Tɔlɔ Mɔ 28 - WE NU GALE 1995

Ombula ngɔ dɔnggamɛnɔ

¹ NWA tɔa hã Mɔizɛ na,

² a é mbulanɔ gɛ hã obe Israɛlɛ na: “Nɛ tɛ sɛ do sa'de we dɔnggɔ do mi do 'da falanɔ kɛ mi ia we ma ni. Nɛ nɛ dɔ sɛ ma na, zɛ̃ we nɛ unu mi, nɛ ma dɛ yangga tɛ mi.

³ “Tũ kpo kpo, nɛ nɛ tɛ sɛ do obata bɔa, kɛ wa ɔa sabɛlɛ kpo, nɛ fo kunda tɛ wa bina ni, nɛ nɛ dɔ wa hã mi NWA. Nɛ nɛ dɛ sɛ ni 'da fala fai.

⁴ Nɛ dɔ sɛ mbe kpo do titole, nɛ mbee nɛ do gɛ̃a wese.

⁵ Nɛ fa sɛ fũ kilo talɛ, nɛ nɛ so dia nɔ litrɛ kpo do dɔ nɛ, nɛ nɛ zanga do fũi ni, nɛ nɛ mba ma do sa'de bata we dɔnggɔ do mi.

⁶ Dɔnggamɛ tũi kpo kpo ni, ma we sɛ kɔ do kɛ nɛ dɔngga zi do mi dati tɛ ngɔ kala Sinai i, nɛ zɛ̃ we nɛ unu zi mi, nɛ ma dɛ yangga tɛ mi ni.

⁷ Nɛ dɛ ngɔ bata wele kɛ nɛ dɔ sɛ a do titole ni, nɛ tɛ sɛ do dɔ́ litrɛ kpo do dɔ nɛ, nɛ nɛ tɛnɛ ma dɛ ngɔ gbagala we dɔnggɔ do mi NWA.

⁸ Nɛ dɔ sɛ bata wele kɛ bɔa do gɛ̃a wese, nɛ nɛ mba sɛ 'bɔ do fũi do dɔ̃ɛ we dɔnggɔ do mi, ɔ nɛ kpo kɛ do titole ni. Nɛ dɔ sɛ sa'denɔ, nɛ zɛ̃ we nɛ ma unu sɛ mi, nɛ ma dɛ yangga tɛ mi.

Dɔnggamɔ kɛ wa hã do kɔ̃ tũ ɔmɔ tɛ wi

⁹ “Do kɔ tũ ɔmɔ tɛ wi, nɛ nɛ dɔ sɛ obata bɔa, kɛ wa ɔa sabɛlɛ kpo, nɛ fo kunda tɛ wa bina ni, we dɔnggɔ do mi. Nɛ so sɛ fũ kilo gazɛlɛ, nɛ nɛ so nɔ, nɛ nɛ zanga do fũi ni, nɛ nɛ tɛ do dɔ̃, nɛ nɛ mba ma do obatanɔ we dɔnggɔ do mi.

¹⁰ Do kɔ̃ tũ ɔmɔ tɛ wi, nɛ nɛ dɔ sɛ obatanɔ ni dɛ ngɔ kɛ nɛ dɔ tũ kpo kpo, nɛ nɛ mba do dɔ̃ɛ ni.

Dɔnggamɔ kɛ do kuti kɔ̃ tũ zɛkɛ

¹¹ “Do kuti kɔ̃ tũ zɛkɛ kpo kpo, nɛ nɛ dɔ sɛ wili ngɔmbɔ bɔa, wili bata kpo do obe bata sambo kɛ wa do sabɛlɛ kpo, we dɔnggɔ do mi NWA. Nɛ sa'denɔ ni vɛ̃ wa tɛ ɔ̀ do kunda tɛ wa gɔ.

¹² Nɛ fa sɛ fũ, nɛ nɛ so nɔ, nɛ nɛ zanga do fũi ni, nɛ wa mba ma do sa'de kpo kpo we dɔnggɔ do mi. Mɛ sɛ a fũ kilo kusi we wili ngɔmbɔ kpo kpo, nɛ fũ kilo gazɛlɛ we wili bata,

¹³ nɛ fũ kilo talɛ, we be bata kpo kpo. Nɛ dɔ sɛ osa'denɔ ni, nɛ zɛ̃ we nɛ ma unu sɛ mi, nɛ ma de tɛ mi.

¹⁴ Nɛ fa sɛ litrɛ dɔ̀ talɛ we mba do wili ngɔmbɔ kpo kpo, nɛ litrɛ dɔ̀ bɔa we wili bata, nɛ litrɛ dɔ̀ kpo do dɔ nɛ, we be bata kpo kpo. Ki ni a omɛnɔ kɛ nɛ dɔ sɛ ma we dɔnggɔ do mi do kuti kɔ tũ zɛkɛ kpo kpo kɔ sabɛlɛ gɛ a ni.

¹⁵ Nɛ dɔ sɛ 'bɔ wili dua kpo dɛ ngɔ kɛ nɛ dɔ tũ kpo kpo ni, we fo ku'da 'dã mɔ, nɛ nɛ fa sɛ dɔ̀ we mba do ma.

Dɔnggamɔ we ɛngga Hɔ Nza kɔ Ngbá

¹⁶ “Do zɛkɛ 'da kpo, kɔ̃ nɛ 'bu ngɔ nɛ nalɛ, nɛ nɛ dungu sɛ ɛngga Hɔ Nza kɔ Ngbá we dɔnggɔ do mi NWA.

¹⁷ Do kɔ tũ 'bu ngɔ nɛ mɔlɔ, kɔ kpo zɛkɛ ni, nɛ nɛ ndo sɛ dungu ɛngga, nɛ ma ɔ tũ sambo. Nɛ do kɔ tũnɔ ni, nɛ nyɔngɔ sɛ mapa kɛ wa à ina hana mapa tɛ nɛ gɔ ni.

¹⁸ Do kuti kɔ̃ tũ ɛngga ni, nɛ mba sɛ ngba nɛ we dɔnggɔ mi NWA. Nɛ nɛ la sɛ fala dɛa tonɔ 'da nɛ.

¹⁹ Nɛ dɔ sɛ wili ngɔmbɔ bɔa, wili bata kpo do obe bata sambo, kɛ wa do sabɛlɛ kpo kpo ni hã mi NWA. Sa'denɔ ni vɛ̃ wa tɛ ɔ̀ do kunda tɛ wa gɔ.

²⁰ Nɛ so sɛ fũ, do nɔ, nɛ nɛ zanga ma, nɛ nɛ mba do sa'de kpo kpo we dɔnggɔ do mi. Mɛ sɛ a fũ kilo kusi we wili ngɔmbɔ kpo kpo, nɛ fũ kilo gazɛlɛ we wili bata,

²¹ nɛ fũ kilo talɛ we be batanɔ kpo kpo, do 'da zu wa sambo ni vɛ̃.

²² Nɛ dɔ sɛ 'bɔ wili dua we fo ku'da 'dã mɔ zu nɛ. Nganga a gbɛ sɛ wili dua ni, takɔ nɛ hɔ sa wi li mi NWA.

²³ Wa dɔ sɛ sa'denɔ ni vɛ̃ dɛ ngɔ kɛ wa dɔ do titole kpo kpo ni.

²⁴ Nɛ do kɔ pɔsɔ ɛngga ni, nɛ zɛ̃ we dɔa sa'denɔ, mba do kɛ nɛ dɔ tũ kpo kpo ni, mba do de ma unu sɛ mi, nɛ ma dɛ yangga tɛ mi.

²⁵ Do kɔ̃ tũ kɛ sambo, nɛ nɛ mba sɛ 'bɔ ngba nɛ we dɔnggɔ mi nwa. Nɛ nɛ la sɛ fala dɛa tonɔ 'da nɛ.

Dɔnggamɔ we ɛngga Kala Kpalɛ

²⁶ “Do kɔ tũ Kala Kpalɛ, tabi kɔ̃ tũ Pantɛkotɛ 'da fala nɛ tɛ sɛ do kuti kpalɛnɔ 'da nɛ hã mi NWA ni, nɛ nɛ mba sɛ ngba nɛ we dɔnggɔ mi. Nɛ nɛ la sɛ fala dɛa tonɔ 'da nɛ.

²⁷ Nɛ dɔ sɛ wili ngɔmbɔ bɔa, wili bata kpo do obe bata sambo, kɛ wa do sabɛlɛ kpo kpo ni. Nɛ zɛ̃ we nɛ ma unu sɛ mi.

²⁸ Nɛ so sɛ fũ, do nɔ, nɛ nɛ zanga ma, nɛ nɛ mba do sa'de kpo kpo we dɔnggɔ do mi. Mɛ sɛ a fũ kilo kusi we wili ngɔmbɔ kpo kpo, nɛ fũ kilo gazɛlɛ we wili bata,

²⁹ nɛ fũ kilo talɛ we be batanɔ kpo kpo, do 'da zu wa sambo ni vɛ̃.

³⁰ Nganga a dɔ sɛ 'bɔ wili dua we fo ku'da 'dã mɔ zu nɛ. Nganga a gbɛ sɛ wili dua ni, takɔ nɛ hɔ sa wi li mi NWA.

³¹ Wa dɔ sɛ sa'denɔ ni vɛ̃ dɛ ngɔ kɛ wa dɔ tũ kpo kpo ni. Nɛ dɔ sɛ a osa'denɔ kɛ fo kunda tɛ wa bina ni. Nɛ fa sɛ fũ do dɔ̀, we mba do ma.