Tɔlɔ Mɔ 8 - WE NU GALE 1995

Fala e do mwindanɔ

¹ NWA tumba Mɔizɛ

² we tɔ̃ mbula hã Aroni na, 'da fala a a sɛ mwindanɔ sambo ngɔ mɔ a do ma ni, nɛ a siki mwindanɔ ni do tɛlɛ tɛ kɛ na, ma yele si dati mɔ a do mwindanɔ ni.

³ Aroni dɛa olo nu NWA kɛ a tombo do Mɔizɛ ni. Nɛ a a mwindanɔ ni, nɛ a dɛ na, ma yele si dati mɔ a do mwindanɔ.

⁴ Wa dɛa zi mɔ a do mwindanɔ, nɛ wa nãlã mɔ mbali tɛ nɛ vɛ̃, yolo nù we hɔ ngɔ, do tɛlɛ tɛ kɛ NWA bia zi nɛ hã Mɔizɛ ni.

Wa ia olevitɛnɔ we dɛ to hã Gale

⁵ NWA tɔ̃a hã Mɔizɛ na:

⁶ “Mɔ fo olevitɛnɔ kɔ tala gele obe Israɛlɛ do'do, takɔ mɔ fɔlɔ wa na, wa hɔ sa wi li mi.

⁷ Fala fɔlɔ wa, nɛ mɔ dɛ sɛ na mɛ gɛ: Mɔ kpã sɛ lì fɔlɔ wi tɛ wa. 'Do nɛ, nɛ wa kɛlɛ sala tɛ wa vɛ̃, nɛ wa fɔlɔ tulu tɛ wa. Na mɛ ni, nɛ wa hɔ sɛ sa wi li mi.

⁸ Wa tɛ sɛ do wili ngɔmbɔ kpo, mba do fũ dɔnggamɔ kɛ wa zanga do nɔ ni. Nɛ mɔ ba sɛ 'bɔ mbe gele wili ngɔmbɔ we hã do dɔnggamɔ we si olo ku'da 'dã mɛ 'da wa.

^9-10 Nɛ mɔ mba sɛ li obe Israɛlɛ vɛ̃, nɛ mɔ tɔ̃ hã olevitɛnɔ na, wa yolo dɛ nu tɔa Tande. Wa yolo sɛ dɛ dati mi, nɛ obe Israɛlɛ wa a kɔ wa zu wa.

¹¹ Nɛ Aroni a a sɛ nɔ kɛ ma santo zu olevitɛnɔ ni, nɛ a e wa na, wa dɛ to hã mi olo li obe Israɛlɛ vɛ̃.

¹² 'Do nɛ, nɛ olevitɛnɔ wa a sɛ kɔ̃ wa dɛ ngɔ wili ngɔmbɛnɔ bɔa ni. Nɛ Aroni gbɛ mbe kpo hã mi, we si olo ku'da 'dã mɔ. Nɛ a dɔ sɛ mbe kpo we dɔnggɔ do mi. Nɛ mɛ a dɛa ni, ma fɔlɔ sɛ olevitɛnɔ na, wa hɔ sa wi li mi.

¹³ “Mɔ e sɛ olevitɛnɔ dɛ dati Aroni do obenɔ 'da a, nɛ mɔ a nɔ zu wa dɛ li winɔ, nɛ mɔ e wa hã mi.

¹⁴ Mɔ dɛ na mɛ ni, sɛ a mɔ fua olevitɛnɔ sanga gele obe Israɛlɛ, kɔ wa hɔa winɔ 'da mi de. Wele wa sɛ a mɔ́ mi.

¹⁵ Nɛ yolo do 'da fala ni, olevitɛnɔ wa wia sɛ we dɛ toe 'da wa kɔ tɔa Tande. Mɔ fɔlɔ sɛ olevitɛnɔ na mɛ ni na, wa hɔ sa wi li mi, nɛ mɔ e wa hã mi.

¹⁶ We kɛ wele wa a mɔ́ mi, nɛ wa sɛ olo li gele obe Israɛlɛ, nɛ wa sɛ 'bɔ olo li kuti bulu benɔ 'da obe Israɛlɛ.

¹⁷ Mba gɔ, kuti bulu benɔ 'da obe Israɛlɛ, do kuti be wili sa'denɔ 'da wa vɛ̃, wele wa mɔ́ mi. Yolo ngba soe zi mi gbɛa do kuti bulu benɔ ngɔ nù Ezipeto vɛ̃ ni, mi hɔa wele kuti bulu benɔ 'da obe Israɛlɛ.

¹⁸ Ma kɛ mi ia olevitɛnɔ ni na, wa ɔ olo li kuti bulu benɔ 'da obe Israɛlɛ.

¹⁹ Nɛ mi ia wa na, wa dɛ to kɔ tɔa Tande dɛ ti Aroni do benɔ 'da a olo li obe Israɛlɛ. Na mɛ ni, nɛ wa amba sɛ zu obe Israɛlɛ na, dɔ wa kɔ́lɔ́ do tɔa Tande, kɔ wa fe gɔ.”

²⁰ Mɔizɛ, Aroni do obe Israɛlɛ vɛ̃ wa dɛa mbula ngɔ olevitɛnɔ, kɛ NWA hã zi ma hã Mɔizɛ ni, do wala olo nɛ ngboo.

²¹ Olevitɛnɔ wa ɔlɔ tɛ wa we hɔ sa wi li Gale, nɛ ya fɔlɔ 'bɔ tulu tɛ wa. 'Do nɛ, nɛ Aroni hã dɔnggamɔ we si olo ku'da 'dã mɛ 'da wa, takɔ wa hɔ sa wi li Gale. Nɛ a ia wa na, wa dɛ to hã NWA.

²² 'Do nɛ, nɛ olevitɛnɔ wa ndua dɛa toe 'da wa kɔ Tɔa Tande dɛ ti Aroni do obenɔ 'da a. Na mɛ ni, wa dɛa mbula ngɔ levitɛnɔ, kɛ nwa hã ma hã Mɔizɛ ni.

²³ Nɛ NWA tɔ̃ hã Mɔizɛ na:

²⁴ “Mɔ kala sɛ olevitɛnɔ kɛ wa do 'bu sabɛlɛ bɔa ngɔ nɛ mɔlɔ ni na, wa dɛ toe 'da wa kɔ tɔa Tande.

²⁵ Kɔ wa hɔ 'bu sabɛlɛ mɔlɔ, nɛ wa da sɛ kɔ wa tɛ toe, wa dɛ́ sɛ 'bɔ to gɔ.

²⁶ Wa wia sɛ we gala olevitɛnɔ kɛ wa 'bana do sabɛlɛ dɛ to kɔ tɔa Tande ni. Nɛ nde wa sɛ do ngbongbo to dɛ dɛa mɔ́ wa bina. Ki ni a mbula ngɔ toe 'da olevitɛnɔ a ni.”