Tɔlɔ Mɔ 7 - WE NU GALE 1995

Okpasa wi nu kɔnggɔ Israɛlɛ wa 'dɔlɔ mɔ hã NWA

¹ Ngba soe Mɔizɛ zĩ zi tɔa Tande nɛ ma ia ni, nɛ a kɔ nɔ yɔmbɔ kɛ ma santo tɛ nɛ, do tɛ omɔ kɔ nɛ vɛ̃, nɛ a e ma hã NWA. 'Do nɛ, nɛ a ia 'bɔ gbagala, do osi'bili mɔ to nɛ vɛ̃ hã NWA.

² 'Do nɛ, nɛ okpasa wi nu kpala Israɛlɛ, kɛ wa dɛ to olo li obe Israɛlɛ, nɛ wa gala zi 'bɔ tɛ tɔlɔ winɔ ni, wa hɔa.

³ Wa tɛa do ongilingili gazɛlɛ do ongɔmbɔ 'bu ngɔ nɛ bɔa, nɛ wa 'dɔlɔ ma hã NWA. Okpasa wi bɔa wa mba, nɛ wa hã ngilingili kpo, nɛ wele do wele hã ngɔmbɔ kpo kpo. Wa tɛa do mɛnɔ ni dɛ nu tɔa Tande.

⁴ Nɛ NWA tɔ̃ hã Mɔizɛ na:

⁵ “Mɔ kɔ̃́ gɛnɛ ongilingilinɔ do ongɔmbɛnɔ kɛ wa 'dɔlɔ ni, nɛ mɔ e ma na, ma gala sɛ winɔ tɛ kala omɔ dɛa to kɔ tɔa Tande. Mɔ kɛ̃ ma hã olevitɛnɔ we do 'da dɛa toe wa dɛ ni.”

⁶ Ma kɛ Mɔizɛ kɔ̃a gɛnɛ ngilingilinɔ do ngɔmbɛnɔ ni, nɛ a kɛ̃ ma hã olevitɛnɔ.

⁷ A hã ngilingili bɔa do ngɔmbɛ nalɛ hã Ogɛrsoni, takɔ ma gala wa tɛ toe 'da wa.

⁸ Nɛ a hã ngilingili nalɛ do tala ngɔmbɛnɔ ngbɛ'dɛ'dɛ ni hã Omɛrari na, ma gala tɛ mɛ 'bɔ wa tɛ toe 'da wa. Wa vɛ̃ wa dɛ zi toe ti Itamarɛ, be 'da nganga Aroni.

⁹ Nɛ nde Mɔizɛ hã̀ ngilingili tabi ngɔmbɔ hã Okehatɛ gɔ, we kɛ wa a wi fɔmɔ omɛnɔ kɛ ma santo ni. Nɛ ma wia na, wa kala tole mɛnɔ ni do ngɔ 'baka wa ngboo.

Wa 'dɔlɔ omɔ we ɛngga e gbagala hã NWA Gale

¹⁰ Ngba soe ɛngga e gbagala dɔ do sa'de hã NWA Gale, nɛ okpasa wi nu kpala Israɛlɛ wa 'dɔlɔ 'bɔ ombé mɔ hã a.

¹¹ Nɛ NWA tɔ̃ hã Mɔizɛ na: “Ma wia na, tũ kpo, nɛ kpasa wi kpo tɛ do mɛ a tɛa nɛ we 'dɔlɔ hã mi 'da fala ɛngga e tɔa Tande hã mi ni.”

^12-83 Wa tɛa tũ kpo kpo dɛ 'do ngba wa na mɛ gɛ: Nu kpala Li kpasa wi 1 Yuda Nasoni, be 'da Aminadabɛ 2 Isakarɛ Nɛtaneɛlɛ, be 'da Suarɛ 3 Zabuloni Eliabɛ, be 'da Heloni 4 Rubɛnɛ Elisurɛ, be 'da Sɛdeurɛ 5 Simeoni Sɛlumiɛlɛ, be 'da Surisadai 6 Gadɛ Eliasafɛ, be 'da Deuɛlɛ 7 Efraimɛ Elisama, be 'da Amihudɛ 8 Manase Gamliɛlɛ, be 'da Pɛdasurɛ 9 Bɛnzamɛ Abidanɛ, be 'da Gidoni 10 Danɛ Ahiezɛrɛ, be 'da Amisadai 11 Asɛrɛ Pagiɛlɛ, be 'da Okranɛ 12 Nɛftali Ahira, be 'da Enanɛ Mɛnɔ kɛ wele do wele 'dɔlɔ zi hã nwa ni ma kɛ: kpangbala sani kɛ wa dɛa do fɛ̃a mɔ bolo, nɛ dĩ nɛ gramɛ koto kpo do kama talɛ, bakulu dĩ nɛ gramɛ kama sambo. (Wa wia dĩ mɛnɔ ni do mɔ we do dĩ mɛnɔ kɔ tɔa Tande.) Saninɔ bɔa ni, ma dunu do fũ kɛ wa zanga do nɔ we hã do dɔnggamɔ. Wa hã 'bɔ kɔpɔ mɔ mbali dĩ nɛ gramɛ kama kpo, nɛ ma dunu do fũ yɔmbɔ we dɔ dɔa. Nɛ wa hã 'bɔ wili ngɔmbɔ kpo, do wili bata kpo, do be bata kɛ a dɛa sabɛlɛ kpo, takɔ wa dɔ wa we dɔnggɔ do Gale. Wa hã 'bɔ wili dua kpo, takɔ wa gbɛ a we si olo ku'da 'dã mɔ. Nɛ wa tɛ 'bɔ do ngɔmbɔ bɔa, wili bata mɔlɔ, wili dua mɔlɔ, do be bata mɔlɔ kɛ wa dɛa sabɛlɛ kpo ni, takɔ wa gbɛ wa we hã do dɔnggamɔ kɛ ma be dɛa na.

Nu kpala Li kpasa wi

⁸⁴ Mɛnɔ vɛ̃ okpasa wi nu kpala Israɛlɛ wa 'dɔlɔ hã NWA, 'da fala ɛngga e gbagala dɔ do sa'de hã a ni, ma kɛ: kpangbala sani 'bu ngɔ nɛ bɔa, bakulu 'bu ngɔ nɛ bɔa, do kɔpɔ mɔ mbali 'bu ngɔ nɛ bɔa.

⁸⁵ Dĩ kpangbala sani kpo kpo a gramɛ koto kpo do kama talɛ, nɛ dĩ bakuli kpo kpo a gramɛ kama sambo. Ma hɔa vɛ̃ fɛ̃a mɔ bolo kilo 'bu nɛ bɔa ngɔ nɛ nalɛ. (Wa wia dĩ ma do mɔ we do dĩ mɛnɔ kɔ tɔa Tande.)

⁸⁶ Dĩ kɔpɔ mɔ mbali kpo kpo a gramɛ kama kpo. Nɛ dĩ ma 'bu ngɔ nɛ bɔa ni vɛ̃ a gramɛ koto kpo do kama bɔa, nɛ ma dunu do fũ yɔmbɔ.

⁸⁷ Wa 'dɔlɔ 'bɔ wili ngɔmbɔ 'bu ngɔ nɛ bɔa, wili bata 'bu ngɔ nɛ bɔa, do obe bata kɛ wa dɛa sabɛlɛ kpo ni 'bu ngɔ nɛ bɔa, takɔ wa dɔ wa we dɔnggɔ do Gale. (Wa mba zi do fũ farini, sɛ nɛ wa dɔ ma do dɔnggamɛ de.) Wa tɛa 'bɔ do owili dua 'bu ngɔ nɛ bɔa, nɛ wa gbɛ we si olo ku'da 'dã mɔ.

⁸⁸ Wili ngɔmbɔ 'bu nɛ bɔa ngɔ nɛ nalɛ, wili bata 'bu nɛ gazɛlɛ, wili dua 'bu nɛ gazɛlɛ do obe bata kɛ wa dɛa sabɛlɛ kpo ni, 'bu nɛ gazɛlɛ, takɔ wa gbɛ wa we hã do dɔnggamɔ kɛ ma be dɛa na. Ki ni a omɛnɔ wa 'dɔlɔ 'da fala ɛngga e gbagala hã Gale gɛ a ni.

⁸⁹ 'Da fala Mɔizɛ lia kɔ tɔa Tande we wele we do NWA ni, nɛ a zele gɛlɛ a, ma yula do si 'biti fala ohi mɛnɔ bɔa ngɔ mɔ nu Sanduku Gba Tɔkɛ wa do nɛ ni. Ohi mɛnɔ ni ma ɔ nɛ wele ni, nɛ sala 'baka ma boe. Nɛ NWA wila we do a.