Tɔlɔ Mɔ 33 - WE NU GALE 1995

Li falanɔ kɛ obe Israɛlɛ wa ɔa tɛ nɛ 'da fala kulu tɔa

¹ Kɛ gɛ a li ofalanɔ kɛ obe Israɛlɛ wa ɔa zi tɛ nɛ, 'do kɛ wa hɔa nza ngɔ nù Ezipeto ni. Do 'da fala ni, owi kpe ti wa zi a Mɔizɛ do Aroni.

² NWA ba nu a hã Mɔizɛ, nɛ a kɔma li falanɔ kpo kpo kɛ na, wa ɔ sɛ tɛ nɛ ni.

³ Obe Israɛlɛ wa kulu zi ngɔ Ramsɛsi do kɔ̃ zɛkɛ 'bu ngɔ nɛ mɔlɔ, zɛkɛ 'da kpo. Wa kulu ngɔ tũ kpo 'do Ɛngga Hɔ Nza kɔ Ngbá, nɛ wa la do gbali Oezipeto ni, nɛ nde fo wi kele ti wa bina.

⁴ Do 'da fala ni, nɛ nde Oezipeto wa zi tɛ mi kuti benɔ 'da wa, kɛ nwa gbɛa wa ni. Mba gɔ, nwa dɛa na mɛ ni we be hã wa na, a do ngawi nɛa ngɔ ogalenɔ ngɔ nùi 'da wa ni.

⁵ Obe Israɛlɛ wa kulu ngɔ Ramsɛsi, nɛ wa la, nɛ wa 'dafa fala ɔi 'da wa tɛ Sukɔtɛ.

⁶ Wa yula di ni, nɛ wa hɔ Etamɛ, kɛ ma do nu ngbáká lì gba zɔ̃ɛ ni.

⁷ Wa kulu ngɔ Etamɛ, nɛ wa kpolo tɛ wa gbaa, nɛ wa hɔ Pi-Hahirɔtɛ, kɛ ma dɛ dati le Bala-Sɛfoni, nɛ wa 'dafa fala ɔi 'da wa dɔ̃ɔ do Migdɔlɛ.

⁸ Wa kulu ngɔ Pi-Hahirɔtɛ, nɛ wa kũ gba lì, nɛ wa hɔ li gba zɔ̃. Wa la li gba zɔ̃ Etamɛ 'do tũ talɛ, nɛ wa hɔ tɛ Mara.

⁹ Wa yula Mara, nɛ wa hɔ Elimɛ, nɛ wa 'dafa fala ɔi 'da wa di ni. We kɛ o'de zi di ni 'bu ngɔ nɛ bɔa, nɛ o'bete 'bu nɛ sambo.

¹⁰ Wa kulu ngɔ Elimɛ, nɛ wa nɛ, nɛ wa 'dafa fala ɔi 'da wa dɔ̃ɔ do nu gba lì Sala Tɔ̃.

¹¹ Nɛ 'do nɛ, nɛ wa hɔ tɛ li gba zɔ̃ Sinɛ.

¹² Wa yula li gba zɔ̃ Sinɛ, nɛ wa la dɛ Dofka.

¹³ Nɛ 'do nɛ, nɛ wa hɔ Alusi,

¹⁴ nɛ wa yolo Alusi, nɛ wa hɔ Rɛfidimɛ. Wa hɔa Rɛfidimɛ ni, nɛ nde fo lì nɔ nɔa bina.

^15-37 Yolo Rɛfidimɛ we hɔ zu kala Hɔrɛ, obe Israɛlɛ wa 'dafa fala ɔinɔ 'da wa tɛ falanɔ gɛ: li gba zɔ̃ Sinai, Kibrɔtɛ-Tava, Haserɔtɛ, Ritma, Rimoni-Perɛsi, Libna, Risa, Kɛhelata, kala Sefɛrɛ, Harada, Makelɔtɛ, Tahatɛ, Tera, Mitka, Hasɛmona, Moserɔtɛ, Bɛne-Yakanɛ, Hɔrɛ-Gidgadɛ, Yotbata, Abrona, Ɛsioni-Gebɛrɛ, Kadɛsɛ, tɛ li gba zɔ̃ Tisinɛ, do kala Hɔrɛ, dɔ̃ɔ do li ngbala nù Edɔmɛ.

^38-39 NWA ba nu a hã nganga Aroni, nɛ a kũ kala Hɔrɛ. A hɔa zu kala i, nɛ a fe dɛ di ni. A fia do zɛkɛ 'da mɔlɔ, kɔ̃ nɛ kpo, nɛ nde a do sabɛlɛ kama do 'bu nɛ bɔa ngɔ nɛ talɛ. Ĩ na, obe Israɛlɛ wa hɔa nza ngɔ nù Ezipeto 'do nɛ la 'bu sabɛlɛ nalɛ.

⁴⁰ Do 'da fala ni, nɛ nwa Aradɛ, kɛ a a be Kanana, nɛ a ɔ ngɔ nùi do si ba gɔtɔ ni, a zila na obe Israɛlɛ wa tɛ tɛ ma.

^41-49 Obe Israɛlɛ wa yula ngɔ kala Hɔrɛ, nɛ wa la, nɛ wa 'dafa fala ɔinɔ 'da wa tɛ falanɔ gɛ: Salmona, Punoni, Obɔtɛ, Ye-Abarimɛ, tɛ li ngbala nù Moabɛ, Diboni-Gadɛ, Almoni-Diblataimɛ, do ngɔ okala Abarimɛ kɛ dati kala Nebo. Nɛ 'do nɛ, nɛ wa hɔa li mbɛ nù Moabɛ dɔ̃ɔ do lì Yɔrdanɛ, kɛ ma ka mɔ dɛ li le Yeriko, nɛ wa 'dafa fala ɔi 'da wa ngbala Bɛtɛ-Yɛsimɔtɛ do Abɛlɛ-Sitimɛ.

NWA hã mbula ngɔ gɔnɔ sanga nù Kanana

⁵⁰ 'Da fala obe Israɛlɛ wa 'bana dɛ li mbɛ nù Moabɛ, dɔ̃ɔ do lì Yɔrdanɛ do dati Yeriko ni, nɛ nwa ba nu a hã Mɔizɛ na,

⁵¹ a tɔ̃ hã obe Israɛlɛ na: “'Da fala nɛ kũ sɛ lì Yɔrdanɛ dɛ ngɔ nù Kanana ni,

⁵² nɛ nɛ ndáká owinɔ ngɔ nùi ni vɛ̃ do'do. Nɛ 'danga sɛ okpikima galenɔ 'da wa kɛ wa dɛa ma do ta, tabi do mɔ bolo ni vɛ̃. Nɛ nɛ 'danga sɛ 'bɔ fala wa 'dafa we dɔnggɔ ogalenɔ 'da wa ni.

⁵³ Nɛ ba sɛ nùi 'da wa, nɛ nɛ dungu ngɔ nɛ, we kɛ mi ba ma hã nɛ do mɔ́ nɛ.

⁵⁴ Nɛ to zeke, nɛ nɛ kɛ̃ sanga nùi dɛ kɔ̃ owi nu kpala nɛ. Nɛ hã sɛ gã nù hã gã nu fɛlɛ, nɛ be nù hã be nu fɛlɛ. Nɛ ma wia na, nu kpala nɛ kpo kpo kɔ̃ gɛnɛ nùi kɛ a kpa ma do wala zeke ni.

⁵⁵ Nɛ nde fala kɛ nɛ ndàkà owinɔ wa ɔ ngɔ nùi ni gɔ, kɔ nɛ la wa na, wa ɔ dɛ sanga nɛ, nɛ wa zɛlɛ sɛ tɛ nɛ, ɔ nɛ 'bulu zɔ̃ kɛ ma te li wi, tabi tɛ̃ kɛ ma dumu nyanga wi ni. Wa bi sɛ nɛ dɛ ngɔ nùi nɛ dungu do ma ni.

⁵⁶ Fala kɛ nɛ ndàkà wa ngɔ nùi ni do'do gɔ, nɛ mi gbɛ sɛ nɛ, ɔ nɛ kɛ mi handa we gbɛ do wa ni.”