Tɔlɔ Mɔ 9 - WE NU GALE 1995

Tũ dungu ɛngga Hɔ Nza kɔ Ngbá

¹ Do zɛkɛ 'da kpo, kɔ bɔa sabɛlɛ 'do kɛ obe Israɛlɛ wa hɔa nza Ezipeto ni, nɛ nde wa zi a tɛ li gba zɔ̃ Sinai. Nɛ NWA tɔ̃a we hã Mɔizɛ dɛ di ni na:

² “Ma wia na, obe Israɛlɛ wa dungu ɛngga Hɔ Nza kɔ Ngbá, do kɔ̃ tũi mi wia ni.

³ Wa ndo sɛ dungu ma do kɔ zɛkɛ 'bu ngɔ nɛ nalɛ, zɛkɛ 'da kpo, do 'da fala wese le nù ni, ɔ nɛ kɛ ombula ngɔ nɛ ma tɔ̃a ni.”

⁴ Mɔizɛ zila we ni, nɛ a mbese do obe Israɛlɛ.

⁵ Nɛ wa dungu ɛngga tɛ li gba zɔ̃ Sinai do gɛ̃a wese, do kɔ̃ zɛkɛ 'bu ngɔ nɛ nalɛ, zɛkɛ 'da kpo. Wa dɛa ngboo ɔ nɛ kɛ NWA ba do nu a hã Mɔizɛ ni.

⁶ Nɛ nde ngba soe ni, ombe winɔ wa zi a wi ndi li Gale, we kɛ wa 'bia tɛ wɔlɔ. Nɛ we duzu ma, wa wè tɛ dungu ɛngga ni gɔ. Wa nɛa, nɛ wa kpa Mɔizɛ do Aroni,

⁷ nɛ wa tɔ̃ hã Mɔizɛ na: “Lɛ hɔa wi ndi li Gale, we kɛ lɛ 'bia tɛ wɔlɔ. Ní a lɛ wè tɛ hã̀ dɔnggamɛ 'da lɛ hã NWA do ngba soe a wia ma ni gɔ nde?”

⁸ Nɛ Mɔizɛ gese hã wa na: “Nɛ 'bɔ́, kɔ mi zele mbula kɛ NWA nɛ ba ngɔ nɛ ni sɛ.”

⁹ Nɛ Mɔizɛ aka NWA we ma, nɛ NWA tɔ̃ hã a na,

¹⁰ a tɔ̃ mbula gɛ hã obe Israɛlɛ. Mbula ni sɛ 'bɔ we benɔ kɛ wa ko sɛ wa ni. A na: “Fala kɛ mbe winɔ wa hɔ wi ndi li mi, we kɛ wa 'bia tɛ wɔlɔ, tabi wa nɛa gɛnɛ nyɛlɛ wena do 'da fala dungu ɛngga nde,

¹¹ nɛ winɔ ni wa dungu sɛ ɛngga kpaa, nɛ nde wa 'bɔ sɛ gbaa zɛkɛ 'da bɔa, nɛ wa ndo dungu ma do kɔ zɛkɛ 'bu ngɔ nɛ nalɛ, do 'da fala wese le nù ni. Wa nyɔngɔ sɛ be bata wa hã ma do dɔnggamɛ, do mapa kɛ wa à ina hana mapa tɛ nɛ gɔ ni, do onwá Sanggo kɛ ma a fã.

¹² Nɛ wa é sɛ tala nyɔngɔmɔ kpo ngɔ gɔ. Kɔ wa ma ngɔ nyɔngɔ sa'de, nɛ nde wa ó sɛ gbãlã nɛ gɔ. Wa dungu sɛ ɛngga ni, ɔ nɛ kɛ mbula ngɔ nɛ tɔ̃ ngboo ni.

¹³ Nɛ nde wi kɛ a hɔ́ wi ndi li mi gɔ, tabi a nɛ̀ gɛnɛ gɔ, kɔ a bɛ̃ we dungu ɛngga do kɔ tũi mi wia ni, nɛ wa fo sɛ a kɔ obe Israɛlɛ do'do. Wi kɛ a tɛ̀ do dɔnggamɛ 'da a do kɔ̃ tũi mi wia ni gɔ, nɛ nde a dɛa 'dã mɔ li mi Gale.

¹⁴ Fala kɛ ogele winɔ ngɔ nùi 'da nɛ, wa kɔ we dungu ɛngga gɛ nde, nɛ ma wia na, wa dungu ma ɔ nɛ kɛ mbula ngɔ nɛ tɔ̃ ni. Mbula ni ma we winɔ vɛ̃, obe Israɛlɛ, tabi ogele winɔ.”

Zɛ we kpia ngɔ tɔa Tande

¹⁵ Do ngba soe wa zĩ tɔa Tande ia do'do ni, nɛ zɛ̃ we kpia ma tɛ si fala Ta Gba Tɔkɛ do ma ni. Do gɛ̃a wese, nɛ zɛ̃ we ni ma yele ngɔ tɔa Tande ɔ nɛ we ni gbaa we hɔ titole.

¹⁶ Ma dɛ zi tɛ̃ ɛ fai na mɛ gɛ: Zɛ̃ we kpe ngɔ tɔa Tande, nɛ ma yele do tũi.

¹⁷ 'Da fala fai kɛ zɛ̃ we ni kulu zi ngɔ zu tɔa Tande, nɛ obe Israɛlɛ wa le wala, nɛ wa nɛ, nɛ wa ɔ tɛ fala zɛ̃ we yolo nɛ nù ni.

¹⁸ Na mɛ ni, NWA ba zi nu a, sɛ nɛ obe Israɛlɛ wa le wala de. Nɛ a ba 'bɔ nu a, sɛ nɛ wa ɔ nù de. Kɔ fala kɛ zɛ̃ we 'bana dɛ ngɔ tɔa Tande ni, nɛ nde obe Israɛlɛ wa lé wala gɔ.

¹⁹ Fala kɛ zɛ̃ we ni ma dɛ zi dɔa kɔ tũ dɛ ngɔ Tɔa Tande nde, nɛ obe Israɛlɛ wa dɛ mbula 'da NWA, nɛ wa 'bana dɛ di ni.

²⁰ Kɔ fala kɛ zɛ̃ we dɛ̃ dɔa kɔ tũ gɔ, nɛ nde 'do wa nyɛlɛ gɔ, nɛ wa le wala do 'da mbulanɔ NWA ba hã wa ni.

²¹ Mbe gɔ, nɛ zɛ̃ we yolo nù tati a do gɛ̃a wese we hɔ titole iko, tabi ma yolo nù wese kpo do tũ kpo. Kɔ ma kulu ngɔ, nɛ obe Israɛlɛ wa le tɛ 'bɔ wala do ti.

²² Nɛ nde fala ma 'bana dɛ ngɔ tɔa Tande 'do tũ bɔa, zɛkɛ kpo, tabi sabɛlɛ kpo nde, nɛ obe Israɛlɛ wa kúlú ngɔ gɔ. Nɛ wa 'bɔ na, zɛ̃ we ni ma kulu ngɔ do'do sɛ nɛ de.

²³ NWA ba zi nu a, sɛ nɛ obe Israɛlɛ wa ɔ nù tabi wa le wala de. Wa dɛ zi tonɔ 'da wa hã NWA do 'da mbulanɔ a hã ma hã wa do wala 'da Mɔizɛ ni.