Tɔlɔ Mɔ 35 - WE NU GALE 1995

Olenɔ 'da olevitɛnɔ

¹ NWA wila we do Mɔizɛ tɛ li mbɛ nù Moabɛ, dɔ̃ɔ do nu lì Yɔrdanɛ, kɛ ma ka mɔ dɛ li le Yeriko ni na:

^2-3 “Mɔ bá nu mɔ hã obe Israɛlɛ na, wa hã mbe ole kɔ 'bili tɛ nùnɔ 'da wa hã obe zã Levi, takɔ wa ɔ nɛ. Obe Israɛlɛ wa hã sɛ 'bɔ fala hã wa kɛ zã olenɔ ni na, wa dala do nadalamɛnɔ do ogele sa'denɔ 'da wa.

^4-5 Fala dala do nadalamɛnɔ ni, 'da du nɛ do 'da dɔ nɛ vɛ̃ ma we sɛ kɔ̃ mɛtrɛ kama mɔlɔ nɛ ma zĩ 'do ngbo le. 'Do nɛ, nɛ nɛ 'bili sɛ fala, 'da du nɛ do 'da dɔ nɛ vɛ̃ we kɔ̃, mɛtrɛ koto kpo, nɛ ma fi le dɛ gbogbo.

⁶ Wa hã sɛ lenɔ gazɛlɛ kɛ winɔ wa wia sɛ do usu tɛ wa kɔ nɛ ni hã obe zã Levi. Wele kɛ a gbɛ wi, kɔ a gbɛ a do mbana gɔ, nɛ a yu sɛ, nɛ a usu tɛ̃ a kɔ mbe kpo kɔ olenɔ ni. Wa hã sɛ 'bɔ ogele le 'bu nɛ nalɛ ngɔ nɛ bɔa dɛ ngɔ kɛnɔ ni hã wa.

⁷ Obe zã Levi wa kpa sɛ ole vɛ̃ 'bu nɛ nalɛ ngɔ nɛ ngbɛ'dɛ'dɛ, nɛ ma kpo kpo sɛ do ofala dala do nadalamɛnɔ kɛ zã nɛ.

⁸ Nu kpala obe Israɛlɛ kpo kpo a hã sɛ lenɔ hã obe zã Levi do 'da gã nùi 'da a. Gã nu kpala a hã sɛ gã le, nɛ be nu kpala a hã be le.”

Lenɔ we usu tɛ wi kɔ nɛ

⁹ NWA tɔ̃a hã Mɔizɛ na,

¹⁰ a e mbulanɔ gɛ hã obe Israɛlɛ na: “'Da fala nɛ kũ sɛ lì Yɔrdanɛ dɛ kulu nɛ i, kɔ nɛ le ngɔ nù Kanana,

¹¹ nɛ nɛ saka sɛ ombe lenɔ kɛ winɔ wa wia sɛ do usu tɛ wa kɔ nɛ ni. Wele kɛ a gbɛ ngba a, nɛ nde a gbɛ a do mbana gɔ ni, nɛ a yu sɛ, nɛ a usu tɛ̃ a kɔ mbe le ni kpo.

¹² Na mɛ ni, nɛ a yu sɛ wi bili nu gbã fie ni na, dɔ a gbɛ́ a dati a kɛ na, wa gɔnɔ we 'da a dɛ li winɔ vɛ̃ ni gɔ.

¹³ Lenɔ we usu tɛ wi kɔ nɛ, ma sɛ gazɛlɛ:

¹⁴ ole talɛ sɛ do nu lì Yɔrdanɛ, si 'biti gba wese, nɛ ole talɛ do ngɔ nù Kanana.

¹⁵ Lenɔ gazɛlɛ ni, ma sɛ we gala be Israɛlɛ tabi gɛnɛ, tabi wi la wala kɛ a gbɛ wi do mbana gɔ ni na, a usu tɛ̃ a kɔ nɛ.

^16-18 “Nɛ nde fala kɛ wele gbɛ ngba a do tɔ̃a nu bolo, tabi ta, tabi do te, nɛ ma wia na wa gbɛ wi ni, we kɛ a a wi gbɛ wi.

¹⁹ 'Da fala kɛ wi bili nu gbã a kpa wi kɛ a gbɛa ngba a ni, nɛ a gbɛ sɛ a.

²⁰ Fala kɛ wele sɛnɛ ngba a, kɔ a ili a do nɔ̃lɔ̃ zã, tabi a lo a do mɔ,

²¹ tabi a zɛ a do kɔ̃ a, hã a fe, nɛ nde a a wi gbɛ wi, nɛ ma wia na wa gbɛ a. 'Da fala kɛ wi bili nu gbã a kpa wi gbɛ wi ni, nɛ a gbɛ sɛ a.

²² “Mbe gɔ, nɛ wele sɛnɛ ngba a gɔ, nɛ a ili a, tabi a lo a do mɔ, nɛ nde a dɛ̃ do mbana gɔ, nɛ ngba a fe.

²³ Tabi 'bɔ na, a zɔ̃ ngba a gɔ, nɛ a da ta, nɛ ma lo a, nɛ a fe, nɛ nde a do 'dã linggamɔ dɛ 'da a bina.

²⁴ Fala kɛ ma ɔ na mɛ ni, nɛ winɔ wa dɛ sɛ vɛ̃ ɔ nɛ kɛ mbula tɔ̃a ni.

²⁵ Wa fɔmɔ sɛ wi gbɛ wi ni, nɛ wa tombo a dɛ kɔ le usu do tɛ wi na, da dɛ kɔ wi bili nu gbã gbɛ́ a gɔ. Nɛ ma wia na, a ɔ dɛ di ni gbaa na, gã nwa nganga fe do'do sɛ nɛ de.

²⁶ Nɛ nde fala kɛ wi gbɛ wi ni hɔ nza kɔ le a usu do tɛ̃ a ni,

²⁷ kɔ wi bili nu gbã kpa a, kɔ a gbɛ a, nɛ nde ki ni, a sɛ do ngbangga bina.

²⁸ Mba gɔ, ma wia na wi gbɛ wi 'bana dɛ kɔ le a usu do tɛ̃ a ni gbaa na, gã nwa nganga fe, sɛ nɛ a ĩ ti kpolo tɛ̃ a dɛ ngɔ nùi 'da a de.

²⁹ Nɛ dɛ sɛ mbula gɛ 'da fala fai tɛ falanɔ vɛ̃ nɛ dungu sɛ nɛ ni.

³⁰ “Fala kɛ gili Owele wa ɔ temɔɛ gbɛa wi, nɛ wi gɔnɔ we a 'bili sɛ 'dã we hã wi gbɛ wi. Nɛ nde fala kɛ wele kpo iko hã a tɔ̃ temɔɛ gbɛa wi nde, nɛ wi gɔnɔ we a 'bílí sɛ 'dã we hã wi gbɛ wi gɔ.

³¹ Nɛ tɛ kɔ̃̀ gɛnɛ mbili na, nɛ kpasa wi kɛ a gbɛa wi ni gɔ, we kɛ a wia do fio.

³² Nɛ tɛ kɔ̃̀ 'bɔ gɛnɛ mbili na, nɛ hã wala hã wi gbɛ wi na, a yu dɛ kɔ le usu tɛ wi, nɛ a kpolo tɛ̃ a dɛ ngɔ nùi 'da a dati fie 'da gã nwa nganga gɔ.

³³ Fala kɛ nɛ dɛ̃ mbula ni gɔ, nɛ nde nɛ faka nùi 'da nɛ faka. Gbɛa wi ma faka nù faka. Wa gbɛ sɛ wi gbɛ wi, takɔ nùi ma hɔ sa li mi Gale.

³⁴ Nɛ tɛ fàkà nùi 'da nɛ gɔ. Mba gɔ mi nwa, mi dungu dɛ sanga nɛ obe Israɛlɛ.”