Tɔlɔ Mɔ 5 - WE NU GALE 1995

Wa fo sɛ owi ndi li Gale dɛ nza

¹ NWA tɔ́a hã Mɔizɛ na:

² “Mɔ bá nu mɔ hã obe Israɛlɛ na, wa zɔ winɔ vɛ̃ kɛ wa do zɛlɛ ngbɛlɛ, tabi wa ba zɛlɛ kɛ wi wili tabi wuko kpa tɛ ngba a, tabi wanɔ kɛ wa 'bia tɛ wɔlɔ ni, nɛ wa fo wa tɛ fala ɔi do'do.

³ Gɛnɛ kɔ wi wili tabi wuko, nɛ ma wia na, mɔ fo wa do'do, da dɛ kɔ wa 'dángá fala mi ɔ nɛ dɛ kɔ owinɔ ni gɔ.”

⁴ Obe Israɛlɛ wa dɛa mbula NWA hã ma hã Mɔizɛ ni, nɛ wa fua winɔ vɛ̃ wa a owi ndi li Gale ni tɛ fala ɔi 'da wa do'do.

Tɛlɛ tɛ kɛ wele wia we si olo 'dã mɔ kɛ a dɛa

⁵ NWA tɔ̃a hã Mɔizɛ na,

⁶ a é mbulanɔ gɛ hã obe Israɛlɛ na: “Fala kɛ wi wili tabi wuko dɛ 'dã mɔ dɛ 'da ngba a, nɛ nde a dɛa ma dɛ 'da NWA.

⁷ Nɛ ma wia na, a gbala 'dã mɛ a dɛa ni, nɛ a gese mɛ a 'danga ni hã wele nɛ, nɛ a e kpo mbee mɔlɔ gole mɛ ni ngɔ nɛ.

⁸ Fala kɛ wele mɛ ni fe do'do, kɔ fo wi na mɔ́ a na, wa futa olo nɛ hã a ni bina nde, nɛ wa hã sɛ ma hã NWA, nɛ ma wia tɛ gala onganganɔ. Nɛ wi dɛ 'dã mɛ a hã sɛ 'bɔ wili ngɔmbɔ, nɛ nganga gbɛ ma hã NWA, we si olo ku'da 'dã mɛ zu wi ni.

⁹ Wa fo sɛ mbee tɛ dɔnggamɛnɔ vɛ̃ kɛ obe Israɛlɛ wa tɛ nɛ hã Gale ni, nɛ wa hã ma hã nganga kɛ a dɛ toe ni.

¹⁰ Mɛ kɛ wele hã ma hã NWA ni, wele nɛ a mɔ́ nganga ni.”

Mbula ngɔ wuko kɛ wa lengge na a ɔa do gele wili

¹¹ NWA tɔ́a hã Mɔizɛ na,

¹² a é mbulanɔ gɛ hã obe Israɛlɛ na: “Lɛ ba na, mbe wuko mɔ́ wili 'danga dɛa to tɛ̃ ɛ, nɛ a dɛ vĩ zu dɛa mɔ.

¹³ Nɛ a ya fala tɛ̃ a, nɛ a ɔ do gele wi wili do usu nɛ. Nɛ nde wili a kpà mɔ kɛ ma be na a dɛa mɛnɔ ni gɔ, we kɛ fo temɔɛ bina, nɛ wa bà 'bɔ a dɛ tɛ nɛ gɔ.

¹⁴ Nɛ nde wili a lengge ní lingga iko. Mbe 'bɔ, nɛ ma hɔ na, wi wili lengge wuke 'da a na, a dɛ vĩ zu dɛa mɔ, nɛ nde a dɛ ma gɔ.

¹⁵ Ma ɔ do wenɔ bɔa ni, nɛ wi wili a kã sɛ kɛnɛ a dɛ 'da nganga i, nɛ a tɛ do dɔnggamɔ kɛ ma wia ni. Mɛ a fũ ɔrzɛ kilo talɛ. A á sɛ nɔ ngɔ nɛ gɔ, nɛ a á sɛ 'bɔ fũ yɔmbɔ ngɔ nɛ gɔ, we kɛ mɛ a dɔnggamɛ 'da wi wili kɛ a dɛ bɔnɛ. A dɔnggɔ ma do Gale, takɔ gbãlã we hɔ nza.

¹⁶ “Nɛ nganga a kpe sɛ ti wuke dɛ fala dɔnggɔ do mi NWA Gale na, a yolo dati mi.

¹⁷ Nɛ nganga a so sɛ lì kɛ ma santo ni dɛ kɔ kpana gili, nɛ a ngɛmɛ mbe kɛnzɛ ngɔ nù kɔ tɔa Tande, nɛ a mba do ma.

¹⁸ Nɛ a fo sɛ kitambala zu wuke, nɛ a a fũi dɛ kɔ̃ wuke na, a dɔnggɔ do mi Gale. Dɔnggamɛ ni, ma we duzu bɔnɛ 'da wili a. Nganga do tɛ̃ a, a 'be sɛ kpana kɛ lì fɔmbɔ do wi kɔ nɛ ni dɛ kɔ a.

¹⁹ Nɛ nganga a tɔ̃ sɛ hã wuke ni na, a kɔ̃ nu owenɔ ɛ nɛ tɔ̃ nɛ ni. A tɔ̃ sɛ na: ‘Fala kɛ mɔ ɔlɔ wili mɔ, nɛ mɔ ɔ do gele wili gɔ, nɛ lì gɛ dɛ́ sɛ mɔ kpo do mɔ gɔ.

²⁰ Nɛ nde fala kɛ mɔ ɔa do gele wi wili, kɔ mɔ ɔlɔ wili mɔ do gbãlã we,

²¹ nɛ é kɔ NWA hã etumbu hã mɔ. Nɛ a dɛ́ na, zã mɔ ma hana, nɛ mɔ tɛ kò 'bɔ gɔ, do tɛlɛ tɛ kɛ na, ongba mɔ wa ba kumbu tɛ wa do mɔ do 'da fala wa ma sɛ ngɔ kana tɛ wa li Owele ni.

²² Nɛ é kɔ lì fɔmba gɛ, ma le kɔ zã mɔ, nɛ ma hana zã mɔ kirr, nɛ mɔ tɛ kò 'bɔ gɔ.’ Nɛ wuke gese sɛ na: ‘Mi kɔa, é kɔ ma dɛ tɛ̃ ɛ na mɛ ni.’

²³ “'Do nɛ, nɛ nganga a kɔmɔ sɛ olɛnggɛ fɔmbanɔ ni dɛ ngɔ mɔ, nɛ a fɔlɔ ma dɛ 'dɔ lì fɔmba.

²⁴ Dati kɛ na, wa hã lì ni hã wuke na a nɔ, kɔ ma la dɛ kɔ kala zã a ni,

²⁵ nɛ nganga a ba sɛ dɔnggamɔ bɔnɛ kɔ̃ a do'do, nɛ a yaka ma dati mi NWA Gale, nɛ a e ma ngɔ gbagala dɔ do sa'de hã mi.

²⁶ A so sɛ zu fũ dɔnggamɛ ni, ɔ nɛ dɔnggamɔ kɛ ma gba ta zu mi NWA ngɔ wuke ni, nɛ a dɔ ma ngɔ gbagala dɔ do sa'de hã mi. 'Do nɛ, nɛ a ba sɛ nu a hã wuke na, a nɔ lì ni.

²⁷ Hã fala kɛ a nɔ lì ni, kɔ a ɔa do gele wili do gbãlã we nde, nɛ lì fɔmba ni, ma le sɛ kɔ kala zã a, nɛ ma hana sɛ zã a, nɛ a kó sɛ 'bɔ gɔ. Na mɛ ni, nɛ ongba a wa ba sɛ kumbu tɛ wa do a 'da fala wa ma sɛ ngɔ kana tɛ wa li Owele ni.

²⁸ Nɛ nde fala kɛ wuke ɔ̀ do gele wili gɔ, kɔ a dɛ̃ 'dã mɔ gɔ nde, hã a nɔ lì, nɛ mɔ kpo dɛ́ sɛ a gɔ, nɛ a ko sɛ be iko.

²⁹ “Ki ni, mɛ a mbula kɛ ma zɔa wi wili dɛ bɔnɛ kɛ a lengge na, wuke 'da ɛ yɛnggɛ vĩ zu yɛli, nɛ a ɔ do gele wi wili ni.

³⁰ Tabi ma zɔa 'bɔ wuko kɛ wili a tɔ̃ do zu li a na, a a wi yɛnggɛ vĩ zu yɛli ni. Wi wili ni a tɛ sɛ do wuke 'da a dati mi NWA, nɛ nganga a dɛ sɛ mɛnɔ vɛ̃ ɔ nɛ kɛ mbula tɔ̃a ni.

³¹ Na mɛ ni, wa dã́lã́ sɛ do wi wili gɔ. Nɛ nde fala kɛ wuke dɛ 'dã mɔ, nɛ a kpa sɛ si olo nɛ.”