Tɔlɔ Mɔ 31 - WE NU GALE 1995

Obe Israɛlɛ wa bi Omadianɛ

¹ NWA ba nu a hã Mɔizɛ na:

² “Mɔ nɛ́, kɔ mɔ hã etumbu hã Omadianɛ, we 'dã mɛ wa dɛa do obe Israɛlɛ ni. Mɔ dɛ na mɛ ni do'do, nɛ mɔ fe sɛ.”

³ Ma kɛ Mɔizɛ tɔ́a hã obe Israɛlɛ na: “Ma wia na, ombe kɔ nɛ gɛ wa kala mɔ bi bole 'da wa, kɔ wa nɛ we bi Omadianɛ. Nɛ wa hã etumbui kɛ NWA kɔa we tombo dɛ ngɔ wa ni hã wa.

⁴ Nɛ sáká owi bolo koto kpo kɔ nu kpala obe Israɛlɛ kpo kpo.”

⁵ Ma kɛ wa saka Owele koto kpo kɔ nu kpala wa kpo kpo. Nɛ ngɔ gili wa vɛ̃, ma hɔa osoda koto 'bu ngɔ wa bɔa.

⁶ Nɛ Mɔizɛ tumba wa vɛ̃ we bi bole. Nɛ nganga Pinasi, be 'da Elazarɛ kã wa. A nɛa do ombe mɛnɔ kɛ ma santo ni li bole, nɛ a nɛ 'bɔ do omɔtũlũ na, a dama ma we he hiamɔ bolo.

⁷ Wa nɛa, nɛ wa bi nùi 'da Omadianɛ ɔ nɛ kɛ nwa ba do nu ɛ hã Mɔizɛ ni, nɛ wa gbɛ owi wilinɔ vɛ̃.

⁸ Wa gbɛa 'bɔ Onwanɔ mɔlɔ tɛ ngɔ nu Madianɛ kɛ li wa a: Evi, Rekɛme, Surɛ, Hurɛ do Reba. Nɛ wa gbɛ 'bɔ Balamɛ, be 'da Beɔrɛ

⁹ Nɛ wa kala owukonɔ do obenɔ 'da Omadianɛ do bɔlɔkɔ. Nɛ wa kala 'bɔ osa'de kala tolenɔ 'da Omadianɛ, do onadalamɛnɔ, do dia mɛnɔ 'da wa vɛ̃ do mɔ́ wa.

¹⁰ Nɛ wa dɔa lenɔ do fala ɔinɔ 'da Omadianɛ,

¹¹ nɛ wa si do dia mɛnɔ, do owinɔ do osa'denɔ wa kala wa i mɔ ni,

¹² dɛ 'da Mɔizɛ, do Elazarɛ do obe Israɛlɛ. Do 'da fala ni, nɛ nde obe Israɛlɛ wa 'bana zi tɛ fala ɔi 'da wa tɛ li mbɛ nù Moabɛ, dɔ̃ɔ do lì Yɔrdanɛ, kɛ ma ka mɔ dɛ li le Yeriko ni.

¹³ Mɔizɛ, Elazarɛ do ombe gã wi ngɔ obe Israɛlɛ, wa hɔa fala ɔi dɛ nza, we yɛlɛ ti osodanɔ.

¹⁴ Mɔizɛ nɛa we zɔ owukonɔ kɛ wa kala wa si do wa ni, nɛ zã a nɔ̃lɔ̃ dɛ tɛ ogã wi ngɔ osodanɔ kɛ wa tɛ si li bole ni.

¹⁵ Nɛ a aka wa na: “Gulu kɛ nɛ la wukonɔ gɛ do tunu li wa we ge nde?

¹⁶ Nɛ ĩ de wena na, wi a wukonɔ gɛ, kɛ wa zila zi mbulanɔ 'da Balamɛ tɛ Peɔrɛ i ni, hã wa dɛa zi na, obe Israɛlɛ wa dɔnggɔ ogale bɛlɛnɔ 'da wa. Gulu kɛ 'dã zɛlɛ ma tia zi tɛ obe Israɛlɛ gɛ a ni.

¹⁷ Kɔ nɛ lá, nɛ nɛ gbɛ́ obulu benɔ, do owukonɔ vɛ̃ kɛ wa ɔa do wili ɔa ni.

¹⁸ Nɛ nɛ 'bana tati a do oboko benɔ kɛ wa tɛ ĩ̀ ti wili gɔ ni.

¹⁹ Winɔ vɛ̃ kɔ nɛ gɛ, kɛ wa gbɛa wele tabi wa 'bia tɛ wɔlɔ ni, wa ɔ sɛ tũ sambo dɛ 'do ngbo ɔi gɛ. Nɛ ma wia na tũi kɛ talɛ do tũi kɛ sambo, onganganɔ wa fɔlɔ wa na, wa hɔ sa wi li Gale. Mbula ni, ma sɛ 'bɔ we wukonɔ nɛ kala wa si do wa ni.

²⁰ Nɛ onganganɔ wa dɛ sɛ 'bɔ na, otulunɔ do omɛnɔ vɛ̃ kɛ wa dɛa ma do nga ndala, do ndala dua, tabi do te ni, ma hɔ santo li Gale.”

²¹ Nɛ nganga Elazarɛ tɔ́a hã owi wilinɔ wa nɛa zi bole ni na: “Kɛ gɛ a ombulanɔ NWA hã ma hã Mɔizɛ.

^22-23 A na: Mɛnɔ vɛ̃ kɛ ma bɛ́lɛ́ gɔ, ɔ nɛ mɛnɔ kɛ wa dɛa do mɔ mbali, do omɔ bolo kpi do kpi ni, nɛ yulu sɛ ma na, ma la do li nyɛa we, nɛ 'do nɛ, nɛ nɛ kpã lì fɔlɔ winɔ tɛ nɛ, nɛ ma vɛ̃ ma hɔ sɛ santo li Gale. Nɛ mɛnɔ vɛ̃ kɛ ma bɛ bɛla ni, nɛ kpã sɛ 'bɔ lì fɔlɔ winɔ tɛ nɛ, nɛ ma hɔ santo.

²⁴ Do tũ kɛ sambo, nɛ nɛ fɔlɔ sɛ otulu tɛ nɛ, nɛ nɛ hɔ sɛ sa wi li Gale. 'Do nɛ, nɛ nɛ kpolo sɛ tɛ nɛ dɛ kɔ ngbo ɔi i.”

Wa gɔnɔ sanga dia mɛnɔ wa kala Li bole ni

²⁵ NWA tɔ́a hã Mɔizɛ na:

²⁶ “Nɛ, do Elazarɛ, do okpasa wi nu fɛlɛ obe Israɛlɛ, nɛ tɔlɔ sɛ owinɔ, do osa'denɔ, do omɛnɔ wa kala li bole ni.

²⁷ 'Do nɛ, nɛ mɔ kɛ sanga nɛ dɛ gbogbo, nɛ mɔ hã́ mbee nɛ hã osodanɔ, nɛ mɔ hã tala nɛ hã obe Israɛlɛ.

²⁸ Nɛ mɔ zɔ kɔ mɛnɔ kɛ osodanɔ wa kpa ni, nɛ mɔ fó wele kpo kɔ Owele kama mɔlɔ, nɛ sa'de kpo kɔ osa'de kama mɔlɔ. Mɛ a osa'denɔ gɛ: ongɔmbɔ, opunda, obata do odua. Nɛ wele owinɔ do osa'denɔ ni sɛ vɛ̃ a mɔ mi,

²⁹ nɛ mɔ hã sɛ wa hã nganga Elazarɛ.

³⁰ Nɛ ngɔ omɛnɔ kɛ tala obe Israɛlɛ wa kpa ni, mɔ fo sɛ wele kpo kɔ Owele 'bu wa mɔlɔ, nɛ sa'de kpo kɔ osa'de 'bu wa mɔlɔ. Mɛ sɛ a osa'denɔ gɛ: ongɔmbɔ, opunda, obata, odua do ogele sa'denɔ. Nɛ wele wa vɛ̃ sɛ a mɔ́ mi. Nɛ mɔ hã sɛ wa hã olevitɛnɔ, kɛ wa dɛ toe kɔ tɔa Tande 'da mi ni.”

³¹ Mɔizɛ do Elazarɛ, wa dɛa mbula NWA hã ma hã Mɔizɛ ni.

^32-35 Kɛ gɛ a ngɔ gili omɛnɔ osodanɔ wa si do ma, (fo kɛnɔ wa kala do mɔ́ wa ni): obata do odua koto kama gazɛlɛ do 'bu nɛ sambo ngɔ nɛ mɔlɔ (675.000), ongɔmbɔ koto 'bu nɛ sambo ngɔ nɛ bɔa (72.000), opunda koto 'bu nɛ gazɛlɛ ngɔ nɛ kpo (61.000), do obe zɔnga kɛ wa tɛ ɔ̀ do wi wili gɔ ni koto 'bu wa talɛ ngɔ wa bɔa (32.000).

^36-40 Omɛnɔ wa hã ma hã osodanɔ ni ma kɛ: obata do odua koto kama talɛ do 'bu nɛ talɛ ngɔ nɛ sambo do kama mɔlɔ (337.500), nɛ wa fo zu wa kama gazɛlɛ do 'bu nɛ sambo ngɔ nɛ mɔlɔ hã NWA, ongɔmbɔ koto 'bu nɛ talɛ ngɔ nɛ gazɛlɛ (36.000), nɛ wa fo zu wa 'bu nɛ sambo ngɔ nɛ bɔa hã NWA, opunda koto 'bu nɛ talɛ do kama mɔlɔ (30.500), nɛ wa fo zu wa 'bu nɛ gazɛlɛ ngɔ nɛ kpo hã NWA. Nɛ obe zɔnganɔ wa tɛ ɔ̀ do wi wili gɔɛ ni koto 'bu ngɔ wa gazɛlɛ (16.000), nɛ wa fo zu wa 'bu wa talɛ ngɔ wa bɔa hã NWA.

⁴¹ Ma kɛ Mɔizɛ kala owinɔ do osa'denɔ wa fua hã NWA ni, nɛ a hã wa hã nganga Elazarɛ ɔ nɛ kɛ NWA ba zi do nu a hã a ni.

^42-46 Omɛnɔ tala obe Israɛlɛ wa kpa ni ma wia kɔ̃ do kɛ osodanɔ wa kpa ni. Mɛ a odua do obata koto kama talɛ do 'bu nɛ talɛ ngɔ nɛ sambo do kama mɔlɔ (337. 500), ongɔmbɔ koto 'bu nɛ talɛ ngɔ nɛ gazɛlɛ (36.000), opunda koto 'bu nɛ talɛ do kama mɔlɔ (30.500) do Owele koto 'bu ngɔ wa gazɛlɛ (16.000).

⁴⁷ Nɛ ngɔ omɛnɔ ni, Mɔizɛ fua wele kpo kɔ Owele 'bu wa mɔlɔ, nɛ sa'de kpo kɔ osa'de 'bu wa mɔlɔ, nɛ a hã wa hã olevitɛnɔ, kɛ wa dɛ toe kɔ tɔa Tande 'da NWA ni. A dɛa ɔ nɛ kɛ NWA ba zi do nu ɛ hã a ni.

⁴⁸ 'Do nɛ, nɛ ogã wi ngɔ sodanɔ wa nɛa 'da Mɔizɛ i,

⁴⁹ nɛ wa tɔ̃ hã a na: “Lɛ tɔla osodanɔ lɛ kpe ti wa ni, nɛ nde zu wele kpo yɔ̀ gɔ.

⁵⁰ Ma kɛ lɛ tɛa do dɔnggamɛnɔ gɛ hã NWA, takɔ a zɔ 'bɔ mɔ tɛ lɛ na, da dɛ kɔ lɛ fé gɔ. Wele do wele kɔ lɛ gɛ tɛa do mɔ mbalinɔ a kpa ni, we dɔnggɔ do NWA. Mɛ a: dia mɔ kɛ wuko a fi zã 'baka a, mɔ nu kɔ wi, pɛtɛ, mɔ zala wi, do mɔ gɛlɛ wi.”

⁵¹ Nɛ Mɔizɛ do nganga Elazarɛ, wa kɔa gɛnɛ omɔ mbalinɔ kɛ ogã wi ngɔ sodanɔ wa tɛa do ma ni.

⁵² Wa mba li mɔ mbalinɔ ni vɛ̃, nɛ dĩ nɛ kɔla dɔ̃ɔ do kilo kama kpo do 'bu nɛ sambo.

⁵³ Nɛ nde tala gele osodanɔ, wa 'bana zi do dia mɛnɔ wa kala li bole ni.

⁵⁴ Mɔizɛ do Elazarɛ wa kala mɔ mbalinɔ ni, nɛ wa a ma kɔ tɔa Tande 'da NWA na, ma gba ta zu NWA ngɔ obe Israɛlɛ.