Tɔlɔ Mɔ 32 - WE NU GALE 1995

Nu kpala obe Israɛlɛ talɛ wa kpa nù

¹ Obe zã Rubɛnɛ do Gadɛ wa zi do onadalamɔ wena. Nɛ wa zɔa na, nù Yazɛrɛ do Galadɛ wia do fala dala do nadalamɛnɔ ni.

² Ma kɛ wa nɛa, nɛ wa kpa Mɔizɛ, do nganga Elazarɛ, do okpasa wi ngɔ obe Israɛlɛ, nɛ wa tɔ̃ hã wa na:

^3-4 “Olenɔ gɛ: Atarɔtɛ, Diboni, Yazɛrɛ, Nimra, Hɛsɛboni, Elale, Sɛbamɛ, Nebo do Beoni, ma vɛ̃ tɛ ngɔ nùi NWA dɛa na, obe Israɛlɛ wa ba ma ni. Nɛ mɛ a dia fala dala onadalamɔ, nɛ lɛ do onadalamɔ wena.

⁵ Kɔ fala kɛ nɛ kɔ linggamɛ 'da lɛ nde, nɛ nɛ hã nùi ni hã lɛ do mɔ lɛ. Nɛ nɛ tɛ tɔ̃̀ hã lɛ na, lɛ kũ lì Yɔrdanɛ dɛ kulu nɛ i gɔ.”

⁶ Nɛ Mɔizɛ gese hã wa na: “Gee! Nɛ kɔ̃a na, nɛ dungu fioo dɛ dɛ iko do 'da fala kɛ onya nɛ wa nɛ we bi bolo ni nde?

⁷ Gulu kɛ nɛ kɔ̃a we a tili li obe Israɛlɛ na, wa tɛ lè ngɔ nùi kɛ NWA hã ma hã wa ni gɔ we ge nde?

⁸ Oyaa nɛ wa dɛa zi 'bɔ kpo 'dã mɛ gɛ, 'da fala lɛ zi tɛ Kadɛsɛ-Barnea, nɛ mi tombo zi wa na, wa nɛ kɔ wa yɛnggɛ ngɔ nù Kanana we zɔ ma.

⁹ Nɛ wa nɛa gbaa, nɛ wa hɔ tɛ kɔ gbangɔlɔ̃ Ɛsɛkɔlɛ, nɛ wa yɛnggɛ ngɔ nùi ni. Kɔ wa nɛa we kpolo tɛ wa, nɛ wa a tili li gele obe Israɛlɛ na, wa tɛ nɛ̀ dɛ ngɔ nùi NWA hã zi ma hã wa ni gɔ.

¹⁰ Do ngba soe ni, nɛ zã NWA nɔ̃lɔ̃ zi dɛ tɛ wa, nɛ a tɔ̃ hã wa na:

¹¹ ‘Sanga nɛ, owinɔ nɛ yula Ezipeto i ni, wanɔ wa do 'bu sabɛlɛ bɔa we kũ dɛ ngɔ ni, wele kpo zɔ̃ sɛ nùi mi kpua mbulu nɛ hã Abrahama, Izaka do Yakɔbɔ ni gɔ. We kɛ nɛ dɛ̀ olo nu mi gɔ.

¹² Nɛ nde tati a Kalɛbɛ, be 'da Yɛfune, kɛ a a wi nu fɛlɛ Kɛnazɛ, wa do Yozue, be 'da Nunɛ, hã wa zɔ sɛ nùi ni, we kɛ wa dɛa olo nu mi.’ ”

¹³ Nɛ Mɔizɛ tɔ̃ 'bɔ hã wa na: “Zã NWA nɔ̃lɔ̃ zi dɛ tɛ lɛ obe Israɛlɛ, nɛ a dɛa na, lɛ ɔ 'bɔ li gba zɔ̃ 'do 'bu sabɛlɛ nalɛ, takɔ owinɔ vɛ̃ kɛ dɛa to tɛ wa ma dè li a gɔɛ ni, wa fe do'do sɛ nɛ de.

¹⁴ Kɔ nɛ, nu kpala owi dɛ 'dã mɛnɔ gɛ! Nɛ kɔ̃a we ba wala zi olo oyaa nɛ ni na, zã nwa nɔ̃lɔ̃ 'bɔ mbé nɛ dɛ tɛ lɛ obe Israɛlɛ nde?

¹⁵ Fala kɛ nɛ, owi nu kpala Rubɛnɛ do Gadɛ, nɛ bɛ̃ we nɛ 'do nwa, nɛ a dɛ sɛ na, lɛ ɔ 'bɔ dɛ li gba zɔ̃ɛ gɛ 'do nɛ nyɛlɛ. Na mɛ ni, nɛ tɔkɔ tɛ obe Israɛlɛ sɛ dɛ zu nɛ.”

¹⁶ Nɛ owi wilinɔ ni wa tili dɛ kɛ zã Mɔizɛ, nɛ wa tɔ̃ hã a na: “Gɔ, lɛ dɛ sɛ ngbo dɛ dɛ we onadalamɛnɔ 'da lɛ, nɛ lɛ dɛ le kɛ gba ngbo zĩ ma takpa ni, hã owi nu fɛlɛ lɛ.

¹⁷ 'Do nɛ, nɛ lɛ 'dafa sɛ tɛ lɛ, nɛ lɛ kala mɔ bi bolonɔ 'da lɛ na, lɛ la fala nɛ kpo do onya lɛ, we kã wa dɛ ngɔ nùi kɛ nwa hã ma hã wa ni. Do 'da fala ni, nɛ nde onu fɛlɛ lɛ, wa sɛ dɛ kɔ le kɛ gba ngbo zĩ ma takpa, nɛ owinɔ ngɔ nùi gɛ, wa dɛ́ sɛ mɔ do wa gɔ.

¹⁸ Nɛ lɛ, lɛ 'bana sɛ tɛ kulu lì i gbaa na, be Israɛlɛ kpo kpo a kpa nùi 'da a, sɛ nɛ lɛ kpolo tɛ lɛ de.

¹⁹ Fala kɛ lɛ kpa 'bili tɛ nùi 'da lɛ dɛ kulu lì nga, do si 'biti gba wese, nɛ nde lɛ bá sɛ 'bɔ nù kulu lì i gɔ.”

²⁰ Nɛ Mɔizɛ gese hã wa na: “Nɛ dɛ́ mbuli nɛ kpua ni. Nɛ kálá mɔ bi bolonɔ 'da nɛ dɛ gbali NWA gɛ, kɔ nɛ nɛ bole.

²¹ Nɛ, owi bolonɔ vɛ̃, nɛ kũ dɛ kulu lì Yɔrdanɛ i, ɔ nɛ kɛ zã NWA kɔ̃a ni. Nɛ nɛ 'bana sɛ dɛ i mɔ, we bi bole gbaa na, NWA ndaka owi sɛnɛ lɛ,

²² nɛ lɛ ba nùi do zu li a sɛ nɛ de. 'Do nɛ, nɛ nɛ kpolo sɛ tɛ nɛ dɛ olo nɛ, nɛ nde NWA kɔ́'dɔ́ sɛ nɛ gɔ, nɛ ogele obe Israɛlɛ, wa kɔ́'dɔ́ sɛ 'bɔ nɛ gɔ. Na mɛ ni, nɛ NWA a kɔ̃ sɛ na, nùi nu lì Yɔrdanɛ gɛ, ma ɔ do mɔ́ nɛ.

²³ Kɔ fala nɛ dɛ̃ na mɛ ni gɔ, nɛ nde nɛ dɛa 'dã mɔ dɛ 'da NWA. Nɛ mi mbese nɛ na, nɛ dɛ ni, nɛ NWA a hã sɛ etumbu hã nɛ.

²⁴ Na mɛ ni, nɛ dɛ́ gba ngbo, nɛ ma zĩ nu olenɔ 'da nɛ takpa, nɛ nɛ lá owi nu fɛlɛ nɛ dɛ di ni. Nɛ nɛ dɛ ngbo we obatanɔ do oduanɔ 'da nɛ. Nɛ nde tɛ zu nɛ tɛ èlè ngɔ mbuli nɛ kpua ni gɔ.”

²⁵ Nɛ owi nu kpala Rubɛnɛ do Gadɛ, wa gese hã a na: “Lɛ dɛ sɛ ɔ nɛ kɛ mɔ ba do nu mɔ ni.

²⁶ Lɛ la sɛ obenɔ, owukonɔ, onadalamɛnɔ do osa'de kala tolenɔ 'da lɛ dɛ kɔ lenɔ tɛ ngɔ nù Gadɛ gɛ.

²⁷ Nɛ lɛ kala sɛ mɔ bi bolonɔ 'da lɛ, nɛ lɛ la we bi bole do zu li NWA, ɔ nɛ kɛ mɔ tɔ̃a ni.”

²⁸ Ma kɛ Mɔizɛ ba nu a ngɔ owinɔ ni hã nganga Elazarɛ, do Yozue, be 'da Nunɛ, do okpasa wi nu fɛlɛ kulanɔ kpi do kpi kɔ nu kpala obe Israɛlɛ na:

²⁹ “Owi wili kɔ nu kpala Rubɛnɛ do Gadɛ, wa kala sɛ mɔ bi bolonɔ 'da wa, nɛ wa kũ lì Yɔrdanɛ fala nɛ kpo do nɛ, nɛ wa gala nɛ we bi bole na, nɛ ba nùi ɔ nɛ kɛ NWA ba do nu a ni. 'Do nɛ, nɛ nɛ hã sɛ nù Galadɛ hã wa.

³⁰ Nɛ nde fala kɛ wa dɛ na mɛ ni gɔ, nɛ nɛ hã sɛ 'bili tɛ nù hã wa tɛ ngɔ nù Kanana.”

³¹ Nɛ owi wili kɔ nu kpala Rubɛnɛ do Gadɛ wa gese na: “Lɛ dɛ sɛ kɛ NWA tɔ̃a hã lɛ ni.

³² Lɛ kala sɛ mɔ bi bolonɔ 'da lɛ, nɛ lɛ nɛ, nɛ lɛ le ngɔ nù Kanana, nɛ lɛ ba ma, ɔ nɛ kɛ NWA ba do nu a ni. Lɛ dɛ sɛ ni, takɔ lɛ kpa 'bili tɛ nùi 'da lɛ dɛ nu lì Yɔrdanɛ gɛ.”

³³ Ma kɛ Mɔizɛ hã 'bili tɛ nùi 'da Sihoni, nwa ngɔ Oamori, do 'bili tɛ nùi 'da Ɔgɛ, nwa ngɔ Obasanɛ hã owi nu kpala Gadɛ, Rubɛnɛ do mbee nu kpala Manase, be 'da Yozɛfu. Nɛ a hã 'bɔ olenɔ do o'bili tɛ nùnɔ kɛ zã nɛ ni hã wa.

³⁴ Nɛ obe zã Gadɛ wa dɛa ombé le olo lenɔ gɛ: Diboni, Atarɔtɛ, Arɔɛrɛ,

³⁵ Atrɔtɛ-Sofanɛ, Yazɛrɛ, Yogbaha,

³⁶ Bɛtɛ-Nimra do Bɛtɛ-Harnɛ, nɛ wa dɛ gba ngbo zĩ ma takpa. Nɛ wa dɛ 'bɔ ngbo nadalamɛnɔ 'da wa.

³⁷ Nɛ obe zã Rubɛnɛ wa dɛa ombé le olo lenɔ gɛ: Hɛsɛboni, Elale, Kiriataimɛ,

³⁸ Nebo, Bala-Meoni do Sibma. Nɛ wa ia mbé li zu lenɔ wa dɛa ni.

³⁹ Obe zã Makirɛ, be 'da Manase, wa lia kɔ 'bili tɛ nù Galadɛ, nɛ wa ba ma. Nɛ wa ndaka Oamori kɛ wa ɔ zi di ni ni.

⁴⁰ Ma kɛ Mɔizɛ hã 'bili tɛ nùi ni hã wa na, wa ɔ dɛ di ni.

⁴¹ Obe zã Yairɛ, mbee be 'da Manase, wa nɛa, nɛ wa bi mbe lenɔ 'da Oamori, nɛ wa ba ma. Nɛ wa sa li lenɔ ni na: “Ole Yairɛ.”

⁴² Do Sɔkpɔ nɛ vɛ̃, nɛ Noba bi le Kɛnatɛ, do obe lenɔ kɛ zã nɛ ni, nɛ a ba ma. Nɛ a ia li a wele nɛ dɛ zu le ni na, Noba.