Tɔlɔ Mɔ 25 - WE NU GALE 1995

Obe Israɛlɛ wa dɔnggɔ gale Bala

¹ 'Da fala obe Israɛlɛ wa tɛ ɔ dɛ Sitimɛ ni, nɛ wa yɛnggɛ vĩ zu yɛli do owuko Moabɛ.

² Nɛ owukonɔ ni wa dɛa na, obe Israɛlɛ wa mba do wa fala nɛ kpo, nɛ wa dungu ɛngganɔ kɛ wa dɔ do sa'de we dɔnggɔ do ogalenɔ 'da wa ni. Nɛ wa nyɔngɔ dɔnggamɛnɔ fala nɛ kpo do wa, nɛ wa dɔnggɔ ogalenɔ 'da wa.

³ Wa mba vɛ̃ we dɔnggɔ gale Bala, kɛ a a gale tɛ Peɔrɛ. Ma kɛ zã NWA Gale nɔ̃lɔ̃ dɛ tɛ wa,

⁴ nɛ a tɔ̃ hã Mɔizɛ na: “Mɔ kálá ogã wi ngɔ obe Israɛlɛ, kɔ mɔ gbɛ wa dɛ dati mi NWA do gba wese, sɛ a owinɔ vɛ̃ wa zɔa de. Na mɛ ni, nɛ gã nɔ̃lɔ̃ zã kɛ mi do ma dɛ tɛ nɛ ni, ma gɛ̃ sɛ.”

⁵ Ma a Mɔizɛ tɔ̃a hã okumu Israɛlɛ na: “Wele do wele gbɛ owinɔ kɔ nu kpala a, kɛ wa hã tɛ wa we dɔnggɔ gale Bala tɛ Peɔrɛ ni.”

⁶ Do 'da fala ni, nɛ mbe be Israɛlɛ kpo tɛa do wuko Madianɛ, nɛ a le do a kɔ tande 'da a. Nɛ Mɔizɛ do obe Israɛlɛ vɛ̃, kɛ wa he mɔ do 'bako dɛ nu tɔa Tande kpa ngba wi do NWA ni, wa zɔa wa.

⁷ Nɛ Pinasi, be 'da nganga Elazarɛ, nɛ a 'bɔ a be yaa Aroni ni, zɔa na mɛ ni, nɛ a kulu ngɔ sanga obe Israɛlɛ, nɛ a ba sɛlɛ 'da a,

⁸ nɛ a le 'do wi ni dɛ kɔ tande i, nɛ a dumu zã wa bɔa nɛ fala kpo, nɛ a gbɛ wa. Nɛ do kpo fala ni, nɛ 'dã zɛlɛ kɛ ma ba obe Israɛlɛ ni, ma e do ti.

⁹ Nɛ nde ngɔ gili owinɔ wa fia 'dã zɛlɛ ni, wa zi koto 'bu wa bɔa ngɔ wa nalɛ.

¹⁰ NWA tɔ̃a hã Mɔizɛ na:

¹¹ “Nganga Pinasi bɛ̃a na, owinɔ wa tɛ dɔnggɔ ogele galenɔ gɔ. Nɛ nde wa dɔnggɔ tati a mi iko. Kɔ we duzu ma, ma kɛ nɔ̃lɔ̃ zã 'da mi ma fua tɛ̃ ɛ ngɔ obe Israɛlɛ, nɛ mi gbɛ wa vɛ̃ gɔ.

¹² Kɔ mɔ nɛ, hã mɔ tɔ̃ hã Pinasi na, mi kpua mbulu hã a. Nɛ mbuli ni, ma hã sɛ gɛ̃a dungu hã a.

¹³ Nɛ ma sɛ we duzu a do obe zã a. Mbuli ni ma kɛ: A, do obe zã a, wa sɛ fai a onganga. Mba gɔ, a bia na, ɛ dɔnggɔ tati a mi Gale iko. Nɛ a dɛa na, mi fo ku'da 'dã mɔ zu obe Israɛlɛ.”

¹⁴ Li be Israɛlɛ, kɛ Pinasi gbɛa zi a fala nɛ kpo do wuko Madianɛ ni a Zimri, be 'da Salu. A zi a mbe kpo kɔ owinɔ wa zɔ mɔ tɛ nu kpala Simeoni ni.

¹⁵ Nɛ li wuko Madianɛ ni zi a Kozbi. Li baa a a Surɛ, a zi a gã wi ngɔ gili nu kɔnggɔ kɔ mbe nu kpala winɔ tɛ Madianɛ.

¹⁶ NWA tɔ́a hã Mɔizɛ na:

¹⁷ “Nɛ nɛ́, kɔ nɛ bi Omadianɛ, nɛ nɛ gbɛ wa.

¹⁸ Wa dɛ̀ nɛ de gɔ, we kɛ wa ɔla nɛ na, nɛ dɔnggɔ gale Bala tɛ Peɔrɛ. Wa hã 'bako hã nɛ do wala 'da Kozbi, be 'da mbe kɔ Onwanɔ 'da wa, kɛ winɔ wa gbɛa zi a do 'da fala 'dã zɛlɛ ba zi obe Israɛlɛ tɛ Peɔrɛ ni.”