Tɔlɔ Mɔ 6 - WE NU GALE 1995

Mbula ngɔ hã tɛ wi we dɛ to hã Gale

¹ NWA tɔ̃a hã Mɔizɛ na,

² a é mbulanɔ gɛ hã obe Israɛlɛ na: “Fala kɛ wi wili tabi wuko kpo mbulu we hã tɛ̃ a hã mi NWA, nɛ wa sa sɛ li a na Nazire.

³ Nɛ ma wia na, a bɛ̃ nga dɔ̃nɔ vɛ̃. Gɛnɛ kɔ dɔ̃ kɛ wa dɛ do fila wala te vinɔ ni, a tɛ nɔ̀ gɔ. A tɛ nyɔ̀ngɔ̀ 'bɔ fila wala te vinɔ, tabi kula nɛ gɔ

⁴ 'Da fala kɛ a 'bana dɛ mbuli a kpua ni, nɛ a nyɔngɔ sɛ mɔ kpo kɛ wa dɛa do wala te vinɔ ni gɔ. Gɛnɛ kɔ gbãlã wala nɛ tabi kɔa tɛ nɛ 'bɔ gɔ.

⁵ Nɛ ma wè 'bɔ na, a kɛlɛ zu a, tabi nzɛlɛ a gɔ. A hã tɛ̃ a hã mi NWA, nɛ ma wia na, a la mili zu a do nzɛlɛ a, nɛ ma dulu gbaa we hɔ Sɔkpɔ mbuli kɛ a kpua ni.

⁶ Nɛ do zɔlɔ mbuli ni 'bɔ vɛ̃, ma wè na, a kɔlɔ do wɔlɔ gɔ.

⁷ Nɛ wa wè do hã 'bɔ wala hã a na, a 'be tɛ wɔlɔ baa a, naa a, bulu nya a, tabi boko nya a gɔ. Mba gɔ, we kɛ a hã tɛ̃ a hã mi NWA, ɔ nɛ kɛ mili zu a ma be ma ni.

⁸ “Do zɔlɔ mbuli ni vɛ̃, wi ni a sɛ a wi mɔ́ mi NWA.

⁹ Fala kɛ fio gbanga wele dɛ kɛ zã a nde, nɛ mbuli a kpua we hã tɛ̃ a hã mi NWA ni, ma yolo sɛ nù. We kɛ fie ni dɛa na, a hɔ wi ndi li mi NWA. Nɛ a 'bɔ sɛ 'do tũ sambo, sɛ nɛ a hɔ 'bɔ sa wi li mi NWA, nɛ a kɛlɛ wá zu a de.

¹⁰ Fala kɛ ma hɔ tɛ tũ kɛ ngbɛ'dɛ'dɛ, nɛ a tɛ sɛ do ongoto bɔa tabi gbakulĩ bɔa hã nganga. A tɛ sɛ nɛ dɛ tɛ nu tɔa Tande kpa ngba wi do mi Gale.

¹¹ Nɛ nganga a gbɛ sɛ mbe kpo kɔ nɔɛnɔ ni hã mi NWA, we fo ku'da 'dã mɛ zu wi ni. Nɛ a dɔ sɛ mbee nɛ we dɔnggɔ do mi. Nganga a dɛ sɛ mɛnɔ ni vɛ̃ we fɔlɔ wi ni olo kɛ a kɔlɔ do wɔlɛ ni. Do ngba soe ni, nɛ nganga a mbese sɛ winɔ na, wi ni a hɔa 'bɔ wi mɔ́ mi NWA.

¹² Nɛ nde ma wia na, wi ni a hã sɛ 'bɔ mbé tɛ̃ a hã mi NWA. A hã sɛ be bata kɛ a dɛa sabɛlɛ kpo ni do dɔnggamɔ, we si olo ku'da 'dã mɛ 'da a. Nɛ wa tɔ́lɔ́ sɛ 'bɔ kɔ̃ tũnɔ zi a hã do tɛ̃ a hã mi dati ni gɔ, we kɛ kɔ tũi ni, ma yula nù dɛ sanga gɛ iko.

¹³ “Mɛnɔ ma wia sɛ na, wi kɛ a kɔa we hã tɛ̃ a hã mi NWA a dɛ ni, ma kɛ: 'Da fala kɛ a hɔ Sɔkpɔ mbuli a kpua zi ni, nɛ wa kã a dɛ nu tɔa Tande i.

¹⁴ Nɛ a tɛ sɛ do osa'de talɛ kɛ fo kunda tɛ wa bina ni hã mi NWA. Mɛ a be wili bata, kɛ a dɛa sabɛlɛ kpo ni na, wa dɔ a we dɔnggɔ do mi, nɛ be naa bata, we si olo ku'da 'dã mɔ zu a, do wili bata we dɔnggamɔ kɛ ma be dɛa na.

¹⁵ Nɛ a tɛ 'bɔ do yele mapa kɛ wa à ina hana mapa tɛ nɛ gɔ, nɛ wa dɔa ma do nɔ ni, do bisikiti kɛ wa à 'bɔ ina hana mapa tɛ nɛ gɔ, nɛ wa ndɔa nɔ ngɔ nɛ, mba do fũ farini, do dɔ́ kɛ ma wia do dɔnggamɛ ni.

¹⁶ “Nɛ nganga a hã sɛ dɔnggamɛnɔ ni hã mi NWA, 'do nɛ, nɛ a gbɛ sɛ 'bɔ sa'de dɔnggamɔ we si olo ku'da 'dã mɔ, nɛ a dɔ sa'de we dɔnggɔ do mi NWA.

¹⁷ 'Do nɛ, nɛ a gbɛ sɛ wili bata do dɔnggamɔ we be dɛa na. A hã sɛ dɔnggamɛ ni fala nɛ kpo do yele mapa. Nɛ a hã sɛ 'bɔ farini do dɔ̃ɛ do dɔnggamɔ.

¹⁸ Do 'da fala ni, nɛ wi a hã tɛ̃ a hã mi NWA ni, a kɛlɛ sɛ zu a dɛ nu tɔa Tande ni. Nɛ a a sɛ mili zu a li we fala wa dɔ do wili bata we be dɛa na ni.

¹⁹ “Kɔ a kɛlɛ zu a do'do, nɛ nganga a ba sɛ 'baka wili bata kɛ wa gi ma ni, nɛ a ba mapa kpo kɔ yele ni, do bisikiti kpo, nɛ a a ma dɛ kɔ̃ wi ni.

²⁰ 'Do nɛ, nɛ nganga a hã sɛ ma do dɔnggamɔ hã mi NWA. A yaka sɛ ma dati mi. Nɛ wele dɔnggamɛnɔ ni sɛ a mɔ́ nganga, mba do ngu'du sa'de do ku a, kɛ wele nɛ 'bɔ a mɔ́ a ni. Nɛ yolo do kɔ̃ tũi ni, wi ni wia tɛ nɔ 'bɔ dɔ̃.

²¹ “Ki ni mɛ a ombula we wi kɛ a kpua mbulu we hã tɛ̃ a hã mi NWA gɛ a ni. Nɛ nde fala kɛ Nazire kpo mbulu we hã mɛnɔ nɛ ngɔ ki ni nde, nɛ ma wia na, a hã dɔnggamɛnɔ vɛ̃ a kpua mbulu nɛ ni, ɔ nɛ kɛ mbula tɔ̃ nɛ ni.”

Olɛnggɛ wila nui 'da nganganɔ

²² NWA tɔ̃a hã Mɔizɛ na:

²³ “Mɔ tɔ̃ hã Aroni do obenɔ 'da a na, fala kɛ wa nɛ we wele nu wa tɛ obe Israɛlɛ, nɛ wa tɔ̃ sɛ lɛnggɛnɔ gɛ:

²⁴ ‘E kɔ NWA wele nu a tɛ nɛ, nɛ a zɔ mɔ tɛ nɛ!

²⁵ E kɔ NWA lengge nɛ de wena, nɛ a ĩ 'bako hã nɛ!

²⁶ E kɔ NWA be dia zã 'da a hã nɛ, nɛ a hã dungu fio hã nɛ!’ ”

²⁷ NWA tɔ̃a na: “'Da fala onganganɔ wa sa sɛ li mi we wele do nu wa tɛ obe Israɛlɛ ni, nɛ mi wele sɛ nu mi tɛ wa.”