OHEBRE 10 - WE NU GALE 1995

¹ Mbula 'da Oyudanɔ, ma bé dia mɛnɔ ma hɔ sɛ do 'do ni ngboo gɔ, nɛ nde ma be hi omɛnɔ ni iko. Nɛ sabɛlɛ do sabɛlɛ, onganganɔ wa dɔnggɔ Gale do kpo kpo sa'denɔ ni. Nɛ nde sa'denɔ ni wa do ngawi we 'dafa winɔ kɛ wa kɔ̃a we kɔlɔ do Gale ni na, wa we li a ngboo ni bina.

² Ma ɔ zi na, winɔ kɛ wa dɔnggɔ Gale do tɛlɛ tɛ ki ni, wa ĩ ngboo na, Gale fua ku'da 'dã mɛnɔ zu lo gbãlã we, nɛ nde wa la zi fala gbɛ sa'denɔ hã Gale we 'dã mɛnɔ 'da wa belee ia, we kɛ ta zu wa sɔ 'bɔ ngɔ 'dã mɔ bina.

³ Ĩ na, dɔnggamɛnɔ wa hã hã Gale sabɛlɛ kpo kpo ni, ma gba ta zu winɔ ngɔ 'dã mɛnɔ 'da wa fai.

⁴ Mba gɔ, tɔkɔ tɛ wili ngɔmbɛnɔ, do tɔkɔ tɛ wili duanɔ, ma wè tɛ fo ku'da 'dã mɔ fala kpo gɔ.

⁵ We duzu ki ni, ma hã 'da fala Kristo nɛa zi we tɛ nù nga ni, nɛ a tɔ̃a hã Gale na: “Mɔ kɔ̃̀ gɛnɛ osa'denɔ kɛ wa gbɛ wa, do omɛnɔ kɛ wa hã ma we dɔnggɔ do mɔ ni gɔ. Nɛ nde mɔ hã kili tɛ wi hã mi na, mi dɔnggɔ do mɔ.

⁶ Mɔ dɛ́ yangga sa'denɔ kɛ wa dɔ wa ngɔ gbagala hã mɔ ni gɔ, nɛ sa'denɔ kɛ wa gbɛ wa we fo ku'da 'dã mɛnɔ ni, wa dé tɛ mɔ gɔ.

⁷ Ma hã mi tɔ̃a na: ‘Aa Gale, mi kɛ! Mi tɛa we dɛ mɛ kɛ zã mɔ kɔ̃a ni, ɔ nɛ kɛ wa kɔma zi ngɔ mi kɔ 'Buku Mbula ni.’ ”

⁸ Kristo tɔ̃a dati na: “Mɔ kɔ̃̀ gɛnɛ osa'denɔ kɛ wa gbɛ wa, do omɛnɔ kɛ wa hã ma we dɔnggɔ do mɔ ni gɔ. Mɔ dɛ́ yangga sa'denɔ kɛ wa dɔ wa ngɔ gbagala hã mɔ ni gɔ, nɛ sa'denɔ kɛ wa gbɛ wa we fo ku'da 'dã mɛnɔ ni, wa dé tɛ mɔ gɔ.” Ĩ na, wa hã dɔnggamɛnɔ ni vɛ ɔ nɛ kɛ mbula tɔ̃a ni.

⁹ Nɛ 'do nɛ, nɛ a tɔ̃ 'bɔ na: “Aa Gale! Mi kɛ! Mi tɛa we dɛ mɛ kɛ zã mɔ kɔ̃a ni.” Na mɛ ni, Yezu Kristo la fala ã mɛnɔ vɛ̃ kɛ wa hã zɛ́ ma we dɔnggɔ do Gale ni, nɛ a hã kili tɛ a olo nɛ.

¹⁰ Nɛ we duzu kɛ Kristo dɛa zi mɛnɔ vɛ̃ kɛ zã Gale kɔ̃a ni, ma kɛ a fɔla 'dã mɛ 'da lɛ do wala 'da kili tɛ a, kɛ a hã zi ma hã Gale fala kpo ia ni.

¹¹ Tũ kpo kpo, nɛ nganga yolo tɛ dɛ to nganga 'da a. Nɛ 'da fala fai, a hã tati a dɔnggamɛnɔ kɛ a hã ma fai ni hã Gale. Nɛ dɔnggamɛnɔ ni ma wè do fo ku'da 'dã mɔ zu winɔ gɔ.

¹² Nɛ nde Kristo dɛ̀ na mɛ ni gɔ, a hã zi dɔnggamɔ hã Gale fala kpo iko, nɛ a fua ku'da 'dã mɛnɔ zu owinɔ fai. 'Do nɛ, nɛ a dungu tɛ ngɔ ngawili kɔ̃ Gale.

¹³ Nɛ ngangga ni, a tɛ 'bɔ dɛ di ni gbaa na, Gale a Owi sɛnɛ a nù, nɛ a ma wa ti tambala nyanga a.

¹⁴ Do dɔnggamɛ kpo ni, Kristo 'dafa winɔ kɛ Gale fua ku'da 'dã mɛnɔ 'da wa ni na, wa we ngboo fai.

¹⁵ Nɛ Hi Wi Santo be 'bɔ gulu nɛ hã lɛ na:

¹⁶ “Nwa tɔ̃a na: Mbé gba tɔkɛ mi gba sɛ do Oisraɛlɛ ni, ma kɛ: Do 'do ngba soenɔ ni, nɛ mi dɛ sɛ na, mbulanɔ 'da mi le dɛ zu wa, nɛ mi kɔmɔ sɛ ma dɛ kɔ sila wa.”

¹⁷ Nɛ 'do nɛ, nɛ a tɔ̃ 'bɔ na: “Mi lénggé sɛ 'bɔ mbé nɛ do 'dã mɛnɔ 'da wa, do yɔa ti dɛa mɛnɔ 'da wa gɔ.”

¹⁸ Kɔ nɛ́ kɛ Gale fua ku'da 'dã mɛnɔ ia ni, fo 'bɔ gulu hã dɔnggamɔ hã a, we fo ku'da 'dã mɛnɔ zu winɔ bina.

Lɛ nɛ́ hã lɛ kɔlɔ do Gale

¹⁹ Na mɛ ni, onyae, lɛ kpa li wala we le tɛ fala wa sa li nɛ na, fala kɛ ma santo wena ni, we duzu tɔkɔ tɛ Yezu.

²⁰ Yezu hũi nu mbé wala kɛ lɛ wia we kpasa nɛ ni hã lɛ na, lɛ le 'do tuli tɛ fala kɛ ma santoe ni. Nɛ tuli ni a kili tɛ̃ a ngboo.

²¹ Gã nwa nganga 'da lɛ, Gale ia a do nwa ngɔ winɔ kɔ tɔa 'da a li nza i.

²² We duzu ma, lɛ é sila lɛ vɛ̃ ngɔ Gale, nɛ lɛ nɛ́, nɛ lɛ kɔ́lɔ́ do a do sila lɛ kpo, we duzu kɛ Yezu fua ndi 'dã mɔ kɔ sila lɛ, nɛ lɛ fɔla tɛ lɛ do lì kɛ ma a sa li Gale ni.

²³ Lɛ tɛ mbɔ̀kɔ̀ gɔ, lɛ gbíní zã lɛ do mbuli 'da Gale kɛ lɛ kɔ̃a gɛnɛ nɛ ni, we kɛ lɛ ĩ na, Gale kɛ a kpua mbuli do lɛ gɛ, a dɛ sɛ olo nu a.

²⁴ Lɛ lénggé ngba lɛ, nɛ lɛ ngándá sila ngba lɛ na, lɛ kɔ̃ gɛnɛ ngba lɛ, nɛ lɛ dɛ dia mɔ dɛ dati.

²⁵ Lɛ tɛ là fala nɛ tɛ mba li ngba winɔ 'da lɛ gɔ. Lɛ tɛ dɛ̀ nɛ́ owanɔ wa kɔ̃̀ 'bɔ we nɛ tɛ mba li ngba wi gɔɛ ni gɔ. Nɛ nde lɛ hã́ kpã sila hã ngba lɛ, we kɛ nɛ ĩ na, tũi kɛ Nwa a tɛ sɛ nɛ ni kɔla ia.

²⁶ Lɛ ĩ ti gbãlã we 'da Gale ia, kɔ fala kɛ lɛ 'bana tɛ dɛ 'dã mɔ do mbana, nɛ nde fo 'bɔ mbé mɔ kɛ lɛ wia tɛ dɔnggɔ do Gale, nɛ ma fo ku'da 'dã mɛ zu lɛ ni bina.

²⁷ Ki ni, nɛ nde ma 'bana tati a kɛ na, lɛ tana kili 'bɔ do 'da ngbangga kɛ Gale a 'bili sɛ dɛ ngɔ owi bɛ̃ gɛnɛ a ni, mba do gba nyɛa we kɛ ma tɛ sɛ we bɛlɛ wa ni.

²⁸ Fala kɛ wele 'danga mbula 'da Mɔizɛ, kɔ otemɔɛ bɔa tabi talɛ wa tɔ̃ gulu nɛ, hã a te do ngbangga, nɛ nde wa ĩ́ sɛ 'bako hã á gɔ, nɛ wa gbɛ a.

²⁹ Kɔ ma ɔ na mɛ ni, nɛ nɛ lengge na ge nde? Wi kɛ a zɔ Be 'da Gale li a yala iko, nɛ a faka gba tɔkɛ kɛ Gale fua do ku'da 'dã mɛnɔ zu a ni na, fo gulu nɛ bina, nɛ a dã 'bɔ zu li Hi Wi Santo kɛ a be dia zã 'da Gale hã lɛ ni, a kpá sɛ zɛlɛ tɛ 'danga nɛ ngɔ wele kɛ sɔ ni gɔ nde?

³⁰ We duzu kɛ lɛ ĩ ti wi kɛ a tɔ̃a we na: “Wi a mi, mi gese sɛ do 'dã mɔ hã wi dɛ 'dã mɔ.” Nɛ a tɔ̃ 'bɔ na: “Nwa a 'bili sɛ we 'da owinɔ 'da a” ni.

³¹ Mãlã 'da Gale, wele kpasi te ngɔ wele, nɛ nde mɛ a mɔ kili.

³² Nɛ lénggé do tɛlɛ tɛ kɛ nɛ zi nɛ dati, 'da fala kɛ nɛ lia kɔ sa fala 'da Gale 'da kala gɔ ni. Nɛ kpa zi ngamɔ wena, nɛ nɛ kunu sila nɛ kɔ nɛ vɛ.

³³ Mbe 'da falanɔ ni, nɛ wa dã zi nɛ, nɛ wa zɛlɛ tɛ nɛ dɛ li owele vɛ̃. Nɛ mbe ngba soenɔ ni, nɛ nɛ gala zi 'bɔ owinɔ kɛ wa zi tɛ kpa ngamɛnɔ ɔ nɛ nɛ ni.

³⁴ Nɛ nɛ kpa zi ngamɔ fala nɛ kpo do Owi bɔlɔkɔnɔ. Nɛ 'da fala wa kala mɛnɔ kɔ̃ nɛ ni, nɛ nɛ kɔ̃a gɛnɛ nɛ do yangga iko, we kɛ nɛ ĩ zi na, nɛ kpa sɛ mbé kpamɔ kɛ ma dia nɛa ngɔ ki ni, nɛ ma 'dángá sɛ gɔ fai ni.

³⁵ Kɔ nɛ tɛ là fala gbini zã nɛ do Gale gɔ, we kɛ nɛ kpa sɛ si mɔ olo nɛ gã wena.

³⁶ Ma wia na, nɛ ɔ do du sila, takɔ nɛ we tɛ dɛ mɛ kɛ zã Gale kɔ̃a ni, nɛ nɛ kpa mɛ kɛ a kpua zɛ́ mbulu nɛ hã nɛ ni.

³⁷ Ma ɔ nɛ kɛ wa kɔma kɔ 'Buki 'da Gale na: “Ma 'bànà gã gɔ, ma 'bana sĩ iko, nɛ wi kɛ ma wia na a tɛ ni, a tɛ sɛ. A zĩ́ sɛ tɛ a gɔ.

³⁸ Nɛ wi kɛ a dɛ bɔlɔ zu dɛa mɔ li mi ni, a kpasa sɛ we duzu kɔ̃a we 'da a. Kɔ fala kɛ kɔ̃a we 'da a si 'do, nɛ nde mi dɛ́ sɛ yangga do a gɔ.”

³⁹ Nɛ nde lɛ gɛ, lɛ sanga owinɔ kɛ kɔ̃a we 'da wa si 'do, kɔ wa yɔa ni bina. Lɛ kɔ̃a zu li Gale, nɛ lɛ dɛ ngɔ li wala kpasi.