OHEBRE 11 - WE NU GALE 1995

Owi kɔ̃a wenɔ

¹ Ɔ do kɔ̃a we, mɛ a ĩ ngboo na, mɛ kɛ mɔ gbini zã mɔ do ma ni, ma dɛ sɛ tɛ ɛ, nɛ mɛ kɛ mɔ zɔ̀ gɔ ni, ma boe.

² Owinɔ zɛ́ dati gɛ, wa zɛ́ do kɔ̃a we dɛ 'da Gale, nɛ Gale kɔ̃a gɛnɛ wa we duzu ma.

³ Lɛ do kɔ̃a we dɛ 'da Gale, ma kɛ lɛ ĩ na, Gale dɛa mɛnɔ nyanga nza gɛ vɛ̃ do we nu a. A kala mɛnɔ kɛ lɛ zɔ́ gɔ ni, nɛ a dɛa do kɛnɔ lɛ zɔ zɔa ni.

⁴ Abɛlɛ zɛ́ do kɔ̃a we dɛ 'da Gale, ma kɛ dɔnggamɛ 'da a ma dia zɛ́ li Gale nɛa ngɔ kɛ 'da Kaina ni. Nɛ we duzu kɔ̃a we 'da Abɛlɛ, nɛ Gale sa li a na, a a wi bɔlɔ zu, nɛ a kɔ̃a gɛnɛ dɔnggamɛ 'da a. Gɛnɛ kɔ Abɛlɛ fia, nɛ nde a 'bana tɛ wele we hã lɛ we duzu kɔ̃a we 'da a.

⁵ Henɔkɛ zɛ́ do kɔ̃a we dɛ 'da Gale, ma kɛ a fè fia gɔ, nɛ Gale ba a dɛ 'dɛ ɛ ngɔ i iko. Nɛ wele kpo kpà a gɔ, we kɛ Gale ba a dɛ 'dɛ ɛ ngɔ i. Nɛ wa kɔma kɔ 'Buki 'da Gale na, dati kɛ na Gale ba Henɔkɛ dɛ ngɔ i ni, nɛ nde dɛa mɔ tɛ̃ a de zɛ́ li Gale wena.

⁶ Kɔ wi kɛ a do kɔ̃a we bina ni, a wè tɛ de li Gale gɔ. Mba gɔ, wi kɛ a kɔ̃a we kɔlɔ do Gale ni, ma wia na, a kɔ̃ na Gale boe, nɛ a kɔ̃ 'bɔ na, Gale gese de mɔ hã owinɔ kɛ wa fa a ni.

⁷ Nowe zɛ́ do kɔ̃a we dɛ 'da Gale, ma kɛ 'da fala Gale mbisa a we mɛnɔ kɛ ma hɔ sɛ do 'do, nɛ wele wa tɛ zɔ̀ gɔ ni, nɛ a kɔ̃a gɛnɛ nɛ. A zila nu Gale, nɛ a dɛa masua, nɛ a do Owi nu fɛlɛ a, wa kpasa we nɛ. Na mɛ ni, nɛ a 'bili zɛ́ ngbangga dɛ zu owinɔ nù gɛ. We duzu kɔ̃a we 'da a, nɛ Gale sa li a na, a a wi bɔlɔ zu.

⁸ Abrahama zɛ́ do kɔ̃a we dɛ 'da Gale, ma kɛ 'da fala Gale sa mɔ hã a, nɛ a zila nu a. Nɛ a kulu ngɔ, nɛ a la dɛ kɔ mbé le kɛ Gale kɔ̃a zɛ́ we 'dɔlɔ ma hã a ni. A kulu ngɔ kɔ le 'da a, nɛ a le wala, nɛ nde a ĩ̀ ti fala a nɛ se'de ni gɔ.

⁹ Nɛ we duzu kɔ̃a we 'da a dɛ 'da Gale, nɛ a hɔa ngɔ nùi kɛ Gale kpua zɛ́ mbulu nɛ hã a ni, nɛ a ɔa nɛ́ gɛnɛ ni. A ɔa zɛ́ ti tɔa tande fala nɛ kpo do Izaka do Yakɔbɔ, kɛ Gale kpua zɛ́ 'bɔ kpo mbuli ni hã wa ni.

¹⁰ Mba gɔ, Abrahama 'bɔ zɛ́ 'da le kɛ ma 'bana sɛ fai ni. Mɛ a le kɛ Gale ndua nyanga nɛ, nɛ a dɛ 'bɔ ma vɛ̃.

¹¹ We duzu kɛ Abrahama zɛ́ do kɔ̃a we dɛ 'da Gale ni, ma kɛ Gale dɛa na, a ko be. Gɛnɛ kɔ Abrahama dɛ zi gbɛlɛ wena, nɛ wuke 'da a Sara wè zi 'bɔ we ko be gɔ, nɛ nde Abrahama gbini zi zã a do Gale na, a dɛ sɛ mbuli a kpua hã ɛ ni.

¹² Gulu nɛ hã yolo tɛ wi wili kpo, kɛ a 'bɔ zi fie iko ni, obe wa sanza, nɛ wa dɛla nɛ́ osɔlanɔ li nza, tabi ogbãlã kɛnzɛnɔ nu gba lì, kɛ wele wè tɛ tɔlɔ ma gɔ ni.

¹³ Owinɔ ni vɛ wa kɔ̃a zɛ́ zu li Gale, gbaa nɛ wa fe do ma, nɛ nde wa kpà dia mɛnɔ kɛ Gale kpua zɛ́ mbulu nɛ hã wa ni gɔ. Wa zɔa zɛ́ ma ndũu dɛ dati wa i, nɛ wa dɛa yangga nɛ. Nɛ wa tɔ̃a dɛ nza na, lo a gɛnɛ, nɛ lo do fala mɔ́ lo ngɔ nù gɛ bina.

¹⁴ Winɔ kɛ wa tɔ̃a ní ni, wa bia hã lɛ na, wa fa le mɔ́ wa ngboo.

¹⁵ Ɔ do kɛ wa lengge zi le kɛ wa yula kɔ nɛ ni, nɛ wa si zi 'do iko.

¹⁶ Nɛ nde wa kɔ̃a zi we kpa dia le mɔ́ wa, nɛ le ni, ma a tɛ li nza i. We duzu ma, nɛ sape bà li Gale we tɔ̃ na, ɛ a Gale 'da wa ni gɔ. We kɛ a 'dafa zi le hã wa.

¹⁷ We duzu kɛ Abrahama zɛ́ do kɔ̃a we dɛ 'da Gale ni, ma kɛ a bɛ̃̀ zɛ́ we nu Gale 'da fala kɛ a yamba sila a ni gɔ, nɛ a ba be 'da a Izaka na, ɛ gbɛ a we dɔnggɔ do Gale. Gɛnɛ kɔ Gale kpua zi mbulu hã Abrahama na, a ko sɛ obe, nɛ nde tili bà li a we hã kpo bulu be 'da a do dɔnggamɔ hã Gale gɔ.

¹⁸ Gale tɔ̃a zɛ́ hã Abrahama na: “Tati a obe zã Izaka wa sɛ a obe zã mɔ, ɔ nɛ kɛ mi kpua zi mbulu nɛ hã mɔ ni.”

¹⁹ Nɛ Abrahama tɔ̃a do sila ɛ na, Gale wia we tunu 'bɔ Izaka kɔ fio. Na mɛ ni, lɛ wia we tɔ̃ na, Izaka fia, nɛ Gale tunu a, nɛ a gisa 'bɔ a hã Abrahama.

²⁰ Izaka zɛ́ do kɔ̃a we dɛ 'da Gale, ma kɛ a wila nu a tɛ Yakɔbɔ do Ezau ngɔ mɛnɔ kɛ ma hɔ sɛ do 'do ni.

²¹ Yakɔbɔ zɛ́ do kɔ̃a we dɛ 'da Gale, ma kɛ a wila nu a tɛ benɔ 'da Yozɛfu kpo do kpo dati kɛ na a fe ni. 'Do nɛ, nɛ a bili dɛ ngɔ dɔndɔlɔ 'da a, nɛ a dɔnggɔ Gale.

²² Yozɛfu zɛ́ do kɔ̃a we dɛ 'da Gale, ma kɛ 'da fala a kɔla do fio, nɛ a tɔ̃a hã obe Israɛlɛ na, mbe ngba soe kpo, nɛ wa hɔ sɛ nza ngɔ nù Ezipeto. Nɛ a tɔ̃a tɛlɛ tɛ kɛ ma wia na, wa dɛ sɛ do gbãlã a do ngba soe nɛ ni.

²³ Owi ko Mɔizɛ wa zɛ́ do kɔ̃a we dɛ 'da Gale, ma kɛ wa dɛ̀ kili mbula 'da nwa ngɔ nù Ezipeto gɔ, nɛ wa usu nzɔ Mɔizɛ gbaa 'do zɛkɛ talɛ, we kɛ wa zɔa na, be 'da lo de wena ni.

²⁴ Mɔizɛ zɛ́ do kɔ̃a we dɛ 'da Gale, ma kɛ 'da fala a gã, nɛ a kɔ̃̀ zɛ́ 'bɔ we zele na, ɛ a be 'da be zɔnga be 'da nwa ngɔ nù Ezipeto gɔ.

²⁵ Nɛ a saka zɛ́ na, ɛ kpa zɛlɛ tɛ fala nɛ kpo do winɔ 'da Gale, do li kɛ na ɛ dɛ yangga do 'dã mɔ 'do be kɔ̃ tũ iko ni.

²⁶ A zɔa na, fala kɛ wa yɔndɔ ɛ, ɔ nɛ kɛ wa yɔndɔ do Mɛsiya ni, nɛ nde ma dia nɛa ngɔ kɛ na ɛ kpa kpamɛnɔ ngɔ nù Ezipeto vɛ̃. We kɛ a ia zɛ́ linggamɛ 'da a ngɔ si olo nɛ kɛ a kpa sɛ do 'do ni.

²⁷ Nɛ we duzu kɔ̃a we 'da a dɛ 'da Gale, ma kɛ a dɛ̀ kili nɔ̃lɔ̃ zã 'da nwa ngɔ nù Ezipeto gɔ, nɛ a kulu ngɔ nù Ezipeto do'do. A ngua sila a, ɔ nɛ kɛ a zɔ zɛ́ Gale, kɛ wele zɔ́ a gɔ ni, do gbali a zɔa ni.

²⁸ Nɛ we duzu kɔ̃a we 'da a, ma kɛ a ba nu a hã obe Israɛlɛ na, wa dungu ɛngga Hɔ Nza kɔ Ngbá, nɛ wa kpã tɔkɛ tɛ gbangga nu tɔanɔ 'da wa na, da dɛ kɔ anzɛ gbɛ wi gbɛ́ Okuti bulu benɔ 'da wa gɔ.

²⁹ Obe Israɛlɛ wa zɛ́ do kɔ̃a we dɛ 'da Gale, ma kɛ wa kũ zɛ́ gba lì Sala Tɔ̃ do nyanga wa iko, ɔ nɛ kɛ wa la do ngɔ nga nù ni. Nɛ 'da fala Oezipeto wa yamba zɛ́ we kũ 'do wa ni, nɛ wa bindi, nɛ wa fe vɛ.

³⁰ We duzu kɔ̃a we 'da obe Israɛlɛ, ma kɛ wa nɛa zɛ́ we zĩ 'do ngbo le Yeriko tũ sambo, nɛ ma gbini, nɛ ma te ni.

³¹ Nɛ we duzu kɔ̃a we 'da Rahabɛ, wuko ndumba, ma kɛ a fè zɛ́ fala nɛ kpo do owinɔ kɛ wa bɛ̃a we dɔnggɔ Gale ni gɔ, we duzu kɛ a kɔ̃a zi gɛnɛ Owi miãnɔ 'da Oisraɛlɛ kɔ tɔa 'da a ni.

³² Mi nɛ tɔ̃ 'bɔ na ge nde? Mi wia sɔ we tɔ̃ 'bɔ we 'da Zedeoni, Barakɛ, Samsoni, Yɛfte, Davidi, Samuɛlɛ, tabi kɛ 'da ombe gele wi gba do nu Gale, nɛ nde fo fala bina.

³³ Wa zɛ́ do kɔ̃a we dɛ 'da Gale, ma kɛ wa nɛa ngɔ Owi kɔ gele lenɔ li bolonɔ, nɛ wa kala nùnɔ 'da wa ni. Wa dɛa zɛ́ bɔlɔ zu dɛa mɔ, nɛ wa kpa zɛ́ mɛnɔ kɛ Gale kpua mbulu nɛ hã wa ni. Wa kpia zɛ́ nu ogbɔgbɔ,

³⁴ nɛ wa bi gba nyɛa we, nɛ wa kpasa li tɔ̃a nu bolonɔ kɛ Owele wa bi do wa ni. Wa zɛ́ do ngawi bina, nɛ nde wa kpa ngawi, nɛ tɛ wa hãsã li bolonɔ, nɛ wa nɛa ngɔ ogele sodanɔ.

³⁵ Nɛ we duzu kɔ̃a we 'da mbe wi fio wilinɔ, ma kɛ Gale tunu zɛ́ wili wa kɔ fio, nɛ a gisa wa hã wa ni. Nɛ ombe kɔ wa ni, wa saka zɛ́ na, Owele wa hã zɛlɛ tɛ hã lo, nɛ wa gbɛ lo. Wa bɛa zɛ́ na, wa tɛ dà kɔ̃ wa tɛ lo, hã lo kpasa gɔ. Mba gɔ, wa ia zɛ́ sila wa ngɔ Gale na, a tunu sɛ lo kɔ fio, nɛ a hã sɛ kpasi kɛ ma dia nɛa ngɔ mɛnɔ vɛ̃ ni hã lo.

³⁶ Nɛ ombe gele nɛ wa kpa ngamɔ kɔ̃ owinɔ kɛ wa mɔmɔ wa, nɛ wa zɛ wa do zufa. Wa ɛnza ombe do dɔkpɔ, nɛ wa a wa bɔlɔkɔ.

³⁷ Wa lua ombe do ta gbaa nɛ wa gbɛ wa, nɛ wa 'bili sanga ombe do sii, nɛ wa gbɛ ombe do du kɔya. Nɛ ombe wa hi'da zɛ́ ndala bata tabi ndala dua, nɛ wa yɛnggɛ mba mba, we duzu kɛ sã ba zɛ́ wa wena, nɛ Owele wa tɛ ndaka wa, do hã zɛlɛ tɛ hã wa.

³⁸ Wa zɛ́ a odia wi ngboo, nɛ ma wè zi na, wa ɔ sanga Owi nùnɔ gɔ. Wa yɛnggɛ zɛ́ do li gba zɔ̃nɔ, do ngɔ kalanɔ mba mba, nɛ wa ɔ kɔ ta, do kɔ kɔ̃.

³⁹ Gɛnɛ kɔ kɔ̃a we 'da owinɔ ni de zɛ́ li Gale wena, nɛ nde wa kpà zɛ́ mɛ kɛ a kpua mbulu nɛ hã wa ni gɔ.

⁴⁰ We duzu kɛ Gale 'dafa mɔ kɛ ma dia nɛa ngɔ ma ni we lɛ. A kɔ̃a na, a mba lɛ do wa kpo, sɛ nɛ a hã kpasi kɛ ma wia ngboo ni hã lɛ de.