Tɔlɔ Mɔ 30 - WE NU GALE 1995

¹ Mɔizɛ tɔ̃a mbulanɔ vɛ̃ a kpa 'da nwa i ni, hã obe Israɛlɛ.

Mbula ngɔ ombulanɔ wa kpua ni

² 'Do nɛ, nɛ Mɔizɛ tɔ̃a mbulanɔ gɛ hã ogã wi ngɔ nu kpala obe Israɛlɛ na:

³ “Fala kɛ wele kpo mbulu hã dɔnggamɔ hã NWA, tabi we bɛ̃ mɔ do zu li a nde, nɛ ma wia na, a dɛ olo nu a kɛ a tɔ̃a ni vɛ̃.

⁴ “Mbe gɔ, nɛ be zɔnga 'bana dɛ ti baa a, nɛ a kpo mbulu we dɔnggɔ NWA do mɔ, tabi a bɛ̃ mɔ do zu li NWA.

⁵ Kɔ fala kɛ baa a zele we nɛ, kɔ a wèlè we si ngɔ nɛ gɔ nde, nɛ ma wia na, be zɔnga ni dɛ olo nu ɛ.

⁶ Nɛ nde fala kɛ baa a zele we nɛ, kɔ a bɛ̃, nɛ be zɔnga a la sɛ fala mbuli ni. Nɛ NWA a mbɔkɔ sɛ a, we kɛ baa a a bɛ̃a na, a tɛ dɛ̃ olo nu a gɔ.

⁷ “Mbe gɔ, nɛ be zɔnga kpo mbulu hã NWA, tabi a lengge mɔ ngɔ nɛ dati, tabi a lènggè mɔ ngɔ nɛ gɔ. Nɛ 'do nɛ, nɛ a ba wili.

⁸ Kɔ fala kɛ wili a zele we nɛ, kɔ a wèlè we si ngɔ nɛ gɔ nde, nɛ ma wia na, be zɔnga ni dɛ olo nu ɛ.

⁹ Nɛ nde ngba soe kɛ wili a zele we nɛ, kɔ a bɛ̃, nɛ mbuli wuke kpua ni ma 'danga sɛ. Nɛ NWA a mbɔkɔ sɛ wuke ngɔ mbuli kɛ a dɛ̃ ma gɔɛ ni.

¹⁰ “Fala kɛ wi fio wili, tabi wuko kɛ wili a bɛ̃a a ni kpo mbulu, nɛ ma wia na, a dɛ olo nu a.

^11-12 “Fala kɛ wuko mɔ́ wili kpo mbulu dɛ mɔ hã NWA, kɔ wili a zele we nɛ, kɔ a bɛ̃̀ gɔ nde, nɛ ma wia na wuke ni dɛ olo nu ɛ.

¹³ Nɛ nde ngba soe kɛ wili a zele we nɛ, kɔ a bɛ̃ mbulunɔ ni, nɛ wuke a la sɛ fala dɛ ma. Nɛ NWA a mbɔkɔ sɛ a, we kɛ wili a bɛ̃a na, a tɛ dɛ̀ olo nu a gɔ.

¹⁴ Na mɛ ni, fala kɛ wuko kpo mbulu we bɛ̃ mɔ do zu li NWA nde, nɛ wili a wia we bɛ̃ mbuli ni, tabi we kɔ 'bɔ ma.

¹⁵ Fala kɛ wuko kpo mbulu, hã ma la tũ kpo, kɔ wili a wèlè we si ngɔ nɛ gɔ nde, nɛ ma be sɛ na, a kɔa do kɔ sila a na, wuke 'da a dɛ olo nu ɛ.

¹⁶ Nɛ nde fala kɛ 'do nɛ ma nyɛlɛ, kɔ wili wuke ni bɛ̃, nɛ a te sɛ li ngbangga olo wuke 'da a, kɛ a d mbuli a kpua ni gɔɛ ni.”

¹⁷ Ki ni a mbulanɔ kɛ NWA tɔ́a hã Mɔizɛ si ngɔ mbulunɔ kɛ wuko mɔ́ wili, tabi be zɔnga kɛ a 'bana dɛ ti baa a, a kpo ni.