Tɔlɔ Mɔ 29 - WE NU GALE 1995

Dɔnggamɔ we ɛngga Dama Mɔtũlũ

¹ “Do zɛkɛ 'da sambo, kɔ̃ nɛ kpo, nɛ mba sɛ ngba nɛ we dɔnggɔ mi NWA. Nɛ nɛ la sɛ fala dɛa tonɔ 'da nɛ, we kɛ mɛ a ngba soe dama mɔtũlũ.

² Nɛ dɔ sɛ wili ngɔmbɔ kpo, wili bata kpo do obe bata sambo, kɛ wa do sabɛlɛ kpo kpo ni. Nɛ sa'denɔ ni vɛ̃ wa tɛ ɔ̀ do kunda tɛ wa gɔ. Nɛ zɛ̃ we nɛ ma unu sɛ mi.

³ Nɛ so sɛ fũ, do nɔ, nɛ nɛ zanga do ma, nɛ nɛ mba ma do sa'de kpo kpo we dɔnggɔ do mi. Mɛ sɛ a fũ kilo kusi we wili ngɔmbɛ kpo ni, nɛ fũ kilo gazɛlɛ we wili bata,

⁴ nɛ fũ kilo talɛ we be batanɔ kpo kpo, do 'da zu wa sambo ni vɛ̃.

⁵ Nɛ dɔ sɛ 'bɔ wili dua hã mi, we fo ku'da 'dã mɔ zu nɛ. Nganga a gbɛ sɛ wili dua ni, takɔ nɛ hɔ sa wi li mi NWA.

⁶ Wa dɔ sɛ sa'denɔ ni vɛ̃ dɛ ngɔ kɛ wa dɔ tũ kpo kpo do kuti kɔ̃ tũ zɛkɛ ni. Nɛ so sɛ fũ do dɔ̃, nɛ nɛ mba do ma, ɔ nɛ kɛ nɛ dɛ fai ni. Nɛ zɛ̃ we dɔa sa'denɔ ni ma unu sɛ mi nwa, nɛ ma dɛ yangga tɛ mi.

Dɔnggamɔ we ngba soe fo ku'da 'dã mɛnɔ

⁷ “Do zɛkɛ 'da sambo, kɔ̃ nɛ 'bu, nɛ nɛ mba sɛ ngba nɛ we dɔnggɔ mi NWA. Nɛ bɛ̃ sɛ nyɔngɔmɔ, nɛ nɛ la sɛ 'bɔ fala dɛa tonɔ 'da nɛ.

⁸ Nɛ dɔ sɛ wili ngɔmbɔ kpo, wili bata kpo do obe bata sambo, kɛ wa do sabɛlɛ kpo kpo ni hã mi nwa. Nɛ sa'denɔ ni vɛ̃ wa tɛ ɔ̀ do kunda tɛ wa gɔ. Nɛ zɛ̃ we nɛ ma unu sɛ mi.

⁹ Nɛ so sɛ fũ, do nɔ, nɛ nɛ zanga do ma, nɛ nɛ mba ma do sa'de kpo kpo. Mɛ sɛ a fũ kilo kusi we wili ngɔmbɛ, nɛ fũ kilo gazɛlɛ we wili bata,

¹⁰ nɛ fũ kilo talɛ, we obe batanɔ kpo kpo, do 'da zu wa sambo ni vɛ̃.

¹¹ Nɛ nɛ dɔ sɛ 'bɔ wili dua we fo ku'da 'dã mɔ zu nɛ. Nɛ dɔ sɛ sa'denɔ ni vɛ̃, mba do wili dua nɛ dɔa a na, nɛ hɔ sa wi li mi ni, dɛ ngɔ kɛ nɛ dɔ tũ kpo kpo mba do fũi do dɔ̃ɛ ni.

Dɔnggamɔ we ɛngga Ɔ ti Dan

¹² “Do zɛkɛ 'da sambo, kɔ̃ nɛ 'bu ngɔ nɛ mɔlɔ, nɛ nɛ mba sɛ ngba nɛ we dɔnggɔ mi NWA. Nɛ nɛ la sɛ fala dɛa tonɔ 'da nɛ. Nɛ dungu sɛ ɛngga 'do tũ sambo, we hã dɔ̃lɔ̃ li hã mi NWA.

¹³ Kɔ tũ kɛ dati ni, nɛ nɛ dɔ sɛ owili ngɔmbɔ 'bu ngɔ wa talɛ, wili bata bɔa do obe bata 'bu ngɔ wa nalɛ, kɛ wa do sabɛlɛ kpo kpo. Nɛ sa'denɔ ni vɛ̃ wa tɛ ɔ̀ do kunda tɛ wa gɔ. Nɛ zɛ̃ we nɛ ma unu sɛ mi.

¹⁴ Nɛ so sɛ fũ, do nɔ, nɛ nɛ zanga ma, nɛ nɛ mba ma do sa'de kpo kpo we dɔnggɔ do mi. Mɛ sɛ a fũ kilo kusi we wili ngɔmbɔ kpo kpo, do 'da zu wa 'bu ngɔ wa talɛ ni vɛ̃, nɛ fũ kilo gazɛlɛ, we wili bata kpo kpo do 'da zu wa bɔa ni vɛ̃,

¹⁵ nɛ fũ kilo talɛ we be batanɔ kpo kpo do 'da zu wa 'bu ngɔ wa nalɛ ni vɛ̃.

¹⁶ Nɛ dɔ sɛ 'bɔ wili dua we fo ku'da 'dã mɔ zu nɛ. Nɛ dɔ sɛ sa'denɔ ni vɛ̃ dɛ ngɔ kɛ nɛ dɔ tũ kpo kpo, mba do fũi do dɔ̃ɛ ní.

^17-34 “Yolo tɛ bɔa kɔ̃ tũ ɛngga we hɔ kɔ̃ tũ kɛ sambo, nɛ nɛ dɔ sɛ osa'de dɛ ngɔ kɛ nɛ dɔ tũ kpo kpo ni, mba do fũi do dɔ̃ɛ. Nɛ sa'denɔ ni vɛ̃ wa tɛ ɔ̃ do kunda tɛ wa gɔ. Nɛ dɔ sɛ osa'denɔ gɛ do kɔ̃ tũnɔ ni. Tũi kɛ bɔa: Nɛ dɔ sɛ wili ngɔmbɔ 'bu ngɔ wa bɔa, wili bata bɔa, do obe bata 'bu ngɔ wa nalɛ, kɛ wa do sabɛlɛ kpo kpo ni, do wili dua kpo. Tũi kɛ talɛ: wili ngɔmbɔ 'bu ngɔ wa kpo, wili bata bɔa, do obe bata 'bu ngɔ wa nalɛ, kɛ wa do sabɛlɛ kpo kpo ni, do wili dua kpo. Tũi kɛ nalɛ: wili ngɔmbɔ 'bu, wili bata bɔa, do obe bata 'bu ngɔ wa nalɛ, kɛ wa do sabɛlɛ kpo kpo ni, do wili dua kpo. Tũi kɛ mɔlɔ: wili ngɔmbɔ kusi, wili bata bɔa, do obe bata 'bu ngɔ wa nalɛ, kɛ wa do sabɛlɛ kpo kpo ni, do wili dua kpo. Tũi kɛ gazɛlɛ: wili ngɔmbɔ ngbɛ'dɛ'dɛ, wili bata bɔa, do obe bata 'bu ngɔ wa nalɛ, kɛ wa do sabɛlɛ kpo kpo ni, do wili dua kpo. Tũi kɛ sambo: wili ngɔmbɔ sambo, wili bata bɔa, do obe bata 'bu ngɔ wa nalɛ, kɛ wa do sabɛlɛ kpo kpo ni, do wili dua kpo.

³⁵ “Do ngbɛ'dɛ'dɛ kɔ̃ tũ ɛngga, kɛ mɛ a Sɔkpɔ kɔ̃ tũ mba ngba wi ni, nɛ nɛ la sɛ fala dɛa tonɔ 'da nɛ.

³⁶ Nɛ nɛ dɔ sɛ wili ngɔmbɔ kpo, wili bata kpo, do obe bata sambo, kɛ wa dɛa sabɛlɛ kpo kpo ni hã mi NWA. Nɛ sa'denɔ ni vɛ̃ wa tɛ ɔ̃ do kunda tɛ wa gɔ. Nɛ zɛ̃ we nɛ, ma unu sɛ mi.

³⁷ Nɛ so sɛ fũ do dɔ̃, nɛ nɛ mba ma do sa'de kpo kpo.

³⁸ Nɛ dɔ sɛ 'bɔ wili dua kpo we fo ku'da 'dã mɔ zu nɛ. Nɛ dɔ sɛ sa'denɔ ni vɛ̃ dɛ ngɔ kɛ nɛ dɔ tũ kpo kpo mba do fũi do dɔ̃ɛ ni.

³⁹ “Ki ni a osa'denɔ nɛ dɔ sɛ wa hã mi NWA do kɔ̃ tũ ɛngganɔ gɛ a ni. Nɛ dɔ sɛ sa'denɔ ni vɛ̃ dɛ ngɔ kɛnɔ nɛ dɔ we dɔnggɔ do mi, do dɔnggamɔ fũi, dɔnggamɔ dɔ̃ɛ, do dɔnggamɔ be dɛa na, kɛ nɛ hã ma we be na, nɛ kpua mbulu, tabi nɛ hã gele dɔnggamɔ iko ni.”