mɔ yala gɔ. Tabi mi kɔ'dɔ mɔ nde, nɛ mɔ tɛ mbɔ̀kɔ̀ gɔ.

⁶ We kɛ mi Nwa, mi hã etumbu hã wi kɛ mi kɔ̃a gɛnɛ a, nɛ mi zɛ owanɔ kɛ mi zɔ wa nɛ́ obenɔ 'da mi ni.”

⁷ Kɔ nɛ kúnú sila nɛ kɔ zɛlɛ tɛnɔ kɛ nɛ kpa ma gɛ, nɛ nɛ zɔ́ ma nɛ́ etumbu kɛ baa be hã hã be 'da a ni. Mba gɔ, zɛlɛ tɛ ni be na, Gale kɔ̃a gɛnɛ nɛ nɛ́ benɔ 'da a ni. Nɛ zɔa mbe be kɛ baa a hã etumbu hã a gɔ ni nde?

⁸ Fala kɛ nɛ kpà mbe etumbu ɔ nɛ kɛ benɔ vɛ wa kpa ma ni gɔ, nɛ nde ma be na, nɛ a obenɔ 'da baa nɛ ni ngboo gɔ, nɛ a ogele be iko.

⁹ Nɛ lénggé do obaa lɛ ngɔ nù gɛ. Wa hã zi etumbu hã lɛ, nɛ lɛ dɔnggɔ zi wa. Kɔ ma wia tɛ mɛ 'bɔ na, lɛ dɔnggɔ Baa lɛ kɛ li nza i ni nɛ ngɔ ki ni, sɛ nɛ lɛ ɔ sɛ do kpasi de.

¹⁰ Obaa lɛ ngɔ nù gɛ, wa hã etumbu hã lɛ 'do be ngba soe sĩ, ɔ nɛ kɛ wa zɔa na, ma wia ni. Nɛ nde Gale hã etumbu hã lɛ, takɔ ma gala lɛ we ɔ santo, ɔ nɛ kɛ a santo ni.

¹¹ Wele kpa etumbu, nɛ nde ma hã́ yangga hã a do 'da fala ni gɔ, ma hã 'bako hã a. Nɛ 'do nɛ, nɛ owanɔ wa 'dafa sila wa olo etumbui ni, wa kpa dia mɔ olo nɛ. Nɛ etumbui gala wa na, wa dɛ bɔlɔ zu dɛa mɔ, nɛ wa ɔ do gɛ̃a sila.

Ombula kpi do kpi

¹² Aa nɛ, owinɔ kɛ kɔ̃ nɛ mbɔka, nɛ zugolo nɛ gɛa ni, nɛ ngo ma hã ma nganda dɛ olo nɛ.

¹³ Nɛ yɛ́nggɛ́ li bɔlɔ wala na, da dɛ kɔ Owi 'dã nyanganɔ wa té gɔ, nɛ nde nyanga wa de dɛ do nɛ.

¹⁴ Nɛ dɛ́ nganda we dɛ na do owinɔ vɛ̃, nɛ nɛ 'dáfá dungi 'da nɛ ɔ nɛ kɛ ma wia do winɔ 'da Gale ni. Mba gɔ, wi kɛ a dɛ̀ ni gɔ, nɛ nde a wé sɛ tɛ zɔ Nwa gɔ.

¹⁵ Nɛ nɛ dɛ́ nganda na, dɔ mbe kpo sanga nɛ zɔ́lɔ́ kpa dia zã 'da Gale gɔ. Nɛ da dɛ kɔ wele kpo kífí 'dã kpalɛ, kɔ ma gã, hã 'dã ina kɔ nɛ 'danga ogili winɔ gɔ.

¹⁶ Li nɛ sɔ̃́, dɔ wele kpo sanga nɛ bá tɛ̃ a we yɛnggɛ vĩ zu yɛli gɔ, tabi a zɔ́ mɔ santo li a yala, ɔ nɛ kɛ Ezau dɛa zi ni gɔ. Ezau tɛka zi nwa kuti be kɛ ma wia sɔ na, a kpa ma olo baa a ni, nɛ a kpula ma do sani nyɔngɔmɔ kpo.

¹⁷ Nɛ nɛ ĩ na, 'do nɛ, nɛ a kɔ̃a zi we kpa wila nui 'da baa a, nɛ baa a bɛa gɛnɛ a. Gɛnɛ kɔ Ezau hia kɔ̃a gbaa, nɛ nde a wè zi 'bɔ we kpolo mɛ kɛ a dɛa ni gɔ.

¹⁸ Kɛ 'da nɛ, nɛ hɔ̀ ti nyanga kala Sinai, nɛ nɛ zɔ mɛnɔ kɛ obe Israɛlɛ wa zɔa zɛ́, nɛ wa ĩ ti nɛ ni gɔ. 'Da fala wa hɔa zɛ́ ti nyanga kala ni, nɛ wa zɔa ma tɛ nyɛ do gba nyɛa we, nɛ gba tũ tũ kpã kpã, nɛ gba bũ kamba fi kpu kpu kpu.

¹⁹ Nɛ wa zila giti mɔtũlũ tɛ dɔ̃lɔ̃ nɛ, do gɛlɛ wele tɛ wele we. Kɔ 'da fala wa nɛa we zele wila we ni, nɛ wa ala nu wa na, dɔ ma wélé 'bɔ we hã lo gɔ.

²⁰ We duzu kɛ wila we ni wila zɛ́ hã wa na: “Gɛnɛ kɔ ma ɔ do wele, tabi sa'de nde, kɔ a 'be tɛ kala, nɛ nɛ ló a do ta, nɛ nɛ gbɛ a.” Nɛ obe Israɛlɛ wa wè zɛ́ tɛ kunu sila wa tɛ we ni gɔ.

²¹ Nɛ mɛnɔ kɛ wa zɔa zɛ́ ma ni, mɛ zɛ́ a gba mɔ kili. Nɛ Mɔizɛ do tɛ a tɔ̃a 'bɔ na: “Kili ba mi wena! Nɛ tɛ mi ta tana.”

²² Nɛ nde nɛ, nɛ hɔa ti nyanga kala Sioni kɔ le 'da Gale, wele kpasi. Mɛ a le Yeruzalɛmɛ li nza i, kɛ gili oanzɛnɔ koto do koto wa mba ngba wa dɛ kɔ nɛ ni.

²³ Nɛ nɛ lia kɔ gbalimɛ 'da okuti benɔ 'da Gale, kɛ a kɔma li wa kɔ 'buki 'da a li nza i ni. Nɛ kɔla do Gale, kɛ a 'bili sɛ we 'da winɔ vɛ ni, nɛ nɛ kɔlɔ 'bɔ do hi winɔ kɛ zu wa a bɔlɔ, nɛ wa wia ngboo ni.

²⁴ Nɛ nɛ hɔa 'bɔ dati Yezu, kɛ a yula sanga tɛ ngba lɛ do Gale, nɛ a 'dafa mbé gba tɔkɔ sanga lɛ ni. Tɔkɔ tɛ Yezu ma a nù, nɛ ma wele we de nɛ ngɔ kɛ 'da Abɛlɛ.

²⁵ Kɔ nɛ dɛ́ nganda na, dɔ nɛ bɛ̃́ we zele we nu Gale, kɛ a wele we hã nɛ ni gɔ. Mba gɔ, owinɔ wa bɛ̃a zɛ́ we zele we nu wi kɛ a gba do nu Gale hã wa ngɔ nù nga ni, wa wè zɛ́ tɛ yu etumbu gɔ. Na mɛ ni, fala kɛ lɛ zèlè we nu Wele kɛ a wele we hã lɛ yolo do li nza i ni gɔ, nɛ nde lɛ wé sɛ tɛ mɛ 'bɔ do yu ma gɔ.

²⁶ Wala gɛlɛ a dɛa zi na, nùi tana, nɛ ngangga gɛ, a kpua mbulu na: “Mi wele sɛ 'bɔ mbé nɛ fala kpo, nɛ mɛ táná sɛ tati a nùi iko gɔ, nɛ nde li nza ma tana sɛ 'bɔ.”

²⁷ Kɔ we Gale tɔ̃a na: “'Bɔ mbé nɛ fala kpo” ni, ma be na, mɛnɔ vɛ kɛ a dɛa zɛ́, nɛ ma ta tana ni, ma tana sɛ, nɛ ma busu sɛ, takɔ mɛ kɛ ma wè tɛ tana nɛ gɔ ni, ma 'bana fai.

²⁸ Kɔ lɛ ha iɔ̃nae hã Gale, we duzu kɛ a hã le nwa hã lɛ, nɛ le ni ma táná sɛ gɔ. Kɔ ma wia na, lɛ dɛ to hã a do tɛlɛ tɛ kɛ ma de tɛ̃ a ni, lɛ dɔ́nggɔ́ a, nɛ lɛ dɛ́ kili a.

²⁹ Mba gɔ, Gale 'da lɛ a ɔ nɛ nyɛa we kɛ ma bɛlɛ mɔ, nɛ ma ngutu vɛ̃ ni.