Tɔlɔ Mɔ 4 - WE NU GALE 1995

Tonɔ 'da olevitɛnɔ kɛ wa a obe zã Kehatɛ

¹ NWA tɔ̃a hã Mɔizɛ do Aroni na:

² “Nɛ á olevitɛnɔ, kɛ wa a obe zã Kehatɛ ni, do 'da nu fɛlɛ wa.

³ Nɛ nɛ tɔ́lɔ́ wi wilinɔ, wanɔ wa wia 'bu sabɛlɛ talɛ we hɔ 'bu nɛ mɔlɔ ni, nɛ nɛ kɔmɔ sɛ li wa, takɔ wa dɛ ombe tonɔ kɔ tɔa Tande i.

⁴ Nɛ wa sɛ a owi zɔ tɛ mɛnɔ ma santo wena ni.

⁵ 'Da fala obe Israɛlɛ wa kulu sɛ ngɔ we la nɛ ni, nɛ Aroni do obenɔ 'da a wa fo sɛ ku'bi ma gɔnɔ sanga tɔa Tande ni, nɛ wa lɔmbɔ sɛ do 'do Sanduku Gba Tɔkɛ.

⁶ Nɛ wa lɔmbɔ sɛ 'bɔ nga ndala sa'de 'dɔ lì ngɔ tuli ni, nɛ wa fi gbau tulu kɛ wa dɛa do fila sala sa'de kpi do kpi ni lɔngbɔɔ dɛ ngɔ nɛ. Nɛ wa fi sɛ ote ngbangbo tɛ Sanduki we ba do ma.

⁷ “Wa fi sɛ 'bɔ mbee gbau tuli ni ngɔ mɛsa a do mapa santonɔ, nɛ wa a okpangbala sani, okɔpɔ, bakulu, do okpana a do dɔ́ dɔnggamɛ dɛ ngɔ nɛ. Nɛ omapa hã do dɔnggamɛnɔ hã mi Gale, ma 'bana dɛ ngɔ mɛsa ni fai.

⁸ Wa gu sɛ tulu kɛ wa dɛa do fila sala sa'de kpi do kpi ni ngɔ mɛnɔ ni, nɛ wa lɔmbɔ ma vɛ̃ do nga ndala sa'de 'dɔ lì. Nɛ wa fi ote ngbangbo tɛ mɛsa we ba do ma.

⁹ Wa lɔmbɔ sɛ gbau tulu kɛ wa dɛa do fila sala sa'de kpi do kpi ni tɛ mɔ a do omwindanɔ, do mwindanɔ ngɔ nɛ ni. Nɛ wa lɔmbɔ 'bɔ tɛ osi'bili mɔ to nɛ, do be sa'ba, do mɔ so do bũi, do be daka nɔɛ.

¹⁰ Nɛ wa a sɛ mɛnɔ ni vɛ̃ dɛ kɔ nga ndala sa'de, nɛ wa e ma ngɔ mɔ ba do ma.

¹¹ “Wa gu sɛ gbau tulu kɛ wa dɛa do fila sala sa'de kpi do kpi ni ngɔ gbagala wa dɛa do mɔ mbali ni, nɛ wa lɔmbɔ 'do nɛ do nga ndala sa'de 'dɔ lì. Nɛ wa fi te ngbangbo tɛ nɛ we ba do ma.

¹² Wa mba sɛ li omɔ dɛ do sambala kɔ tɔa Tande, nɛ wa lɔmbɔ 'do nɛ do gbau tulu kɛ wa dɛa do fila sala sa'de kpi do kpi ni, nɛ wa lɔmbɔ 'do nɛ vɛ̃ do nga ndala sa'de 'dɔ lì, nɛ wa e ma ngɔ mɔ ba do ma.

¹³ Wa fo sɛ obũnɔ ngɔ mbee gbagala, nɛ wa fi fila tulu ngɔ nɛ,

¹⁴ nɛ wa e osi'bili mɛnɔ wa dɛ do toe 'da fala dɔnggamɛnɔ ni ngɔ nɛ. Mɛnɔ ni a: mɔ so do bũ, kanya dumu do sa'de, opau, do bakulu we kpɔ do tɔkɔ. Nɛ wa gu sɛ nga ndala sa'de 'dɔ lì ngɔ mɛnɔ ni vɛ̃, nɛ wa fi te ngbangbo tɛ nɛ we ba do ma.

¹⁵ Kɔ wa nɛ la ma, nɛ Aroni do obenɔ 'da a wa lɔmbɔ sɛ 'do omɛnɔ ma santo ni, do osi'bili mɔ to nɛ vɛ̃ do'do, sɛ nɛ obe zã Kehatɛ wa tɛ we ba tole nɛ de. Na mɛ ni, nɛ kɔ Okehatɛ ndɔ́ sɛ tɛ mɔ santoe, kɔ wa hɔ fɛna fio gɔ. Obe zã Kehatɛ wa dɛ sɛ to kala omɔ tole santonɔ kɔ tɔa Tande ni.

¹⁶ “Kɛ 'da Elazarɛ, be 'da nganga Aroni, a sɛ a wi zɔ mɔ tɛ nɔ tũ do mwindanɔ, fũ yɔmbɛ we dɔ nɛ, dɔnggamɔ fũ, do nɔ a zu winɔ. Nɛ a zɔ sɛ 'bɔ mɔ tɛ tɔa Tande do mɛnɔ kɔ nɛ ni vɛ̃, mɛ a omɛnɔ kɛ ma santo, do osi'bili mɔ nɛ.”

¹⁷ Nɛ NWA tɔ̃ 'bɔ hã Mɔizɛ do Aroni na:

¹⁸ “Nɛ zɔ́ mɔ tɛ obe zã Kehatɛ, da dɛ kɔ wa 'bé tɛ mɛnɔ kɛ ma santo ni,

¹⁹ kɔ wa fe gɔ. We duzu ma, ma wia na, nɛ dɛ na mɛ gɛ: Aroni do obenɔ 'da a, wa kã sɛ wele do wele dɛ fala 'da a, nɛ wa be mɛ ma wia na a dɛ, tabi mɔ kɛ a ba sɛ tole nɛ ni hã a.

²⁰ Na mɛ ni, nɛ nde wa kpá sɛ fala we le kɔ tɔa Tande we soko mɛnɔ kɛ ma santo ni, kɔ wa kpa 'dã mɔ gɔ. Mba gɔ, li wa gbo tɛ mɛnɔ ni, nɛ wa fe sɛ.”

Obe zã Gɛrsoni

²¹ Nɛ NWA tɔ̃ hã Mɔizɛ na:

²² “Mɔ á 'bɔ olevitɛnɔ kɛ wa a obe zã Gɛrsoni ni do 'da nu fɛlɛ wa.

²³ Nɛ mɔ tɔ́lɔ́ wi wilinɔ, wanɔ wa wia 'bu sabɛlɛ talɛ we hɔ 'bu nɛ mɔlɔ, nɛ mɔ kɔmɔ sɛ li wa, takɔ wa dɛ ombe tonɔ kɔ tɔa Tande i.

²⁴ Wa sɛ a owi ba tole. Omɛnɔ kɛ wa ba sɛ tole nɛ ni ma kɛ:

²⁵ gbau tuli kɛ ma kele tɔa Tande, nɛ ma gɔnɔ sanga nɛ bɔa ni, nga ndala wili bata, nga ndala sa'de 'dɔ lì we gu ngɔ tɔa ni, ku'bi nu tɔa Tande,

²⁶ tulu kɛ wa dɛa do ngboe ma gɔnɔ sanga gbogbo fanda ma zĩ tɔa Tande do gbagala dɔ do sa'de takpa ni, ku'bi nu ngboe do ofɛlɛ dɛ do ngboe. Wa ba sɛ 'bɔ osi'bili mɛnɔ do osani kɛ wa dɛ do tonɔ 'da wa ni.

²⁷ Aroni do obenɔ 'da a wa zɔ sɛ mɔ tɛ toe Ogɛrsoni wa dɛ sɛ ni, do omɛnɔ wa ba sɛ tole nɛ ni. Wa dɛ sɛ mɛnɔ vɛ̃ kɛ Aroni do obenɔ 'da a wa tɔ̃ hã wa ni.

²⁸ Ki ni a tonɔ mɔ hã sɛ hã obe zã Gɛrsoni tɛ kɔ tɔa Tande gɛ a ni. Itamarɛ, be 'da nganga Aroni, a zɔ sɛ mɔ tɛ toe 'da wa.

Obe zã Mɛrari

²⁹ “Mɔ á 'bɔ olevitɛnɔ kɛ wa a obe zã Mɛrari do 'da nu fɛlɛ wa.

³⁰ Nɛ mɔ tɔ́lɔ́ wi wilinɔ, wanɔ wa wia 'bu sabɛlɛ talɛ we hɔ 'bu nɛ mɔlɔ, nɛ mɔ kɔmɔ sɛ li wa na, wa dɛ ombe tonɔ kɔ tɔa Tande i.

³¹ Wa sɛ 'bɔ a owi ba tole. Omɛnɔ kɛ wa ba sɛ tole nɛ ni ma kɛ: oma'baya tɔa Tande vɛ̃, obɛlɛduma, mɔ bolonɔ kɛ hole kɔ nɛ ni,

³² ote zĩ do ngboe, olangbanɔ, obe kunggu do ofɛlɛ, do osi'bili mɛnɔ wa dɛ do toe ni. Onganganɔ wa kɔmɔ sɛ li mɛnɔ kɛ wele do wele a ba sɛ ma do tɛ̃ a ni.

³³ Ki ni a tonɔ mɔ hã sɛ hã obe zã Mɛrari, tɛ kɔ tɔa Tande gɛ a ni. Itamarɛ, be 'da nganga Aroni, a zɔ sɛ 'bɔ mɔ tɛ toe 'da wa.”

Wa tɔlɔ levitɛnɔ wa dɛ toe ni

^34-49 Mɔizɛ, Aroni do okpasa wi ngɔ obe Israɛlɛ, wa tɔlɔ olevitɛnɔ vɛ̃ kɛ wa a obe zã Kehatɛ, Gɛrsoni do Mɛrari do 'da nu fɛlɛ wa do nu di 'da wa. Wa tɔlɔ wanɔ wa wia 'bu sabɛlɛ talɛ we hɔ 'bu nɛ mɔlɔ ni. Wa kɔma li winɔ ni we dɛ tonɔ kpi do kpi kɔ tɔa Tande. Wa tɔlɔ wa ɔ nɛ kɛ NWA ba do nu ɛ hã Mɔizɛ na a dɛ ni. Nɛ wa kpa wa na mɛ gɛ: Obe zã Kehatɛ; owi wili 2.750 Obe zã Gɛrsoni; owi wili 2.630 Obe zã Mɛrari; owi wili 3.200 Ngɔ gili levitɛnɔ vɛ̃ hɔa owi wili 8.580. Levitɛ kpo kpo kpa ombula ngɔ toe 'da a, do omɛnɔ ma wia na a ba tole nɛ ni. A kpa toe ni ɔ nɛ kɛ NWA ba do nu ɛ hã Mɔizɛ ni.