OHEBRE 1 - WE NU GALE 1995

Gale wila we hã lɛ do wala 'da Be 'da a

¹ Zɛ́ dati, Gale wila zɛ́ we hã oyaa lɛ fala dɛlɛ wena, do walanɔ kpi do kpi. A wila zɛ́ we hã wa do wala 'da owi gba olo nu a.

² Nɛ nde do ngba soenɔ gɛ, kɛ mɛ a ndɔti tũnɔ ni, Gale wila we hã lɛ do wala 'da Be 'da a. Be ni a wi kɛ Gale dɛa zɛ́ mɛnɔ vɛ̃ do wala 'da a, nɛ a ia mɛnɔ vɛ̃ dɛ kɔ̃ a ni.

³ A bia yele ngbala dɔ̃lɔ̃ li 'da Gale, nɛ tɛlɛ tɛ̃ a be tɛlɛ tɛ Gale ngboo. Ngawi 'da wila we nu a tɔndɔ mɛnɔ nyanga nza gɛ vɛ́, nɛ ma yolo. 'Do kɛ a fɔlɔ 'dã mɛnɔ 'da owinɔ do'do ni, nɛ a kũ li nza i, nɛ a dungu tɛ ngɔ ngawili kɔ̃ Gale, kɛ a do nganda nɛa ngɔ mɛnɔ vɛ ni.

Be 'da Gale nɛa ngɔ anzɛnɔ

⁴ Be ni gã nɛa ngɔ anzɛnɔ vɛ, ma kɛ Gale sa li a na Be 'dɛ ɛ. Nɛ li ni dia nɛa ngɔ kɛ 'da anzɛnɔ vɛ.

⁵ Mba gɔ, Gale tɔ̃̀ mbe hã anzɛ na: “Mɔ a Be 'da mi, ndo do sɔɛ gɛ, mi a baa mɔ” gɔ. Nɛ a tɔ̃̀ 'bɔ we ngɔ mbe anzɛ na: “Mi sɛ a baa a, nɛ a sɛ a be 'da mi” gɔ.

⁶ Nɛ nde do 'da fala kɛ Gale nɛa we tombo kuti Be 'da a dɛ ngɔ nù gɛ ni, nɛ a tɔ̃a na: “Ma wia na, anzɛnɔ 'da Gale vɛ wa dɔnggɔ a.”

⁷ Nɛ a tɔ̃a kɛ 'da anzɛnɔ na: “Gale dɛa anzɛnɔ 'da a ɔ nɛ bũ, nɛ a dɛ Owi dɛa tonɔ 'da a ɔ nɛ nyɛa we ni.”

⁸ Nɛ nde a tɔ̃a hã Be 'da a na: “Aa Gale, kpongbo nwa 'da mɔ ma 'bana sɛ kɔ sabɛlɛ do sabɛlɛ. Mɔ dɛ to nwa 'da mɔ do bɔlɔ nɛ ngboo.

⁹ Mɔ kɔ̃a gɛnɛ mɔ kɛ ma a bɔlɔ, nɛ mɔ bɛa gɛnɛ 'dã mɔ. We duzu ma, ma kɛ mi Gale 'da mɔ, mi saka mɔ sanga ongba mɔ, nɛ mi hã yangga hã mɔ la li ngele.”

¹⁰ Nɛ a tɔ̃a 'bɔ hã a na: “Mɔ Nwa, mɔ a mɔ dɛa zɛ́ nùi do ndo nyanga mɛnɔ vɛ, nɛ mɔ a mɔ dɛa 'bɔ li nza do kɔ̃ mɔ ngboo.

¹¹ Mɛnɔ ni vɛ ma la sɛ, nɛ nde mɔ sɛ boe fai. Nùi do li nza ma dɛ sɛ ã ɔ nɛ tulu ni.

¹² Nɛ mɔ kasa sɛ ma ɔ nɛ gbau tulu ni, nɛ mɔ kpolo ma, ɔ nɛ wa kpolo do tulu ni. Nɛ nde mɔ, mɔ 'bana ɔ nɛ ã olo tɛ mɔ ni fai, nɛ fo sɛ ndɔti dungu nza 'da mɔ bina.”

¹³ Gale tɔ̃̀ zɛ́ hã anzɛ fala kpo na: “Mɔ tɛ́ hã mɔ dungu tɛ ngɔ ngawili kɔ̃ mi, kɔ mi a owi sɛnɛ mɔ nù, nɛ mɔ ma wa ti nyanga mɔ” gɔ.

¹⁴ Anzɛnɔ wa a wio nde? Wa a ohi winɔ kɛ wa dɛ to hã Gale, nɛ Gale tombo wa we gala owinɔ kɛ a kɔ̃a we kpasa wa ni.