Tɔlɔ Mɔ 27 - WE NU GALE 1995

Oboko benɔ 'da Sɛlofadɛ wa kpa nù

¹ Kɛ gɛ a nu fɛlɛ Manase, be 'da Yozɛfu. Yozɛfu kua Manase, nɛ Manase ko Makirɛ, nɛ Makirɛ ko Galadɛ, nɛ Galadɛ ko Hefɛrɛ, nɛ Hefɛrɛ ko Sɛlofadɛ, nɛ Sɛlofadɛ ko oboko be mɔlɔ: Mala, Nowe, Hogla, Milka do Tirsa. Mbe tũ kpo, nɛ owukonɔ mɔlɔ ni,

² wa nɛa, nɛ wa hɔ dati Mɔizɛ, do nganga Elazarɛ, do okumunɔ, do obe Israɛlɛ vɛ̃ tɛ nu tɔa Tande we kpa ngba wi do NWA Gale, nɛ wa tɔ̃ na:

³ “Baa lɛ fia zi li gba zɔ̀ i, nɛ nde a kò bulu be gɔ. A zi kɔ owinɔ wa mba zi do Kore we dɛ nga zu hã NWA ni bina. A fia zi a fio 'dã mɛnɔ 'da a wele nɛ.

⁴ Kɔ ɔ nɛ kɛ a do bulu be bina ni, nɛ kɔa na, li a ma mbiti nde? Nɛ hã́ nù hã lɛ, ɔ nɛ kɛ nɛ hã ma hã onya baa lɛ ni, sɛ a li a ma 'bana nza de.”

⁵ Mɔizɛ nɛa, nɛ a be gulu we 'da wa hã NWA,

⁶ nɛ NWA gese hã a na:

⁷ “Oboko benɔ 'da Sɛlofadɛ, wa do dia gulu we. Mɔ hã sɛ nù hã wa, ɔ nɛ kɛ mɔ hã ma hã onya baa wa ni. Wa kpa sɛ nù olo baa wa.

⁸ 'Do nɛ, nɛ mɔ tɔ̃ sɛ hã obe Israɛlɛ na, fala kɛ wi wili fe, nɛ nde a kò bulu be gɔ, nɛ wa hã sɛ nù olo a ni hã boko be 'da a.

⁹ Kɔ fala kɛ a do boko be bina nde, nɛ wa hã sɛ nù olo a ni, hã onya a.

¹⁰ Fala a do onya wi bina nde, nɛ onya baa a, wa kpa sɛ nùnɔ olo a ni.

¹¹ Fala kɛ baa a do onya ɛ bina nde, nɛ wa hã sɛ nù olo a ni hã mbe wi na mɔ a. Obe Israɛlɛ wa dɛ sɛ mbula ni, ɔ nɛ kɛ mi ba do nu mi hã mɔ ni.”

NWA saka Yozue na a dungu olo Mɔizɛ

¹² 'Do nɛ, nɛ nwa tɔ̃ hã Mɔizɛ na: “Mɔ kũ dɛ zu okala Abarimɛ, nɛ mɔ zɔ sɛ nùi mi nɛ hã ma hã obe Israɛlɛ ni.

¹³ Mɔ zɔ ma do'do, nɛ mɔ fe sɛ ɔ nɛ kɛ nya mɔ Aroni fia zi ni.

¹⁴ Mba gɔ, nɛ bɛ̃a zi nu mi tɛ li gba zɔ̀ Tisinɛ i, do 'da fala kɛ obe Israɛlɛ wa fa zi we hã mi ni. 'Da fala wa gɔa zi lì ni, nɛ nɛ bà wala hã mi na, mi be ngawi santo 'da mi hã wa gɔ.” (A tɔ̃ we mɛnɔ kɛ ma la zi tɛ nu lì Mɛriba, lì Kpa We tɛ Kadɛsɛ, tɛ li gba zɔ̀ Tisinɛ.)

¹⁵ Nɛ Mɔizɛ tɔ̃ hã NWA na:

¹⁶ “Aa NWA Gale, kpasi 'da winɔ vɛ̃ ngɔ nù gɛ dɛ kɔ̃ mɔ. Kɔ ma wia na, mɔ saka mbé wele olo mi, we kpe ti obe Israɛlɛ.

¹⁷ Ma wia na, wi ni ɔ wi kɛ a kã sɛ owinɔ 'da mɔ falanɔ vɛ̃ ni na, dɔ wa ó nɛ obata kɛ wa zɔlɔ wi fɔmɔ wa ni gɔ.”

^18-19 Nɛ NWA gese hã Mɔizɛ na: “Yozue, be 'da Nunɛ, a a wi kɛ a do Hi Wi 'da mi kɔ a boe. Mɔ sá sɛ mɔ hã a, nɛ mɔ nɛ do a dati nganga Elazarɛ do obe Israɛlɛ vɛ̃. Nɛ mɔ e kɔ̃ mɔ zu a, nɛ mɔ tɔ̃ dɛ li winɔ vɛ̃ na, a dɛ sɛ toe olo mɔ.

²⁰ Mɔ hã sɛ mbe ngawi dɛa toe 'da mɔ hã a, sɛ a obe Israɛlɛ vɛ̃ wa dɛa olo nu a de.

²¹ A dɛ sɛ toe 'da a ti nganga Elazarɛ, kɛ a aka sɛ linggamɛ 'da mi do wala 'da omɛnɔ kɛ ma santo ni. Yozue do obe Israɛlɛ vɛ̃, wa dɛ sɛ mbulanɔ 'da Elazarɛ 'da falanɔ vɛ̃.”

²² Mɔizɛ dɛa olo nu NWA. A nɛa do Yozue, nɛ a e a dati nganga Elazarɛ, do obe Israɛlɛ vɛ̃.

²³ Nɛ a e kɔ a zu a, nɛ a tɔ̃ dɛ li winɔ vɛ̃ na, Yozue a dɛ sɛ toe olo ɛ. Mɔizɛ dɛa mɛnɔ vɛ̃ ɔ nɛ kɛ NWA ba do nu ɛ hã a ni.