Tɔlɔ Mɔ 3 - WE NU GALE 1995

Tonɔ 'da nu kpala Levi

¹ Nɛ zélé li owi nu fɛlɛ Aroni do Mɔizɛ, 'da fala NWA wila do we hã Mɔizɛ tɛ ngɔ kala Sinai i ni.

² Aroni zi do obulu be nalɛ. Li kuti be a Nadabɛ, nɛ dɛ 'do a Abihu, Elazarɛ do Itamarɛ.

³ Wa a zi nɔ zu wa, takɔ wa dɛ to nganga.

⁴ Nɛ nde Nadabɛ do Abihu wa fia zi tɛ li gba zɔ́ Sinai i, we kɛ wa hã zi yɔmbɔ kɛ ma santo gɔ ni do dɔnggamɔ hã Gale. Wa zi do be bina, ma kɛ tati a Elazarɛ do Itamarɛ wa dɛa to nganga fala nɛ kpo do baa wa Aroni.

⁵ NWA tɔ́a hã Mɔizɛ na:

⁶ “Mɔ sá mɔ hã obe zã Levi, nɛ mɔ a nɔ zu wa na, wa gala nganga Aroni.

⁷ Wa dɛ sɛ toe kɛ ma zɔa tɔa Tande we kpa ngba wi do mi Gale ni dɛ ti Aroni, do zu li tala obe Israɛlɛ vɛ̃.

⁸ Wa fɔmɔ sɛ osi'bili mɔ tɛ tɔa Tande, nɛ wa dɛ sɛ to i mɔ do zu li tala gele obe Israɛlɛ.

⁹ Dɛa toe 'da levitɛnɔ tati a gala Aroni do benɔ 'da a tɛ to nganga 'da wa. Wa dɛ sɛ ma olo li tala obe Israɛlɛ vɛ̃.

¹⁰ Mɔ dɛ́ na, tati a Aroni do benɔ 'da a, hã wa dɛ to nganga. Kɔ gele wele iko, kɛ a a nganga gɔ ni, a yamba dɛ toe ni, nɛ ma wia na wa gbɛ a.”

¹¹ Nɛ NWA tɔ̃ 'bɔ hã Mɔizɛ na:

¹² “Wi a mi hã mi saka levitɛnɔ kɔ tala gele obe Israɛlɛ vɛ̃. Wa dɛ sɛ to hã mi olo li kuti benɔ 'da obe Israɛlɛ.

¹³ Mba gɔ, ngba soe mi gbɛa zi do kuti bulu benɔ 'da Oezipeto ni, nɛ mi la zi kuti bulu benɔ 'da obe Israɛlɛ, do kuti be wili nadalamɛnɔ 'da wa. Na mɛ ni, wele wa a mɔ́ mi. Mi a NWA!”

Kuti tɔlɔ owi nu kpala Levi

¹⁴ NWA tɔ̃a hã Mɔizɛ tɛ li gba zɔ̃ Sinai i na:

¹⁵ “Mɔ tɔ́lɔ́ owi nu kpala Levi, do 'da nu fɛlɛ kula 'da wa kpo kpo. Nɛ mɔ kɔ́mɔ́ li owi wilinɔ do obulu benɔ, yolo tɛ wanɔ wa wia zɛkɛ kpo we kũ dɛ ngɔ.”

¹⁶ Nɛ Mɔizɛ dɛa nɛ́ kɛ NWA ba do nu a ni.

¹⁷ Obe zã Levi wi a Gɛrsoni, Kehatɛ do Mɛrari.

¹⁸ Nɛ obenɔ 'da Gɛrsoni wi a Libni do Simei. Wa a oyaa nu fɛlɛ winɔ kɛ wa ia li wa dɛ zu wa ni.

¹⁹ Obenɔ 'da Kehatɛ wi a Amramɛ, Isarɛ, Hebroni do Uziɛlɛ. Wa tɛ mɛ 'bɔ a oyaa nu fɛlɛ wa.

²⁰ Obenɔ 'da Mɛrari wi a Mali do Musi. Wa 'bɔ a oyaa nu fɛlɛ wa. Winɔ ni vɛ̃, wa ia li wa zu onu fɛlɛ winɔ kɔ nu kpala Levi.

²¹ Gɛrsoni zi a yaa Ogɛrsoni. Nu fɛlɛ wa kɛ̃a sanga tɛ ngbɛ ɛ bɔa: Olibni do Osimei.

²² Nɛ wa tɔlɔ wi wilinɔ mba do bulu benɔ yolo tɛ zɛkɛ kpo we kũ dɛ ngɔ, nɛ nde wa zi vɛ̃ 7.500.

²³ Fala ɔi 'da nu fɛlɛ Ogɛrsoni, ma zi do 'do tɔa Tande, si 'biti gɛ̃a wese.

²⁴ Nɛ nwa ngɔ wa a Eliasafɛ, be 'da Laɛlɛ.

²⁵ Ogɛrsoni wa zɔ zi mɔ tɛ omɛnɔ gɛ: tulu Tande kɛ kɔ tɔa i, do kɛ ma kele 'do tɔa nza nga ni, do tulu kele do ma, ku'bi nu tɔa Tande,

²⁶ tulu tande do ku'bi we le dɛ li fanda ma zĩ tɔa Tande takpa, do gbagala wa dɔ do sa'de hã Gale ni, do ofɛlɛ tɔa Tande. Wa zi a wa zɔ mɔ tɛ omɛnɔ ni.

²⁷ Kehatɛ zi a yaa Okehatɛ. Nu fɛlɛ wa kɛ̃a sanga tɛ ngbɛ ɛ nalɛ: Oamrami, Oisari, Ohebroni, do Ouziɛlɛ.

²⁸ Owi wilinɔ do obulu benɔ yolo tɛ zɛkɛ kpo we kũ dɛ ngɔ, wa zi vɛ̃ 8.600. Wa zi a wa fɔmɔ omɛnɔ kɛ ma santo ni.

²⁹ Onu fɛlɛ Okehatɛ wa 'dafa fala ɔi 'da wa do 'do tɔa Tande, si ba gɔtɔ.

³⁰ Nwa ngɔ wa zi a Elisafanɛ, be 'da Uziɛlɛ.

³¹ Okehatɛ wa zɔ zi mɔ tɛ mɛnɔ gɛ: Sanduku Gba Tɔkɛ, mɛsa kɛ ma santo, mɔ a mwindanɔ ngɔ nɛ, gbagalanɔ we dɔ do sa'de, saninɔ wa dɛ do to kɔ tɔa Tande ni, do ku'bu gɔnɔ sanga kɔ tɔa Tande. Wa zi a wa zɔ mɔ tɛ omɛnɔ ni.

³² Nwa ngɔ olevitɛnɔ a Elazarɛ, be 'da nganga Aroni. A zi a wi ngɔ owinɔ kɛ wa dɛ toe kɔ tɔa Tande ni.

³³ Mɛrari zi a yaa Omɛrari. Nu fɛlɛ wa kɛ̃a sanga tɛ ngbɛ ɛ bɔa: Omali do Omusi.

³⁴ 'Da fala tɔlɔ winɔ, nɛ nde owi wilinɔ do bulu benɔ yolo tɛ zɛkɛ kpo we kũ dɛ ngɔ ni, wa zi vɛ̃ 6.200.

³⁵ Nwa ngɔ wa a Suriɛlɛ, be 'da Abihailɛ. Wa 'dafa zi fala ɔi 'da wa do 'do tɔa Tande, si gbãlã ngɔ.

³⁶ Omɛrari zi a wa zɔ mɔ tɛ ma'baya tɔa Tande, obɛlɛdumanɔ, omɔ bolonɔ hole kɔ nɛ ni, do osi'bili mɔ tɛ tɔa Tande.

³⁷ Wa zɔ zi 'bɔ mɔ tɛ bɛlɛdumanɔ kɛ wa zĩ do ngbo 'do li fanda tɔa Tande, do mɔ bolonɔ kɛ hole kɔ nɛ, obe kunggu do ofɛlɛ kɛ wa dɛ do ngboe ni.

³⁸ Nɛ Mɔizɛ, Aroni do obenɔ 'da a, wa 'dafa fala ɔi 'da wa do dati tɔa Tande, si 'biti gba wese. Wa dɛ zi toe kɔ tɔa Tande do zu li obe Israɛlɛ. Kɔ gele wele iko, kɛ a a nganga gɔ ni, a yamba dɛ toe ni, nɛ ma wia na wa gbɛ a.

³⁹ Olevitɛnɔ vɛ̃, owi wilinɔ do bulu benɔ kɛ wa wia zɛkɛ kpo we kũ dɛ ngɔ ni, wa zi koto 'bu wa bɔa ngɔ wa bɔa. Mɔizɛ do Aroni wa a wa tɔlɔ zi winɔ, do 'da nu fɛlɛ wa, ɔ nɛ kɛ NWA ba do nu ɛ hã wa ni.

Wa gɔnɔ sɛ zu kuti bulu benɔ

⁴⁰ NWA tɔ́a hã Mɔizɛ na: “Mɔ tɔ́lɔ́ Okuti bulu benɔ 'da obe Israɛlɛ vɛ̃, yolo tɛ wanɔ wa wia zɛkɛ kpo we kũ dɛ ngɔ, nɛ mɔ kɔmɔ li wa.

⁴¹ 'Do nɛ, nɛ mɔ e sɛ olevitɛnɔ na, wa dɛ to hã mi olo li kuti bulu benɔ 'da obe Israɛlɛ. Mɔ hã sɛ 'bɔ kuti be wili nadalamɛnɔ 'da olevitɛnɔ hã mi, olo li kuti be wili sa'denɔ 'da obe Israɛlɛ.”

⁴² Mɔizɛ tɔlɔ Okuti bulu benɔ 'da obe Israɛlɛ vɛ̃, ɔ nɛ kɛ NWA ba do nu ɛ hã a ni,

⁴³ yolo do zɛkɛ kpo we kũ dɛ ngɔ. Nɛ wa hɔa vɛ̃ koto 'bu wa bɔa ngɔ wa bɔa do kama bɔa do 'bu wa sambo ngɔ wa talɛ (22.273).

⁴⁴ Nɛ NWA tɔ̃ hã Mɔizɛ na:

⁴⁵ “Mɔ é olevitɛnɔ na, wa dɛ to hã mi, olo li kuti bulu benɔ 'da obe Israɛlɛ. Nɛ mɔ hã 'bɔ be wili nadalamɛnɔ 'da wa hã mi, olo li kuti be wili nadalamɛnɔ 'da obe Israɛlɛ.

⁴⁶ Nɛ nde ɔ nɛ kɛ kuti bulu benɔ 'da obe Israɛlɛ wa dɛlɛ nɛa ngɔ olevitɛnɔ do 273 ni, ma wia na, wa gɔnɔ zu otala wanɔ ni.

⁴⁷ We duzu wa, wele kpo kpo a hã sɛ mbili mɔlɔ kɛ wa dɛa do fɛ̃a mɔ bolo, nɛ wa ba ma do 'da mɔ we do mbili kɔ tɔa Tande.

⁴⁸ Nɛ mɔ hã sɛ mbili ni hã Aroni do obenɔ 'da a. Tɛlɛ tɛ kɛ wa gɔnɔ sɛ do zu kuti bulu benɔ kɛ ngɔ gili wa nɛa ngɔ olevitɛnɔ gɛ a ni.”

⁴⁹ Mɔizɛ kala mbili wa gɔnɔ do zu kuti bulu benɔ, kɛ wa dɛlɛ nɛa ngɔ olevitɛnɔ ni.

⁵⁰ A kala mbili ni kɔ̃ kuti bulu benɔ 'da obe Israɛlɛ vɛ̃, nɛ ma hɔa mbili fɛ̃a mɔ bolo koto do kama talɛ do 'bu nɛ gazɛlɛ ngɔ nɛ mɔlɔ (1.365).

⁵¹ Nɛ a hã ma hã Aroni do obenɔ 'da a, ɔ nɛ kɛ NWA ba do nu a ni.